Abril

Sikatayo ey? Kasin say panagnonot tayo et miparad kanonotan na Dios, odino na sayan mundo? Tua, nayarin gagawaen tayo la iray panlabayan na Dios. Kumusta balet so panagnonot tayo? Kasin aaligen tayoy paraan na panagnonot tan panmoria nen Jehova? Kaukolan tayoy mansagpot pian nagawaan itan. Kabaliktaran balet ta agtayo la kaukolay mansagpot pian naalig so panagnonot na sayan mundo. Say rason et lapud apaliberan itayo na espiritu na sayan mundo. (Efe. 2:2) Sakey ni, lapud maslak ya ipapaseseg na sayan mundo so sarilin pankaabigan na too, nayarin makapasagyat itan. On, mairap ya aligen so kanonotan nen Jehova balet main-inomay ya naalig so panagnonot na sayan mundo. Balet no abuloyan tayon impluensyaan na sayan mundo so panagnonot tayo, magmaliw tayo lan makasarili tan labay tayon sikatayo lay mandesisyon no antoy duga tan aliwa. (Mar. 7:21, 22) Importante sirin ya aligen tayo so “kanonotan na Dios,” aliwan say “kanonotan na totoo.” w18.11 18 ¶1; 19 ¶3-4

Seguradon apaseseg si Jesus sanen sikatoy binidbir nen Jehova diad talora ya nanduruman pankanawnawa, diad direktan impansalita To manlapud tawen. Kayarin mismo na bautismo nen Jesus ed Ilog Jordan, imbaga nen Jehova so walad teksto tayo natan. Mapatnag ya si Juan Bautista labat so akarengel ed satan. Insan manga sakey taon antis na impatey nen Jesus, arengel na taloran apostol to iyan imbaga nen Jehova: “Saya so Ana’ko, say inad-arok, ya inabobonan ko. Dengel kayod sikato.” (Mat. 17:5) Tan pigaran agew antis na impatey nen Jesus, akitongtong lamet si Jehova ed Anak to manlapud tawen. (Juan 12:28) Anggano amta nen Jesus ya naeksperiensya toy ansakisakit ya ipapatey tan palson inakusaan ya minudmora toy Dios, impikasi to ya nagawa komon so linawa nen Jehova aliwan say linawa to. (Mat. 26:39, 42) “Sikatoy nansungdo ed panamairapan a poste, imbaliwala to so kababaingan,” agto inanap so panamidbir manlapud mundo, noagta manlapud Ama to.​—Heb. 12:2. w18.07 10-11 ¶15-16

Kayarin mismo na impangigapo nen Jesus ed Pangdem na Katawan, impanengneng to ya sikatoy makmakpel. Panon? Inawat nen Jesus no antoy linawa na Ama to parad sikato, anggano amta to ya sikatoy pateyen nisengeg ed makapabaing ya krimen ya panagmudmora ed Dios. (Mat. 26:65, 66) Pinansiansia nen Jesus so perpekton katooran to pian nigalang so ngaran nen Jehova, suportaan so inkasoberano na Dios, tan nawalaan na ilalon bilay ya andi-anggaan iray magbabawin totoo. Ontan met, imparaan nen Jesus iray papatumbok to ed saray subok ya magano da lan arapen. Napatnagan met so inkakpel nen Jesus nen sikatoy nampokus ed pankaukolan na saray matoor ya apostol to imbes ya diad kapagaan ya nayarin alikna to. Say simplin pangdem, ya inggapo to kayari ton pinataynan si Judas, et mangipanonot ed saray magmaliw ya alanaan a papatumbok to no anto ray gunggona ed nipaagus a dala nen Jesus tan say pagmaliw dan kabiangan na balon sipanan.​—1 Cor. 10:16, 17. w19.01 22 ¶7-8

Oniay inyebat na Ama nen Jesus manlapud tawen: “Inggloriak itan tan igloriak lamet.” Nagogonigon si Jesus lapud balbaleg so responsabilidad to ya mansiansian matoor ed si Jehova. Amta nen Jesus ya sikatoy makaeksperiensya na maruksan panagsiplat tan ipapatey. (Mat. 26:38) Say sankaimportantian ed si Jesus et say pangigloria to ed ngaran nen Ama to. Inakusaan si Jesus ya mumudmoraen toy Dios, tan sikatoy napapagaan ya ompan lapud ipatey to et napabanday so ngaran na Dios. Singa si Jesus, nayarin pampapagaan tayo so pamapabanday na arum ed ngaran nen Jehova. Ompan biktima itayo na ag-inkahustisya ya singa si Jesus. Odino nayarin naaaburido tayo no wala ray palson istorya ya ikakayat na saray onsusumpa. Nayarin nononoten tayo ya napapabanday so ngaran nen Jehova lapud sarayan istorya. Diad ontan iran situasyon, makaligliwan maong ed sikatayo imay imbaga nen Jehova. Seguradon igloria nen Jehova so ngaran to.​—Sal. 94:22, 23; Isa. 65:17. w19.03 11-12 ¶14-16

