Impriso Lapud Pananisia Ra—Crimea

Akasabi la anggad Crimea so graben isusumpa na saray autoridad na Russia ed saray Tasi nen Jehova. Aglabat imbawal na gobierno ed Russia iray legal ya korporasyon na saray Tasi, noagta malinlinew ya labay da met ya ekalen so mareen ya panagdayew da. Manlapu la nen imbawal so kimey na saray Tasi nen Abril 2017, dakel lan pantitipon na saray Tasi so ni-raid na saray autoridad na Russia, kanian dakel so inaresto tan impriso. Ontan met so nagagawa ed saray Tasi nen Jehova diad Crimea.

Agawa so unonan malaknab ya impan-raid ed Crimea nen Nobyembre 15, 2018 diad Dzhankoy, nen ni-raid na manga 200 ya pulis tan special forces officers so waloran abung ya nantitiponan na angkelag ya grupo na saray Tasi pian saniiba dan basaen tan pantongtongan so Biblia. Puersaan ya nilooban na ag-onkulang ed 35 ya armadon pulis ya nansakob so lupa ra so abung nen Sergey Filatov, ya kawalaan na anemiran Tasi. Ataktakot ya maong iray Tasi ed saman ya agawa. Diad saman et intulak na saray pulis so 78 años ya laki ed padir, pinakebkeb da ed flooring, pinosasan da, tan pinepekpek da, kanian kaukolan ya ibatik ed ospital so laki kayari to man. Na-stress ya maong tan abigbigla so duara nin maedad lan lalaki kanian tinmagey so presyon na dala da tan imbatik met irad ospital. Makapaermen ta diad sakey ya abung ya ni-raid da et nakalan so sakey ya biin malukon.

Kayari na impan-raid, naakusaan si Sergey ya mangoorganisa kuno na kimey na “organisasyon ya extremist” base ed Article 282.2(1) na Russian Criminal Code. Nen Marso 5, 2020 senentensiaan na district court diad Crimea si Sergey na anemiran taon ya pakapriso ed sakey ya general regime prison colony. Kayarin asentensiaan, impriso dan tampol.

Diad saray sinmublay ya taon kayari na samay impan-raid ed Dzhankoy nen 2018, tuloytuloy nin puersaan ya lolooban na saray special forces officer iray abung na saray Tasi ya pansususpetsaan dan manggagawa na kimey na saray extremist. Say sankabaloan ya impan-raid et nen Agosto 7, 2024. Inimbestigaan na pigaran armadon pulis ya nansakob so lupa ra so abung na limaran Tasi, kaiba lay abung nen Tamara Brattseva ya mantaon na 68 diad baryo na Razdolnoye. Naakusaan si Tamara ya mangoorganisa kuno na saray kimey na extremist ya organisasyon tan peles ya lilitisen. Nen Oktubre 2024 asentensiaan so duaran Tasi ya laki, si Yuriy Gerashchenko tan Sergey Parfenovich na anem taon ya pakapriso diad sakey ya penal colony. Dati la ya walay akasuspendin sentensia ed sikara pero labay na prosecutor ya naikdan ira na mas ambelat ya dusa tan inaprobaan itan na korte. Inaresto da ran tampol diad korte insan da ra impriso.

Kayari na saray impan-raid ed kaabungan tan saray impanlitis tan impansentensia ed saray lalakin Tasi, natan et walay 14 ya akapriso tan asentensiaan ira ya napriso na anggad anemira tan kapalduan taon. Amin da et naakusan ya mangidadaulo ed saray kimey na extremist ya organisasyon.

Apriso Lapud Agnaako na Konsiensia To so Mansundalo

Yuriy Gerashchenko

Inyanak si Yuriy Gerashchenko nen 1979 diad syudad na Lutsk (Ukraine) tan pinabaleg ya bukor nen nanay to. Nen apat taon to la, inmalis ira ed Crimea. Nen ugaw ni Yuriy labalabay toy football, hockey, tan gymnastics. Antis ya naaresto say trabaho to et electrician.

Lapud binmaleg si Yuriy ya anggapoy tatay to, sinmabid puso to may naaralan tod Biblia ya si Jehova so Ama to tan say mangidedepensa ed sikato. Ontan met, lapud anengneng ton nasusumpal iray propesiya ed Biblia, akombinse si Yuriy ya say Biblia et napanmatalekan ya giya. Insan nen 2000 abautismoan bilang Tasi nen Jehova.

Nen 2002 nagmaliw ya asawa nen Yuriy si Irina ya Tasi nen Jehova met. Parehas ira ya labalabay day ompasyar pian nengnengen iray pinalsa, tan diskobrien iray lugar ya agda ni nakar diad Crimea.

Apektadon maong so bilay dan sanasawa tan dakel lay irap ya dinalan da manlapu lad impanlitis ya anggad impakapriso nen Yuriy. Anggaman ontan, mansiasiansia ran positibo. Agnatalosan na saray kakaaro, kakaabay, tan saray katrabaho da no akin ya apriso si Yuriy lapud saray gagawaen tod relihyon to anta kabkabat da ya desente, maomaong, tan mareen ya too. Akaeskedyul ya ibulos si Yuriy no Disyembre 2029.

Time Line

Mayo 19, 2025

Labin-apat ya Tasi nen Jehova ya tagad Crimea so akapriso natan.
Oktubre 3, 2024

Asentensiaan na anemiran taon ya pakapriso si Yuriy Gerashchenko tan Sergey Parfenovich diad sakey ya penal colony.
Agosto 7, 2024

Ni-raid na saray enforcement officer so abung na limaran Tasi diad Alushta, Razdolnoye, tan Senokosnoye. Kinasoan bilang kriminal si Tamara Brattseva.
Agosto 5, 2021

Inimbestigaan so waloran abung na saray Tasi. Naaresto si Aleksandr Dubovenko tan Aleksandr Litvinyuk.
Oktubre 1, 2020

Ni-raid so siameran abung diad Sevastopol. Inaresto si Igor Shmidt tan impriso antis nin litisen.
Hunyo 4, 2019

Ni-raid na saray special forces officer so samploran abung diad Sevastopol. Kayari to et kinasoan si Viktor Stashevskiy ya mangoorganisa kuno na kimey na saray extremist.
Marso 20, 2019

Ni-raid na saray special forces officer so waloran abung diad Alupka tan Yalta. Tinetepetan si Artem Gerasimov insan kayari to et kinasoan da ya mangoorganisa kuno na kimey na saray extremist.
Nobyembre 15, 2018

Ni-raid na masulok a 200 ya pulis tan saray special forces officer so waloran abung diad Dzhankoy, kaiba lay abung nen Sergey Filatov.