ਨਫ਼ਰਤ ਦਾ ਚੱਕਰ ਕਿਵੇਂ ਤੋੜੀਏ?

1 | ਪੱਖਪਾਤ ਨਾ ਕਰੋ

ਬਾਈਬਲ ਦੀ ਸਿੱਖਿਆ:

“ਪਰਮੇਸ਼ੁਰ ਕਿਸੇ ਨਾਲ ਪੱਖਪਾਤ ਨਹੀਂ ਕਰਦਾ, ਪਰ ਹਰ ਕੌਮ ਵਿਚ ਜਿਹੜਾ ਵੀ ਇਨਸਾਨ ਉਸ ਤੋਂ ਡਰਦਾ ਹੈ ਅਤੇ ਸਹੀ ਕੰਮ ਕਰਦਾ ਹੈ, ਪਰਮੇਸ਼ੁਰ ਉਸ ਨੂੰ ਕਬੂਲ ਕਰਦਾ ਹੈ।”—ਰਸੂਲਾਂ ਦੇ ਕੰਮ 10:34, 35.

ਇਸ ਸਿੱਖਿਆ ਦਾ ਕੀ ਮਤਲਬ ਹੈ?

ਯਹੋਵਾਹa ਪਰਮੇਸ਼ੁਰ ਇਹ ਨਹੀਂ ਦੇਖਦਾ ਕਿ ਅਸੀਂ ਕਿਸ ਨਸਲ, ਜਾਤ ਜਾਂ ਦੇਸ਼ ਦੇ ਹਾਂ, ਸਾਡਾ ਰੰਗ-ਰੂਪ ਕੀ ਹੈ ਜਾਂ ਸਾਡਾ ਸਭਿਆਚਾਰ ਕੀ ਹੈ। ਇਸ ਦੀ ਬਜਾਇ, ਉਹ ਇਸ ਗੱਲ ʼਤੇ ਧਿਆਨ ਲਾਉਂਦਾ ਹੈ ਕਿ ਅਸੀਂ ਅੰਦਰੋਂ ਕਿਹੋ ਜਿਹੇ ਇਨਸਾਨ ਹਾਂ। ਬਾਈਬਲ ਇਹ ਵੀ ਦੱਸਦੀ ਹੈ ਕਿ “ਇਨਸਾਨ ਸਿਰਫ਼ ਬਾਹਰਲਾ ਰੂਪ ਦੇਖਦਾ ਹੈ, ਪਰ ਯਹੋਵਾਹ ਦਿਲ ਦੇਖਦਾ ਹੈ।”—1 ਸਮੂਏਲ 16:7.

ਤੁਸੀਂ ਕੀ ਕਰ ਸਕਦੇ ਹੋ?

ਚਾਹੇ ਤੁਸੀਂ ਦਿਲ ਨਹੀਂ ਪੜ੍ਹ ਸਕਦੇ, ਪਰ ਫਿਰ ਵੀ ਰੱਬ ਦੀ ਰੀਸ ਕਰਦਿਆਂ ਤੁਸੀਂ ਦੂਸਰਿਆਂ ਨਾਲ ਨਿਰਪੱਖ ਰਹਿਣ ਦੀ ਕੋਸ਼ਿਸ਼ ਕਰ ਸਕਦੇ ਹੋ। ਇਹ ਨਾ ਦੇਖੋ ਕਿ ਕੋਈ ਵਿਅਕਤੀ ਕਿਸ ਨਸਲ, ਜਾਤ ਜਾਂ ਕੌਮ ਦਾ ਹੈ, ਸਗੋਂ ਇਹ ਦੇਖੋ ਕਿ ਉਹ ਵਿਅਕਤੀ ਕਿਹੋ ਜਿਹਾ ਹੈ। ਜੇ ਤੁਹਾਨੂੰ ਲੱਗਦਾ ਕਿ ਤੁਸੀਂ ਦੂਜਿਆਂ ਨਾਲ ਪੱਖਪਾਤ ਕਰਦੇ ਹੋ, ਤਾਂ ਰੱਬ ਨੂੰ ਬੇਨਤੀ ਕਰੋ ਕਿ ਉਹ ਇਨ੍ਹਾਂ ਭਾਵਨਾਵਾਂ ਨੂੰ ਕੱਢਣ ਵਿਚ ਤੁਹਾਡੀ ਮਦਦ ਕਰੇ। (ਜ਼ਬੂਰ 139:23, 24) ਤੁਸੀਂ ਭਰੋਸਾ ਰੱਖ ਸਕਦੇ ਹੋ ਕਿ ਜੇ ਤੁਸੀਂ ਦਿਲੋਂ ਯਹੋਵਾਹ ਨੂੰ ਬੇਨਤੀ ਕਰੋਗੇ, ਤਾਂ ਉਹ ਤੁਹਾਡੀ ਬੇਨਤੀ ਜ਼ਰੂਰ ਸੁਣੇਗਾ ਤੇ ਤੁਹਾਡੀ ਮਦਦ ਕਰੇਗਾ।—1 ਪਤਰਸ 3:12.

a ਰੱਬ ਦਾ ਨਾਂ ਯਹੋਵਾਹ ਹੈ।—ਜ਼ਬੂਰ 83:18.

