Чи зоны дӕу дӕр ацы чиныг бакӕсын фӕндыд, фӕлӕ дӕ ахӕм хъуыдытӕ бакъуылымпы кодтой. Библи кӕсынмӕ бирӕтӕ нӕ хӕссынц сӕ ныфс. Фӕлӕ Библийы фӕрцы дӕ цард хуыздӕрырдӕм кӕй аивдзӕн ӕмӕ амондджындӕр кӕй уыдзынӕ, уый куы базонай, уӕд та? Кӕнӕ гӕнӕн кӕй ис, ӕмӕ Библи кӕсын дӕ зӕрдӕмӕ фӕцӕуа, уӕд та? Библи кӕсын цы пайда у, уый базонын дӕ фӕнды?

Библи кӕсын цы стыр пайда хӕссы, уый чи бамбӕрста, уыдонӕй цалдӕры ныхӕстӕм ӕркӕсӕм.

Езекилыл цӕуы 20 азӕй гыццыл фылдӕр. Уый зӕгъы: «Раздӕр уыдтӕн, кӕдӕм цӕуы, уый чи нӕ зоны, ахӕм шофыры хуызӕн. Фӕлӕ Библийы фӕрцы бамбӕрстон, цӕмӕн цӕрын, уый. Цы хорз уынаффӕтӕ дзы ис, уыдон мын царды стыр ӕххуыс сты».

Иу ӕрыгон чызг, Фридӕ, загъта: «Раздӕр-иу уайтагъд рамӕсты дӕн. Фӕлӕ Библи кӕй кӕсын, уый фӕрцы мӕхиуыл хӕцын сахуыр дӕн. Ныр мын иннӕтимӕ хӕларӕй цӕрын ӕнцондӕр у, ӕмӕ мын ис бирӕ ӕмбӕлттӕ».

50 азӕй фылдӕр кӕуыл цӕуы, уыцы сылгоймаг Евникӕ та загъта: «Библи мын ӕххуыс кӕны мӕ удыхъӕд хуыздӕрырдӕм ивынӕн ӕмӕ ме ’взӕр миниуджытимӕ тох кӕнынӕн».

Ацы адӕмимӕ милуантӕ сразы уыдзысты, уымӕн ӕмӕ Библийы фӕрцы уыдон дӕр сӕ цардӕй райгонд сты. Ацы чиныг дӕуӕн дӕр баххуыс кӕндзӕн (Исай 48:17, 18). Библи дын ӕххуыс кӕндзӕн: 1) раст уынаффӕтӕ хӕссынӕн, 2) хорз ӕмбӕлттӕ ссарынӕн, 3) зындзинӕдты сӕрты хизынӕн ӕмӕ 4) ӕппӕты сӕйрагдӕр – Хуыцауы тыххӕй рӕстдзинад базонынӕн. Библийы цы уынаффӕтӕ ис, уыдон Хуыцау радта. Уыдонмӕ гӕсгӕ куы цӕрай, уӕд никуы фӕфӕсмон кӕндзынӕ. Хуыцау нын ӕвзӕр уынаффӕ никуы ратдзӕн.

Куыд фӕзӕгъынц, йӕ зын – йӕ райдайӕн. Уӕдӕ сӕйрагдӕр у, цӕмӕй йӕ кӕсын райдайай. Уымӕн дын цы баххуыс кӕндзӕн? Ӕмӕ цы ис саразӕн, цӕмӕй Библи кӕсын бауарзай?

Цы дын баххуыс кӕндзӕн, цӕмӕй Библи кӕсын дӕ зӕрдӕмӕ цӕуа ӕмӕ дын фылдӕр пайда хӕсса? Дӕлдӕр ис фондз хорз уынаффӕйы.

Сабыр бынат ссар. Ссар, сабыр кӕм у ӕмӕ дӕ кӕм ницы хъыгдардзӕн, ахӕм ран. Фаг рухс дзы куы уа ӕмӕ уӕлдӕф сыгъдӕг куы уа, уӕд, цы кӕсыс, уый хуыздӕр ӕмбардзынӕ.

Раст зӕрдӕйы уагимӕ йӕ кӕс. Библи ныффыссын кодта нӕ уӕларвон Фыд. Уымӕ гӕсгӕ дын фылдӕр пайда хӕсдзӕн, ахӕм зӕрдӕйы уагимӕ йӕ куы кӕсай, цӕмӕй дзы истӕуыл сахуыр уай, сывӕллон йӕ фыдӕй куыд фӕахуыр кӕны, афтӕ. Кӕд Библи Хуыцауы комытӕфӕй фыст чиныгыл нӕ нымайыс, уӕд дӕ зондахаст аив, ӕмӕ дӕ уӕд Хуыцау ахуыр кӕндзӕн (Псалом 25:4).