Agmakapanisia iray disipulo nen Jesus ed nadngel da. Si Jesus, say iilaloan dan mangipawil ed panarian na Israel, et imbaga ton sikatoy asingger lan napairap tan ompatey. Kanian nansalitay apostol Pedro, ya imbaga to: “Kasian moy sarilim, Katawan; ag-iyan balot nagawa ed sika.” Balet inmebat si Jesus: “La kad benegan ko, Satanas! Makasbel kad siak, ta say iisipen mo et kanonotan na totoo, aliwan kanonotan na Dios.” (Mat. 16:22, 23; Gawa 1:6) Panamegley na saratan ya salita, impalinew nen Jesus ya walay pandumaan na kanonotan na Dios tan panagnonot na sayan mundo ya kontrolado nen Satanas. (1 Juan 5:19) Impatnag nen Pedro so makasarilin ugali na sayan mundo. Balet amta nen Jesus ya duma so kanonotan na Ama to. Nanengneng ed saman ya ebat tod si Pedro ya mas pinili toy kanonotan nen Jehova nen say panagnonot na sayan mundo. w18.11 18 ¶1-2

Isip mo pa no antoy nenengnengen nen Jehova sano mantitipon so minilyon ya totoo ed interon mundo parad Pangdem na Katawan. Aliwa labat ya say baleg a grupo na totoo so nenengnengen to, noagta iimanoen to so kada indibidual ya inmatendi. Singa bilang, amta to no siopa iramay matoor ya onaatendi kada taon. Kaibad sikara iramay oonla anggano nipapaarap irad graben panamasegsegang. Saray arum et aliwan regular ya onaatendi ed aral, balet ipapasen dan importantin obligasyon so iyatendi ed Memoryal. Naiimano met nen Jehova iramay pilpilimero day onatendi ed Memoryal, nayarin lapud labay dan naamtaan no antoy nagagawa ditan. Seguradon naliliketan si Jehova no nanenengneng ton dakdakel so onaatendi ed Memoryal. (Luc. 22:19) Balet, sikatoy mas interesado ed rason no akin ya onaatendi ira; importante ed si Jehova so motibo. Kasin labalabay tayoy paibangat ed si Jehova tan ed organisasyon ya uusaren to?​—Isa. 30:20; Juan 6:45. w19.01 26 ¶1-3

Mabulos si Jesus ya ompatey parad saray disipulo to tan mabulos ton inusar so bilay to diad kada agew pian iyuna so pankaabigan da nen say sarili to. Singa bilang, nila to ray papatumbok to anggan sanen sikatoy naknaksawan tan nagogonigon. (Luc. 22:39-46) Tan say sankanonot to et no antoy niiter to ed arum, aliwan say naala to ed sikara. (Mat. 20:28) Kabiangan itayo ed saksakey ya tuan Kristianon impanaagi, tan panliliketan tayon usaren so dakel ya panaon tayo pian imbitaan so arum ya miulop ed sikatayo. Balet, nagkalalo lan labay tayon tulongan iray “kapananisiaan tayo” a nagmaliw ya inaktibo. (Gal. 6:10) Nipanengneng tayoy panangaro tayod sikara no pasesegen tayo ran onatendi ed saray pantitipon, lalo la ed Memoryal. Singa si Jehova tan si Jesus, malikeliket itayo no walay inaktibo ya ompawil ed si Jehova.​—Mat. 18:14. w19.01 29 ¶12, 14; 30 ¶15

Nen inggapo nen Jesus so Memoryal na impatey to, say inusar to et saramay wadman la ya tinapay tan alak parad Paskua. Imbaga nen Jesus ed saray apostol to ya sarayan duaran bengatla so mangisisimbolo ed perpekton laman tan dala to, ya magano to lan ibagat parad sikara. Nayarin agla abigla iray apostol ed inkasimpli na sayan balo tan importante ya pangdem. Akin? Pigaran bulan antis na satan, diad abung na saray maapit a kaaro to​—si Lazaro, Marta, tan Maria—​nambangat si Jesus. Wadman si Marta, balet okupado ed pangipaparaan toy dakel a panangan parad gagalangen a bisita to. Nen naimano iya nen Jesus, maaro ton impetek si Marta, ya tinulongan ton natalosan ya agnaynay ya kaukolan so dakel ya naakan. (Luc. 10:40-42) Kalabas na pigaran bulan, sanen pigaran oras labat lay nakekeraan antis na ipatey nen Jesus, inyaplika ton mismo so simbawa to. Ginawa ton simpli so pangdem ed Memoryal. w19.01 20-21 ¶3-4

