ਨਫ਼ਰਤ ਦਾ ਚੱਕਰ ਕਿਵੇਂ ਤੋੜੀਏ?

2 | ਬਦਲਾ ਨਾ ਲਓ

ਬਾਈਬਲ ਦੀ ਸਿੱਖਿਆ:

“ਬੁਰਾਈ ਦੇ ਵੱਟੇ ਬੁਰਾਈ ਨਾ ਕਰੋ। . . . ਜੇ ਹੋ ਸਕੇ, ਤਾਂ ਸਾਰਿਆਂ ਨਾਲ ਸ਼ਾਂਤੀ ਬਣਾਈ ਰੱਖਣ ਦੀ ਪੂਰੀ ਕੋਸ਼ਿਸ਼ ਕਰੋ। . . . ਬਦਲਾ ਨਾ ਲਓ, . . . ਕਿਉਂਕਿ ਲਿਖਿਆ ਹੈ: “‘ਬਦਲਾ ਲੈਣਾ ਮੇਰਾ ਕੰਮ ਹੈ, ਮੈਂ ਹੀ ਉਨ੍ਹਾਂ ਨੂੰ ਸਜ਼ਾ ਦਿਆਂਗਾ,’ ਯਹੋਵਾਹ ਕਹਿੰਦਾ ਹੈ।”—ਰੋਮੀਆਂ 12:17-19.

ਇਸ ਸਿੱਖਿਆ ਦਾ ਕੀ ਮਤਲਬ ਹੈ?

ਜੇ ਤੁਹਾਡੇ ਨਾਲ ਕੋਈ ਗ਼ਲਤ ਕਰਦਾ ਹੈ, ਤਾਂ ਗੁੱਸਾ ਚੜ੍ਹਨਾ ਕੁਦਰਤੀ ਹੈ। ਪਰ ਰੱਬ ਚਾਹੁੰਦਾ ਹੈ ਕਿ ਤੁਸੀਂ ਬਦਲਾ ਨਾ ਲਓ। ਇਸ ਦੀ ਬਜਾਇ, ਉਹ ਚਾਹੁੰਦਾ ਹੈ ਕਿ ਤੁਸੀਂ ਧੀਰਜ ਰੱਖੋ ਕਿਉਂਕਿ ਉਹ ਜਲਦ ਹੀ ਸਭ ਕੁਝ ਠੀਕ ਕਰੇਗਾ। —ਜ਼ਬੂਰ 37:7, 10.

ਤੁਸੀਂ ਕੀ ਕਰ ਸਕਦੇ ਹੋ?

ਜਦੋਂ ਪਾਪੀ ਇਨਸਾਨ ਬਦਲਾ ਲੈਂਦੇ ਹਨ, ਤਾਂ ਨਫ਼ਰਤ ਦਾ ਚੱਕਰ ਚੱਲਦਾ ਹੀ ਰਹਿੰਦਾ ਹੈ। ਇਸ ਲਈ ਜੇ ਕੋਈ ਤੁਹਾਨੂੰ ਠੇਸ ਜਾਂ ਨੁਕਸਾਨ ਪਹੁੰਚਾਉਂਦਾ ਹੈ, ਤਾਂ ਬਦਲਾ ਨਾ ਲਓ। ਆਪਣੀਆਂ ਭਾਵਨਾਵਾਂ ʼਤੇ ਕਾਬੂ ਰੱਖੋ ਤੇ ਸ਼ਾਂਤੀ ਨਾਲ ਪੇਸ਼ ਆਓ। ਕਈ ਵਾਰ ਕਿਸੇ ਗੱਲ ਨੂੰ ਨਜ਼ਰਅੰਦਾਜ਼ ਕਰਨਾ ਵਧੀਆ ਹੁੰਦਾ ਹੈ। (ਕਹਾਉਤਾਂ 19:11) ਪਰ ਕਈ ਵਾਰ ਕਿਸੇ ਮਾਮਲੇ ਬਾਰੇ ਕਦਮ ਚੁੱਕਣਾ ਵਧੀਆ ਹੁੰਦਾ ਹੈ। ਮਿਸਾਲ ਲਈ, ਜੇ ਤੁਸੀਂ ਕਿਸੇ ਅਪਰਾਧ ਦੇ ਸ਼ਿਕਾਰ ਹੋਏ ਹੋ, ਤਾਂ ਤੁਸੀਂ ਇਸ ਬਾਰੇ ਪੁਲਿਸ ਨੂੰ ਰਿਪੋਰਟ ਕਰਨ ਦਾ ਫ਼ੈਸਲਾ ਕਰ ਸਕਦੇ ਹੋ।

