3 | ਰੱਬ ਦੇ ਬਚਨ ਵਿਚ ਦੱਸੇ ਲੋਕਾਂ ਤੋਂ ਮਦਦ ਪਾਓ

ਬਾਈਬਲ ਵਿਚ ਲਿਖਿਆ ਹੈ . . . ਕਈ ਇੱਦਾਂ ਦੇ ਵਫ਼ਾਦਾਰ ਆਦਮੀ ਅਤੇ ਔਰਤਾਂ ਸਨ ਜੋ “ਸਾਡੇ ਵਰਗੀਆਂ ਭਾਵਨਾਵਾਂ” ਰੱਖਦੇ ਸਨ। —ਯਾਕੂਬ 5:17.

ਇਸ ਆਇਤ ਦਾ ਕੀ ਮਤਲਬ ਹੈ?

ਬਾਈਬਲ ਵਿਚ ਇੱਦਾਂ ਦੇ ਬਹੁਤ ਸਾਰੇ ਆਦਮੀਆਂ ਅਤੇ ਔਰਤਾਂ ਬਾਰੇ ਦੱਸਿਆ ਗਿਆ ਹੈ ਜੋ ਸੱਚ-ਮੁੱਚ ਇਕ ਸਮੇਂ ਤੇ ਜੀਉਂਦੇ ਸਨ ਤੇ ਉਨ੍ਹਾਂ ਦੀਆਂ ਵੀ ਸਾਡੇ ਵਾਂਗ ਵੱਖੋ-ਵੱਖਰੀਆਂ ਭਾਵਨਾਵਾਂ ਸਨ। ਬਾਈਬਲ ਵਿੱਚੋਂ ਇਨ੍ਹਾਂ ਬਾਰੇ ਪੜ੍ਹਦਿਆਂ ਕਿਸੇ ਇਕ ਬਾਰੇ ਸ਼ਾਇਦ ਸਾਨੂੰ ਲੱਗੇ ਕਿ ਉਹ ਵੀ ਮੇਰੇ ਵਾਂਗ ਸੋਚਦਾ ਤੇ ਮਹਿਸੂਸ ਕਰਦਾ ਸੀ।

ਇਹ ਆਇਤ ਤੁਹਾਡੀ ਕਿਵੇਂ ਮਦਦ ਕਰ ਸਕਦੀ ਹੈ?

ਅਸੀਂ ਸਾਰੇ ਚਾਹੁੰਦੇ ਹਾਂ ਕਿ ਸਾਨੂੰ ਕੋਈ ਸਮਝੇ, ਖ਼ਾਸ ਤੌਰ ʼਤੇ ਜਦੋਂ ਸਾਡੀ ਮਾਨਸਿਕ ਸਿਹਤ ਠੀਕ ਨਹੀਂ ਹੁੰਦੀ। ਜਦੋਂ ਅਸੀਂ ਬਾਈਬਲ ਵਿੱਚੋਂ ਉਨ੍ਹਾਂ ਲੋਕਾਂ ਬਾਰੇ ਪੜਦੇ ਹਾਂ ਜੋ ਅਸਲ ਵਿਚ ਸਨ, ਤਾਂ ਸ਼ਾਇਦ ਸਾਡੇ ਮਨ ਵਿਚ ਆਵੇ ਕਿ ਉਹ ਵੀ ਸਾਡੇ ਵਾਂਗ ਸੋਚਦੇ ਅਤੇ ਮਹਿਸੂਸ ਕਰਦੇ ਸਨ। ਇਸ ਕਰਕੇ ਸਾਨੂੰ ਅਹਿਸਾਸ ਹੁੰਦਾ ਹੈ ਕਿ ਅਸੀਂ ਇਕੱਲੇ ਇਹ ਲੜਾਈ ਨਹੀਂ ਲੜ ਰਹੇ। ਨਾਲੇ ਜਦੋਂ ਸਾਨੂੰ ਹੱਦੋਂ ਵੱਧ ਚਿੰਤਾ ਹੁੰਦੀ ਹੈ ਜਾਂ ਅਸੀਂ ਬਹੁਤ ਦੁਖੀ ਹੁੰਦੇ ਹਾਂ, ਤਾਂ ਅਸੀਂ ਆਪਣੇ-ਆਪ ਵਿਚ ਬਹੁਤਾ ਇਕੱਲਾਪਣ ਮਹਿਸੂਸ ਨਹੀਂ ਕਰਦੇ।

