ਰਾਜ ਜੋ ਹਮੇਸ਼ਾ ਰਹੇਗਾ

ਰਾਜਾ ਨਬੂਕਦਨੱਸਰ ਨੂੰ ਇਕ ਰਾਤ ਅਜੀਬ ਜਿਹਾ ਸੁਪਨਾ ਆਇਆ। ਇਸ ਸੁਪਨੇ ਕਰਕੇ ਉਹ ਇੰਨਾ ਬੇਚੈਨ ਹੋ ਗਿਆ ਕਿ ਉਸ ਨੂੰ ਨੀਂਦ ਨਾ ਆਈ। ਉਸ ਨੇ ਆਪਣੇ ਜਾਦੂਗਰਾਂ ਨੂੰ ਬੁਲਾਇਆ ਤੇ ਉਨ੍ਹਾਂ ਨੂੰ ਕਿਹਾ: ‘ਮੈਨੂੰ ਮੇਰੇ ਸੁਪਨੇ ਦਾ ਮਤਲਬ ਦੱਸੋ।’ ਉਨ੍ਹਾਂ ਨੇ ਕਿਹਾ: ‘ਹੇ ਮਹਾਰਾਜ, ਤੁਸੀਂ ਸਾਨੂੰ ਆਪਣਾ ਸੁਪਨਾ ਦੱਸੋ।’ ਪਰ ਨਬੂਕਦਨੱਸਰ ਨੇ ਉਨ੍ਹਾਂ ਨੂੰ ਕਿਹਾ: ‘ਨਹੀਂ। ਤੁਸੀਂ ਮੈਨੂੰ ਮੇਰਾ ਸੁਪਨਾ ਦੱਸੋ। ਜੇ ਤੁਸੀਂ ਨਾ ਦੱਸਿਆ, ਤਾਂ ਮੈਂ ਤੁਹਾਨੂੰ ਮਾਰ ਦੇਵਾਂਗਾ।’ ਉਨ੍ਹਾਂ ਨੇ ਦੁਬਾਰਾ ਉਸ ਨੂੰ ਕਿਹਾ: ‘ਤੁਸੀਂ ਸਾਨੂੰ ਦੱਸੋ ਕਿ ਤੁਹਾਨੂੰ ਕੀ ਸੁਪਨਾ ਆਇਆ ਤੇ ਅਸੀਂ ਤੁਹਾਨੂੰ ਉਸ ਦਾ ਮਤਲਬ ਦੱਸਾਂਗੇ।’ ਉਸ ਨੇ ਕਿਹਾ: ‘ਤੁਸੀਂ ਸਾਰੇ ਮੈਨੂੰ ਧੋਖਾ ਦੇਣਾ ਚਾਹੁੰਦੇ ਹੋ? ਦੱਸੋ ਮੈਨੂੰ ਕਿਹੜਾ ਸੁਪਨਾ ਆਇਆ ਸੀ।’ ਉਨ੍ਹਾਂ ਨੇ ਰਾਜੇ ਨੂੰ ਕਿਹਾ: ‘ਕੋਈ ਵੀ ਇਨਸਾਨ ਇਹ ਨਹੀਂ ਦੱਸ ਸਕਦਾ। ਤੁਸੀਂ ਜੋ ਕਰਨ ਨੂੰ ਕਹਿ ਰਹੇ ਹੋ, ਉਹ ਨਾਮੁਮਕਿਨ ਹੈ।’