Pinagalangan nen Jehova si Jesus diad ag-iilaloan ya paraan sanen sikatoy pinaoli to ed “mas atagey a posisyon” tan inter tod si Jesus so tumang ya sikato labat ni akaawat ed saman ya panaon​—say imortal ya bilay bilang espiritu! (Fil. 2:9; 1 Tim. 6:16) Talagan makapadinayew itan ya impamidbir ed katooran nen Jesus! Antoy ontulong ed sikatayon paliisan ya anapen so panangabobon na sayan mundo? Tandaan ya lanang ya bibidbiren nen Jehova iray matoor ya lingkor to tan lanang to ran tutumangan diad ag-iilaloan iran paraan. Agtayo amta no anto ray ag-iilaloan ya bendisyon ya manatalaran ed sikatayo diad arapen. Balet natan, legan tayon susungdoan iray kairapan tan subok ed sayan mauges ya mundo, lanang tayon tandaan ya sayan mundo, et asingger lan naandi. (1 Juan 2:17) Say maaron Ama tayo, si Jehova et ‘matunong kanian agto lingwanan so gawa tayo tan say aro ya impanengneng tayo parad ngaran to.’​—Heb. 6:10. w18.07 11 ¶17-18

Nen unor lan pangdem nen Jesus kaiba iray apostol to, sankanonot toy nipaakar ed pankakasakey da. Nen nampikasi ya kaiba ira, kinerew to ya amin da et magmaliw komon ya saksakey, a singa sikato tan say Ama to et saksakey. Say pankakasakey da et mabiskeg a prueba, odino malinlinew ya ebidensya, ya imbaki nen Jehova si Jesus diad dalin pian gawaen so linawa To. Say aro so pakabidbiran na saray tuan disipulo nen Jesus tan makatulong itan ed pankakasakey da. (Juan 13:34, 35) Manepeg labat ya indanet nen Jesus so pankakasakey. Naimano ton singa anggapoy pankakasakey na saray apostol, a singa diad samay unor lan pangdem to a kaiba ira. Singa agawa la dati, nansasangsangan da “no siopa so manunaan ed sikara.” (Luc. 22:24-27; Mar. 9:33, 34) Diad sakey met a pankanawnawa, kinerew nen Santiago tan Juan ed si Jesus ya ikdan to ra na atagey a posisyon ed Panarian to.​—Mar. 10:35-40. w18.06 8 ¶1-2

Labay nen Jehova ya paeleten na sanasawa so aroan da pian mansiansia itan legay bilay da. (Mat. 19:3-6) Say pikakalugoran et sakey ed saray sankagrabian ya krimen ya nagawaan na sakey a too. Makatunongan labat sirin ya say pikakalugoran et isesebel na komapito ed Samploran Ganggan. (Deu. 5:18) ‘Kasalanan itan ed Dios’ tan grabe so epekto na satan ed inosentin asawa. (Gen. 39:7-9) Anggano dakel lan taon so linmabas, nayarin nalikna to nin siansia so ansakisakit ya impantraidor ed sikato. Sankanonot met nen Jehova so pankaabigan na saray ananak. Ingganggan nen Jehova iray ateng ya itarya da iray pisikal ya pankaukolan na ananak da, ontan met iray espiritual ya pankaukolan da. Diad amin a pankanawnawa et nepeg ya ibangat na atateng iray ananak da ya aroen si Jehova tan tulongan da ran natalosan tan pablien so Ganggan to. (Deu. 6:6-9; 7:13) Saray atateng et agda nepeg ya ipasen iray ananak da ya singa labat kayarian ya sarag dan paulyanan odino usaren ed aliwan paraan, noagta ipasen da ran tawir o regalon nanlapud si Jehova ya nepeg dan pabpablien.​—Sal. 127:3. w19.02 21 ¶5, 7

Apansiansia nen Job so integridad to diad impanpokus to ed ilalo ya sikatoy tumangan nen Jehova. Sikatoy manisia ya papablien na Dios so integridad to. Anggano wala ray subok ed si Job, sikatoy matalek ya walay naawat ton tumang manlapud si Jehova. Seguradon akatulong itan pian napansiansia toy integridad to. Aliketan ya maong si Jehova ed integridad nen Job kanian inikdan Toy dakel ya bendisyon anggano agni perpekto! (Job 42:12-17; Sant. 5:11) Tan mas dakel nin bendisyon so manatalaran ed si Job. Agmanguuman so Dios tayo. (Mal. 3:6) No tandaan tayo ya papablien toy integridad tayo, mansiansian mabilabilay ed puso tayo so alay abig ya ilalo tayo ed arapen. (1 Tes. 5:8, 9) No maminsan, ompan pakaliknam et sika labat so ontan, balet tandaan mo ya agmo bukbukor. Kaibam so minilyon ed interon mundo ya manmamatoor tan pansiasiansiaen day integridad da. Nakaiba ka met ed grupo na lalaki tan bibii ya mabiskeg so pananisia ra tan apansiansia day integridad da nensaman, anggano nipaarap ira ed ipapatey.​—Heb. 11:36-38; 12:1. w19.02 7 ¶15-16

