Lawas Gegemtanen so Maaron Kaabigan
“Say mangegemtan na kaptekan tan maaron-kaabigan so makaromog na bilay, inkatunong tan dayew.”—ULIRAN 21:21.
1. Akin a nepeg tayon ilaloan iramay niwanwan na espiritu na Dios a mangipanengneng na maaron-kaabigan?
SI Jehova so mauyamo tan mapangasi. Sikato so “sakey a Dios a mapangasi tan maaro, matantan a manpasnok tan daakan ed maaron-kaabigan tan katuaan.” (Exodo 34:6, 7) Sirin, natalosan a say bunga na masanton espiritu to et mangilaktip ed aro tan kaabigan.—Galacia 5:22, 23.
2. Anto iran alimbawa so kunsideraen tayo natan?
2 Saramay niwanwan na masanton espiritu nen Jehova, odino aktibon puersa, so mangipanengneng na bunga to a kaabigan. Mangipanengneng ira na maaron-kaabigan ed pisiglaotan da ed arum. Peteg, tutumboken da so alimbawa nen apostol Pablo, irerekomenda ra so inkasikara a bilang ministro na Dios “diad panamegley na kaabigan” tan ed arum iran dalan. (2 Corinto 6:3-10) Say mauyamo, mapangasi, manamerdonan espiritu ra so mitunosan ed personalidad nen Jehova, a “daakan ed maaron-kaabigan” tan say Salita to et nankarga na dakel iran ehemplo na kaabigan. (Salmo 86:15; Efeso 4:32) Anto so naaralan tayo manlapud pigarad saraya?
Say Kaabigan so Manggawa ed Sikatayon Andi-siblet tan Maparawes
3. Panon a maalimbawa si Abraham ed panangipanengneng na kaabigan, tan anton panamaseseg so inter nen Pablo mitukoyan ed saya?
3 Say patriarkan Abraham (Abram)—“kaaro nen Jehova” tan “say ama na amin a walaan na pananisia”—so angiletneg na maabig ya alimbawa ed panangipanengneng na kaabigan. (Santiago 2:23; Roma 4:11) Sikato tan say pamilya to, a pati kaanakan ton Lot, so tinmaynan ed Caldeon syudad na Ur tan linmoob ed Canaan diad ganggan na Dios. Anggaman si Abraham so matatatken a laki tan ulo na pamilya, sikato so mauyamo tan andi-siblet diad impangiyabuloy ed si Lot a mamili ed marikan daldalin, ingen sikaton mismo so angala ed no antoy atilak. (Genesis 13:5-18) Nayarin mipadparan kaabigan so mamakiwas ed sikatayon mangiyabuloy ed saray arum a nawaalaan na saray pankaabiganan ed pansakripisyo tayo. Say ontan ya andi-siblet a kaabigan so mitunosan ed konseho nen apostol Pablo: “Mantultuloy ya anapen komon na balang sakey, ya aliwan pankaabiganan ton dili, noag ed kapara to a too.” Si Pablo a mismo et ‘amaliket ed amin a totoo ed amin a ganagana, ya agnananap ed dilin pankaabiganan to noagta parad karaklan, ta pian nilaban ira.’—1 Corinto 10:24, 33.
4. Panon ya atumangan si Abraham tan si Sara lapud impangipanengneng na kaabigan ed nengneng na panamarawes?
4 No maminsan say kaabigan et diad nengneng na impapuson panagparawes. Si Abraham tan asawa ton, si Sara, so mauyamo tan amarawes ed taloran sangkailin sinmamar ed aminsan ya agew. Kinumbinse ira nen Abraham a mansiansian magano, leleg a sikato tan si Sara et mangganat a mangiparaan na maabig a putahe parad saray bisita. Saraman a sangkaili et angheles nen Jehova, a sakey ed sikara et angipasabi ed sipan a say akulaw tan lepes a Sara et nawalaan na anak. (Genesis 18:1-15) Agaylan sakey a tumang ed maabig a panagparawes!