ਨਬੂਕਦਨੱਸਰ ਨੂੰ ਇੰਨਾ ਗੁੱਸਾ ਚੜ੍ਹਿਆ ਕਿ ਉਸ ਨੇ ਹੁਕਮ ਦਿੱਤਾ ਕਿ ਦੇਸ਼ ਦੇ ਸਾਰੇ ਬੁੱਧੀਮਾਨ ਆਦਮੀਆਂ ਨੂੰ ਜਾਨੋਂ ਮਾਰ ਦਿੱਤਾ ਜਾਵੇ। ਇਨ੍ਹਾਂ ਵਿਚ ਦਾਨੀਏਲ, ਸ਼ਦਰਕ, ਮੇਸ਼ਕ ਤੇ ਅਬਦਨਗੋ ਵੀ ਸ਼ਾਮਲ ਸਨ। ਦਾਨੀਏਲ ਨੇ ਰਾਜੇ ਤੋਂ ਥੋੜ੍ਹਾ ਸਮਾਂ ਮੰਗਿਆ। ਫਿਰ ਉਸ ਨੇ ਅਤੇ ਉਸ ਦੇ ਦੋਸਤਾਂ ਨੇ ਯਹੋਵਾਹ ਨੂੰ ਪ੍ਰਾਰਥਨਾ ਕੀਤੀ ਅਤੇ ਉਸ ਤੋਂ ਮਦਦ ਮੰਗੀ। ਯਹੋਵਾਹ ਨੇ ਕੀ ਕੀਤਾ?

ਯਹੋਵਾਹ ਨੇ ਦਰਸ਼ਣ ਵਿਚ ਦਾਨੀਏਲ ਨੂੰ ਨਬੂਕਦਨੱਸਰ ਦਾ ਸੁਪਨਾ ਦਿਖਾਇਆ ਤੇ ਉਸ ਦਾ ਮਤਲਬ ਦੱਸਿਆ। ਅਗਲੇ ਦਿਨ ਦਾਨੀਏਲ ਰਾਜੇ ਦੇ ਸੇਵਕ ਕੋਲ ਗਿਆ ਤੇ ਕਿਹਾ: ‘ਕਿਸੇ ਵੀ ਬੁੱਧੀਮਾਨ ਆਦਮੀ ਨੂੰ ਜਾਨੋਂ ਨਾ ਮਾਰੋ। ਮੈਂ ਰਾਜੇ ਦੇ ਸੁਪਨੇ ਦਾ ਮਤਲਬ ਦੱਸ ਸਕਦਾ ਹਾਂ।’ ਸੇਵਕ ਦਾਨੀਏਲ ਨੂੰ ਨਬੂਕਦਨੱਸਰ ਕੋਲ ਲੈ ਗਿਆ। ਦਾਨੀਏਲ ਨੇ ਰਾਜੇ ਨੂੰ ਕਿਹਾ: ‘ਰੱਬ ਨੇ ਤੈਨੂੰ ਦੱਸ ਦਿੱਤਾ ਹੈ ਕਿ ਭਵਿੱਖ ਵਿਚ ਕੀ ਹੋਵੇਗਾ। ਤੂੰ ਇਹ ਸੁਪਨਾ ਦੇਖਿਆ: ਤੂੰ ਇਕ ਵੱਡੀ ਮੂਰਤ ਦੇਖੀ ਜਿਸ ਦਾ ਸਿਰ ਸੋਨੇ ਦਾ, ਛਾਤੀ ਅਤੇ ਬਾਹਾਂ ਚਾਂਦੀ ਦੀਆਂ, ਢਿੱਡ ਅਤੇ ਪੱਟ ਤਾਂਬੇ ਦੇ, ਲੱਤਾਂ ਲੋਹੇ ਦੀਆਂ ਅਤੇ ਪੈਰ ਕੁਝ ਲੋਹੇ ਦੇ ਤੇ ਕੁਝ ਮਿੱਟੀ ਦੇ ਸਨ। ਫਿਰ ਪਹਾੜ ਤੋਂ ਇਕ ਪੱਥਰ ਕੱਟਿਆ ਗਿਆ ਅਤੇ ਮੂਰਤ ਦੇ ਪੈਰਾਂ ʼਤੇ ਵੱਜਾ। ਮੂਰਤ ਚੂਰ-ਚੂਰ ਹੋ ਗਈ ਤੇ ਹਵਾ ਉਸ ਨੂੰ ਉਡਾ ਕੇ ਲੈ ਗਈ। ਉਹ ਪੱਥਰ ਇਕ ਵੱਡਾ ਪਹਾੜ ਬਣ ਗਿਆ ਅਤੇ ਸਾਰੀ ਧਰਤੀ ਉੱਤੇ ਫੈਲ ਗਿਆ।’

