Kasin Manbibilay Itayo ed “Panaon na Anggaan”?
“No nipaakar ed sika, O Daniel, gawaen mon maamot iray salita tan tatakan mo so libro, ya anggad panaon na anggaan.”—Daniel 12:4.
SAY mamangan so agutgut. Legan a sikato so tinmangulaw ed bintana na restauran ed pegley-Manhattan a manbanbantag ed Times Square, syudad na Nueva York, saray mata to so pawilpawil a ninmengneng ed baetan na taloran nansisian a relon digital, ya amin so mangikikiddiam na oras ed angkakabaleg iran letra. Sakey a relo so 11:28. Say sananey, anggaman panduaruwaan ed inkaatrasado na oras, so wala ed 11:26, bang say komatlo so abante diad 11:29.
‘Peteg ya aliwan makabaliksan so sakey o duaran minuto,’ nayarin ikuan yo. Salien a kumbensien so sakey a too ed satan, anggaman kuan, ya agto asambot so bus, tren, odino eroplano, aliwan diad saray minuto noagta dia lambengat ed segundo! Say pikabat ed suston oras so importante. Say pikabat ed no iner so kawalaan tayo ed oras na Dios so nagkalalon importante.
Say Posibilidad na Desyang
Siempre, a singa nayarin kabat yo, totongtongen na saray totoo so nipaakar “ed panaon na anggaan”—ikuan na arum ya ‘anggaan na mundo’ odino ‘desyang’—diad saray siglos. Satan so sinalita nen propeta Daniel ed apalabas lan 25 siglos. (Daniel 12:4) Balet natan, unong ed si James David Besser a managsulat, “agla nakaukolan so relihyoso odino mabiskeg a pananisia diad pangawat ed posibilidad na desyang; nakakaukolan to lambengat so iyarap ed balita ed telebisyon.” Kasin sikayo so mipakna?
Andi-duaruwa, gawaen na telebisyon iray balita ed mundo a lalon naasinggeran diad pangiyalis na nagagawa dian mismo ed kuarto tayo. Gawaen toray probleman ompatnag a lalon tamtampol tan lalon personal. Panonotan to itayo a say syudad odino baley so nambubuyak diad sakey a posiblen desyang na nuklar, say anak a laki odino bii so dinuksa diad posiblen daluyon na krimen, say ina odino ama so kinulong na posiblen panangataki na terorista—nayari, amin na sarayan problema so nagawa ed sikatayo. Siansia, sarayan posibilidad ed inkasikaran mismo so agmamaneknek a say desyang so agla manbayag et ondapo ed sikatayo. Balet ta saratan so manggawan mapatnag ya onsabi, a palesaen to so tepet a, Kasin sikatayo la so manbibilay ed “panaon na anggaan?” a lalon wala ed baleg a pankaganatan.
Jesus, Daniel, tan say Anggaan na Mundo
Diad masulok lan 19 siglos, saray babangatan nen Jesus so nantepet ed sikato: “Anto so tanda na kiwawalam tan ed konklusyon na sistema na bengabengatla [“say anggaan na mundo,” King James Version]?” (Mateo 24:3) Diad impangiter to’d sikara na sakey a tanda, sinalita nen Jesus so dakerakel ya ebidensya, amin na satan so diad nantutugyop a dalan a manandan sikatayo la so akarateng “ed konklusyon na sistema na bengabengatla.” Ibukay mo so Bibliam ed Mateo kapitulo 24 tan 25, Marcos kapitulo 13, tan Lucas kapitulo 21, tan saratan so basaen.
Nayarin mankelaw kan makaamta a say binasam so ngalngalin kapadpara na sumarya na balita ed telebisyon natan. Nayarin abasam so nipaakar ed saray bakabakal, angkabaleg iran yegyeg, salot, tan kakisiran na tagano—amin so nagagawa ed sankagloboan a kalaknab. Abasam met so nipaakar ed “irap na nasyones, ya agda amta so dalan a pawayan,” tan nipaakar ed saray totoon “napupunaw ed takot tan panigagel ed saray bengatlan onsasabi ed panaayaman a dalin.” Kasin makaromog ka na mas lalon matukoy iran salita diad paneskribe na kipapasen na mundo, a sikato so malaknab ya ibabaga na saray programa ed telebisyon natan?—Lucas 21:10, 11, 25, 26.
Sayan mabiskeg a nanenengneng ya ebidensyan sikatayo la so manbibilay ed “panaon na anggaan” so aliwan amin a wala ed sikatayo. Unong a naimano tayo la ed tagey, et naromog tayo so manangipaliwawan ebidensya diad ipawil ed sananey a 500 taon diad agew na Judion propeta Daniel. Sikato so tinukoy nen Jesus diad ngaran, tan inturo to so kasumpalan na propesiya to. (Ipareng so Mateo 24:3, 15, 21 ed Daniel 11:31; 12:1, 4.) Diad panggawa ed saya, impanengneng nen Jesus ya agto impasen so “Daan a Sipan” iran salita nen Daniel a nampaso la odino aliwan makabaliksan. Nisay ontan itayo met.
Imanoen so panulibayan na saray salita nen Daniel tan ed saraman so salita nen Jesus a singa nidatak ed tagey. Insan tepetan mo so inkasika, ‘Agta sasalitaen da so nipaakar ed parehon bengatla?’
Mapatnag a si Daniel tan si Jesus et impasakbay da so parehon bengatla, “say panaon na anggaan,” a kaleganan na satan a panaon et si Kristo so presente ed maarin pakayari. Diad anggaan na satan a panaon, et deralen to so amin a kakabusol to ed dalin diad baleg a kairapan. Balet saray totoo na Dios so niliktar.
Kasin labay mon sika so kaiba na saraman so niliktar? Sirin imanoen so ebidensya ya ipipresenta nen Daniel nipaakar ed “panaon na anggaan.” Tulongan to itayon mangamtan eksakto ed no iner so kawalaan tayo ed madibinon oras.
[Kahon ed pahina 4]
DANIEL
“Diad panaon na anggaan . . . si Miguel [Jesu-Kristo] so ontalindeg . . . tan peteg a nagawa so panaon na irap ya agni agawa nanlapulad inlesa na sakey a nasyon. . . . Tan legan na satan a panaon et say katooan mo so makaliktar.”—Daniel 11:40; 12:1.
JESUS
“Anto so tanda na kiwawalam tan ed konklusyon na sistema na bengabengatla? . . .
Wala so baleg a kairapan ya agni agawa nanlapulad gapo na mundo . . .“Anggad saratan ya agew so napatikeyan, anggapo so laman a nilaban; balet . . . saratan ya agew so napatikeyan.”—Mateo 24:3, 21, 22.