ਬਾਈਬਲ ਵਿਚ ਅਜਿਹੇ ਕਈ ਲੋਕਾਂ ਬਾਰੇ ਦੱਸਿਆ ਗਿਆ ਹੈ ਜਿਨ੍ਹਾਂ ਨੇ ਇਕ ਸਮੇਂ ʼਤੇ ਬੇਬੱਸ ਤੇ ਨਿਰਾਸ਼ ਮਹਿਸੂਸ ਕੀਤਾ ਸੀ। ਕੀ ਤੁਸੀਂ ਵੀ ਕਦੀ ਇੱਦਾਂ ਮਹਿਸੂਸ ਕੀਤਾ, ‘ਬਸ ਮੈ ਹੋਰ ਬਰਦਾਸ਼ਤ ਨਹੀਂ ਕਰ ਸਕਦਾ’? ਮੂਸਾ, ਏਲੀਯਾਹ, ਦਾਊਦ ਨੇ ਇੱਦਾਂ ਹੀ ਮਹਿਸੂਸ ਕੀਤਾ ਸੀ।—ਗਿਣਤੀ 11:14; 1 ਰਾਜਿਆਂ 19:4; ਜ਼ਬੂਰ 55:4.
ਬਾਈਬਲ ਵਿਚ ਹੰਨਾਹ ਨਾਂ ਦੀ ਔਰਤ ਬਾਰੇ ਦੱਸਿਆ ਗਿਆ ਹੈ ਜਿਸ ਦਾ ਮਨ “ਕੁੜੱਤਣ ਨਾਲ ਭਰਿਆ ਹੋਇਆ ਸੀ” ਕਿਉਂਕਿ ਉਸ ਦੇ ਬੱਚੇ ਨਹੀਂ ਸਨ। ਨਾਲੇ ਉਸ ਦੀ ਸੌਂਕਣ ਵੀ ਉਸ ʼਤੇ ਤਰਸ ਕਰਨ ਦੀ ਬਜਾਇ ਉਸ ਨੂੰ ਇਸ ਗੱਲ ਲਈ ਤਾਅਨੇ-ਮਿਹਣੇ ਮਾਰਦੀ ਰਹਿੰਦੀ ਸੀ।—1 ਸਮੂਏਲ 1:6, 10.
ਬਾਈਬਲ ਵਿਚ ਅੱਯੂਬ ਨਾਂ ਦੇ ਵਿਅਕਤੀ ਬਾਰੇ ਦੱਸਿਆ ਗਿਆ ਹੈ। ਉਸ ਬਾਰੇ ਪੜ੍ਹ ਕੇ ਸ਼ਾਇਦ ਸਾਨੂੰ ਲੱਗੇ ਕਿ ਉਹ ਵੀ ਸਾਡੇ ਵਾਂਗ ਸੋਚਦਾ ਤੇ ਮਹਿਸੂਸ ਕਰਦਾ ਸੀ। ਚਾਹੇ ਉਸ ਨੂੰ ਪਰਮੇਸ਼ੁਰ ʼਤੇ ਪੂਰਾ ਵਿਸ਼ਵਾਸ ਸੀ, ਫਿਰ ਵੀ ਉਹ ਇਕ ਸਮੇਂ ਤੇ ਅੰਦਰੋ ਪੂਰੀ ਤਰ੍ਹਾਂ ਟੁੱਟ ਚੁੱਕਾ ਸੀ। ਇਸ ਲਈ ਉਸ ਨੇ ਕਿਹਾ: “ਮੈਨੂੰ ਆਪਣੀ ਜ਼ਿੰਦਗੀ ਤੋਂ ਘਿਣ ਹੈ; ਮੈਂ ਹੋਰ ਜੀਉਣਾ ਨਹੀਂ ਚਾਹੁੰਦਾ।”—ਅੱਯੂਬ 7:16.