Кӕсыны размӕ-иу скув. Библийы Хуыцауы хъуыдытӕ фыст кӕй сты, уымӕ гӕсгӕ йӕ цӕмӕй бамбарӕм, уый тыххӕй нӕ йе ’ххуыс ӕнӕмӕнг хъӕуы. Хуыцау зӕрдӕ ӕвӕры, сыгъдӕг тых кӕй ратдзӕн, «чи дзы куры, уыдонӕн» (Лукайы 11:13). Сыгъдӕг тых дын баххуыс кӕндзӕн, Хуыцау куыд хъуыды кӕны, уый бамбарынӕн. Ӕмӕ дын уый фӕстӕ та ӕххуыс кӕндзӕн, цӕмӕй ӕмбарай «суанг Хуыцауы арф зонд дӕр» (1 Коринфӕгтӕм 2:10).

Цы кӕсыс, ууыл-иу хъуыды кӕн. Афтӕ ма хъуыды кӕн, ӕмӕ цас фылдӕр бакӕсай, уыйас хуыздӕр. Цы кӕсай, ууыл-иу лӕмбынӕг хъуыды кӕн. Дӕхимӕ-иу ахӕм фарстатӕ ратт: «Кӕй тыххӕй кӕсын, уыцы адӕймагмӕ цавӕр миниуджытӕ ис? Цы базыдтон, уымӕй мӕ царды куыд спайда кӕнон?»

Дӕ разы бӕлвырд нысӕнттӕ ӕвӕр. Цӕмӕй дын Библи кӕсын пайда хӕсса, уый тыххӕй-иу хъуыды кӕн, цы кӕсыс, уымӕй дӕ бон зондӕн райсын цы у, ууыл. Дӕ разы ӕвӕр бӕлвырд нысӕнттӕ, зӕгъӕм, Хуыцауы тыххӕй фылдӕр базонын, дӕ удыхъӕд аивын, архайын, цӕмӕй хуыздӕр сӕрыхицау кӕнӕ хуыздӕр бинойнаг суай. Уый фӕстӕ-иу Библийы бацагур, дӕ нысӕнттӕ дын дӕ къухы бафтынӕн чи баххуыс кӕндзӕн, ахӕм скъуыддзӕгтӕa.

Ацы фондз уынаффӕйы дын баххуыс кӕндзысты Библи кӕсын райдайынӕн. Фӕлӕ дӕ бон цы у саразын, цӕмӕй ацы чиныг кӕсын бауарзай? Уый фӕдыл иннӕ статьяйы ис цалдӕр уынаффӕйы.

Библи кӕсгӕйӕ-иу дӕ хуыссӕг ӕрцахсдзӕн ӕви-иу де уӕнг фӕрогдӕр уыдзӕн? Бирӕ кӕнгӕ у, дӕхи куыд бацӕттӕ кӕнай, уымӕй. Цӕй ӕмӕ базонӕм, дӕ бон цы у саразын, цӕмӕй дын Библи кӕсын ӕхсызгон уа.

Равзар, раст чи у ӕмӕ йе ’взаг ӕнцонӕмбарӕн кӕмӕн у, ахӕм тӕлмац. Цы кӕсай, уым бирӕ зынӕмбарӕн кӕнӕ зӕронд ныхӕстӕ куы уа, уӕд тыхсгӕ цы скӕнай, ӕндӕр ницы. Уӕдӕ-иу Библи ӕвзаргӕйӕ кӕс, цӕмӕй ӕнцонӕмбарӕн ӕвзагӕй фыст уа ӕмӕ зӕрдӕмӕ хъара. Стӕй-иу кӕс, цӕмӕй йӕ тӕлмац раст уаa.

Пайда кӕн ног технологитӕй. Абон Библи ӕрмӕст мыхуыргондӕй нӕй. Иуӕй-иу Библитӕ ис кӕсӕн онлайн кӕнӕ та сӕ ис рафыссӕн компьютермӕ, планшетмӕ кӕнӕ смартфонмӕ. Иуӕй-иу программӕты ис ахӕм функцитӕ, ӕмӕ цавӕрдӕр темӕйы фӕдыл уайтагъд бакӕнӕн ис цалдӕр стихы Библийы алы рӕтты кӕнӕ ис цалдӕр тӕлмацы кӕрӕдзиимӕ абарӕн дӕр. Кӕцыдӕр ӕвзӕгтыл Библийӕн ис аудиозапись дӕр. Ӕмӕ кӕд кӕсынӕй хъусын фылдӕр уарзыс, уӕд ӕй дӕ бон у рафыссын. Бирӕтӕ йӕм фӕхъусынц транспорты цӕугӕйӕ кӕнӕ ӕндӕр истытӕ аразгӕйӕ. Дӕуӕн дӕр дӕ бон у уыцы мадзӕлттӕй искӕцыйӕ спайда кӕнын.