5. Diad anton dalan ya angipanengneng si Gayo na kaabigan, tan panon tayon makapanggawa na mipadpara?
5 Sakey a dalan a nipanengneng na amin a Kristiano so kaabigan et diad pagmaliw a maparawes. (Roma 12:13; 1 Timoteo 3:1, 2) Kanian, saray ariripen nen Jehova et siuuyamon angilaknab na panamarawes ed saray managbiahen manangasikaso. Manangipanonot iya ed kaabigan ya impanengneng na inmunan-siglon Kristianon Gayo. Sikato so nanggawa na “sakey a matoor a kimey” diad impangabrasan sipaparawes ed ombibisitan agagi—tan sikaray “sangkaili” a datin agto kabkabat. (3 Juan 5-8) Gendagendat, kabat tayoramay siuuyamon panginanatnatan na panamarawes. Nayarin naimano tayo a sakey ya agin bii ed espiritual so maermen. Nayarin say asawa to et agmananisia odino adispelon too. Agaylan pankanawnawa so pangipanengneng na kaabigan diad pangimbita ed sikaton mangayaga ed espiritual a pililimog tan sakey a panangan a kaiba so pamilya tunggal paminsan! Anggaman agtayo manponsia, maseguron say pamilya tayo so makaromog na gayaga ed pangipanengneng na kaabigan ed ontan ya agin bii. (Ipareng so Uliran 15:17.) Tan andiduaruwan ibalikas to so otang na linawa to ed saya diad sinalita odino ed nengneng na notan pisasalamat.
6. Panon ya impanengneng nen Lydia so kaabigan, tan akin ya importanti a mangipanengneng na panamabli ed maabig iran gawa?
6 Kayari inkabautismoan na debotadon bii a si Lydia, “inkuanto a tekep na kerew: ‘No sikayon totoo [Pablo tan saray kaulop to] so mangukom ed siak a matoor ed si Jehova, loob kayo ed abung ko tan manayam.’ Tan apaloob to kami,” inyarum nen Lucas. Andiduaruwa, a naapresya so kaabigan nen Lydia. (Gawa 16:14, 15, 40) Balet say isaew a pangipanengneng na apresasyon so makaderal. Diad sakey ya okasyon, sakey a manedad na 80 ya agin bii a limitado ed biskeg tan pinansyal so siuuyamon angiparaan na putahe parad pigaran bisita. Sikato so naermenan a tuloy sanen sakey a tobonbalon laki so ag-angipakabat a sikato so agmakakar. Diad sananey ya okasyon, duaran agagin bibii so akaliwat ed sakey a panangan ya imparaan na sakey a kalangweran a bii a nagkalautlan parad sikara. “Siak so aseldet,” inkuanto, “ta anggapoy akanonot anggan sakey. . . . mas lablabayen kon narengelan ya alingwanan da so nipaakar ed pangdem, balet imbes anggapo so agin biin siuuyamo o maaron ontawag ed siak.” Kasin say bunga na masanton espiritun kaabigan so mamakiwas ed sikayon mamabli tan maasikaso diad leksab na mipadparan sirkumstansya?
Say Kaabigan so Manggawa ed Sikatayon Makonsidera
7. Anto punto nipaakar ed kaabigan so niyilustra ed sagpot a ginawa ed itumbok ed saray kaliktan nen Jacob ed panagponpon?
7 Nepeg a say kaabigan so manggawa ed sikatayon makonsidera ed saray arum tan ed dugan kalkaliktan da. Diad pangiyilustra: Si Jacob (Israel) et kinerew to so anak ton Jose a mangagamil na maaron-kaabigan ed sikato diad agpanponpon ed sikato diad Ehipto. Anggaman mankaukolan iya a say bangkay nen Jacob et awiten ed arawdawi, si Jose tan arum iran anak nen Jacob so “angiyakar ed sikato ed dalin na Canaan tan sikato so imponpon da ed ungib na uma na Macpela, a sinaliw nen Abraham ya uma pian kayarian a pomponan ed si Efron a Jeteo a kapetekan na Mamre.” (Genesis 47:29; 49:29-31; 50:12, 13) Mitunosan ed satan ya alimbawa, agta say maaron-kaabigan et mamakiwas ed sikatayon ontumbok ed naawat a Makasulatan ya oksuyan na panagponpon a kaliktan na sakey a membro na Kristianon pamilya?
8. Anto so ibangat ed sikatayo na kipapasen nen Rahab nipaakar ed pamales ed kaabigan?
8 Sano ipanengneng na arum ed sikatayo so maaron-kaabigan, agta nepeg ya ibalikas tayo so apresasyon odino ombales ed arum a dalan? Maseguron ontan itayo. Si Rahab a balangkantis so angipanengneng na kaabigan diad impangiyamot ed saray Israelitan tiktik. Kanian, angipanengneng iray Israelita na maaron-kaabigan diad impangiliktar ed sikato tan sankaabungan to sanen intalaga dan deralen so syudad na Jerico. (Josue 2:1-21; 6:20-23) Agaylan maabig ya alimbawa a mangipapatnag a nepeg tayon balesan so kaabigan diad pagmaliw a makonsidera tan mauyamo ed sikatayon dili!
