ਪਰਮੇਸ਼ੁਰ ਦੇ ਬਚਨ ਤੋਂ ਸਿੱਖੋ

ਰੱਬ ਨੂੰ ਕਿਹੋ ਜਿਹੀ ਭਗਤੀ ਮਨਜ਼ੂਰ ਹੈ?

ਇਸ ਲੇਖ ਵਿਚ ਉਨ੍ਹਾਂ ਸਵਾਲਾਂ ਦੀ ਚਰਚਾ ਕੀਤੀ ਗਈ ਹੈ ਜੋ ਸ਼ਾਇਦ ਤੁਹਾਡੇ ਮਨ ਵਿਚ ਆਏ ਹੋਣ। ਇਨ੍ਹਾਂ ਸਵਾਲਾਂ ਦੇ ਜਵਾਬ ਬਾਈਬਲ ਵਿਚ ਦਿੱਤੇ ਗਏ ਹਨ। ਤੁਹਾਡੇ ਨਾਲ ਇਨ੍ਹਾਂ ਬਾਰੇ ਗੱਲ ਕਰ ਕੇ ਯਹੋਵਾਹ ਦੇ ਗਵਾਹਾਂ ਨੂੰ ਖ਼ੁਸ਼ੀ ਹੋਵੇਗੀ।

1. ਕੀ ਰੱਬ ਨੂੰ ਸਾਰੇ ਧਰਮ ਮਨਜ਼ੂਰ ਹਨ?

ਯਿਸੂ ਨੇ ਆਪਣੇ ਚੇਲਿਆਂ ਨੂੰ ਸਿਰਫ਼ ਉਹ ਰਾਹ ਸਿਖਾਇਆ ਜੋ ਰੱਬ ਨੂੰ ਮਨਜ਼ੂਰ ਸੀ। ਇਹ ਉਹ ਰਾਹ ਸੀ ਜੋ ਜ਼ਿੰਦਗੀ ਨੂੰ ਜਾਂਦਾ ਹੈ। ਇਸ ਰਾਹ ਬਾਰੇ ਯਿਸੂ ਨੇ ਕਿਹਾ: “ਥੋੜ੍ਹੇ ਹੀ ਲੋਕ ਇਸ ਨੂੰ ਲੱਭਦੇ ਹਨ।” (ਮੱਤੀ 7:14) ਰੱਬ ਨੂੰ ਸਿਰਫ਼ ਉਹੀ ਭਗਤੀ ਮਨਜ਼ੂਰ ਹੈ ਜੋ ਉਸ ਦੇ ਬਚਨ, ਬਾਈਬਲ, ਮੁਤਾਬਕ ਹੈ। ਸੱਚੇ ਪਰਮੇਸ਼ੁਰ ਦੇ ਭਗਤ ਇੱਕੋ ਰਾਹ ʼਤੇ ਚੱਲਦੇ ਹਨ।—ਯੂਹੰਨਾ 4:23, 24; 14:6; ਅਫ਼ਸੀਆਂ 4:4, 5 ਪੜ੍ਹੋ।

2. ਬਹੁਤ ਸਾਰੇ ਧਰਮ ਮਸੀਹੀ ਹੋਣ ਦਾ ਦਾਅਵਾ ਕਿਉਂ ਕਰਦੇ ਹਨ?

ਈਸਾਈ-ਜਗਤ ਨੇ ਮਸੀਹੀ ਧਰਮ ਨੂੰ ਭ੍ਰਿਸ਼ਟ ਕੀਤਾ ਹੈ ਤੇ ਆਪਣੇ ਹੀ ਫ਼ਾਇਦੇ ਲਈ ਇਸ ਨੂੰ ਵਰਤਿਆ ਹੈ। ਜਿਵੇਂ ਯਿਸੂ ਨੇ ਪਹਿਲਾਂ ਹੀ ਦੱਸਿਆ ਸੀ ਕਿ ਉਹ “ਭੇਡਾਂ” ਦੇ ਭੇਸ ਵਿਚ ਆਉਣਗੇ, ਪਰ ਅੰਦਰੋਂ ਭੁੱਖੇ ਬਘਿਆੜਾਂ ਵਰਗੇ ਹੋਣਗੇ। (ਮੱਤੀ 7:13-15, 21, 23) ਮਸੀਹੀ ਧਰਮ ਵਿਚ ਝੂਠੀਆਂ ਸਿੱਖਿਆਵਾਂ ਯਿਸੂ ਦੇ ਰਸੂਲਾਂ ਦੀ ਮੌਤ ਤੋਂ ਬਾਅਦ ਫੈਲੀਆਂ।—ਰਸੂਲਾਂ ਦੇ ਕੰਮ 20:29, 30 ਪੜ੍ਹੋ।

