ਰਾਹਾਬ ਨੇ ਜਾਸੂਸਾਂ ਨੂੰ ਲੁਕਾਇਆ

ਜਦੋਂ ਇਜ਼ਰਾਈਲੀ ਜਾਸੂਸ ਯਰੀਹੋ ਸ਼ਹਿਰ ਗਏ, ਤਾਂ ਉਹ ਰਾਹਾਬ ਨਾਂ ਦੀ ਔਰਤ ਦੇ ਘਰ ਰੁਕੇ। ਯਰੀਹੋ ਦੇ ਰਾਜੇ ਨੂੰ ਇਹ ਗੱਲ ਪਤਾ ਲੱਗ ਗਈ ਅਤੇ ਉਸ ਨੇ ਰਾਹਾਬ ਦੇ ਘਰ ਫ਼ੌਜੀ ਭੇਜੇ। ਉਸ ਨੇ ਦੋਵੇਂ ਜਾਸੂਸਾਂ ਨੂੰ ਛੱਤ ʼਤੇ ਲੁਕੋ ਦਿੱਤਾ ਅਤੇ ਫ਼ੌਜੀਆਂ ਨੂੰ ਦੂਸਰੇ ਪਾਸੇ ਭੇਜ ਦਿੱਤਾ। ਉਸ ਨੇ ਜਾਸੂਸਾਂ ਨੂੰ ਕਿਹਾ: ‘ਮੈਂ ਤੁਹਾਡੀ ਮਦਦ ਕਰਾਂਗੀ ਕਿਉਂਕਿ ਮੈਂ ਜਾਣਦੀ ਹਾਂ ਕਿ ਯਹੋਵਾਹ ਤੁਹਾਡੇ ਨਾਲ ਹੈ ਅਤੇ ਤੁਸੀਂ ਇਸ ਦੇਸ਼ ਨੂੰ ਜਿੱਤ ਲਓਗੇ। ਕਿਰਪਾ ਕਰ ਕੇ ਮੇਰੇ ਨਾਲ ਵਾਅਦਾ ਕਰੋ ਕਿ ਤੁਸੀਂ ਮੇਰੇ ਪਰਿਵਾਰ ਨੂੰ ਬਚਾਓਗੇ।’

ਜਾਸੂਸਾਂ ਨੇ ਰਾਹਾਬ ਨੂੰ ਕਿਹਾ: ‘ਅਸੀਂ ਵਾਅਦਾ ਕਰਦੇ ਹਾਂ ਕਿ ਜਿਹੜਾ ਤੇਰੇ ਘਰ ਅੰਦਰ ਹੋਵੇਗਾ, ਉਸ ਨੂੰ ਕੁਝ ਨਹੀਂ ਹੋਵੇਗਾ।’ ਉਨ੍ਹਾਂ ਨੇ ਕਿਹਾ: ‘ਤੂੰ ਆਪਣੇ ਘਰ ਦੀ ਖਿੜਕੀ ਨਾਲ ਲਾਲ ਰੰਗ ਦੀ ਰੱਸੀ ਬੰਨ੍ਹ ਦੇਈਂ ਤਾਂਕਿ ਤੇਰਾ ਪਰਿਵਾਰ ਬਚ ਜਾਵੇ।’

ਰਾਹਾਬ ਨੇ ਜਾਸੂਸਾਂ ਨੂੰ ਖਿੜਕੀ ਵਿੱਚੋਂ ਦੀ ਰੱਸੀ ਦੇ ਸਹਾਰੇ ਥੱਲੇ ਉਤਾਰ ਦਿੱਤਾ। ਜਾਸੂਸ ਯਹੋਸ਼ੁਆ ਕੋਲ ਵਾਪਸ ਜਾਣ ਤੋਂ ਪਹਿਲਾਂ ਤਿੰਨ ਦਿਨ ਪਹਾੜਾਂ ਵਿਚ ਲੁਕੇ ਰਹੇ। ਫਿਰ ਇਜ਼ਰਾਈਲੀਆਂ ਨੇ ਯਰਦਨ ਦਰਿਆ ਪਾਰ ਕਰ ਲਿਆ ਅਤੇ ਹੁਣ ਉਹ ਦੇਸ਼ ʼਤੇ ਕਬਜ਼ਾ ਕਰਨ ਲਈ ਤਿਆਰ ਸਨ। ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਯਰੀਹੋ ਸ਼ਹਿਰ ʼਤੇ ਕਬਜ਼ਾ ਕੀਤਾ। ਯਹੋਵਾਹ ਨੇ ਉਨ੍ਹਾਂ ਨੂੰ ਛੇ ਦਿਨਾਂ ਲਈ ਸ਼ਹਿਰ ਦੇ ਦੁਆਲੇ ਇਕ-ਇਕ ਚੱਕਰ ਲਾਉਣ ਲਈ ਕਿਹਾ। ਸੱਤਵੇਂ ਦਿਨ ਉਨ੍ਹਾਂ ਨੇ ਸ਼ਹਿਰ ਦੇ ਦੁਆਲੇ ਸੱਤ ਚੱਕਰ ਲਾਏ। ਫਿਰ ਪੁਜਾਰੀਆਂ ਨੇ ਤੁਰ੍ਹੀਆਂ ਵਜਾਈਆਂ ਅਤੇ ਫ਼ੌਜੀਆਂ ਨੇ ਉੱਚੀ ਆਵਾਜ਼ ਵਿਚ ਜੈਕਾਰਾ ਲਾਇਆ। ਸ਼ਹਿਰ ਦੀਆਂ ਕੰਧਾਂ ਡਿਗਣ ਲੱਗ ਪਈਆਂ! ਪਰ ਰਾਹਾਬ ਦਾ ਘਰ ਨਹੀਂ ਡਿਗਿਆ ਜੋ ਸ਼ਹਿਰ ਦੀ ਕੰਧ ʼਤੇ ਸੀ। ਰਾਹਾਬ ਅਤੇ ਉਸ ਦਾ ਪਰਿਵਾਰ ਬਚ ਗਿਆ ਕਿਉਂਕਿ ਉਸ ਨੇ ਯਹੋਵਾਹ ʼਤੇ ਭਰੋਸਾ ਰੱਖਿਆ।