Natan ya asumpal la so Memoryal ed sayan taon, maabig no itepet tayod sarili tayo: ‘Panon kon mas naalig si Jesus diad panangipanengneng na panangaro? Kasin mas sankanonot koy pankaukolan na saray kapananisiaan ko nen say sarilik? Kasin mas baleg so iilaloan ko ed saray agagi nen say sarag dan gawaen, odino kasin amtak iray limitasyon da?’ Komon ta lanang tayon aligen si Jesus tan “ipatnag [tayoy] pililikna.” Say ganggan ya nodnonoten so Memoryal na impatey nen Kristo et magano lan manampot. Diad “isabi” nen Jesus legan na baleg a kairapan, tiponen to ed tawen iray akeran “pinili to,” tan diad saman et manampot la so pannodnonot ed Memoryal. (1 Cor. 11:26; Mat. 24:31) Anggan sano anampot la so pannodnonot ed Memoryal, seguradon malikeliket iray totoo nen Jehova no nanonotan da iyan simplin pangdem ya mangisisimbolo ed agnaparaan ya inkamapaabeba, inkakpel, tan panangaro ya impanengneng na sakey ya too. w19.01 25 ¶17-19

Pian natalosan tayo ya importante no anton talagay walad loob tayo odino say peteg ya inkatoo tayo, ikompara tayo itan ed kondisyon na laman tayo. Unona, pian mansiansian maksil so laman tayo, nepeg ya masustansia iray kakanen tayo, tan regular tayon man-ehersisyo. Mipadpara, pian mansiansian mabiskeg so espiritualidad tayo, nepeg ya mangan tayoy masustansian espiritual ya naakan tan regular tayon ipanengneng so pananisia tayo ed si Jehova. Nipanengneng tayo itan no iyaplika tayoy nanaaralan tayo tan itongtong tayod arum so pananisia tayo. (Roma 10:8-10; Sant. 2:26) Komadua, no say pangibasiyan tayo labat et say itsura tayo, ompan isipen tayon maksil so laman tayo balet diad tua et wala la manayay sakit tayo ed puso. Mipadpara, no say pangibasiyan tayo labat et say teokratikon rotina tayo, ompan isipen tayo ya mabiskeg so pananisia tayo, balet ompan wala la manayay ontutubon mauges iran pilalek ed puso tayo. (1 Cor. 10:12; Sant. 1:14, 15) Tandaan, labay nen Satanas ya impluensyaan to tayo pian naalig tayoy panagnonot to. w19.01 15 ¶4-5

Tepetan tayoy sarili tayo: ‘Kasin ontan met so gagawaen ko? Kasin aaligen koy ginawa na mapangasin Samaritano?’ (Luc. 10:30-35) ‘Wala ni kasi nagawaan ko pian mas nipanengneng koy panangasi tan makapanggawa na maabig ed saramay maniirap? Singa bilang, wala kasi praktikal a nitulong kod saray maedad lan Kristiano, balo, tan ed saramay ugugaw ya ulila ed espiritual? Kasin siak lay unonan onaasingger pian ‘ligliwaen iramay maer-ermen’?’ (1 Tes. 5:14; Sant. 1:27) No ipanengneng tayoy panangasi ed arum, naliliketan tayo lapud mangiiter tayo. Sakey ni, amta tayon napapaliket tayoy Jehova. (Gawa 20:35; Heb. 13:16) Oniay imbaga nen Arin David nipaakar ed samay mangipapanengneng na konsiderasyon: “Sikatoy bantayan nen Jehova tan pansiansiaen ton mabilay. Sikatoy nibagan maliket diad dalin.” (Sal. 41:1, 2) No ipapanengneng tayoy panangasi ed arum, sakey itayo met ed saramay makaawat na panangasi nen Jehova, tan manresulta itan ed andi-anggaan a liket.​—Sant. 2:13. w18.09 19 ¶11-12