“ਮੈਂ ਤਾਂ ਪਹਿਲਾਂ ਕਦੇ ਕਿਸੇ ਗੋਰੇ ਨਾਲ ਸ਼ਾਂਤੀ ਨਾਲ ਵੀ ਨਹੀਂ ਬੈਠਾ ਸੀ। ਹੁਣ ਮੈਂ ਦੁਨੀਆਂ ਭਰ ਦੇ ਉਸ ਭਾਈਚਾਰੇ ਦਾ ਹਿੱਸਾ ਹਾਂ ਜਿਸ ਵਿਚ ਸੱਚਾ ਪਿਆਰ ਹੈ।”—ਟਾਈਟਸ

ਤਜਰਬਾ—ਟਾਈਟਸ

ਨਫ਼ਰਤ ਨੂੰ ਆਪਣੇ ਦਿਲ ਵਿੱਚੋਂ ਕੱਢਣਾ

ਟਾਈਟਸ ਇਕ ਅਜਿਹੇ ਗੈਂਗ ਦਾ ਮੈਂਬਰ ਸੀ ਜੋ ਮਾਰ-ਧਾੜ ਕਰਦਾ ਸੀ। ਇਹ ਗੈਂਗ ਰੰਗ ਦੇ ਆਧਾਰ ਤੇ ਬਣਾਏ ਕਾਨੂੰਨਾਂ ਖ਼ਿਲਾਫ਼ ਸੀ ਜੋ ਕਾਲਿਆਂ ਨੂੰ ਨੀਵਾਂ ਦਿਖਾਉਣ ਲਈ ਬਣਾਏ ਗਏ ਸਨ। ਉਸ ਨੇ ਕਿਹਾ: “ਅਸੀਂ ਅਜਿਹੀਆਂ ਥਾਵਾਂ ʼਤੇ ਜਾਂਦੇ ਸੀ ਜਿੱਥੇ ਕਾਲਿਆਂ ਨੂੰ ਜਾਣ ਦੀ ਇਜਾਜ਼ਤ ਨਹੀਂ ਸੀ, ਜਿਵੇਂ ਬਾਰ ਤੇ ਹੋਟਲਾਂ ਵਗੈਰਾ ਵਿਚ। ਅਸੀਂ ਉੱਥੇ ਇਸ ਲਈ ਜਾਂਦੇ ਸੀ ਤਾਂਕਿ ਅਸੀਂ ਲੜਾਈ ਸ਼ੁਰੂ ਕਰ ਸਕੀਏ।” ਟਾਈਟਸ ਮੰਨਦਾ ਹੈ ਕਿ ਉਸ ਦਾ ਦਿਲ ਨਫ਼ਰਤ ਨਾਲ ਭਰਿਆ ਹੋਇਆ ਸੀ। ਉਹ ਅੱਗੇ ਦੱਸਦਾ ਹੈ: “ਜੇ ਮੇਰੀ ਕਿਸੇ ਨਾਲ ਬਹਿਸ ਹੋ ਜਾਂਦੀ ਸੀ, ਚਾਹੇ ਉਹ ਆਦਮੀ ਹੋਵੇ ਜਾਂ ਔਰਤ, ਤਾਂ ਸਭ ਤੋਂ ਪਹਿਲਾਂ ਮੈਂ ਹੀ ਹੱਥ ਚੁੱਕਦਾ ਸੀ।”

