Кӕсджыты фарстатӕ

Ацы уынаффӕ, «ахӕммӕ... уӕ хъус лӕмбынӕг дарут», зӕгъгӕ, хистӕр нӕлгоймӕгтӕн ӕрцыд лӕвӕрд ӕви чырыстӕттӕй алкӕмӕн дӕр? (2 Фессалоникӕгтӕм 3:14)

Апостол Павел Фессалоникӕйы цӕрӕг чырыстӕттӕм ныффыста: «Кӕд исчи, ацы фыстӕджы цы зӕгъӕм, уымӕ нӕ байхъуса, уӕд ахӕммӕ... уӕ хъус лӕмбынӕг дарут» (2 Фес. 3:14). Раздӕр афтӕ дзырдтам, ӕмӕ ацы разамынд хистӕр нӕлгоймӕгтӕн уыди лӕвӕрд. Исчи-иу Библийы уагӕвӕрдтӕ куы ницӕмӕ дардта, кӕд ын уынаффӕ бирӕ хӕттыты радтой, уӕддӕр, уӕд-иу ӕмбырд бафӕдзӕхсыны тыххӕй хистӕр нӕлгоймӕгтӕ раныхас радзырдтой. Уый фӕстӕ-иу хъусынгӕнджытӕй чидӕртӕ уыцы адӕймагимӕ сӕ рӕстӕг нал ӕрвыстой.

Фӕлӕ ныр 2 Фессалоникӕгтӕм 3:14 стих ӕндӕрхуызон ӕмбарӕм. Куыд зыны, афтӕмӕй Павелы уынаффӕ афтӕ ӕмбарын хъӕуы, ӕмӕ кӕцыдӕр уавӕрты чырыстон йӕхӕдӕг хъуамӕ аскъуыддзаг кӕна, кӕмӕдӕр йӕ «хъус лӕмбынӕг дардзӕн» ӕви нӕ. Уымӕ гӕсгӕ ӕмбырд бафӕдзӕхсыны тыххӕй хистӕр нӕлгоймӕгты раныхас дзурын нал хъӕудзӕн. Ахӕм ивындзинад арӕзт цӕмӕн ’рцыд? Ӕркӕсӕм, Павел ацы уынаффӕ куы радта, уӕд цӕй кой кодта, уымӕ.

Павел загъта, уыцы ӕмбырды чидӕртӕ кӕй кӕнынц, «цы не ’мбӕлы, уыдӕттӕ». Уыдон ницӕмӕ дардтой, Хуыцауы Ныхасӕй сын цы уынаффӕ радта, уый. Уымӕй размӕ сӕ куы бӕрӕг кодта, уӕд сын бафӕдзӕхста: «Кусын кӕй нӕ фӕнды, уый хӕргӕ дӕр ма кӕнӕд». Фӕлӕ кӕйдӕрты уӕддӕр сӕхи фӕдарыны тыххӕй кусын нӕ фӕндыд, кӕд кусын сӕ бон уыди, уӕддӕр. Стӕй ма иннӕты хъуыддӕгты сӕхи тъыстой. Чи не ’мбӕлы, ахӕм митӕ чи кодта, уыдонимӕ иннӕ чырыстӕттӕ сӕхи куыд хъуамӕ дардтаиккой? (2 Фес. 3:6, 10–12).

Павел загъта: «Ахӕммӕ... уӕ хъус лӕмбынӕг дарут». Ацы ран цы грекъаг дзырд ис, уымӕн йӕ хъуыды у, ахӕм адӕймаджы-иу кӕй хъуамӕ бафиппайӕм ӕмӕ къӕрцхъус кӕй хъуамӕ уӕм, цӕмӕй ныл йӕ зондахаст ма фӕзына. Ӕмӕ Павел ацы уынаффӕ ӕнӕхъӕн ӕмбырдӕн радта, ӕрмӕст хистӕр нӕлгоймӕгтӕн нӕ, фӕлӕ (2 Фес. 1:1; 3:6). Уӕдӕ ӕмбырдӕй исчи куы федтаид, хо кӕнӕ ’фсымӕр Библийы уынаффӕмӕ кӕй нӕ хъусы, уӕд хъуамӕ йӕхӕдӕг аскъуыддзаг кодтаид, йемӕ кӕй нал «иу кӕндзӕн».

