ਇਕ ਸੰਗ ਮਿਲ ਕੇ ਕੰਮ ਕਰੋ
1 ਕੀ ਤੁਸੀਂ ਮਨੁੱਖੀ ਸਰੀਰ ਦੇ ਸ਼ਾਨਦਾਰ ਡੀਜ਼ਾਈਨ ਨੂੰ ਦੇਖ ਕੇ ਅਕਸਰ ਹੈਰਾਨ ਨਹੀਂ ਹੁੰਦੇ? (ਜ਼ਬੂ. 139:14) ਸਰੀਰ ਦਾ ਹਰ ਅੰਗ ਬਾਕੀ ਸਾਰੇ ਅੰਗਾਂ ਨਾਲ ਮਿਲ ਕੇ ਕੰਮ ਕਰਦਾ ਹੈ। ਪਰਮੇਸ਼ੁਰ ਦਾ ਬਚਨ ਮਸੀਹੀ ਕਲੀਸਿਯਾ ਦੀ ਤੁਲਨਾ ਮਨੁੱਖੀ ਸਰੀਰ ਨਾਲ ਕਰਦਾ ਹੈ। ਆਪਣੇ ਸਿਰ, ਮਸੀਹ ਦੇ ਅਧੀਨ ਕਲੀਸਿਯਾ ਦੇ ਸਾਰੇ ਮੈਂਬਰ “ਹਰੇਕ ਜੋੜ ਦੀ ਮੱਦਤ ਨਾਲ ਠੀਕ ਠੀਕ ਜੁੜ ਕੇ ਅਤੇ ਇੱਕ ਸੰਗ ਮਿਲ ਕੇ” ਕੰਮ ਕਰਦੇ ਹਨ। (ਅਫ਼. 4:16ੳ) ਇਸ ਤਰ੍ਹਾਂ, ਯਹੋਵਾਹ ਆਪਣੀ ਇੱਛਾ ਪੂਰੀ ਕਰਨ ਲਈ ਆਪਣੇ ਇਕ-ਮੁੱਠ ਲੋਕਾਂ ਨੂੰ ਵਰਤਦਾ ਹੈ।
2 ਪਹਿਲੀ ਸਦੀ ਦੀ ਕਲੀਸਿਯਾ ਦੇ ਮੈਂਬਰ ਇਕ ਦੂਸਰੇ ਦੀਆਂ ਅਧਿਆਤਮਿਕ ਤੇ ਭੌਤਿਕ ਲੋੜਾਂ ਪੂਰੀਆਂ ਕਰਨ ਲਈ “ਇੱਕ ਮਨ ਹੋ ਕੇ” ਮਿਹਨਤ ਕਰਦੇ ਸਨ। (ਰਸੂ. 2:44-47) ਯਹੋਵਾਹ ਦੀ ਮਦਦ ਨਾਲ ਉਨ੍ਹਾਂ ਨੇ ਮਿਲ ਕੇ ਸਖ਼ਤ ਸਤਾਹਟਾਂ ਦਾ ਸਾਮ੍ਹਣਾ ਕੀਤਾ ਅਤੇ ਉਨ੍ਹਾਂ ਉੱਤੇ ਜਿੱਤ ਹਾਸਲ ਕੀਤੀ। (ਰਸੂ. 4:24-31) ਉਹ ਜਿੱਥੇ ਵੀ ਜਾਂਦੇ ਸਨ ਉੱਥੇ ਰਾਜ ਦਾ ਸੰਦੇਸ਼ ਸੁਣਾਉਂਦੇ ਸਨ ਜਿਸ ਕਰਕੇ ਉਸ ਸਮੇਂ ਦੀ ਦੁਨੀਆਂ ਦੇ ਹਰ ਹਿੱਸੇ ਵਿਚ ਖ਼ੁਸ਼ ਖ਼ਬਰੀ ਸੁਣਾਈ ਗਈ ਸੀ। (ਕੁਲੁ. 1:23) ਅੱਜ ਸਾਡੇ ਦਿਨਾਂ ਵਿਚ, ਮਸੀਹੀ ਕਲੀਸਿਯਾ ਦੇ ਮੈਂਬਰ ਮਿਲ-ਜੁਲ ਕੇ ਇਹੋ ਕੰਮ ਹੋਰ ਵੱਡੇ ਪੈਮਾਨੇ ਤੇ ਕਰ ਰਹੇ ਹਨ। ਉਨ੍ਹਾਂ ਦੀ ਏਕਤਾ ਦੇ ਕੀ ਕਾਰਨ ਹਨ?