3. ਕਿਹੜੀਆਂ ਕੁਝ ਗੱਲਾਂ ਰੱਬ ਦੇ ਸੱਚੇ ਭਗਤਾਂ ਵਿਚ ਹੋਣੀਆਂ ਚਾਹੀਦੀਆਂ ਹਨ?

ਸੱਚੇ ਭਗਤ ਬਾਈਬਲ ਨੂੰ ਪਰਮੇਸ਼ੁਰ ਦਾ ਬਚਨ ਮੰਨ ਕੇ ਉਸ ਦਾ ਆਦਰ ਕਰਦੇ ਹਨ। ਉਹ ਇਸ ਦੇ ਅਸੂਲਾਂ ਮੁਤਾਬਕ ਜੀਣ ਦੀ ਕੋਸ਼ਿਸ਼ ਕਰਦੇ ਹਨ। ਸੋ ਜਿਹੜਾ ਧਰਮ ਰੱਬ ਨੂੰ ਮਨਜ਼ੂਰ ਹੈ ਉਹ ਇਨਸਾਨਾਂ ਦੇ ਖ਼ਿਆਲਾਂ ʼਤੇ ਆਧਾਰਿਤ ਨਹੀਂ ਹੈ। (ਮੱਤੀ 15:7-9) ਸੱਚੇ ਭਗਤ ਇੱਦਾਂ ਦੇ ਨਹੀਂ ਕਿ ਉਹ ਕਹਿੰਦੇ ਕੁਝ ਤੇ ਕਰਦੇ ਕੁਝ ਹੋਰ ਹਨ।—ਯੂਹੰਨਾ 17:17; 2 ਤਿਮੋਥਿਉਸ 3:16, 17 ਪੜ੍ਹੋ।

ਰੱਬ ਦੇ ਸੱਚੇ ਭਗਤ ਪਰਮੇਸ਼ੁਰ ਦੇ ਨਾਂ ਯਹੋਵਾਹ ਦੀ ਵਡਿਆਈ ਕਰਦੇ ਹਨ। ਯਿਸੂ ਨੇ ਲੋਕਾਂ ਨੂੰ ਰੱਬ ਦੇ ਨਾਂ ਬਾਰੇ ਦੱਸਿਆ ਸੀ। ਉਸ ਨੇ ਲੋਕਾਂ ਦੀ ਪਰਮੇਸ਼ੁਰ ਬਾਰੇ ਜਾਣਨ ਵਿਚ ਮਦਦ ਕੀਤੀ ਤੇ ਉਨ੍ਹਾਂ ਨੂੰ ਪ੍ਰਾਰਥਨਾ ਕਰਨੀ ਸਿਖਾਈ ਕਿ ਰੱਬ ਦਾ ਨਾਂ ਪਵਿੱਤਰ ਕੀਤਾ ਜਾਵੇ। (ਮੱਤੀ 6:9) ਜਿੱਥੇ ਤੁਸੀਂ ਰਹਿੰਦੇ ਹੋ ਉੱਥੇ ਕਿਹੜਾ ਧਰਮ ਪਰਮੇਸ਼ੁਰ ਦਾ ਨਾਂ ਵਰਤਦਾ ਹੈ?—ਯੂਹੰਨਾ 17:26; ਰੋਮੀਆਂ 10:13, 14 ਪੜ੍ਹੋ।

4. ਤੁਸੀਂ ਰੱਬ ਦੇ ਸੱਚੇ ਭਗਤਾਂ ਦੀ ਪਛਾਣ ਕਿੱਦਾਂ ਕਰ ਸਕਦੇ ਹੋ?