Si Yoshiko, a sakey ya matoor a Kristianon sister, et walay naamtaan ton mauges a balita. Imbaga na doktor to ya pigaran bulan labat lay pambilay to. Antoy reaksion to? Anonotan nen Yoshiko may paborito ton teksto ed Biblia, say teksto ed sayan agew. Kanian kalmado ton imbaga ed doktor to ya sikatoy agnatatakot ta sankabembenan nen Jehova so lima to. Say makaligliwan mensahe ya walad satan a teksto so akatulong ed sayan agi tayo ya sigpot a manmatalek ed si Jehova. Makatulong met ed sikatayo itan a teksto pian mansiansia tayon kalmado no nipapaarap tayod grabe iran subok. Impaisulat nen Jehova ed si Isaias iratan ya salita pian ligliwaen iray Judio ya ibantak ed Babilonia. Balet, sinegurado nen Jehova ya nipreserba itan ya mensahe aliwa labat ya parad pakagunggonaan na saratan ya Judio noagta parad amin ya totoo to manlapud saman anggad natan. (Isa. 40:8; Roma 15:4) Manbibilay tayo la natan ed “mapeligro tan mair-irap a panaon,” kanian kakkaukolan tayo so panamaseseg ya walad libro na Isaias.​—2 Tim. 3:1. w19.01 2 ¶1-2

Diad ontan a situasyon, anggano mansian so sanasawa, sanasawa ni ran siansia tan wala ray probleman arapen da anggano agla ra manamong. Imbaga nen apostol Pablo so sakey a rason na agpansian: “Say agmananisian asawan laki et ipapasen a masanto lapud asawa to, tan say agmananisian asawan bii et ipapasen a masanto lapud mananisian asawa to; ta no andi, saray anak yo et magmaliw ya agmalinis, balet natan et masanto ira.” (1 Cor. 7:14) Dakel ya matoor ya Kristiano so nansiansia ed agmananisian asawa ra anggano agaylay irap so kipapasen da. Balet nen nagmaliw ya managdayew nen Jehova so asawa ra, nibaga ra ya sulit so impansakripisyo ra. (1 Cor. 7:16; 1 Ped. 3:1, 2) Diad interon mundo, dakel so nanengneng tayon maliket ya sanasawa diad Kristianon kongregasyon. Nayarin dakel met so ontan ed kongregasyon yo. Wadtan iray matoor ya brother ya inar-aro day asawa ra tan maaron asawan bibii ya rerespetoen day asawa ra, amin da et ipapatnag dan manepeg labat a pagalangan so panangasawa.​—Heb. 13:4. w18.12 14 ¶18-19

Say Eden et mankabaliksan na “Liket,” tan talagan makapaliket iman ya hardin. Dakdakel so naakan, balibali kaliberliber, tan walay kareenan ed baetan na totoo tan ayayep. (Gen. 1:29-31) Say Hebreon salita parad “hardin” et impatalos ya paradeisos diad Griego. Ibabaga na Cyclopaedia nen M’Clintock tan Strong ya no narengel na sakey ya Griego so salitan paradeisos, say naimadyin to et marakdakep tan maawang a parke ya arawi ed peligro, wala ray manbubungan kakiewan tan kulos ya malinlinew so danum da, insan diad gilig na saratan et mankakabkab ed karikaan iray ulsa tan karnero. (Ikompara so Genesis 2:15, 16.) Impasen na Dios si Adan tan Eva ed ontan ya hardin, sakey a paraiso. Balet agda inunor so Dios. Kanian sikara tan saray ananak da et abalang day pankanawnawa ya manayam ed Paraiso. (Gen. 3:23, 24) Anggapo lay toon nanayam ed saman ya hardin, balet mapatnag ya nansiansia ni itan anggad Delap diad panaon nen Noe. w18.12 3-4 ¶3-5

Saray atateng et pansasagpotan dan ibangat ed ananak da iray maong ya ugali. No unoren na ananak iray imbangat na atateng da, seguradon makapanggawa ra na saray desisyon ya agda pagbabawian. Kanian napaliisan da ray dakel ya problema tan kapagaan. Singa sakey ya maong ya ateng, labay nen Jehova ya nawalaan na sankaabigan ya bilay iray ananak to anggad posible. (Isa. 48:18) Kanian sikatoy angitarya na saray prinsipyo ed moral tan no panon tayon tratoen so arum. No nipaakar ed saratan ya bengatla, papasesegen to itayo ya aligen so paraan na panagnonot to tan tumboken iray estandarte to. Aliwa iyan panameget, imbes, ontulong iya pian onaligwas tan onlaknab so abilidad tayon mannonot. (Sal. 92:5; Pro. 2:1-5; Isa. 55:9) Ontulong met iya pian makapanggawa tayoy desisyon ya manresulta ed liket, legan tayon onaaligwas bilang indibidual. (Sal. 1:2, 3) On, talagan makagunggona tan makapaliket so pangalig ed kanonotan nen Jehova! w18.11 19-20 ¶7-8

