Kasin Say Arapen So Maudiem a para ed Saray Matatatken?
“SIAK so tobonbalo nensaman,” so inkuan nen Arin David. “Siak met la so tinmatken.” (Salmo 37:25) Diad panaon na Biblia say matatken so pinagalangan a minoridad. No say peles a kurang so mantultuloy, anggaman kuan, saray matatken so agla mabayag et aliwa laran minoridad nisay napagalangan.
Diad Estados Unidos lambengat, wala so kinalkulon 26 milyon a totoon manedad na masulok ya 65 taon. Diad taon 2040 et sayan bilang so nayarin ngalngalin mamitlo ed karakel! Unong ed magasin ya Asiaweek, arum a nasyon ed Asia so “maniilalo ed bilang na matatatken da a nadoblian ed ontumbok a dekada.” Say ilalo na saray matatatken a ngalngalin mas dakel nen saray walad kalangweran, anggaman kuan, so agmangipapasingayew na maabig ed saray matatatken. Dakel lan bilang so akaromog na inkasikara a maniirap odino andian na ayaman. Arum so natataynanan a mankapuy ed saray ospital tan diad saray panagkumponiyan iran abung—a begtebegtew, agnadadalaw, tan agnakukumponi. Saray makapakebbiew a kaso na panamaulian tan panangabuso so nibalita ya anggan diad saray bansan saray atateng so naugalian a galgalangen.
Insulat nen G. M. Ssenkoloto ed magasin a World Health: “Unong ed tradisyon ed kaslakan a bansa ed Africa, tan peteg a diad kaslakan a Komatlon Mundo, kada pamilya so mangumponi ed saray akukulaw to. Sakey a biin andian na anak a mangumponi ed sikato so inasikaso na kakaabay odino na interon sitio.” Imbalita to, anggaman kuan: “Saray ababayaglan ugali so manguuman. Saray mairap a kipapasen ed ekonomya, saray sinasaol a panangibunog ed kaykayarian, say pampirawat ed materyal a bengatla, say pambanikel ed dilin-kagalangan tan estado—amin na sarayan sengegan so manatalona ed tradisyonal iran positibon kablian no nipaakar ed pananulong ed saray matatatken.”
Saray salita na managsulat na Biblia a si Agur so sirin napapaneknekan a tua a malaknab: “Wala so sakey a kapolian ya ayewen to so anggan ama to tan agto benditoen so ina to.” (Uliran 30:11) On, saray matatatken so nanaablog ed posisyon na kagalangan a nanggayagaan da nensaman. Dakel so manmoria ed sikara a pakabelatan ed sosyal imbes a sikara so makatulong. Diad maslak a kabiangan, saray iilaloan da so nengneng toy maudiem.
Panon, anggaman kuan, so panmoria na saray tuan Kristianos ed saray matatatken? Kasin pansiansiaen da so “tradisyonal a positibon kablian” nipaakar ed sikara?