ਪੌਲੁਸ ਦੇ ਭਾਣਜੇ ਨੇ ਬਹਾਦਰੀ ਦਿਖਾਈ

ਆਓ ਆਪਾਂ ਇਕ ਨੌਜਵਾਨ ਬਾਰੇ ਸਿੱਖੀਏ ਜਿਸ ਨੇ ਆਪਣੇ ਮਾਮੇ ਦੀ ਜਾਨ ਬਚਾਈ। ਉਸ ਨੌਜਵਾਨ ਦਾ ਮਾਮਾ ਪੌਲੁਸ ਰਸੂਲ ਸੀ। ਅਸੀਂ ਉਸ ਨੌਜਵਾਨ ਦਾ ਨਾਂ ਨਹੀਂ ਜਾਣਦੇ, ਪਰ ਅਸੀਂ ਇੰਨਾ ਜਾਣਦੇ ਹਾਂ ਕਿ ਉਸ ਨੇ ਬੜਾ ਬਹਾਦਰੀ ਵਾਲਾ ਕੰਮ ਕੀਤਾ ਸੀ। ਕੀ ਤੂੰ ਜਾਣਨਾ ਚਾਹੁੰਦਾਂ ਕਿ ਉਸ ਨੇ ਕੀ ਕੀਤਾ ਸੀ?—

ਪੌਲੁਸ ਯਰੂਸ਼ਲਮ ਦੀ ਇਕ ਜੇਲ੍ਹ ਵਿਚ ਬੰਦ ਸੀ। ਉਸ ਨੂੰ ਇਸ ਲਈ ਗਿਰਫ਼ਤਾਰ ਕੀਤਾ ਗਿਆ ਸੀ ਕਿਉਂਕਿ ਉਹ ਯਿਸੂ ਬਾਰੇ ਪ੍ਰਚਾਰ ਕਰ ਰਿਹਾ ਸੀ। ਕੁਝ ਬੁਰੇ ਆਦਮੀ ਪੌਲੁਸ ਨਾਲ ਨਫ਼ਰਤ ਕਰਦੇ ਸਨ, ਇਸ ਲਈ ਉਨ੍ਹਾਂ ਨੇ ਇਕ ਸਾਜ਼ਸ਼ ਘੜੀ। ਉਨ੍ਹਾਂ ਨੇ ਕਿਹਾ: ‘ਆਓ ਆਪਾਂ ਫ਼ੌਜ ਦੇ ਕਮਾਂਡਰ ਨੂੰ ਕਹੀਏ ਕਿ “ਤੂੰ ਆਪਣੇ ਫ਼ੌਜੀਆਂ ਨੂੰ ਕਹਿ ਕਿ ਉਹ ਪੌਲੁਸ ਨੂੰ ਅਦਾਲਤ ਵਿਚ ਲੈ ਆਉਣ।” ਫਿਰ ਆਪਾਂ ਰਾਹ ਵਿਚ ਲੁਕ ਜਾਵਾਂਗੇ ਤੇ ਜਦੋਂ ਪੌਲੁਸ ਉੱਥੋਂ ਦੀ ਲੰਘੇਗਾ, ਤਾਂ ਆਪਾਂ ਉਹ ਨੂੰ ਮਾਰ ਦੇਵਾਂਗੇ!’