Pian tuloytuloy tayon makapanakar ed katuaan, nepeg ya agtayo manpapadaeg ed panedesdes na arum. Nen ginmapo tayon manakar ed katuaan, anguman so relasyon tayod saray aliwan Tasi ya kakaaro tan kapamilya tayo. Say arum et makatalos; say arum balet et kontra ed sikatayo. Nayarin piliten itayo na saray kapamilya, katrabaho, tan kaeskuela tayo ya mibiang ed saray selebrasyon da. Panon tayon nalabanan so desdes ya mibiang ed saray kustombre tan selebrasyon ya agmamapagalang ed si Jehova? Nagawaan tayo itan no sankanonot tayon naynay no antoy panmoria nen Jehova ed saratan ya kagagawa. Makatulong no basaen lamet iray publikasyon tayo ya mangipapaliwawa no iner so nanlapuan na saratan ya popular a selebrasyon. No nonoten tayo ray Makasulatan ya rason no akin ya agtayo mibibiang ed saratan ya selebrasyon, naseguro tayo ya manaakar tayod paraan ya “makapaliket ed Katawan.” (Efe. 5:10) Say panmatalek ed si Jehova tan ed Salita to so manprotekta ed sikatayo manlapud “panggiwgiw ed arap na totoo.”​—Pro. 29:25. w18.11 11 ¶10, 12

No walay biglan nagawa ya pananguman ed bilay tayo, ompan magmaliw tayo lan mapagpaga tan atan lan naynay so sankanonot tayo. Nayarin ontan met komon so agawa ed si Jose. Balet mapatnag ya pinili toy manggawa na maabig anggano mairap so situasyon to, kanian benendisyonan nen Jehova. Anggano walad prisoan, si Jose et makulikuli tan sinumpal toy amin ya ipapagawa ed sikato na manunan opisyal na prisoan, ya singa ginawa to nen manlilingkor nid si Potifar. (Gen. 39:21, 22) Singa si Jose, nayarin nipaarap itayo met ed sakey ya situasyon ya agtayo kontrolado. Balet no mansiansia tayon maanos tan makuli tan no manggawa tayoy maabig anggano mairap so situasyon tayo, manggagawa tayoy bengatlan bendisyonan nen Jehova. (Sal. 37:5) Tua, no maminsan et nayarin “nawewetwet” tayo, balet singa imbaga nen apostol Pablo, ag-itayon balot ‘napaulyan ya anggapoy ilalo.’ (2 Cor. 4:8; paimanod leksab) Magmaliw ya tua ed sikatayo iratan ya imbaga nen Pablo, lalo la no mansiansia tayon akapokus ed ministeryo tayo. w18.10 29 ¶11, 13

Antoy naliknam no say sakey ya kabat mo tan rerespetoen mo et alingwanan toy ngaran mo, odino say mas makapaermen ni ingen et agto ka la nabidbir? Talagan makapadismaya itan. Akin? On ta natural labat ya labay tayon awaten itayo na arum. Tan aliwa labat ya basta bidbiren itayo na arum, noagta labay tayo met ya naamtaan da no siopa itayo tan saray agawaan tayo. (Num. 11:16, paimanod leksab; Job 31:6) Balet singa met ed arum nin natural ya pilalek, say pilalek tayon naapresya na arum et nayarin magmaliw ya aliwan balanse lapud agtayo perpekto. Nayarin anapen tayo so agmanepeg ya panamidbir. Sasagyaten na mundo nen Satanas iray totoo ya pirawaten so magmaliw ya sikat tan nakabkabat pian say imano ra et niyarawi ed samay makanepegan ya nabidbir tan nadayew, say Ama tayod tawen, si Jehova a Dios.​—Apo. 4:11. w18.07 7 ¶1-2

Agtayo la sirin pankelawan ya sarag nen Satanas tan saray demonyo to ya impluensyaan iray totoon walaan na pakayari ya ‘mansalita na katilaan.’ (1 Tim. 4:1, 2) Mas ambelat so eebatan na matitilan lider na relihyon lapud ipepeligro day bilay na totoo ya manisia ed katilaan ya ibabangat da. No panisiaan na sakey ya too so palson bangat insan to gawaen iray bengatlan kabusol na Dios, napepeligro so ilalo ton manbilay ya andi-anggaan. (Os. 4:9) Diad panaon nen Jesus, amta ton papalikdoen na saray lider na relihyon iray totoo. Kanian arap-arapan ton imbagad sikara: “Pakaskasi kayo la, sikayo ran eskriba tan Fariseo a mansimpisimpitan! ta babaliwen yoy dayat tan dalin pian kombertien yo so sakey a too, balet sano sikatoy magmaliw lan ontan, sikatoy gagawaen yon mas makanepegan ed Gehenna [andi-anggaan a kadederal] nen say sikayo.” (Mat. 23:15; paimanod leksab) Ambelat iray salitan inusar nen Jesus nen kinondena to iratan ya palson lider na relihyon. Talagan ‘nanlapu irad ama ran Diablo, a managpatey.’—Juan 8:44. w18.10 7 ¶5-6