Уӕдӕ ахӕм адӕймагимӕ иннӕтӕ сӕхи куыд хъуамӕ дардтаиккой? Ӕмбырдӕй кӕй «фӕхицӕн кӕнынц», уыимӕ чырыстӕттӕ сӕхи куыд фӕдарынц, афтӕ? (1 Кор. 5:13). Нӕ, уымӕн ӕмӕ ма Павел афтӕ дӕр загъта: «Дарддӕр дӕр [ын], куыд уе ’фсымӕрӕн, афтӕ зонд амонут». Уӕдӕ-иу иннӕтӕ ӕмбырды йемӕ ныхас кодтой ӕмӕ-иу йемӕ уацамынды цыдысты, фӕлӕ-иу ӕнӕуи сӕ рӕстӕг йемӕ не ’рвыстой. Цӕуылнӕ? Павел загъта: «Цӕмӕй йӕхиуыл ӕрхуда». Сӕ рӕстӕг йемӕ куы не ’рвыстаиккой, уӕд ӕм, чи зоны, худинаг ӕркастаид ӕмӕ, чи не ’мбӕлы, ахӕм митӕ нал кодтаид (2 Фес. 3:14, 15).

Абон чырыстӕттӕн сӕ бон куыд у уыцы уынаффӕмӕ гӕсгӕ архайын? Цӕмӕй кӕмӕдӕр нӕ «хъус лӕмбынӕг дарӕм», уый тыххӕй хъуамӕ бӕлвырдӕй зонӕм, адӕймаг ӕцӕгдӕр, «цы не ’мбӕлы, уыдӕттӕ» кӕй кӕны. Чырыстӕттӕй чидӕртӕ рахӕссынц, Библийы уагӕвӕрдты ныхмӕ чи нӕу, фӕлӕ махӕн не ’фсарм бар цӕмӕн нӕ дӕтты, ахӕм уынаффӕтӕ. Кӕйдӕрты зӕрдӕмӕ та цӕуынц, мах зӕрдӕмӕ цы нӕ цӕуы, уыдӕттӕ. Фӕлӕ Павел уыцы чырыстӕтты кой нӕ кодта. Истӕмӕй нӕ чи фӕхъыг кодта, уыдоны кой дӕр нӕ кодта. Уый кодта, Хуыцауы Ныхасӕй уынаффӕ кӕмӕн радтой, фӕлӕ йӕ чи ницӕмӕ дары, уыдоны кой.

Хо кӕнӕ ’фсымӕр Библийы уынаффӕтӕ кӕй ницӕмӕ дары, уый куы бафиппайӕм, уӕд нӕ бон у аскъуыддзаг кӕнын, нӕ рӕстӕг йемӕ кӕй не ’рвитдзыстӕмa. Ахӕм уынаффӕ алчидӕр йӕхӕдӕг кӕй рахӕссы, уымӕ гӕсгӕ ууыл никӕимӕ ныхас кӕндзыстӕм, нӕ бинонтӕй Йегъовӕйы Ӕвдисӕн чи у, уыдонӕй дарддӕр. Фӕлӕ уӕддӕр уыцы хо кӕнӕ ’фсымӕримӕ ӕмбырды ныхас кӕндзыстӕм ӕмӕ йемӕ уацамынды цӕудзыстӕм. Йӕ зондахаст куы аива ӕмӕ, чи не ’мбӕлы, ахӕм митӕ куы нал кӕна, уӕд та нӕхи йемӕ раздӕрау дардзыстӕм.