Пайда кӕн, Библи ахуыр кӕнынӕн чи ӕххуыс кӕны, ахӕм ӕрмӕгӕй. Библи ахуыр кӕнынӕн цы ӕрмӕг ис, уый фӕрцы дын Библи кӕсын фылдӕр пайда ӕрхӕсдзӕн. Библийы кӕй кой ис, уыцы бӕстӕты картӕты-иу дӕ бон уыдзӕн ссарын, цы бынаты тыххӕй кӕсай, уый. Афтӕмӕй дын ӕнцондӕр уыдзӕн хабӕрттӕ дӕ цӕстытыл ауайын кӕнын. Кӕцыдӕр стихтӕ бамбарынӕн дын стыр ӕххуыс фӕуыдзысты, зӕгъӕм, ацы брошюрӕйы цы статьятӕ ис, уыдон кӕнӕ, нӕ сайты чи ис, уыцы статьятӕ.

Ӕнӕмӕнг нӕу, ӕмӕ Библи райдианӕй кӕсын райдайай. Кӕд Библи райдианӕй кӕронмӕ кӕсынмӕ зивӕг кӕныс, уӕд ӕй кӕсын райдай, дӕ зӕрдӕмӕ дзы тынгдӕр чи цӕуы, уыцы чиныгӕй. Кӕд дӕ фӕнды, Библийы кӕй тыххӕй фыст ис, уыцы адӕймӕгты тыххӕй базонын, уӕд-иу бакӕс, сӕ кой кӕм ис, ӕрмӕстдӕр уыцы скъуыддзӕгтӕ. Уымӕн дын баххуыс кӕндзӕн рамкӕ «Библи лӕмбынӕг иртас – цы адӕмы кой дзы ис, уыдоны тыххӕй фылдӕр базон». Библи ма кӕсӕн ис темӕтӕм гӕсгӕ кӕнӕ, хабӕрттӕ фӕд-фӕдыл куыд цыдысты, уымӕ гӕсгӕ. Уӕдӕ дӕ зӕрдӕмӕ тынгдӕр куыд цӕуы, афтӕ йӕ райдай кӕсын.

Библи хуымӕтӕг чиныг нӕу. Цы уынаффӕтӕ дзы ис, уыдон сты не Сфӕлдисӕджы уынаффӕтӕ (2 Тимофеймӕ 3:16). Ацы чиныг дыл, гӕнӕн ис, ӕмӕ тынг фӕзына. Библи зӕгъы: «Хуыцауы ныхас у удӕгас ӕмӕ дзы ис стыр тых» (Дзуттӕгтӕм 4:12). Уый нын царды разамынд дӕтты, стӕй нын ӕххуыс кӕны, цӕмӕй базонӕм Хуыцауы ӕмӕ нын фидӕнӕй цы ныфс ӕвӕры, уый (1 Тимофеймӕ 4:8; Иаковы 4:8).

Ӕххуыс нын кӕны нӕ цард фӕхуыздӕр кӕнынӕн. Библи нын ӕххуыс кӕны царды алы хъуыддаджы дӕр. Мӕнӕ дзы ӕрмӕст цалдӕр.

• Иннӕтимӕ куыд хъуамӕ уӕм (Ефесӕгтӕм 4:31, 32; 5:22, 25, 28, 33).

• Нӕ зӕрдӕйы фарн ӕмӕ не ’нӕниздзинад куыд хъахъхъӕнӕм (Псалом 37:8; Ӕмбисӕндтӕ 17:22).

• Уаг ӕмӕ ӕгъдаумӕ цы цӕстӕй хъуамӕ кӕсӕм (1 Коринфӕгтӕм 6:9, 10).

• Цы хъуамӕ аразӕм, цӕмӕй нӕхи дарынхъом уӕм (Ӕмбисӕндтӕ 10:4; 28:19; Ефесӕгтӕм 4:28)a.