Antoy labay ya ibaga nen Jesus? Intuloy ton imbaga: “Manliket kayon maong, ta baleg so tumang yo ed tawen, ta ontan met so impamasegsegang dad saray propeta ya akadkauna nen sikayo.” (Mat. 5:12) Nen sinisiplatan iray apostol tan ingganggan iran ontunda lan manpulong, “tinmaynan irad arapan na Sanhedrin, a malikeliket.” Siempre, agda nanliketan so sakit ya alikna da ed impakasiplatan da. Balet malikeliket ira “lapud awalaan iray pribilehyo a napabanday nisengeg ed ngaran [nen Jesus].” (Gawa 5:41) Natan, maliket met ya mansusungdo iray totoo nen Jehova no napapasegsegang ira nisengeg ed ngaran nen Jesus, odino no onaarap irad mairap ya subok. (Sant. 1:2-4) Singa saray apostol, agtayo panliketan so anggan anton klase na panamairap. Balet no mansiansia tayon matoor ed Dios anggano wala ray subok, tulongan itayo nen Jehova pian makpel tayon makapansungdo. No walad sikatayo so pabor na “maliket a Dios,” siansian maliket itayo anggano wala ray panamasegsegang lapud relihyon odino isusumpa na kapamilya.​—1 Tim. 1:11. w18.09 21 ¶18-20

Dakel so makakaeksperiensya na nanduruman klase na pakakaermenan ed sarayan ‘mapeligron panaon.’ Dakel so ngalngali la onsuko. (2 Tim. 3:1-5) Base ed tantiya, masulok ya 800,000 so ompapatey kada taon lapud manbibikkel ira​—sakey so ompapatey diad kada 40 segundo. Makapaermen ta anggan diad saray agagi et wala ray adaeg na saray problema ra kanian akapambikkel ira. Anggano agmet labay na saray agagi tayo so onsuko, dakel natan so onaarap ed makapa-stress iran situasyon tan kaukolan iran pabiskegen diad aro. Wala ray susungdoan day panamasegsegang tan panagbalaw. Say arum et biktima na panagkritiko odino panagpauges diad pantratrabahoan da. Odino nakekesawan iran maong lapud pano-overtime dad trabaho, odino lapud saray agnaupot ya deadline ya kaukolan dan aboten. Say arum balet et kaukolan dan arapen iray makapakapuy ya problema ed abung, nayarin lapud panagkritiko na agmananisian asawa. Kanian lapud saratan tan arum nin rason, dakel ed saray agagi ed kongregasyon so talagan nakekesawan, parehon diad pisikal tan emosyonal. w18.09 13 ¶3, 5

Saray Kristianon atateng et mikikimeyan ed si Jehova no tutulongan da ray ananak da ya nawalaan na saray teokratikon kalat. Dakel ed saray atateng ya ontan so ginawa ra et linmoob ed full-time ya panaglingkor iray ananak da diad arawin pasen. Say arum et nagmaliw ya misionero; wala ray nagmaliw ya payunir diad lugar ya baleg so pankaukolan ed saray manangipalapag; saray arum balet et manlilingkor diad Bethel. Lapud arawi rad sakey tan sakey, nayarin matalag la ran makapaniiba a singa dati. Anggaman ontan, papasesegen na saray masakripisyon atateng so ananak da ya mantultuloy ed saray asainmin da. Akin? Naliliketan iran maong no nanenengneng dan iyuuna na ananak da iray interes na Panarian. Nayarin dakel ed sarayan atateng so makakalikna ed singa alikna nen Hana, ya angibagan “ipabayes” toy anak ton si Samuel ed si Jehova. Ipapasen na saratan ya atateng ya balbaleg a pribilehyo itan. Anggapo lay arum ya labay da likud ed satan.​—1 Sam. 1:28, paimanod leksab. w18.08 24 ¶4