ਬਦਲਾ ਲੈਣ ਨਾਲ ਆਪਣਾ ਹੀ ਨੁਕਸਾਨ ਹੁੰਦਾ ਹੈ

ਪਰ ਉਦੋਂ ਕੀ ਜੇ ਤੁਹਾਨੂੰ ਲੱਗਦਾ ਹੈ ਕਿ ਕਿਸੇ ਮੁਸ਼ਕਲ ਦਾ ਹੱਲ ਸ਼ਾਂਤੀ ਨਾਲ ਨਹੀਂ ਕੱਢਿਆ ਜਾ ਸਕਦਾ? ਜਾਂ ਉਦੋਂ ਕੀ ਜਦੋਂ ਤੁਸੀਂ ਮਾਮਲੇ ਨੂੰ ਸ਼ਾਂਤੀ ਨਾਲ ਹੱਲ ਕਰਨ ਦੀ ਹਰ ਮੁਮਕਿਨ ਕੋਸ਼ਿਸ਼ ਕਰ ਲਈ ਹੈ? ਫਿਰ ਵੀ ਬਦਲਾ ਨਾ ਲਓ। ਕਿਉਂ? ਕਿਉਂਕਿ ਬਦਲਾ ਲੈਣ ਨਾਲ ਮਾਮਲਾ ਵਿਗੜੇਗਾ। ਇਸ ਦੀ ਬਜਾਇ, ਨਫ਼ਰਤ ਦੇ ਚੱਕਰ ਨੂੰ ਤੋੜੋ। ਭਰੋਸਾ ਰੱਖੋ ਕਿ ਰੱਬ ਜਿਸ ਤਰੀਕੇ ਨਾਲ ਮੁਸ਼ਕਲਾਂ ਦਾ ਹੱਲ ਕੱਢਦਾ ਹੈ, ਉਹ ਤਰੀਕਾ ਸਹੀ ਹੁੰਦਾ ਹੈ। “ਉਸ ਉੱਤੇ ਭਰੋਸਾ ਰੱਖ ਅਤੇ ਉਹ ਤੇਰੀ ਖ਼ਾਤਰ ਕਦਮ ਚੁੱਕੇਗਾ।”—ਜ਼ਬੂਰ 37:3-5.

ਤਜਰਬਾ—ਆਡਰੀਅਨ

ਬਦਲੇ ਦੀਆਂ ਭਾਵਨਾਵਾਂ ਉੱਤੇ ਕਾਬੂ ਪਾਇਆ

ਜਦੋਂ ਆਡਰੀਅਨ 14-15 ਸਾਲਾਂ ਦਾ ਸੀ, ਤਾਂ ਉਹ ਨਫ਼ਰਤ ਨਾਲ ਭਰਿਆ ਹੋਇਆ ਸੀ। ਇਸ ਕਰਕੇ ਉਹ ਸੜਕਾਂ ʼਤੇ ਲੜਾਈ-ਝਗੜੇ ਕਰਦਾ ਹੁੰਦਾ ਸੀ। ਉਹ ਦੱਸਦਾ ਹੈ: “ਲੜਾਈ ਵਿਚ ਅਕਸਰ ਗੋਲੀਆਂ ਚੱਲਦੀਆਂ ਹੁੰਦੀਆਂ ਸੀ ਤੇ ਕਈ ਵਾਰ ਮੈਨੂੰ ਖ਼ੂਨ ਨਾਲ ਲਥ-ਪਥ ਸੜਕ ʼਤੇ ਹੀ ਮਰਨ ਲਈ ਛੱਡ ਦਿੱਤਾ ਜਾਂਦਾ ਸੀ।”

ਆਡਰੀਅਨ ਨੇ 16 ਸਾਲਾਂ ਦੀ ਉਮਰ ਵਿਚ ਬਾਈਬਲ ਬਾਰੇ ਸਿੱਖਣਾ ਸ਼ੁਰੂ ਕੀਤਾ। ਉਹ ਅੱਗੇ ਦੱਸਦਾ ਹੈ: “ਬਾਈਬਲ ਸਟੱਡੀ ਕਰਦਿਆਂ ਮੈਂ ਜਾਣਿਆ ਕਿ ਮੈਨੂੰ ਆਪਣੀ ਜ਼ਿੰਦਗੀ ਵਿਚ ਬਦਲਾਅ ਕਰਨ ਦੀ ਲੋੜ ਹੈ।” ਉਸ ਨੂੰ ਆਪਣੇ ਦਿਲ ਵਿੱਚੋਂ ਨਫ਼ਰਤ ਕੱਢਣ ਤੇ ਲੜਾਈ-ਝਗੜੇ ਛੱਡਣ ਦੀ ਲੋੜ ਸੀ। ਉਸ ਨੂੰ ਖ਼ਾਸ ਤੌਰ ਤੇ ਬਾਈਬਲ ਵਿਚ ਰੋਮੀਆਂ 12:17-19 ਵਿਚ ਦਿੱਤੀ ਸਲਾਹ ਤੋਂ ਫ਼ਾਇਦਾ ਹੋਇਆ ਕਿ ਸਾਨੂੰ ਬਦਲਾ ਨਹੀਂ ਲੈਣਾ ਚਾਹੀਦਾ। ਉਹ ਦੱਸਦਾ ਹੈ: “ਮੈਨੂੰ ਇਸ ਗੱਲ ਦਾ ਯਕੀਨ ਹੋ ਗਿਆ ਕਿ ਯਹੋਵਾਹ ਆਪਣੇ ਸਮੇਂ ʼਤੇ ਆਪਣੇ ਤਰੀਕੇ ਨਾਲ ਨਿਆਂ ਕਰੇਗਾ। ਹੌਲੀ-ਹੌਲੀ ਮੈਂ ਆਪਣੇ ਗੁੱਸੇਖ਼ੋਰ ਸੁਭਾਅ ਨੂੰ ਬਦਲ ਸਕਿਆ।”

