Бинонтимӕ рӕстӕг ӕрвитын
«Уымӕй хуыздӕр, уымӕй ӕхсызгондӕр ницы ис, ӕмӕ ӕфсымӕртӕ иумӕ ӕмвӕнд-ӕмзондӕй куы цӕрой!» (ПСАЛОМ 133:1).
Иуӕй-иутӕ Рождество цӕмӕн бӕрӕг кӕнынц?
Израилӕгтӕ се ’ппӕт дӕр иу адӕймаджы, ома Иаковы, байзӕддӕгтӕ кӕй уыдысты, уымӕ гӕсгӕ иууылдӕр уыдысты «ӕфсымӕртӕ», иу бинонтӕ. Иерусалимы-иу бӕрӕгбӕтты рӕстӕг куы ӕрӕмбырд сты, уӕд-иу се ’ппӕтӕн дӕр уыд «хорз» ӕмӕ «ӕхсызгон». Уыдонау абон дӕр бирӕ бинонтӕ Рождествомӕ фенхъӕлмӕ кӕсынц, цӕмӕй-иу иумӕ ӕрӕмбырд уой ӕмӕ сын «хорз» ӕмӕ «ӕхсызгон» уа.
Уый зын бамбарӕн цӕмӕн у?
Иу энциклопедийы Рождество ӕмӕ Ног азы тыххӕй фыст ис: «Бинонтӕм афӕдзы дӕргъы цы гыццыл быцӕутӕ уыд, уыдонӕй стыр хылтӕ рауайы, бӕрӕгбоны иумӕ куы ӕрӕмбырд вӕййынц, уӕд» (The Encyclopedia of Christmas and New Year’s Celebrations).
Библийӕ нын цавӕр уагӕвӕрдтӕ баххуыс кӕндзысты?
«Уӕ ныййарджыты ӕмӕ [уыл] уӕ ныййарджыты ныййарджыты раз цы хӕс ис, уый ӕххӕст кӕнут» (1 Тимофеймӕ 5:4). Уӕ бинонтимӕ, гӕнӕн уӕвгӕйӕ, арӕхдӕр иумӕ ӕмбырд кӕнут. Кӕд дӕ хиуӕттӕ дард искуы цӕрынц, уӕддӕр сӕ ма рох кӕн. Зӕгъӕм, писмо-иу сӕм афысс, телефонӕй-иу сӕм бадзур кӕнӕ та-иу семӕ компьютеры уылты аныхас кӕн. Афтӕ куы кӕнат, уӕд кӕрӕдзи хуыздӕр ӕмбардзыстут.
«Уӕ зӕрдӕты фаг бынат нӕй фӕлмӕн уарзтӕн... Уӕ зӕрдӕтӕ уӕрӕх байгом кӕнут» (2 Коринфӕгтӕм 6:12, 13). Хиуӕттӕ кӕрӕдзи афӕдз иу хатт йеддӕмӕ куы нӕ фӕуынынц, уӕд ӕцӕгӕлӕттӕй уӕлдай нал вӕййынц, уӕлдайдӕр та сывӕллӕттӕ. Иуӕй-иу сывӕллӕттӕ сӕ ныййарджыты ныййарджытыл ӕмӕ сӕ хӕстӕджытыл тынг ӕнувыд нӕ вӕййынц. Уымӕ гӕсгӕ уӕ сывӕллӕтты ахуыр кӕнут, цӕмӕй «сӕ зӕрдӕтӕ уӕрӕх байгом кӕной» ӕмӕ уын уӕ ацӕргӕ ныййарджыты дӕр уарзой. Ацӕргӕ адӕмимӕ бирӕ рӕстӕг чи фервиты, уыцы сывӕллӕттӕ, иннӕтимӕ абаргӕйӕ, арӕхдӕр, сӕхицӕй хистӕр чи у, уыдоны тынгдӕр фӕуарзынц ӕмӕ сын тынгдӕр фӕкад кӕнынц.
«Адӕймаг цы дзуапп ратты, уый йын хӕссы циндзинад, ӕмӕ куыд хорз у, йӕ афоныл кӕй зӕгъай, ахӕм ныхас!» (Ӕмбисӕндтӕ 15:23). Кӕрӕдзи куы нӕ бамбарат кӕнӕ-иу уе ’хсӕн исты куы рауайа, уӕд уӕ бон цы у саразын, цӕмӕй бинонтӕ кӕрӕдзийӕ ма адард уой? Хорз уаид, цы уӕ тыхсын кӕны, ууыл-иу «афоныл» куы ныхас кӕниккат. Кӕд уӕ бинонтӕ кӕрӕдзиимӕ арӕх фӕныхас кӕнынц, уӕд уын цыфӕнды зын фарста аскъуыддзаг кӕныны тыххӕй аныхас кӕнын ӕнцондӕр уыдзӕн ӕмӕ уын иумӕ уыдзӕн «хорз» ӕмӕ «ӕхсызгон».