9. Akin a nikuan yon manepeg so ikerew na pangipanengneng na kaabigan na siopakaman?
9 Nipaakar ed satan, manepeg ya onkerew ed siopakaman a mangipanengneng na kaabigan ed sikatayo. Saya so ginawa nen Jonathan, anak na inmunan ari na Israel, si Saul. Kinerew nen Jonathan ed inadaro ton mas-malangwer a kaaron David a mangipanengneng na maaron-kaabigan ed sikato tan ed sankaabungan to. (1 Samuel 20:14, 15; 2 Samuel 9:3-7) Anonotan iya nen David sanen binmales parad saray Gabaonita a pinasakitan nen Saul. Diad pakanonot ed “samba nen Jehova” ed baetan to tan si Jonathan, angagamil si David na maaron-panangasi diad impangiliktar ed bilay na anak nen Jonathan a si Mefiboset. (2 Samuel 21:7, 8) Mipadpara ta met itayo ‘ya abuloyan a say On et On’? (Santiago 5:12) Tan no sikatayoray mamatatken ed kongregasyon, kasin mapangasi tayo met sano nakakaukolan na kapananisian so napanengnengan na maaron-kaabigan?
Say Kaabigan so Mamabiskeg na Buknol
10. Panon ya abendisyonan so maaron-kaabigan nen Rut?
10 Say maaron-kaabigan so mamabiskeg na saray buknol na pamilya tan mangiyalibansa na liket. Saya so nipanengneng ed kipapasen na Moabitan si Rut. Sikato so nankimey a bilang sakey a managtudtor ed uma na matatken lan Boaz ya asingger ed Betlehem, ya angitarok na tagano parad inkasikato tan ed abalo tan mankakaukolan a katulangan ton bii, si Noemi. (Rut 2:14-18) Diad saginonor imbaga nen Boaz ed si Rut: “Walan imbalikas mon magmaong so maaron-kaabigan mo ed kaunoran a pankanawnawa nen diad inmunan pankanawnawa, diad agmo intumbok ed tobonbalon lalaki balanglan duka odino mayaman.” (Rut 3:10) Ununa, impanengneng nen Rut so maaron-kaabigan ed si Noemi. “Diad kaunoran a pankanawnawa,” imparungtal na Moabita so maaron-kaabigan diad mabulos ya impiasawa ed matatken lan Boaz ta pian mamawala na sakey a ngaran nisesengeg ed inatey ya asawa to tan parad akulaw lan Noemi. Diad panamegley nen Boaz, si Rut so nagmaliw ya ina na laki nen David a si Obed. Tan sikato so tinumangan na Dios na “naspot a gungguna” diad impagmaliw ya ateng nen Jesu-Kristo. (Rut 2:12; 4:13-17; Mateo 1:3-6, 16; Lucas 3:23, 31-33) Agaylan bendisyon so kabaliksan na maaron-kaabigan nen Rut parad sikato tan ed pamilya to! Natan, saray bendisyon, liket, tan sakey a manamabiskeg na saray buknol na pamilya so nagawa met sano ondaak so maaron-kaabigan ed maridios iran ayaman.
11. Anto so walan epekto na kaabigan nen Filemon?
11 Say kaabigan so mamabiskeg ed saray buknol ed limog na saray kongregasyon na totoo nen Jehova. Say Kristianon laki a si Filemon so kabkabat lapud impangipanengneng na maaron-kaabigan ed saray kapananisiaan. Imbaga nen Pablo ed sikato: “Misalamatak ya andi ebas ed Dios ko sano salambiten ta ka ed saray pikakasik, legan a narengelan ko so arom tan pananisiam a wala ed Katawan a Jesus tan nipaakar ed saray amin a sasanto . . . a wala so dakel a gayaga tan ligliwa ed siak lapud arom, ta saray abig linawa na sasanto so walan aligliwa ed panamegley mo, agi.” (Filemon 4-7) Agsalitaen na Kasulatan no panon a saray abig a linawa na sasanto so aligliwa ed panamegley nen Filemon. Anggaman ontan, mapatnag a nipanengneng to so maaron-kaabigan ed kaparan alanaan ed nanduruman dalan ya amaneknek a makaligliwa ed sikara, tan saya so andiduaruwan amabiskeg ed saray buknol ed baetan da. Mipadparan bengatla so nagawa sano saray Kristiano so mangiparungtal na maaron-kaabigan natan.