3 ਪਰਮੇਸ਼ੁਰ ਦੀ ਸਿੱਖਿਆ ਕਾਰਨ ਏਕਤਾ: ਪੂਰੀ ਦੁਨੀਆਂ ਵਿਚ ਅਸੀਂ ਆਪਣੀ ਭਗਤੀ ਕਰਕੇ ਏਕਤਾ ਦਾ ਆਨੰਦ ਮਾਣਦੇ ਹਾਂ। ਇਹ ਕਿੱਦਾਂ ਸੰਭਵ ਹੈ? “ਵੇਲੇ ਸਿਰ” ਅਧਿਆਤਮਿਕ ਭੋਜਨ ਮੁਹੱਈਆ ਕਰਨ ਦੇ ਯਹੋਵਾਹ ਦੇ ਜ਼ਰੀਏ ਨੂੰ ਅਸੀਂ ਕਬੂਲ ਕਰਦੇ ਹਾਂ। (ਮੱਤੀ 24:45) ਅਸੀਂ ‘ਮਨੁੱਖਾਂ ਨੂੰ ਦਿੱਤੇ ਦਾਨਾਂ’ ਦੀ ਵੀ ਬਹੁਤ ਕਦਰ ਕਰਦੇ ਹਾਂ ਜਿਨ੍ਹਾਂ ਨੂੰ ਯਹੋਵਾਹ ਨੇ ਕਲੀਸਿਯਾ ਵਿਚ ਸਾਨੂੰ ਸਿਖਾਉਣ ਲਈ ਨਿਯੁਕਤ ਕੀਤਾ ਹੈ। ਜਦੋਂ ਸਾਨੂੰ ਅਧਿਆਤਮਿਕ ਭੋਜਨ ਦੇਣ ਦੇ ਯਹੋਵਾਹ ਦੇ ਸਾਰੇ ਪ੍ਰਬੰਧਾਂ ਨੂੰ ਅਸੀਂ ਨਿਮਰਤਾ ਨਾਲ ਸਵੀਕਾਰ ਕਰਦੇ ਹਾਂ, ਤਾਂ ਪਰਮੇਸ਼ੁਰ ਦੇ ਬਚਨ ਬਾਰੇ ਸਾਡੀ ਸਮਝ ਵਧਦੀ ਹੈ ਅਤੇ ਯਿਸੂ ਦੇ ਚੇਲੇ ਹੋਣ ਦੇ ਨਾਤੇ ਸਾਡੇ ਸਾਰਿਆਂ ਵਿਚ ਉਸ ਦੀ ਰੀਸ ਕਰਨ ਦੀ ਇੱਛਾ ਪੈਦਾ ਹੁੰਦੀ ਹੈ। ਸਾਨੂੰ ਪਰਮੇਸ਼ੁਰ ਦੇ ਬਚਨ ਦਾ ਅਧਿਐਨ ਕਰਦੇ ਰਹਿਣਾ ਚਾਹੀਦਾ ਹੈ ਅਤੇ ‘ਨਿਹਚਾ ਦੀ ਏਕਤਾ’ ਨੂੰ ਕਾਇਮ ਰੱਖਣ ਦੀ ਪੂਰੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। (ਅਫ਼. 4:8, 11-13) ਕੀ ਤੁਸੀਂ ਹਰ ਰੋਜ਼ ਬਾਈਬਲ ਪੜ੍ਹਨ ਦੁਆਰਾ ਇਸ ਅਧਿਆਤਮਿਕ ਏਕਤਾ ਨੂੰ ਮਜ਼ਬੂਤ ਬਣਾ ਰਹੇ ਹੋ?