ਪੌਲੁਸ ਦੇ ਭਾਣਜੇ ਨੇ ਇਸ ਸਾਜ਼ਸ਼ ਬਾਰੇ ਸੁਣ ਲਿਆ। ਉਸ ਨੇ ਕੀ ਕੀਤਾ? ਉਹ ਜੇਲ੍ਹ ਵਿਚ ਪੌਲੁਸ ਕੋਲ ਗਿਆ ਤੇ ਉਸ ਨੂੰ ਸਾਰਾ ਕੁਝ ਦੱਸ ਦਿੱਤਾ। ਪੌਲੁਸ ਨੇ ਆਪਣੇ ਭਾਣਜੇ ਨੂੰ ਕਿਹਾ ਕਿ ਉਹ ਫਟਾਫਟ ਜਾ ਕੇ ਇਸ ਸਾਜ਼ਸ਼ ਬਾਰੇ ਫ਼ੌਜ ਦੇ ਕਮਾਂਡਰ ਨੂੰ ਦੱਸੇ। ਤੇਰੇ ਖ਼ਿਆਲ ਵਿਚ ਕੀ ਪੌਲੁਸ ਦੇ ਭਾਣਜੇ ਲਈ ਫ਼ੌਜ ਦੇ ਕਮਾਂਡਰ ਨਾਲ ਗੱਲ ਕਰਨੀ ਸੌਖੀ ਸੀ?— ਨਹੀਂ, ਕਿਉਂਕਿ ਫ਼ੌਜ ਦਾ ਕਮਾਂਡਰ ਬਹੁਤ ਵੱਡਾ ਆਦਮੀ ਸੀ। ਪਰ ਪੌਲੁਸ ਦਾ ਭਾਣਜਾ ਬਹਾਦਰ ਸੀ ਤੇ ਉਸ ਨੇ ਜਾ ਕੇ ਕਮਾਂਡਰ ਨਾਲ ਗੱਲ ਕੀਤੀ।

ਫ਼ੌਜ ਦੇ ਕਮਾਂਡਰ ਨੂੰ ਪਤਾ ਸੀ ਕਿ ਉਸ ਨੂੰ ਕੀ ਕਰਨ ਦੀ ਲੋੜ ਸੀ। ਪੌਲੁਸ ਦੀ ਰਾਖੀ ਕਰਨ ਵਾਸਤੇ ਉਸ ਨੇ ਲਗਭਗ 500 ਫ਼ੌਜੀ ਇਕੱਠੇ ਕੀਤੇ! ਉਸ ਨੇ ਫ਼ੌਜੀਆਂ ਨੂੰ ਕਿਹਾ ਕਿ ਉਹ ਉਸੇ ਰਾਤ ਪੌਲੁਸ ਨੂੰ ਕੈਸਰੀਆ ਲੈ ਜਾਣ। ਕੀ ਪੌਲੁਸ ਦੀ ਜਾਨ ਬਚ ਗਈ?— ਹਾਂ, ਉਹ ਬੁਰੇ ਆਦਮੀ ਪੌਲੁਸ ʼਤੇ ਹਮਲਾ ਨਹੀਂ ਕਰ ਸਕੇ! ਉਨ੍ਹਾਂ ਦੀ ਸਾਜ਼ਸ਼ ਨਾਕਾਮ ਹੋ ਗਈ।

ਇਸ ਕਹਾਣੀ ਤੋਂ ਤੂੰ ਕੀ ਸਿੱਖਿਆ?— ਤੂੰ ਵੀ ਪੌਲੁਸ ਦੇ ਭਾਣਜੇ ਵਾਂਗ ਬਹਾਦਰ ਬਣ ਸਕਦਾ ਹੈਂ! ਜਦੋਂ ਅਸੀਂ ਦੂਜਿਆਂ ਨਾਲ ਯਹੋਵਾਹ ਬਾਰੇ ਗੱਲ ਕਰਦੇ ਹਾਂ, ਤਾਂ ਸਾਨੂੰ ਬਹਾਦਰ ਬਣਨ ਦੀ ਲੋੜ ਹੈ। ਕੀ ਤੂੰ ਬਹਾਦਰ ਬਣ ਕੇ ਯਹੋਵਾਹ ਬਾਰੇ ਗੱਲ ਕਰਦਾ ਰਹੇਂਗਾ?— ਜੇ ਤੂੰ ਇੱਦਾਂ ਕਰੇਂਗਾ, ਤਾਂ ਤੂੰ ਵੀ ਸ਼ਾਇਦ ਕਿਸੇ ਦੀ ਜਾਨ ਬਚਾ ਸਕੇਂਗਾ!