12. Anto so nansumpalan ed impangipanengneng nen Onisifero na kaabigan?
12 Say kaabigan nen Onesiforo so walaan met na maabig ya epekto. “Yabuloy komon na Katawan so panangasi ed sankaabungan nen Onesifiro,” inkuan nen Pablo, “ta lawas ton itatarok so ligliwa ed siak, tan agto imbaing so gulong-gulong ko. Noag ingen, sanen wadman ed Roma, inanap toak a siseseet et nalmo toak. Yabuloy komon na Katawan a sikato so makaromog na panangasi manlapud si Jehova ed saman ya gew. Tan kabat mon maomaong so amin na saray linkor to ed Efeso.” (2 Timoteo 1:16-18) No panggunaetan tayo ed inkasikatayo ya ipanengneng so maaron-kaabigan ed kaparan managdayew, sikatayo so makapanliket tan makapabiskeg ed saray buknol na sanaagin panangaro ed leet na Kristianon kongregasyon.
13, 14. Panon a say kongregasyon ed Filipos so ehemplo, tan panon so inkiwas nen Pablo ed kaabigan to?
13 Sano say interamentin kongregasyon so mangipanengneng na maaron-kaabigan ed kaparan managdayew, saya so mamabiskeg ed saray buknol ed baetan da. Say ontan a maapit a buknol so niwala ed baetan di Pablo tan say kongregasyon na syudad na Filipos. Diad tua, sakey a rason a sikato so nansulat na sulat to ed saray taga-Filipos so pangibalikas na pisasalamat lapud kaabigan tan materyal a tulong da. Insulat to: “Diad gapo na panangiyabawag na maong a balita, sanen tinmaynan ak ed Macedonia, anggapo so kongregasyon ya angiba ed siak ed pamaakaran na panangiter tan panangawat, noag sikayo labat; ta, anggan dia ed Tesalonica, angipawit kayo na bengatla ed siak ya aminsan tan pinidua lamet parad nakaukolan ko. . . . walaan ak na amin a bengabengatla a nagnap tan walaan na inkadaakan. Napnek ak, ta walan inawat ko natan ed Epaprodito so ganaganan nanlapud sikayo, sakey a samiong ya ambalingit ya angob, sakey a makanan bagat, makapaliket ed Dios.”—Filipos 4:15-18.
14 Agpankelawan a saray mauyamon taga-Filipos et nilaktip ed saray pikakasi nen Pablo! Inkuanto: “Lawas misalamat ak ed Dios ko ed amin a pakanonotan ed sikayo ed kada pikakasik parad sikayon amin, unong a gawaen ko so pikakasik a tekep na gayaga, lapud tulong a ginawa yo nipaakar ed maong a balita nanlapud inmunan agew ya anggad natan.” (Filipos 1:3-5) Say ontan a mauyamon-impanpuso tan mabunlok a pananuporta ed panagpulong a kimey na Panarian so agbalot manggawad kongregasyon a duka. Kayariy sipapangasin ginawa na saray taga-Filipos nipaakar ed sayan bengatla, amaseguro si Pablo ed sikara: “Kayari na satan, nagnagnap a naitdan kayo na ganaganan nakaukolan yo na Dios unong na kayamanan to dia ed gloria ed panamegley nen Kristo Jesus.” (Filipos 4:19) On, balesan na Dios so kaabigan tan inkabunlok. Ikuan na Salita to: “Balang sakey, antokaman a maabig a gawaen to, ontan so awaten to lamet manlapu ed si Jehova.”—Efeso 6:8.
Sano Ipanengneng na Bibii so Kaabigan
15, 16. (a) Panon ya anonotan so kaabigan nen Dorcas, tan anto so agawa sanen sikato so inatey? (b) Panon a saray mauyamon impanpuson Kristianon bibii so napano na maabig iran gawa natan?
15 Say maaron-kaabigan nen babangatan a Dorcas (Tabita) ed Joppe so atumangan. “Sikato so napno na saray maong a gawa tan langkap na panangasi,” tan sanen ‘sikato so nansakit tan inatey,’ imbaki na saray babangatan si Pedro diad Lidda. Diad insabi to, “inyakar da ed atagtagey a silir; et sikato so niliktob na amin a bibii a babalo a mannangis tan ipapanengneng daray aysing tan kawes ed sikato a ginawa nen Dorcas nen walani ed sikara.” Iretrato so eksena: Maermen, mannangis a bibiin babalo so angibaga ed apostol no panon kaabig si Dorcas tan impanengneng da ed sikatoramay kawes a bilang ebidensya na aro tan kaabigan to. Pinapaway iran amin, si Pedro so tinmalimukor a nampikasi tan inmarap ed bangkay. Talineng! Inkuanto: “Tabita, alagey ka!” Tan nia! “Inmurikat toray mata to et sanen anengneng to si Pedro, binmangon. Inegnaan to ed lima et pinaalagey to, insan tinawag toray sasanto tan bibiin babalo tan imparungtal to a mabilay.” (Gawa 9:36-41) Agaylan bendisyon manlapud Dios!
