Ут зӕнджын — кӕрон ӕрхӕстӕг
1 Хуыцауы Ныхасы иу ӕмӕ дыууӕ хатты нӕ дзырдӕуы, зӕгъгӕ, Иегъовӕйы бон ӕрхӕстӕг кӕны, ӕмӕ ӕрцӕудзӕн «куыд хуыснӕг», ома ӕнӕнхъӕлӕджы, ӕваст, сусӕгӕй (1 Фес. 5:2; Матф. 24:43; 2 Пет. 3:10; Рарг. 3:3; 16:15). «Уый тыххӕй,— загъта Йесо — сымах дӕр цӕттӕ ут, уымӕн ӕмӕ кӕцы сахат ӕнхъӕл не стут, ӕрцӕудзӕн Адӕймаджы Фырт» (Матф. 24:44). Уӕдӕ кӕрон кӕй ӕрхӕстӕг кӕны, уымӕ гӕсгӕ цырддзаст куыд уӕм? Уымӕн нын баххуыс кӕндзӕн Хуыцауы фӕдзӕхст: «Ут зӕндджын» (1 Пет. 4:7, НФ).
2 Цӕмӕй зӕнджын уӕм, уый тыххӕй алцӕмӕдӕр хъуамӕ кӕсӕм Иегъовӕйы цӕстӕй (Еф. 5:17). Уый нын баххуыс кӕндзӕн, цӕмӕй ацы цардӕвӕрды нӕхи хатӕм «куыд ӕрцӕуӕггӕгтӕ ӕмӕ фӕндаггӕттӕ» (1 Пет. 2:11). Уый фӕрцы ӕмбардзыстӕм, ӕцӕгӕй ахсджиагдӕр цы у, фыццаг бынаты цы хъӕуы ӕвӕрын, уый, ӕмӕ раст уынаффӕтӕ хӕсдзыстӕм (Фил. 1:10).
3 Уырнындзинадӕн ахъаз нысӕнттӕ. Уырнындзинадӕн ахъаз нысӕнттӕ куы ӕвӕрӕм ӕмӕ нӕ къухы куы ӕфтой, зӕнджын уӕд уыдзыстӕм. Ахӕм нысӕнттӕ сӕвӕрдтай дӕ разы? Архайыс алы бон дӕр Библи кӕсын, алы чырыстон фембӕлдмӕ дӕр цӕуын, «Хъахъхъӕнӕн мӕсыг» ӕмӕ «Райхъал ут!»-ы алы номыр дӕр кӕсын, ӕмӕ фылдӕр хъусын кӕнын? Дӕ бон сӕххӕст кӕнын кӕй уа, ахӕм нысӕнттӕ дӕ разы куы ӕвӕрай, фӕндфидарӕй сӕ куы ӕххӕст кӕнай, ӕмӕ Иегъовӕйӕ ӕххуыс куы курай, уӕд де ’нтыстытыл дӕхӕдӕг дӕр дис кӕндзынӕ.
4 Иу хистӕр нӕлгоймаг иу бинонты, ӕрыгон лӕг ӕмӕ усы, бафарста, сӕ разы цы монон нысӕнттӕ сӕвӕрдтой, уый тыххӕй. Уыцы фарстайӕ бамбӕрстой, сӕ цард куы фӕхуымӕтӕгдӕр кӕниккой ӕмӕ сӕ хӕстӕ куы бафидиккой, уӕд сӕ бон кӕй суаид пионертӕй лӕггад кӕнын. Ӕмӕ ахӕм нысан сӕ разы сӕвӕрдтой. Сындӕггай сӕ хӕстӕ иууылдӕр бафыстой, ӕмӕ сын сӕ рӕстӕг ӕмӕ сӕ тыхтӕ цы ӕнӕхъӕугӕ хъуыддӕгтӕ истой, уыдонӕй фервӕзтысты. Растдӕр иу азы фӕстӕ сӕ нысан сӕ къухы бафтыд. Цы сын бантыст? Лӕг дзуры: «Абон цы уавӕры стӕм, уый ӕнӕ нысанӕй нӕ къухы нӕ бафтыдаид. Мах бирӕ амондджындӕр стӕм. Ныр сабырдӕр ӕмӕ хуыздӕр цӕрӕм. Нӕ цардӕн ныр ис ӕцӕг нысан».
5 Цӕй уӕдӕ, Иегъовӕйы бонмӕ ӕнхъӕлмӕ кӕсгӕйӕ, нӕ монон хӕцӕнгӕрзтӕ цӕттӕйӕ дарӕм, уыимӕ зӕнджын уӕм ӕмӕ ӕппӕт хъарутӕй Хуыцауы фӕндон ӕххӕст кӕнӕм (Тит. 2:11—13).