ਜਦੋਂ ਅਸੀਂ ਬਾਈਬਲ ਤੋਂ ਸਿੱਖਦੇ ਹਾਂ ਕਿ ਇਨ੍ਹਾਂ ਆਦਮੀਆਂ ਤੇ ਔਰਤਾਂ ਨੇ ਆਪਣੀਆਂ ਨਿਰਾਸ਼ ਕਰਨ ਵਾਲੀਆਂ ਸੋਚਾਂ ʼਤੇ ਕਿਵੇਂ ਕਾਬੂ ਪਾਇਆਂ, ਤਾਂ ਸਾਨੂੰ ਵੀ ਤਣਾਅ ਅਤੇ ਨਿਰਾਸ਼ਾ ਨਾਲ ਲੜਨ ਦੀ ਤਾਕਤ ਮਿਲਦੀ ਹੈ।

ਕੇਵਿਨ ਨੂੰ ਬਾਈਬਲ ਤੋਂ ਮਦਦ ਮਿਲ ਰਹੀ ਹੈ

ਬਾਈਪੋਲਰ ਡਿਸਔਡਰ ਦਾ ਮੇਰੇ ʼਤੇ ਅਸਰ

“ਜਦੋਂ ਮੇਰੀ ਉਮਰ ਲਗਭਗ 50 ਸਾਲਾਂ ਦੀ ਸੀ, ਤਾਂ ਮੈਨੂੰ ਬਾਈਪੋਲਰ ਡਿਸਔਡਰ ਹੋ ਗਿਆ। ਇਸ ਕਰਕੇ ਕਈ ਵਾਰ ਤਾਂ ਮੈਨੂੰ ਲੱਗਦਾ ਸੀ ਕਿ ਮੈਂ ਕਿਸੇ ਵੀ ਮੁਸ਼ਕਲ ਨੂੰ ਪਾਰ ਕਰ ਸਕਦਾ ਹਾਂ, ਪਰ ਕਈ ਵਾਰ ਮੈਨੂੰ ਇੱਦਾਂ ਲੱਗਦਾ ਸੀ ਕਿ ਮੇਰੇ ਜੀਉਣ ਦਾ ਕੋਈ ਫ਼ਾਇਦਾ ਨਹੀਂ।”

ਬਾਈਬਲ ਤੋਂ ਮੇਰੀ ਮਦਦ ਕਿਵੇਂ ਹੁੰਦੀ ਹੈ?