16 Saya so inmunan nikurit a kiolin ginawa na sakey ya apostol nen Jesu-Kristo. Tan saray sirkumstansya ya angitonton ed sayan makapakelaw a milagro so nilamot ed kaabigan. Siopa so makapangibaga a si Dorcas et napaoli ed bilay no sikato et agnapno na maabig iran gawa tan langkap na panangasi—no sikato so agnapno na maaron-kaabigan? Aliwa lambengat a si Dorcas tan saraman a babalon bibii so abendisyonan balet say milagro na kioli to so angiter na pantasi ed gloria na Dios. On, “saya so akabatan ed lapag a Joppe, tan dakel so nagmaliw a mananisia ed Katawan.” (Gawa 9:42) Natan, saray mauyamon impanpuson Kristianon bibii so napno met na maabig iran gawa—palagi diad pandait na saray kawes parad kapananisiaan, pangitatarya na saray tagano parad matatken la ed limog tayo, a mangilaknab na panamarawes ed saray arum. (1 Timoteo 5:9, 10) Agaylan pantasi iya ed saray mangiimano! Manuna ed amin, alay liket tayo a say maridios a debosyon tan maaron-kaabigan so mamakiwas ed sayan ‘baleg ya armada na bibii a mangipaamta ed maong a balita’ ed gloria na Dios tayo, si Jehova!—Salmo 68:11.
Mantultuloy a Gegemtanen so Maaron-Kaabigan
17. Anto so nibabaga ed Uliran 21:21, tan panon a saratan a salita et niyaplika ed saray maridios ya indibidual?
17 Nakaukolan a gegemtanen na amin a manpilalek ed pangabobon na Dios so maaron-kaabigan. “Say mangegemtan na kaptekan tan maaron-kaabigan so makaromog na bilay, inkatunong tan dayew,” ikuan na makabat ya uliran. (Uliran 21:21) Say maridios a too so siseseet a mangegemtan ed inkatunong na Dios, lawas iwawanwan na madibinon estandarte. (Mateo 6:33) Sikato so mantultuloy a mangipapanengneng na matoor ya aro, odino maaron-kaabigan, ed saray arum diad materyal tan nagkalautla ed espiritual iran dalan. Sirin, naromog to so inkatunong, ta say espiritu nen Jehova so ontulong ed sikato a manbilay ed sakey a matunong a dalan. Diad tua, sikato so ‘akawesan a tekep na inkatunong’ a singa say maridios a lakin si Job. (Job 29:14) Say ontan a too so agmananap na dilin gloria to. (Uliran 25:27) Imbes, awaten to so antokaman a glorian iyabuloy nen Jehova ed sikaton awaten, palagi diad nengneng na respeto ed kaparan totoo a sinagyat na Dios a mideneng ed sikaton sipapangasi lapud dilin maaron-kaabigan to ed sikara. Niarum ni, saraman so sitotoor a manggagawa na linawa na Dios so makaromog na bilay—aliwa lambengat ed pigaran maganon ilabas na taotaon noagta ed ando lan ando.
18. Akin a nepeg tayon gegemtanen so maaron-kaabigan?
18 Sirin, amin komon a mangaro ed si Jehova a Dios so mantultuloy a mangegemtan na maaron-kaabigan. Sayan kalidad so mamaaro ed sikatayo ed Dios tan ed saray arum. Mangiyalibansa itan na panamarawes tan gawaen to itayon makonsidera. Say kaabigan so mamabiskeg na saray buknol ed limog na pamilya tan ed say Kristianon kongregasyon. Saray bibiin mangipapanengneng na maaron-kaabigan so napabli tan narespeto. Tan amin na saramay mangegemtan na sayan maglorian kalidad so mangitarok na dayew ed Dios na maaron-kaabigan, si Jehova.
Panon so Pangebat Yo?
◻ Panon a maalimbawa si Abraham ed pangipanengneng na kaabigan?
◻ Anto so ibangat ed sikatayo na kipapasen nen Rahab nipaakar ed pamales na kaabigan?
◻ Panon so impangipanengneng na kongregasyon na Filipos na kaabigan?
◻ Panon a saray mauyamon impanpuson Kristianon bibii so napno na maabig iran gawa natan?
◻ Akin a nepeg tayon gegemtanen so maaron-kaabigan?