ਫਿਰ ਦਾਨੀਏਲ ਨੇ ਕਿਹਾ: ‘ਤੇਰੇ ਸੁਪਨੇ ਦਾ ਮਤਲਬ ਇਹ ਹੈ: ਸੋਨੇ ਦਾ ਸਿਰ ਤੇਰਾ ਰਾਜ ਹੈ। ਚਾਂਦੀ ਦਾ ਰਾਜ ਤੇਰੇ ਤੋਂ ਬਾਅਦ ਆਵੇਗਾ। ਫਿਰ ਰਾਜ ਆਵੇਗਾ ਜੋ ਤਾਂਬੇ ਵਰਗਾ ਹੋਵੇਗਾ ਜੋ ਸਾਰੀ ਧਰਤੀ ਉੱਤੇ ਹਕੂਮਤ ਕਰੇਗਾ। ਅਗਲਾ ਰਾਜ ਲੋਹੇ ਵਰਗਾ ਮਜ਼ਬੂਤ ਹੋਵੇਗਾ। ਅਖ਼ੀਰ ਵਿਚ ਇਕ ਅਜਿਹਾ ਰਾਜ ਆਵੇਗਾ ਜੋ ਵੰਡਿਆ ਹੋਵੇਗਾ। ਇਸ ਦੇ ਕੁਝ ਹਿੱਸੇ ਲੋਹੇ ਵਾਂਗ ਮਜ਼ਬੂਤ ਹੋਣਗੇ ਤੇ ਕੁਝ ਮਿੱਟੀ ਵਾਂਗ ਕਮਜ਼ੋਰ। ਉਹ ਪੱਥਰ ਜੋ ਪਹਾੜ ਬਣੇਗਾ, ਉਹ ਪਰਮੇਸ਼ੁਰ ਦਾ ਰਾਜ ਹੈ। ਉਹ ਇਨ੍ਹਾਂ ਸਾਰੇ ਰਾਜਾਂ ਨੂੰ ਚੂਰ-ਚੂਰ ਕਰ ਦੇਵੇਗਾ ਅਤੇ ਆਪ ਹਮੇਸ਼ਾ ਲਈ ਕਾਇਮ ਰਹੇਗਾ।’

ਨਬੂਕਦਨੱਸਰ ਨੇ ਦਾਨੀਏਲ ਅੱਗੇ ਗੋਡਿਆਂ ਭਾਰ ਬੈਠ ਕੇ ਸਿਰ ਨਿਵਾਇਆ। ਉਸ ਨੇ ਕਿਹਾ: ‘ਤੇਰੇ ਪਰਮੇਸ਼ੁਰ ਨੇ ਤੈਨੂੰ ਇਹ ਸੁਪਨਾ ਦੱਸਿਆ। ਉਸ ਵਰਗਾ ਕੋਈ ਪਰਮੇਸ਼ੁਰ ਨਹੀਂ ਹੈ।’ ਦਾਨੀਏਲ ਨੂੰ ਮਾਰਨ ਦੀ ਬਜਾਇ ਨਬੂਕਦਨੱਸਰ ਨੇ ਉਸ ਨੂੰ ਸਾਰੇ ਬੁੱਧੀਮਾਨ ਆਦਮੀਆਂ ਉੱਤੇ ਮੁੱਖ ਨਿਗਰਾਨ ਠਹਿਰਾ ਦਿੱਤਾ ਅਤੇ ਬਾਬਲ ਜ਼ਿਲ੍ਹੇ ਦਾ ਹਾਕਮ ਬਣਾ ਦਿੱਤਾ। ਕੀ ਤੁਸੀਂ ਦੇਖਿਆ ਕਿ ਯਹੋਵਾਹ ਨੇ ਦਾਨੀਏਲ ਦੀ ਪ੍ਰਾਰਥਨਾ ਦਾ ਜਵਾਬ ਕਿਵੇਂ ਦਿੱਤਾ?