ਇਕ ਦਿਨ ਸ਼ਾਮ ਨੂੰ ਆਡਰੀਅਨ ʼਤੇ ਇਕ ਦੁਸ਼ਮਣ ਗੈਂਗ ਨੇ ਹਮਲਾ ਕੀਤਾ। ਗੈਂਗ ਦੇ ਲੀਡਰ ਨੇ ਉਸ ਨੂੰ ਉੱਚੀ ਆਵਾਜ਼ ਨਾਲ ਕਿਹਾ: “ਹਿੰਮਤ ਆ, ਤਾਂ ਲੜ!” ਆਡਰੀਅਨ ਮੰਨਦਾ ਹੈ: “ਮੈਨੂੰ ਉਸ ਸਮੇਂ ਇੰਨਾ ਗੁੱਸਾ ਚੜ੍ਹ ਗਿਆ ਕਿ ਮੈਂ ਲੜਨਾ ਚਾਹੁੰਦਾ ਸੀ।” ਪਰ ਲੜਨ ਦੀ ਬਜਾਇ ਉਸ ਨੇ ਯਹੋਵਾਹ ਨੂੰ ਛੋਟੀ ਜਿਹੀ ਪ੍ਰਾਰਥਨਾ ਕੀਤੀ ਤੇ ਉੱਥੋਂ ਚਲਿਆ ਗਿਆ।

ਆਡੀਰਅਨ ਅੱਗੇ ਕਹਿੰਦਾ ਹੈ: “ਅਗਲੇ ਦਿਨ ਮੈਂ ਗੈਂਗ ਦੇ ਲੀਡਰ ਨੂੰ ਦੇਖਿਆ ਜੋ ਉਸ ਸਮੇਂ ਇਕੱਲਾ ਸੀ। ਉਸ ਨੂੰ ਦੇਖ ਕੇ ਮੈਨੂੰ ਬਹੁਤ ਗੁੱਸਾ ਆਇਆ, ਪਰ ਮੈਂ ਮਨ ਵਿਚ ਯਹੋਵਾਹ ਨੂੰ ਪ੍ਰਾਰਥਨਾ ਕੀਤੀ ਕਿ ਮੈਂ ਖ਼ੁਦ ʼਤੇ ਕਾਬੂ ਰੱਖ ਸਕਾਂ। ਮੈਨੂੰ ਬਹੁਤ ਹੈਰਾਨੀ ਹੋਈ ਜਦੋਂ ਉਹ ਮੇਰੇ ਕੋਲ ਆਇਆ ਤੇ ਉਸ ਨੇ ਮੈਨੂੰ ਕਿਹਾ: ‘ਕੱਲ੍ਹ ਰਾਤ ਜੋ ਕੁਝ ਵੀ ਹੋਇਆ, ਉਸ ਲਈ ਮੈਨੂੰ ਮਾਫ਼ ਕਰ ਦੇ। ਸੱਚ ਤਾਂ ਇਹ ਹੈ ਕਿ ਮੈਂ ਤੇਰੇ ਵਰਗਾ ਬਣਨਾ ਚਾਹੁੰਦਾ ਹਾਂ। ਮੈਂ ਬਾਈਬਲ ਸਟੱਡੀ ਕਰਨੀ ਚਾਹੁੰਦਾ ਹਾਂ।’ ਮੈਨੂੰ ਬਹੁਤ ਖ਼ੁਸ਼ੀ ਹੋਈ ਕਿ ਮੈਂ ਆਪਣੇ ਗੁੱਸੇ ʼਤੇ ਕਾਬੂ ਰੱਖ ਸਕਿਆ। ਅਸੀਂ ਇਕੱਠੇ ਬਾਈਬਲ ਸਟੱਡੀ ਕਰਨ ਲੱਗ ਪਏ।”