4 ਮਸੀਹੀ ਸੰਗਤੀ ਨਾਲ ਏਕਤਾ: ਪਿਆਰ ਸਾਨੂੰ ਮਸੀਹੀ ਸਭਾਵਾਂ ਵਿਚ ਇਕ ਦੂਸਰੇ ਨਾਲ ਸੰਗਤੀ ਕਰਨ ਲਈ ਪ੍ਰੇਰਦਾ ਹੈ ਜਿਸ ਨਾਲ ਸਾਡੀ ਏਕਤਾ ਹੋਰ ਵੀ ਵਧਦੀ ਹੈ। ਇਨ੍ਹਾਂ ਸਭਾਵਾਂ ਵਿਚ ਅਸੀਂ ‘ਇੱਕ ਦੂਏ ਦਾ ਧਿਆਨ ਰੱਖਦੇ’ ਹਾਂ। (ਇਬ. 10:24, 25) ਇਸ ਦਾ ਮਤਲਬ ਸਿਰਫ਼ ਆਪਣੇ ਭਰਾਵਾਂ ਨੂੰ ਉਪਰੋਂ-ਉਪਰੋਂ ਜਾਣਨਾ ਨਹੀਂ, ਸਗੋਂ ਉਨ੍ਹਾਂ ਤੋਂ ਚੰਗੀ ਤਰ੍ਹਾਂ ਵਾਕਫ਼ ਹੋਣਾ ਹੈ। ਯਹੋਵਾਹ ਵਾਂਗ, ਅਸੀਂ ਵੀ ਉਨ੍ਹਾਂ ਨੂੰ ਅਣਮੋਲ ਸਮਝਦੇ ਹਾਂ। (ਹੱਜ. 2:7) ਜਦੋਂ ਅਸੀਂ ਉਨ੍ਹਾਂ ਨੂੰ ਆਪਣੀ ਨਿਹਚਾ ਦਾ ਪ੍ਰਗਟਾਵਾ ਕਰਦੇ ਸੁਣਦੇ ਹਾਂ, ਤਾਂ ਉਨ੍ਹਾਂ ਲਈ ਸਾਡਾ ਪਿਆਰ ਵਧਦਾ ਹੈ ਅਤੇ ਸਾਡੀ ਏਕਤਾ ਮਜ਼ਬੂਤ ਹੁੰਦੀ ਹੈ। ਕੀ ਤੁਹਾਡੇ ਬਾਰੇ ਇਹ ਕਿਹਾ ਜਾ ਸਕਦਾ ਹੈ ਕਿ ਤੁਸੀਂ ਕਲੀਸਿਯਾ ਦੀਆਂ ਸਭਾਵਾਂ ਵਿਚ ਬਾਕਾਇਦਾ ਜਾਂਦੇ ਹੋ?
