2 Тимофеймӕ 1:7. «Хуыцау нын цы сыгъдӕг тых радта, уый нӕ тӕппудтӕ нӕ аразы»

«Хуыцау нын цы сыгъдӕг тых радта, уый нӕ тӕппудтӕ нӕ аразы, фӕлӕ нӕ уадзы тых, дӕтты нын уарзондзинад ӕмӕ уӕззау зонд» (2 Тимофеймӕ 1:7, «Ног Дунейы тӕлмац»).

«Уымӕн ӕмӕ нын Хуыцау цы Удӕй бахай кодта, уый нын тӕппуды хос нӕу, фӕлӕ нын дӕтты тых, уарзт ӕмӕ раст зонд» (2 Тимофеймӕ 1:7, «Библи. Сыгъдӕг Фысты чингуытӕ», 2022 аз).

2 Тимофеймӕ 1:7 стихӕн йӕ хъуыды

Хуыцауӕн йӕ бон у адӕймагӕн баххуыс кӕнын, цӕмӕй ныфсджын уа ӕмӕ, раст цы у, уый араза. Хуыцауы нӕ фӕнды, цӕмӕй адӕймаг «тӕппуд» уа, ома истӕмӕй афтӕ тынг тӕрса, ӕмӕ йӕ бон ма уа Хуыцауы зӕрдӕ рухс кӕнын.

Ӕркӕсӕм, ацы стихы цы миниуджыты кой ис, уыдон нын куыд баххуыс кӕндзысты, цӕмӕй нӕм ахӕм тас ма уа кӕнӕ тӕппуд ма уӕм.

«Тых». Кӕд чырыстӕттӕ бирӕ зындзинӕдтӕ ӕвзарынц ӕмӕ сын бирӕ знӕгтӕ ис, уӕддӕр сӕ бон у Хуыцауӕн ныфсджынӕй лӕггад кӕнын. Уыдон нӕ фӕтӕрсынц ӕмӕ Хуыцауы нӕ ныууадзынц (2 Коринфӕгтӕм 11:23–27). Цы сын ӕххуысы кӕны? Апостол Павел ӕмбарын кӕны: «Алцыдӕр у мӕ бон, хъару мын чи дӕтты, уый фӕрцы» (Филиппӕгтӕм 4:13). Хуыцауӕн йӕ бон у йӕ лӕггадгӕнджыты схайджын кӕнын, «адӕймагмӕ чи нӕй, ахӕм хъаруйӕ», цӕмӕй-иу цыфӕнды зындзинӕдты сӕрты дӕр ахизой (2 Коринфӕгтӕм 4:7).

«Уарзондзинад». Чырыстон Хуыцауы тынг кӕй уарзы, уый йын ӕххуыс кӕны, цӕмӕй хъӕбатыр уа ӕмӕ, раст цы у, уый араза. Раст афтӕ, чырыстон иннӕты кӕй уарзы, уый тыххӕй сыл йӕхицӕй тынгдӕр фӕтыхсы, йӕ фӕдыл куы фӕзилынц кӕнӕ йын тӕссаг куы вӕййы, суанг уӕд дӕр (Иоанны 13:34; 15:13).

«Уӕззау зонд». Библийы «уӕззау зонд» арӕхдӕр фӕамоны, чырыстонӕн йӕ бон кӕй у Библимӕ гӕсгӕ раст уынаффӕтӕ хӕссын. Адӕймаг уӕззау зонды хицау куы уа, уӕд йӕ бон уыдзӕн цыфӕнды зын рӕстӕг дӕр ӕмбаргӕйӕ архайын. Йӕ уынаффӕтӕй бӕрӕг уыдзӕн, алцӕмӕ дӕр Хуыцауы цӕстӕй кӕй кӕсы ӕмӕ зоны, Хуыцауимӕ йын цы хӕлардзинад ис, уый бирӕ ахсджиагдӕр кӕй у, адӕм цы хъуыды кӕнынц, уымӕй.

2 Тимофеймӕ 1:7 стихӕн йӕ контекст

Дыккаг Тимофеймӕ фыстӕг апостол Павел ныффыста йе ’мбалмӕ ӕмӕ йе ’мкусӕгмӕ – Тимофеймӕ. Павел ӕрыгон Тимофейы фӕлмӕнӕй разӕнгард кодта, цӕмӕй дарддӕр дӕр зынгзӕрдӕйӕ лӕггад кӕна (2 Тимофеймӕ 1:1, 2). Ӕвӕццӕгӕн, Тимофей уыд ӕфсӕрмыгӕнаг ӕмӕ ӕнӕуӕндон, ӕмӕ йӕ уый къуылымпы кодтаид ӕмбырды йӕ хӕстӕ ӕххӕст кӕнын (1 Тимофеймӕ 4:12). Уымӕ гӕсгӕ Павел Тимофейӕн йӕ зӕрдыл ӕрлӕууын кодта, йӕ бон кӕй у ӕмбырды кадджын хӕстӕ ӕххӕст кӕнын. Уыцы курдиатӕй та йӕ Хуыцау схайджын кодта. Загъта йын, цӕмӕй ныфсджын уыдаид, хистӕр нӕлгоймаг уӕвгӕйӕ йын цы бартӕ уыд, уыдонӕй куы пайда кодтаид, хорз хабар куы хъусын кодтаид ӕмӕ йӕ уырнындзинады тыххӕй зындзинӕдтӕ куы ӕвзӕрстаид, уӕд (2 Тимофеймӕ 1:6–8).

Кӕд Павел ацы ныхӕстӕ Тимофеймӕ ныффыста, уӕддӕр ныфс уадзынц, абон Хуыцауӕн лӕггад кӕнын кӕй фӕнды, уыдоны. Хъуамӕ ма дызӕрдыг кӕной, Хуыцау сын кӕй ӕххуыс кӕндзӕн, цӕмӕй сӕ лӕггады ӕнтыстджын уой, цыфӕнды зындзинӕдтӕ ма ӕвзарой, уӕддӕр.