Balita na Saray Manangiyabawag ed Panarian

Maliket ya Impantutuyaw ed Brazil

Diad 67 nampasal-ed-Gilead a misioneron peles a manlilingkor ed Brazil, 63 so nankakasakey ed sangan opisina tan nampaala ed sayan maawaran a retrato. Sayan maliket ya impantutuyaw so agawa nen Nobyembre 18, 1986, legan na dalaw nen A. D. Schroeder, sakey a membro na Mananguley ya Ulop na saray Tasi nen Jehova ed Brooklyn, Nueba York.

Saman so 41 taon ya akauna na ngalngali ed saman ya agew​—diad Nobyembre 17, 1945​—a duaran graduado na inmunan klase na Watchtower Bible School of Gilead so sinmabi ed Brazil. Para ed sakey ed sikara, si Charles Leathco (beneg, kawigi ed sentro), saya so nikadkaduman impantutuyaw lapud sikato tan si bisitan Charlotte Schroeder so sankaklasiyan ed Gilead, tan si Brother Schroeder so sakey ed saray instruktor da.

Nanlapulad saman ya inmunan klase, sakey a dagup na 258 misionero so sinmabi ed Brazil. Diad limog da et 16 so taga Brazil. Sakey ed sikara et si Augusto Machado (arap a kawigi), so akaaral na katuaan ed sakey ya akaunan misionero, linma ed Gilead tan pinmawil ed Brazil. Sikato so nanlingkor ed sangan opisina ed unor a 30 taon tan natan et sikato so coordinator na Branch Committee. Anggaman dakel ed saray misionero so agla manseserbi ed misioneron lawak, say agawaan dan maabig a kimey so nansiansia. Nen 1945 et wala lambengat so 394 a manangipalapag na Panarian ed satan a dalin; natan et say Brazil so akalampas la ed 200,000 a bilang, ya angireport na pantok a 201,226 manangipalapag nen Pebrero 1987.

Agaylan gayaga ed saray misioneron taga Brazil, ugaw tan matatken, so pannonot ed sayan maliket ya impantutuyaw nipaakar ed amin a makapakelaw a kimey ed apabalas a 41 taon.