ਸੱਚੇ ਭਗਤ ਪਰਮੇਸ਼ੁਰ ਦੇ ਰਾਜ ਦਾ ਪ੍ਰਚਾਰ ਕਰਦੇ ਹਨ। ਪਰਮੇਸ਼ੁਰ ਨੇ ਯਿਸੂ ਨੂੰ ਇਸ ਰਾਜ ਬਾਰੇ ਪ੍ਰਚਾਰ ਕਰਨ ਲਈ ਭੇਜਿਆ ਸੀ। ਪਰਮੇਸ਼ੁਰ ਦਾ ਰਾਜ ਇਨਸਾਨਾਂ ਲਈ ਇੱਕੋ-ਇਕ ਉਮੀਦ ਹੈ। ਯਿਸੂ ਇਸ ਬਾਰੇ ਮਰਦੇ ਦਮ ਤਕ ਗੱਲਾਂ ਕਰਦਾ ਰਿਹਾ। (ਲੂਕਾ 4:43; 8:1; 23:42, 43) ਉਸ ਨੇ ਆਪਣੇ ਚੇਲਿਆਂ ਨੂੰ ਕਿਹਾ ਕਿ ਉਹ ਪਰਮੇਸ਼ੁਰ ਦੇ ਰਾਜ ਬਾਰੇ ਲੋਕਾਂ ਨੂੰ ਦੱਸਣ। ਜੇ ਕੋਈ ਤੁਹਾਡੇ ਨਾਲ ਪਰਮੇਸ਼ੁਰ ਦੇ ਰਾਜ ਬਾਰੇ ਗੱਲ ਕਰੇ, ਤਾਂ ਤੁਹਾਡੇ ਖ਼ਿਆਲ ਵਿਚ ਉਸ ਦਾ ਕਿਹੜਾ ਧਰਮ ਹੈ?—ਮੱਤੀ 10:7; 24:14 ਪੜ੍ਹੋ।

ਯਿਸੂ ਦੇ ਚੇਲੇ ਇਸ ਦੁਸ਼ਟ ਦੁਨੀਆਂ ਵਰਗੇ ਨਹੀਂ ਹਨ। ਉਹ ਸਿਆਸੀ ਮਾਮਲਿਆਂ ਵਿਚ ਜਾਂ ਸਮਾਜ ਦੇ ਲੜਾਈ-ਝਗੜਿਆਂ ਵਿਚ ਕੋਈ ਹਿੱਸਾ ਨਹੀਂ ਲੈਂਦੇ। (ਯੂਹੰਨਾ 17:16) ਇਸ ਤੋਂ ਇਲਾਵਾ ਉਹ ਦੁਨੀਆਂ ਦੀ ਬੁਰੀ ਸੋਚਣੀ ਤੇ ਗੰਦਗੀ ਤੋਂ ਦੂਰ ਰਹਿੰਦੇ ਹਨ।—ਯਾਕੂਬ 1:27; 4:4 ਪੜ੍ਹੋ।

5. ਸੱਚੇ ਭਗਤਾਂ ਦੀ ਖ਼ਾਸ ਪਛਾਣ ਕੀ ਹੈ?