“ਮੈਨੂੰ ਬਾਈਬਲ ਵਿਚ ਦੱਸੇ ਪਤਰਸ ਨਾਂ ਦੇ ਆਦਮੀ ਤੋਂ ਬਹੁਤ ਹਿੰਮਤ ਮਿਲਦੀ ਹੈ ਕਿਉਂਕਿ ਉਹ ਵੀ ਮੇਰੇ ਵਾਂਗ ਮਹਿਸੂਸ ਕਰਦਾ ਸੀ। ਉਸ ਨੇ ਆਪਣੀ ਜ਼ਿੰਦਗੀ ਵਿਚ ਗ਼ਲਤੀਆਂ ਕੀਤੀਆਂ ਸਨ ਜਿਨ੍ਹਾਂ ਕਰਕੇ ਉਹ ਆਪਣੇ ਆਪ ਨੂੰ ਬੇਕਾਰ ਸਮਝਣ ਲੱਗਾ। ਪਰ ਇਨ੍ਹਾਂ ਗੱਲਾਂ ਬਾਰੇ ਸੋਚਦੇ ਰਹਿਣ ਦੀ ਬਜਾਇ ਉਸ ਨੇ ਆਪਣੇ ਉਨ੍ਹਾਂ ਦੋਸਤਾਂ ਦੀ ਮਦਦ ਲਈ ਜੋ ਉਸ ਦੀ ਪਰਵਾਹ ਕਰਦੇ ਸਨ। ਮਾਨਸਿਕ ਸਿਹਤ ਠੀਕ ਨਾ ਹੋਣ ਕਰਕੇ ਜਦੋਂ ਮੈਨੂੰ ਆਪਣੀਆਂ ਗ਼ਲਤੀਆਂ ਬਹੁਤ ਵੱਡੀਆਂ ਲੱਗਣ ਲੱਗ ਪੈਂਦੀਆਂ ਅਤੇ ਮੈਂ ਖ਼ੁਦ ਨੂੰ ਨਿਕੰਮਾ ਸਮਝਣ ਲੱਗ ਪੈਂਦਾ ਹਾਂ, ਤਾਂ ਮੈਂ ਵੀ ਪਤਰਸ ਵਾਂਗ ਆਪਣੇ ਉਨ੍ਹਾਂ ਦੋਸਤਾਂ ਦੀ ਮਦਦ ਲੈਂਦਾ ਹਾਂ ਜੋ ਅੱਗੇ ਵਧਦੇ ਰਹਿਣ ਵਿਚ ਮੇਰੀ ਮਦਦ ਕਰਦੇ ਹਨ।

“ਬਾਈਬਲ ਵਿਚ ਦਰਜ ਇਕ ਹੋਰ ਆਦਮੀ ਤੋਂ ਮੈਨੂੰ ਬਹੁਤ ਹੌਸਲਾ ਮਿਲਦਾ ਹੈ, ਉਹ ਹੈ ਰਾਜਾ ਦਾਊਦ। ਉਹ ਵੀ ਅਕਸਰ ਆਪਣੀ ਹਾਲਤ ਅਤੇ ਬੀਤੇ ਸਮੇਂ ਵਿਚ ਕੀਤੀਆਂ ਗ਼ਲਤੀਆਂ ਕਰਕੇ ਬਹੁਤ ਦੁਖੀ ਰਹਿੰਦਾ ਸੀ। ਮੈਨੂੰ ਲੱਗਦਾ ਹੈ ਕਿ ਉਹ ਵੀ ਬਿਲਕੁਲ ਮੇਰੇ ਵਾਂਗ ਹੀ ਮਹਿਸੂਸ ਕਰਦਾ ਸੀ ਕਿਉਂਕਿ ਕਈ ਵਾਰ ਮੈਂ ਵੀ ਕੁਝ ਅਜਿਹਾ ਕਹਿ ਜਾਂ ਕਰ ਦਿੰਦਾ ਹਾਂ ਜਿਸ ਦਾ ਮੈਨੂੰ ਬਾਅਦ ਵਿਚ ਪਛਤਾਵਾ ਹੁੰਦਾ ਹੈ। ਮੈਨੂੰ ਦਾਊਦ ਦੁਆਰਾ ਲਿਖੇ ਜ਼ਬੂਰ 51 ਤੋਂ ਬਹੁਤ ਹੌਸਲਾ ਮਿਲਦਾ ਹੈ। ਆਇਤ 3 ਵਿਚ ਉਸ ਨੇ ਲਿਖਿਆ: “ਮੈਂ ਆਪਣੇ ਗੁਨਾਹਾਂ ਨੂੰ ਚੰਗੀ ਤਰ੍ਹਾਂ ਜਾਣਦਾ ਹਾਂ ਅਤੇ ਮੇਰਾ ਪਾਪ ਹਮੇਸ਼ਾ ਮੇਰੇ ਸਾਮ੍ਹਣੇ ਹੈ।” ਜਦੋਂ ਮੈਨੂੰ ਬਹੁਤ ਜ਼ਿਆਦਾ ਡਿਪਰੈਸ਼ਨ ਹੁੰਦਾ ਹੈ, ਤਾਂ ਮੈਂ ਵੀ ਬਿਲਕੁਲ ਇੱਦਾਂ ਹੀ ਮਹਿਸੂਸ ਕਰਦਾ ਹਾਂ। ਉਸ ਵੇਲੇ ਮੇਰੇ ਲਈ ਬਹੁਤ ਔਖਾ ਹੁੰਦਾ ਹੈ ਕਿ ਮੈਂ ਆਪਣੇ ਬਾਰੇ ਕੁਝ ਚੰਗਾ ਸੋਚਾਂ। ਪਰ ਦਾਊਦ ਨੇ ਆਇਤ 10 ਵਿਚ ਲਿਖਿਆ ਹੈ: “ਹੇ ਪਰਮੇਸ਼ੁਰ, ਮੇਰੇ ਅੰਦਰ ਇਕ ਸਾਫ਼ ਦਿਲ ਪੈਦਾ ਕਰ ਅਤੇ ਮੈਨੂੰ ਨਵਾਂ ਅਤੇ ਪੱਕੇ ਇਰਾਦੇ ਵਾਲਾ ਮਨ ਦੇ।” ਮੈਂ ਦਾਊਦ ਦੀ ਇਸ ਗੱਲ ਨੂੰ ਸਮਝ ਸਕਦਾ ਹਾਂ ਕਿਉਂਕਿ ਮੈਂ ਵੀ ਰੱਬ ਨੂੰ ਇਹੀ ਬੇਨਤੀ ਕਰਦਾ ਹਾਂ। ਮੈਂ ਉਸ ਤੋਂ ਮਦਦ ਮੰਗਦਾ ਹਾਂ ਕਿ ਮੈਂ ਖ਼ੁਦ ਬਾਰੇ ਸਹੀ ਨਜ਼ਰੀਆ ਰੱਖ ਸਕਾਂ। ਅਖ਼ੀਰ ਆਇਤ 17 ਤੋਂ ਮੈਨੂੰ ਬਹੁਤ ਦਿਲਾਸਾ ਮਿਲਦਾ ਹੈ, ਇੱਥੇ ਲਿਖਿਆ ਹੈ: “ਹੇ ਪਰਮੇਸ਼ੁਰ, ਤੂੰ ਟੁੱਟੇ ਅਤੇ ਦੁਖੀ ਦਿਲ ਨੂੰ ਨਹੀਂ ਠੁਕਰਾਏਂਗਾ।” ਇਸ ਆਇਤ ਤੋਂ ਮੈਨੂੰ ਭਰੋਸਾ ਹੁੰਦਾ ਹੈ ਕਿ ਰੱਬ ਮੈਨੂੰ ਪਿਆਰ ਕਰਦਾ ਹੈ।

