Say Ag-inimanon Pasakbay

NEN MAYO 18, 1980, tinmerak so Mount St. Helens ed Estados Unidos kayari na mareereen a 123 taon. Say mabiskeg ya interak to so nanggeray na 1,300 pie a manlapud tuktok to, a dinesyang to so 230 kuadrado milyas na agaylay santing ya alusadsar, tan pinatey to so masulok ya 60 totoo.a

Say interak so agsinmabin andian na pasakbay. Ngalngalin duaran bulan ed asakbay, yinmegyeg na malaknab ed saman a pasen, a tinumbokan na dakel nin yegyeg ya ombibiskeg. Nen Marso 27, say palandey so angipugso na asewek na dapol tan petang ed kaatagey na apatiran milyas.b Anggaman say palandey so singa kalmada ed Abril, say nanengneng ya ibibisog so napoporma ed bandad baybay tan ombabaleg na apatiran pie ed kada agew.

Para ed saray sientista sarayan tanda so malinlinew ya angipanengneng na magano lan iterak. Saray pasakbay so niiter pian saray totoo so ontaynan ed palandey. Balet dakel so ag-angimano ed pasakbay.

Si Harry Truman, ya akankayarian na sakey ya abung ed Spirit Lake ya asingger ed sengeg na palandey, so agmalabay ya ontaynan. Sikato so nanayam diman ed 50 lan taon tan agmakapanisian say inad-aro ton palandey so manguman na inkamareen ed kaliberliber to. Arum so nampuesto ed saray kalsada pian mankampo tan bantayan da so palandey diad makapalikdon mareereen a kakiewan.

Sanen sinmabi so abalbaleg ya interak, saray dapol tan ampetang a gas so impugso na palandey diad peles a 200 milyas ed kada oras! Minilyon iran kakiewan so apalanas, tan saray bilay na ag-angimanon totoo so naksep. Arum so inatey a saray kamera ra so wala ed mata ra. Apataplon pien manlelwag a pitek so tinmabon ed si Harry Truman tan say abung to.

Saray pitek ed palandey so onaagus a maples diad 50 milyas ed kada oras. Sanen nampasakbay so sakey a piloto na helicopter ed totoo diad daralanen na agos na pitek, arum so agtinmalineng ed saray salita to. Inkuanto: “Agko napanisiaan. Imbagak ed sikara so onsasabi tan sikara lambengat so nanelek tan nampayapay.” Agnambayag kayari na saman saray elek da so nansumpal a kakigtotan.

Sayan agpanlabay a manisia ed napanmatalkan iran pasakbay so aliwan nikadkaduma, ilautla no saraya so manutukoy ed bengatlan agnin balot naeksperiensian personal na totoo. Ikatunongan dan anggapo so manguman lapud saray kaliberliber a kipapasen so mantutultuloy a parepareho nanlapulad saray agew na atateng da. Say ontan ya awawey so mansumpal a makadesyang a gawaen to so sakey ya agmangimano ed kadaanan a pasakbay diad onsasabin kadederal ya arawin palumbasan to so interak na Mount St. Helens. Anto ‘tan a desyang? Tan anto so awawey yo ed pasakbay? Kasin ibaliwala yo diad agpanisia, odino kasin sikayo so mabulos ya ontalineng ed satan tan manbilay? Nengnengen no anto so wala ed onggendan ya artikulo.

[Paimano ed Leksab]

[Credit Line Parad Litrato ed pahina 3]

H. Armstrong Roberts