5 ਮਿਲ ਕੇ ਪ੍ਰਚਾਰ ਕਰਨਾ: ਆਪਣੇ ਸਾਥੀ ਨਿਹਚਾਵਾਨਾਂ ਨਾਲ ਮਿਲ ਕੇ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕਰਨ ਨਾਲ ਅਸੀਂ ਇਕ ਹੋ ਕੇ ਪਰਮੇਸ਼ੁਰ ਦੀ ਇੱਛਾ ਪੂਰੀ ਕਰਦੇ ਹਾਂ। ਪੌਲੁਸ ਰਸੂਲ ਨੇ ‘ਪਰਮੇਸ਼ੁਰ ਦੇ ਰਾਜ ਲਈ ਆਪਣੇ ਨਾਲ ਕੰਮ ਕਰਨ ਵਾਲਿਆਂ’ ਦੀ ਬਹੁਤ ਕਦਰ ਕੀਤੀ। (ਕੁਲੁ. 4:11) ਪ੍ਰਚਾਰ ਕਰਦੇ ਸਮੇਂ ਇਕ ਦੂਸਰੇ ਦੇ ਤਜਰਬੇ ਸੁਣਨ ਅਤੇ ਇਕ ਦੂਸਰੇ ਦੀ ਮਦਦ ਕਰਨ ਨਾਲ ਸਾਨੂੰ ਆਪਣੀ ਮਸੀਹੀ ਜ਼ਿੰਮੇਵਾਰੀ ਨਿਭਾਉਣ ਵਿਚ ਅਤੇ ਆਪਣੀ ਏਕਤਾ ਦੇ ਬੰਧਨ ਨੂੰ ਮਜ਼ਬੂਤ ਕਰਨ ਵਿਚ ਮਦਦ ਮਿਲਦੀ ਹੈ।—ਕੁਲੁ. 3:14.
6 ਪਵਿੱਤਰ ਆਤਮਾ ਸਾਨੂੰ ਇਕ ਕਰਦੀ ਹੈ: ਜਦੋਂ ਅਸੀਂ ਯਹੋਵਾਹ ਦੀ ਇੱਛਾ ਪੂਰੀ ਕਰਨ ਲਈ ਮਿਹਨਤ ਕਰਦੇ ਹਾਂ, ਤਾਂ ਉਹ ਸਾਨੂੰ ਆਪਣੀ ਪਵਿੱਤਰ ਆਤਮਾ ਬਖ਼ਸ਼ਦਾ ਹੈ। ਇਹ ਆਤਮਾ ਆਪਸੀ ਮਤਭੇਦਾਂ ਨੂੰ ਦੂਰ ਕਰਨ ਅਤੇ ਆਪਸ ਵਿਚ ਮਿਲ-ਜੁਲ ਕੇ ਵੱਸਣ ਵਿਚ ਸਾਡੀ ਮਦਦ ਕਰਦੀ ਹੈ। (ਜ਼ਬੂ. 133:1) ਇਹ ਸਾਨੂੰ “ਮਿਲਾਪ ਦੇ ਬੰਧ ਵਿੱਚ ਆਤਮਾ ਦੀ ਏਕਤਾ ਦੀ ਪਾਲਨਾ ਕਰਨ” ਦੀ ਪ੍ਰੇਰਣਾ ਦਿੰਦੀ ਹੈ। (ਅਫ਼. 4:3) ਅਸੀਂ ਸਾਰੇ ਆਪਣੇ ਆਪਸੀ ਸੰਬੰਧਾਂ ਵਿਚ ਆਤਮਾ ਦਾ ਫਲ ਪੈਦਾ ਕਰ ਕੇ ਪਰਮੇਸ਼ੁਰ ਦੇ ਲੋਕਾਂ ਦੀ ਏਕਤਾ ਵਧਾ ਸਕਦੇ ਹਾਂ।—ਗਲਾ. 5:22, 23.
7 ਮਸੀਹ ਦੀ ਸਰਦਾਰੀ ਹੇਠ ਮਿਲ ਕੇ ਸੇਵਾ ਕਰਨ ਨਾਲ ਪੂਰੀ ‘ਦੇਹੀ ਆਪਣੇ ਆਪ ਨੂੰ ਵਧਾਈ ਜਾਂਦੀ ਹੈ ਭਈ ਉਹ ਪ੍ਰੇਮ ਵਿੱਚ ਆਪਣੀ ਉਸਾਰੀ ਕਰੇ।’ (ਅਫ਼. 4:16ਅ) ਨਾਲੇ ਇਸ ਨਾਲ “ਸ਼ਾਂਤੀ ਦਾਤਾ ਪਰਮੇਸ਼ੁਰ” ਯਹੋਵਾਹ ਦੀ ਮਹਿਮਾ ਵੀ ਹੁੰਦੀ ਹੈ।—ਰੋਮੀ. 16:20.