ਬਾਅਦ ਵਿਚ ਟਾਈਟਸ ਨੇ ਯਹੋਵਾਹ ਦੇ ਗਵਾਹਾਂ ਤੋਂ ਬਾਈਬਲ ਬਾਰੇ ਸਿੱਖਣਾ ਸ਼ੁਰੂ ਕੀਤਾ। ਤੇ ਉਸ ਨੇ ਖ਼ੁਦ ਵਿਚ ਬਦਲਾਅ ਕੀਤੇ। ਬਾਈਬਲ ਦਾ ਉਸ ਦੀ ਸੋਚ ʼਤੇ ਜ਼ਬਰਦਸਤ ਅਸਰ ਪਿਆ। ਖ਼ਾਸ ਕਰਕੇ ਬਾਈਬਲ ਦੇ ਇਸ ਵਾਅਦੇ ਨੇ ਉਸ ਦੇ ਦਿਲ ਨੂੰ ਛੋਹਿਆ ਕਿ “ਮੌਤ ਨਹੀਂ ਰਹੇਗੀ, ਨਾ ਹੀ ਸੋਗ ਮਨਾਇਆ ਜਾਵੇਗਾ ਅਤੇ ਨਾ ਹੀ ਕੋਈ ਰੋਵੇਗਾ ਅਤੇ ਕਿਸੇ ਨੂੰ ਕੋਈ ਦੁੱਖ-ਦਰਦ ਨਹੀਂ ਹੋਵੇਗਾ।”—ਪ੍ਰਕਾਸ਼ ਦੀ ਕਿਤਾਬ 21:3, 4.

ਪਹਿਲਾਂ-ਪਹਿਲ ਤਾਂ ਟਾਈਟਸ ਲਈ ਆਪਣੇ ਦਿਲ ਵਿੱਚੋਂ ਨਫ਼ਰਤ ਕੱਢਣੀ ਔਖੀ ਸੀ। ਉਹ ਦੱਸਦਾ ਹੈ: “ਮੇਰੇ ਲਈ ਆਪਣੀ ਸੋਚ ਅਤੇ ਕੰਮਾਂ ਨੂੰ ਬਦਲਣਾ ਸੌਖਾ ਨਹੀਂ ਸੀ।” ਪਰ ਬਾਈਬਲ ਵਿਚ ਰਸੂਲਾਂ ਦੇ ਕੰਮ 10:34, 35 ਵਿਚ ਦਿੱਤੀ ਜਾਣਕਾਰੀ ਨੇ ਉਸ ਦੀ ਬਹੁਤ ਮਦਦ ਕੀਤੀ ਜਿਸ ਵਿਚ ਦੱਸਿਆ ਗਿਆ ਹੈ ਕਿ ਰੱਬ ਕਿਸੇ ਨਾਲ ਪੱਖਪਾਤ ਨਹੀਂ ਕਰਦਾ।

ਇਸ ਦਾ ਕੀ ਨਤੀਜਾ ਨਿਕਲਿਆ? ਟਾਈਟਸ ਦੱਸਦਾ ਹੈ: “ਜਦੋਂ ਮੈਂ ਦੇਖਿਆ ਕਿ ਯਹੋਵਾਹ ਦੇ ਗਵਾਹ ਹਰ ਨਸਲ ਜਾਂ ਰੰਗ ਦੇ ਲੋਕਾਂ ਨਾਲ ਪਿਆਰ ਕਰਦੇ ਹਨ, ਤਾਂ ਮੈਨੂੰ ਪੱਕਾ ਯਕੀਨ ਹੋ ਗਿਆ ਕਿ ਉਹੀ ਸੱਚੇ ਰੱਬ ਨੂੰ ਮੰਨਦੇ ਹਨ। ਮੇਰੇ ਬਪਤਿਸਮੇ ਤੋਂ ਪਹਿਲਾਂ ਹੀ ਮੰਡਲੀ ਦੇ ਇਕ ਗੋਰੇ ਭਰਾ ਨੇ ਮੈਨੂੰ ਆਪਣੇ ਘਰ ਖਾਣੇ ʼਤੇ ਬੁਲਾਇਆ। ਇਹ ਇਕ ਸੁਪਨੇ ਵਾਂਗ ਸੀ ਕਿਉਂਕਿ ਕਿਸੇ ਗੋਰੇ ਦੇ ਘਰ ਰੋਟੀ ਖਾਣੀ ਤਾਂ ਦੂਰ ਦੀ ਗੱਲ ਸੀ, ਮੈਂ ਤਾਂ ਪਹਿਲਾਂ ਕਦੇ ਕਿਸੇ ਗੋਰੇ ਨਾਲ ਸ਼ਾਂਤੀ ਨਾਲ ਵੀ ਨਹੀਂ ਬੈਠਾ ਸੀ। ਹੁਣ ਮੈਂ ਦੁਨੀਆਂ ਭਰ ਦੇ ਉਸ ਭਾਈਚਾਰੇ ਦਾ ਹਿੱਸਾ ਹਾਂ ਜਿਸ ਵਿਚ ਸੱਚਾ ਪਿਆਰ ਹੈ।”