“ਬਾਈਬਲ ਵਿੱਚੋਂ ਇਨ੍ਹਾਂ ਆਦਮੀਆਂ ਤੇ ਔਰਤਾਂ ਬਾਰੇ ਪੜ੍ਹ ਕੇ ਅਤੇ ਰੱਬ ਨੇ ਮੇਰੇ ਲਈ ਜੋ ਵੀ ਕੀਤਾ ਹੈ, ਉਸ ਵੱਲ ਧਿਆਨ ਦੇ ਕੇ ਭਵਿੱਖ ਲਈ ਮੇਰੀ ਉਮੀਦ ਹੋਰ ਵੀ ਪੱਕੀ ਹੁੰਦੀ ਹੈ। ਮੈਨੂੰ ਪੂਰਾ ਯਕੀਨ ਹੈ ਕਿ ਬਾਈਬਲ ਵਿਚ ਦਰਜ ਸਾਰੇ ਵਾਅਦੇ ਜ਼ਰੂਰ ਪੂਰੇ ਹੋਣਗੇ ਅਤੇ ਇਸ ਕਰਕੇ ਮੈਂ ਕਦੇ ਵੀ ਆਪਣੀਆਂ ਮੁਸ਼ਕਲਾਂ ਸਾਮ੍ਹਣੇ ਗੋਡੇ ਨਹੀਂ ਟੇਕਦਾ।”