Ag-imbaga nen Jesus ya imposiblin nagawa itan. Imbaga to met: “Maliket kayo, sikayo ran mairap-bilay, ta nakayarian yo so Panarian na Dios.” (Luc. 6:20) Anggaman ontan, agto labay ya ibagan amin lan mairap-bilay et pinaboran tan onkiwas ed saray bangat nen Jesus. Dakel ed saray mairap-bilay nensaman et agkinmiwas. Malinew sirin ya agtayo nayarin husgaan so relasyon na sakey a too ed si Jehova base ed materyal ya kaykayarian to. Abendisyonan itayo na dakel ya agagi, mayaman tan mairap, ya mangaaro tan manlilingkor ed si Jehova diad interon puso. Bibilinen na Kasulatan iramay mayaman ya “say panilaloan da et aliwan diad agnapanmatalkan iran kayamanan noagta diad Dios.” (1 Tim. 6:17-19) Ontan met, sisimbawaen na Biblia so amin ya totoo na Dios, mayaman tan mairap, a manalwar ira ya agda aaroen so kuarta. (1 Tim. 6:9, 10) On, no lukasan tayo ray mata tayo tan nengnengen tayo ray agagi a singa ed inenengneng nen Jehova ed sikara, agtayo ra husgaan base ed no antoy wala odino anggapod sikara. w18.08 10-11 ¶11-12

Seguradon labalabay tayon ipanengneng so pisasalamat tayod si Jehova lapud pribilehyon nagmaliw tayon totoo to. Apaneknekan tayon makabat so pamidbir ya sikatoy makankayarian ed sikatayo diad mabulos ya impangidedika tayod bilay tayo ed sikato. Determinado tayon ipulisay so kaugsan. Tan inar-aro tan rerespetoen tayo ray agagi tayo, ya bibidbiren tayon kayarian met ira nen Jehova. (Roma 12:10) Oniay sipan na Biblia: “Agpaulyan nen Jehova so totoo to.” (Sal. 94:14) Sayan mabiskeg a garantiya et mansiansia antokaman so onsabi ed sikatayon subok. Anggapon balot so makapangisian ed sikatayo manlapud panangaro nen Jehova, anggan say patey. (Roma 8:38, 39) “No manbibilay itayo tan no ompatey itayo, kien itayo nen Jehova.” (Roma 14:8) Kanian tatalaranan tayo lay agew ya paolien nen Jehova so amin a matoor ya kakaaro ton naandi lad bilay. (Mat. 22:32) Natan ni labat et dakel lan bendisyon so panliliketan tayo. Singa ibabaga na Biblia, “maliket so nasyon a say Dios to et si Jehova, saray totoon pinili to bilang kayarian to.”​—Sal. 33:12. w18.07 26 ¶18-19

Nayarin isipen na arum ya lapud personal iray pigaran pamaakaran, a singa say edukasyon, trabaho, odino karera, et nepeg ya walay kawayangan dan pilien no antoy labay da basta ag-ira nakokonsiensia. Ompan sankanonot da imay imbaga nen Pablo ed saray Kristiano ed Corinto nipaakar ed naakan: “Akin a say kawayangan ko et ukomen na konsiensia na sananey a too?” (1 Cor. 10:29) Tua, walay kawayangan tayon manpili ed sarayan personal a bengatla, balet nepeg tayon tandaan ya walay limitasyon na kawayangan tayo tan amin ya desisyon tayo et walay epekto tod bilay tayo. Lapud satan et imbaga nen Pablo so walad teksto ed sayan agew. Seguradon makatulong itan ed sikatayon nanengneng ya wala ni ray mas importantin ikonsidera nen say sarilin panlabayan tayo sano uusarey kawayangan tayo ed amin ya aspekto na bilay tayo. w18.04 10 ¶10

Say sakey a Kristiano natan et nayarin ibaga ton sikatoy mandadayew ed si Jehova balet manggagawa met na mauges. (Jud. 11) Singa bilang, nayarin bayuboan to so imoral iran pilalek, maagum ya panagnonot, odino pambusol ed kaparan Kristiano. (1 Juan 2:15-17; 3:15) Say ontan ya panagnonot et nayarin mansumpal ed panggawa na kasalanan. Kaleganan to et nayarin sikatoy aktibo ed ministeryo tan regular ed saray aral. Nayarin ag-amta na arum no antoy nononoten tan gagawaen tayo, balet sankanengneng nen Jehova so amin tan amta to no aliwan interon puso itayon ondadapag ed sikato. (Jer. 17:9, 10) Anggaman ontan, ag-onsusukon tampol si Jehova ed sikatayo. No say gagawaen na sakey et manresulta ed pakaarawi tod Dios, sikatoy papasesegen nen Jehova: ‘Pawil ka ed siak.’ Lalo la no wala ray kakapuyan ya lalabanan tayo, labay nen Jehova ya busolen tayo so kaugsan. (Isa. 55:7) No gawaen tayo itan, sikatoy ondapag met ed sikatayo diad pangiter to na kaukolan tayon biskeg ed espiritual, emosyonal, tan pisikal pian “daegen” iray makasalanan ya tendensia tayo.​—Gen. 4:7. w18.07 18 ¶5-6