Campaña pa gä unihu̱ yä imbitasio pa rä däta mhuntsꞌi regional

Tatꞌä je̱ya, ko ndunthi rä johya di to̱ꞌmhu̱ gä häñhu̱ näꞌä rä ñhuni rꞌakhu̱ Jeoba ha yä däta mhuntsꞌi regional. Koꞌmu̱ di nehu̱ ge märꞌa yä jäꞌi dä hñäni ꞌnehe näꞌä rä mäkä ñhuniꞌä, ma gä o̱thu̱ ntsꞌe̱di pa gä uñhu̱ ndunthi yä imbitasio (Sl 34:8). Yä ansiano de rä mhuntsꞌi, go geꞌu̱ ma dä xikhu̱ te mä arreglo ja pa gä unihu̱ yä imbitasio.

YꞌO̱TꞌE NGUE̱NDA NUYA YÄ NTꞌANI

• ¿Te mä fecha ma dä nja mä däta mhuntsꞌi?

• ¿Hämꞌu̱ ma dä mu̱di rä campaña pa dä tꞌuni yä imbitasio?

• ¿Te mä ora ꞌne te mä pa ma gä muntsꞌihu̱ pa gä po̱ñhu̱ gä uñhu̱ ntꞌo̱de?

• Xi nuga, ¿te ma gä pe̱fi durante nunä campaña?

• ¿Toꞌo ma gä mbitabi?

TE DÄ ZA GI MÄÄ

Mꞌe̱tꞌo ze̱njua, ꞌnepu̱ ꞌñembäbi:

«Po gatꞌho rä Xiꞌmhai tꞌumbäbi yä jäꞌi nunä imbitasio pa nꞌa rä däta mhuntsꞌi ma dä nja. Rä fecha, rä pa ꞌne rä dirección ja huxä ha nunä imbitasio. Hängu gä johyahe gi ntini kongekhe».

SIGI GI FATSꞌI

Mäske di nehu̱ gä uñhu̱ ndunthi yä imbitasio, ꞌnehe mähyoni gä handihu̱ toꞌo bi ho bi yꞌo̱de, pa gä pengihu̱ gä ñähu̱ kongeꞌä mä nꞌa rä pa ꞌne gä sigi gä fatsꞌihu̱ nuꞌu̱ yä jäꞌi.

De gä nsabdo ꞌne de gä ndomingo dä za gä ofresehu̱ rä rebista mähye̱gi ko rä imbitasio.