ਸੱਚੇ ਭਗਤ ਇਕ-ਦੂਜੇ ਨਾਲ ਦਿਲੋਂ ਪਿਆਰ ਕਰਦੇ ਹਨ। ਬਾਈਬਲ ਦੀ ਸਿੱਖਿਆ ਲੈਣ ਕਰਕੇ ਉਹ ਹਰ ਕੌਮ ਦੇ ਲੋਕਾਂ ਨਾਲ ਆਦਰ ਨਾਲ ਪੇਸ਼ ਆਉਂਦੇ ਹਨ। ਭਾਵੇਂ ਕਈ ਧਰਮਾਂ ਦੇ ਲੋਕਾਂ ਨੇ ਯੁੱਧਾਂ ਵਿਚ ਵਧ-ਚੜ੍ਹ ਕੇ ਹਿੱਸਾ ਲਿਆ ਹੈ, ਪਰ ਸੱਚੇ ਭਗਤਾਂ ਨੇ ਇਸ ਤਰ੍ਹਾਂ ਕਰਨ ਤੋਂ ਇਨਕਾਰ ਕੀਤਾ ਹੈ। (ਮੀਕਾਹ 4:1-4) ਇਸ ਦੀ ਬਜਾਇ ਰੱਬ ਦੇ ਸੱਚੇ ਭਗਤ ਦੂਜਿਆਂ ਦਾ ਭਲਾ ਕਰਨ ਲਈ ਆਪਣਾ ਸਮਾਂ ਤੇ ਪੈਸਾ ਵਰਤਦੇ ਹਨ।—ਯੂਹੰਨਾ 13:34, 35; 1 ਯੂਹੰਨਾ 4:20, 21 ਪੜ੍ਹੋ।

ਕਿਹੜੇ ਧਰਮ ਦੀਆਂ ਸਾਰੀਆਂ ਸਿੱਖਿਆਵਾਂ ਪਰਮੇਸ਼ੁਰ ਦੇ ਬਚਨ ʼਤੇ ਆਧਾਰਿਤ ਹਨ? ਕਿਹੜਾ ਧਰਮ ਪਰਮੇਸ਼ੁਰ ਦੇ ਨਾਂ ਦੀ ਵਡਿਆਈ ਕਰਦਾ ਤੇ ਪਰਮੇਸ਼ੁਰ ਦੇ ਰਾਜ ਦਾ ਪ੍ਰਚਾਰ ਕਰਦਾ ਹੈ? ਕਿਹੜੇ ਧਰਮ ਦੇ ਲੋਕ ਸਾਰਿਆਂ ਨੂੰ ਪਿਆਰ ਕਰਦੇ ਹਨ ਤੇ ਯੁੱਧਾਂ ਵਿਚ ਹਿੱਸਾ ਨਹੀਂ ਲੈਂਦੇ? ਇਨ੍ਹਾਂ ਸਾਰੀਆਂ ਗੱਲਾਂ ਨੂੰ ਅਸੀਂ ਯਹੋਵਾਹ ਦੇ ਗਵਾਹਾਂ ਵਿਚ ਦੇਖ ਸਕਦੇ ਹਾਂ।—1 ਯੂਹੰਨਾ 3:10-12. (w11-E 08/01)

ਹੋਰ ਜਾਣਕਾਰੀ ਲਈ ਪਵਿੱਤਰ ਬਾਈਬਲ ਕੀ ਸਿਖਾਉਂਦੀ ਹੈ? ਕਿਤਾਬ ਦਾ ਪੰਦਰਵਾਂ ਅਧਿਆਇ ਦੇਖੋ। ਇਹ ਕਿਤਾਬ ਯਹੋਵਾਹ ਦੇ ਗਵਾਹਾਂ ਦੁਆਰਾ ਛਾਪੀ ਗਈ ਹੈ।

[ਸਫ਼ਾ 16 ਉੱਤੇ ਤਸਵੀਰ]

“ਉਹ ਸਾਰਿਆਂ ਸਾਮ੍ਹਣੇ ਪਰਮੇਸ਼ੁਰ ਨੂੰ ਜਾਣਨ ਦਾ ਦਾਅਵਾ ਤਾਂ ਕਰਦੇ ਹਨ, ਪਰ ਉਨ੍ਹਾਂ ਦੇ ਕੰਮਾਂ ਤੋਂ ਪਤਾ ਲੱਗਦਾ ਹੈ ਕਿ ਉਨ੍ਹਾਂ ਨੇ ਪਰਮੇਸ਼ੁਰ ਤੋਂ ਮੂੰਹ ਮੋੜ ਲਿਆ ਹੈ।”—ਤੀਤੁਸ 1:16