Библийы уынаффӕтӕ тынг баххуыс кодтой иу ӕрыгон лӕг ӕмӕ усӕн Азийӕ. Дыууӕ адӕймаджы сӕ цард куы баиу кӕнынц, уӕд арӕх сӕ кӕрӕдзийыл дӕр ӕмӕ ӕргом ныхас кӕнын уайтагъд нӕ сахуыр вӕййынц. Ӕмӕ уый зӕгъӕн уыд ацы бинонтӕй дӕр. Фӕлӕ уыдон сӕ цард аразын райдыдтой, Библийы-иу цы бакастысты, уымӕ гӕсгӕ. Цымӕ сын уый исты ӕххуыс фӕци? Лӕг, Висент, зӕгъы: «Нӕ бинойнагимӕ зындзинӕдтыл дӕр куыннӕ ӕмбӕлдыстӕм. Фӕлӕ, Библийы цы кастӕн, уый мын баххуыс кодта, цӕмӕй нӕ уыцы зындзинӕдтӕ кӕрӕдзийӕ ма адард кодтаиккой. Библийы уынаффӕты фӕрцы абон амондджын стӕм». Йӕ бинойнаг Аналу дӕр разы у йемӕ: «Библийы кӕй тыххӕй кастыстӕм, уыцы адӕмы царды хабӕрттӕ нын тынг баххуыс кодтой. Ныр нӕ бинонты цардӕй райгонд дӕн ӕмӕ нӕ дыууӕ дӕр стӕм амондджын. Нӕ разы цы нысӕнттӕ ӕвӕрӕм, уыдоны фӕрцы та ноджы ӕнгомдӕр стӕм».

Ӕххуыс нын кӕны Хуыцауы базонынӕн. Висентӕн Библи ӕрмӕст йӕ бинонты царды нӕ баххуыс кодта. Мӕнӕ ма цы загъта ноджыдӕр: «Йегъовӕмӕ ныры хуызӕн ӕввахс никуы уыдтӕн. Библи кӕй кӕсын, уый фӕрцы сси мӕ хорз хӕлар». Висенты ныхӕстӕй бӕрӕг у, Библи дын кӕй баххуыс кӕндзӕн Хуыцауы базонынӕн дӕр. Уӕдӕ ацы чиныг куы кӕсай, уӕд Хуыцауы уынаффӕты фӕрцы дӕ цард фӕхуыздӕр уыдзӕн ӕмӕ ма йӕ хорз хӕлар дӕр суыдзынӕ. Уымӕй уӕлдай ма базондзынӕ, цы диссаджы фидӕн нӕм ӕнхъӕлмӕ кӕсы, уый тыххӕй – ӕнустӕм амондджынӕй кӕм цӕрдзыстӕм, уыцы «ӕцӕг царды» тыххӕй (1 Тимофеймӕ 6:19). Уыдӕттӕ ӕндӕр никӕцы чиныгӕй ис базонӕн.

Библийы фӕрцы дӕуӕн дӕр дӕ цард фӕхуыздӕр уыдзӕн ӕмӕ Хуыцауы базондзынӕ. Фӕлӕ йӕ куы кӕсай, уӕд дӕм, чи зоны, бирӕ фарстатӕ уа. Ахӕм уавӕры хорз уаид бафӕзмын, 2 000 азы размӕ чи цард, уыцы ефиопаг хицауы. Фыстад куы каст, уӕд дзы бирӕ цыдӕртӕ не ’мбӕрста. Ӕмӕ йӕ куы бафарстой, цы кӕсыс, уый ӕмбарыс, зӕгъгӕ, уӕд загъта: «Исчи мын ӕй куы нӕ бамбарын кӕна, уӕд ӕй куыд хъуамӕ ӕмбарон?»b Йемӕ чи ныхас кодта, уый уыд Филипп, Чырыстийы фыццаг ахуыргӕнинӕгтӕй иу. Филипп Фыстад хорз зыдта, ӕмӕ йын ефиопаг хицау йе ’ххуысыл цингӕнгӕйӕ сразы (Хъуыддӕгтӕ 8:30, 31, 34). Кӕд дӕу дӕр Библи хуыздӕр базонын фӕнды, уӕд ныффысс, ацы брошюрӕйы цы адристӕ ис, уыдонӕй иуыл. Кӕнӕ дӕм Йегъовӕйы Ӕвдисӕнтӕй хӕстӕг чи цӕры, уыдонӕй искӕмӕн зӕгъ, йе та, кӕм фембырд кӕнынц, уыцы Паддзахады залмӕ бацу. Цӕй уӕдӕ Библи абон кӕсын райдай ӕмӕ дӕ цард уымӕ гӕсгӕ араз, ӕмӕ уӕд амондджындӕр уыдзынӕ.