8 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Библи кӕимӕ ахуыр кӕнӕм, уыдоны ӕмбырдтӕм цӕуынмӕ разӕнгард кӕнӕм
1. Цӕмӕн у хорз, Библи кӕимӕ ахуыр кӕнӕм, уыдонӕн ӕрвылкъуыри дӕр Иегъовӕйы организацийы тыххӕй исты дзурын?
1 Искӕимӕ Библи куы ахуыр кӕнӕм, уӕд нӕ нысан ӕрмӕст уый нӕу, ӕмӕ йын сӕйраг ахуырӕдтӕ бацамонӕм, фӕлӕ ма йын баххуыс кӕнӕм, цӕмӕй чырыстон ӕмбырдмӕ ӕрбаиу уа (Зах. 8:23). Уый тыххӕй нӕм ис брошюрӕ «Иегъовӕйы Ӕвдисӕнтӕ чи сты? Цӕуыл ӕууӕндынц?». Библи ахуыр кӕнын кӕимӕ райдайыс, уыдонӕн-иу ратт ацы брошюрӕ, ӕмӕ-иу сын зӕгъ, цӕмӕй йӕ бакӕсой. Уыимӕ ма, алы къуыри дӕр хицӕн кӕн цалдӕр минуты Иегъовӕйы организацийы тыххӕй сын исты радзурынӕн.
2. Цы аразӕн ис, цӕмӕй, Библи кӕимӕ ахуыр кӕныс, уыдоны ӕмбырды фембӕлдтӕм цӕуын бафӕнда?
2 Ӕмбырды фембӕлдтӕ. Библи кӕимӕ ахуыр кӕнӕм, уыдон цӕмӕй Хуыцауы организацийӕн аргъ кӕнын райдайой, уый тыххӕй сӕ сӕйраджыдӕр хъӕуы ӕмбырды фембӕлдтӕм цӕуын (1 Кор. 14:24, 25). Уымӕ гӕсгӕ сын фыццаг дӕ бон у нӕ фондз фембӕлды тыххӕй радзурын, иу хатт иу фембӕлды тыххӕй, иннӕ хатт – иннӕйы. Зӕгъ сын, цӕуыл уыдзӕн иннӕ хатт раныхас. Равдис, «Хъахъхъӕнӕн мӕсыг»-ӕй цавӕр статья ахуыр кӕндзыстут ӕмӕ чиныгахуыры цы ӕрмӕг ӕвзардзыстут. Радзур сын, Хъусынгӕнджыты скъола ӕмӕ Хъусын кӕныны фембӕлды цы вӕййы, уый тыххӕй. Скъолайы дын хӕслӕвӕрд куы уа, уӕд сын дӕ бон у равдисын, куыд ӕй дзурдзынӕ, уый. Радзур-иу сын, фембӕлдты цы цымыдисаг хъуыдытӕ фехъуыстай, уыдон. Нӕ литературӕйы цы къамтӕ вӕййы, уыдон-иу сын равдис, цӕмӕй феной, куыд фӕцӕуынц нӕ фембӕлдтӕ. Фыццаг хатт куы ахуыр кӕнай семӕ, уӕд дӕр ӕмӕ сӕ уый фӕстӕ дӕр хон фембӕлдтӕм.
3. Нӕ организацийы тыххӕй цавӕр фарстыты фӕдыл у нӕ бон аныхас кӕнын?
3 Ӕрымысӕн изӕр кӕнӕ конгресс куы ӕрцӕйхӕццӕ кӕна, йе та уӕм районон цӕстдарӕг ӕрцӕуинаг куы уа, уӕд рахицӕн кӕн цалдӕр минуты, ӕмӕ зӕрдиагӕй ӕрдзур уыцы хабӕрттыл. Рӕстӕг куыд цӕуа, афтӕ сын ӕмбарын кӕн алыхуызон фарстытӕ, зӕгъӕм: Иегъовӕйы Ӕвдисӕнтӕ цӕмӕн хуыйнӕм? Нӕ фембӕлдтӕ кӕм уадзӕм, уыцы агъуыстытӕ Паддзахады залтӕ цӕмӕн хонӕм? Цы хӕстӕ ис хистӕр нӕлгоймӕгтыл ӕмӕ кӕстӕриуӕггӕнӕг ӕфсымӕртыл? Куыд хъусын кӕнӕм ӕмӕ нӕ территори куыд дих у? Нӕ литературӕ куыд мыхуыр кӕнӕм? Организацимӕ ӕхца кӕцӕй цӕуы? Филиалтӕ ӕмӕ Разамонӕг совет нӕ куыстӕн разамынд куыд дӕттынц?
4, 5. Цӕмӕй нын адӕм нӕ организаци хуыздӕр базоной ӕмӕ йын аргъ кӕной, уый тыххӕй сын нӕ кинонывтӕ куыд ӕххуыс кӕнынц?
4 Кинонывтӕ – ахуыр кӕнынӕн. Цӕмӕй, Библи кӕимӕ ахуыр кӕнӕм, уыдон Иегъовӕйы диссаджы организаци базоной, уымӕн ма иу мадзал – нӕ кинонывтӕ. Фондз азы дӕргъы нӕ журналтӕ ӕмӕ ӕндӕр литературӕ чи каст, иу ахӕм сылгоймаг, кинонывмӕ, «Иегъовӕйы Ӕвдисӕнтӕ – йӕ номмӕ гӕсгӕ архайӕг организаци», зӕгъгӕ, куы бакаст, уӕд йӕ цӕссыг ӕркалдта. Ӕвдисӕнтӕй йӕм чи цыд, уыдоныл ӕууӕндыд, фӕлӕ уыцы кинонывмӕ бакӕсгӕйӕ бамбӕрста, сӕ организацийыл дӕр кӕй ис ӕууӕндӕн. Йемӕ райдыдтой Библи ахуыр кӕнын ӕмӕ къуыри фӕстӕ та Паддзахады залмӕ фембӕлдмӕ ӕрбацыд.
5 Библи кӕимӕ ахуыр кӕнӕм, уыдонӕн ӕрвылкъуыри дӕр цалдӕр минуты дӕргъы нӕ организацийы тыххӕй исты куы дзурӕм, уӕд сӕ сабыргай ӕрбакӕндзыстӕм, абон Иегъовӕйӕн зӕххыл цы иунӕг организаци ис, уырдӕм.