‘Ipatnag Yo so Iyaabante’
“Natan ta siak so nagmaliw a matatken, pinaulian koray kagagawa na ugaw.”—1 CORINTO 13:11.
1. Panon a say ibubulaslas et sakey a paneknek ed pakelaw na inkapalsa?
MANLAPUD sakey ya iknol a melmelag a nanengneng lambengat ed sakey a mikroskopyo, nayarin ombaleg so balyena ed sakey a palsan masulok a sanlasus piye ed dukey tan manbelat na ngalngali 80 tonelada. Mipadpara, manlapud sakey ed saray sankamelagan a bukel, say higanten sequoia so nayarin ombaleg ed ngalngali 300 piye ed kaatagey. Tua, say ibabaleg so sakey ed saray pakelaw na bilay. A singa ed impangidalatdat nen apostol Pablo, sikatayo so nayarin mantanem tan mansalog, balet say “Dios so mamabaleg.”—1 Corinto 3:7.
2. Anton nengneng na ibubulaslas so nipasakbay ed Biblia?
2 Anggaman ontan, wala so sananey a nengneng na ibubulaslas a makapakelaw a singa ontan. Saman so impasakbay nen propeta Isaias: “Say daiset a mismo so magmaliw a sanlibo, tan say melag magmaliw a mabiskeg a nasyon. Siak a mismo, si Jehova, so mamapeles ed atan diad dilin panaon to.” (Isaias 60:22) Sayan propesiya so nipaakar ed ibubulaslas na totoo na Dios, tan mangagawa itan na baleg a kasumpalan ed agew tayo.
3. Panon a say report ed 1991 serbisyon-taon so mangipanengneng a si Jehova so mamapapeles ed kimey na totoo to?
3 Say report ed 1991 serbisyon-taon ed sankamundoan a kimey na Tastasi nen Jehova so mangipanengneng a say bilang na manangipalapag ed Panarian so akadampot na balon pantok a 4,278,820, tan dagup a 300,945 iran totoo so abautismoan legan na taon. Tekep na indagsa na ontanlan karakel na saray balo ni, 3,191 iran balon kongregasyon so aporma, pati ed misimbangan a bilang na balo iran sirkito tan distrito. Atan so masulok a waloran balon kongregasyon ed sakey ya agew, ngalngali sakey a balon sirkito ed kada duaran agew. Agaylan makapakelaw ya ibubulaslas! Natalosan, si Jehova so mamapapeles ed bengabengatla, tan say bendisyon to so walad saray sagpot na totoo to.—Salmo 127:1.
Panaon na Dilin-Panangusisa
4. Antoran tepet so nepeg a kunsideraen unong ya onnengneng tayo ed arapen?
4 Anggaman makapaliket a nengnengen, sayan bendisyon so mangitarok met na saray responsabilidad. Kasin wala so magenap a matatken tan mabulos iran indibidual a mangasikaso ed espiritual iran pankaukolan na amin na sarayan balo ni? Diad inengneng tayo ed arapen, makapataranta so panisip ed bilang na saray payunir, ministeryal ya ariripen, mamatatken, tan managbiahen manangasikaso a nakaukolan ed pangasikaso parad ibubulaslas tan panangilaknab, ontan met ed bilang na boluntaryon kumikimey a nakaukolan ed saray sangan opisina tan saray Ayaman a Bethel ed sankamundoan pian ontulong ed atan a kimey. Iner so panlapuan na sayan baleg a bilang na totoo? Anggapo so duaruwa a say panagani so baleg. Balet siopa so walad kipapasen natan a mangasikaso parad amin a kumikimey a nakaukolan pian manani?—Mateo 9:37, 38.
5. Antoran kipapasen so niwala ed arum a paspasen lapud maples ya ibubulaslas?
5 Alimbawa, nireport, a diad arum iran parte na mundo, walaray kongregasyon a walaan na sanlasus iran karakel na manangipalapag ed Panarian a lilingkoran lambengat na sakey a matatken a kaulop na sakey odino duaran ministeryal ya ariripen. No maminsan sakey a matatken so kaukolan a manlingkor ed duaran kongregasyon. Diad arum iran pasen say pankaukolan parad kualipikadon Kristiano iran ministro a mangikondukta na saray panagaral na Biblia ed abung so ontanlan baleg a saray balo ni so nepeg a napilista ed saraman so manaalagar na mangiyaral ed sikara. Diad arum niran pasen, saray balon kongregasyon so napoporma ed agaylan peles a talora, apatira, odino anggan limaran kongregasyon so mangusar ed sakey a Kingdom Hall. Angangko anengneng yo la so singa onyan ibubulaslas ed dilin lugar yo.
6. Akin a say dilin-panangusisa so nipanpanaon ed biang tayo?
6 Anto so ipanengneng na atan ed sikatayo? A nisesengeg ed saray panaon, amin tayo so nepeg a mangusisa ed saray sirkumstansya tayo no kasin gagawaen tayo so sankaabigan ed panaon tan kaykayarian tayo ta pian onkiwas unong ed pankaukolan. (Efeso 5:15-17) Si apostol Pablo so nansulat ed Hebreon Kristianos nen inmunan siglo: “Ta anta nepeg yo la komon so managbangat, lapu ed inkabayag la na panaon yo ya anisia, nakaukolan yo a wala so manbangat lamet ed sikayo manlapud gapo na saray ununan aralen ed saray salita na Dios; tan nagmaliw kayon singa saray mankaukolan na gatas, ya aliwan anawet a tagano.” (Hebreos 5:12) Unong ya ipatnag na saraman a salita, saray indibidual a Kristianos so kaukolan met ya ombulaslas. Tan wala so peteg a kapeligroan a say sakey so nayarin manbayag ed espiritual ya inkaugaw imbes ya onaligwas ed Kristianon inkatatken. Mitunosan ed saya, sisimbawaen itayo nen Pablo: “Mantultuloy a suboken no kasin sikayo so wala ed pananisia, mansiansian paneknekan yo so inkasikayo.” (2 Corinto 13:5) Kasin inusisa yo la so inkasikayo no sikayo so ombubulaslas ed espiritual nanlapulad inkabautismoan yo? Odino sikayo so siansian mantanyareg? Anggaman kuan, panon so pakapangibaga na sakey?
‘Saray Kagagawa na Ugaw’
7. Pian say espiritual ya iyaabante so nipatnag, anto so nepeg a gawaen tayo?
7 “Sanen siak so ugaw, nansalitaak a singa ugaw, nanisip ak a singa ugaw, nanrason ak a singa ugaw; balet natan ta siak so nagmaliw a matatken, pinaulian koray kagagawa na ugaw,” inkuan nen apostol Pablo. (1 Corinto 13:11) Diad espiritual ya iyaaligwas, aminsan et amin tayo so singa ugugaw ed panagnonot tan kiwakiwas tayo. Anggaman ontan, pian nipatnag so iyaabante, sikatayo so nepeg a mamaulian ed ‘saray kagagawa na ugaw,’ a singa inkuan nen Pablo. Antoray arum ed sarayan kagagawa?
8. Unong ed saray salita nen Pablo ed Hebreos 5:13, 14, anto so sakey a kagagawa na ugaw ed espiritual?
8 Ununa, imanoen pa so saray salita nen Pablo ed Hebreos 5:13, 14: “Balang sakey ya uninom na gatas so agmikabat ed salita na inkatunong, ta sikato so sakey ya ugaw. Ingen say taganon anawet so kien na saray matatken lan totoo, salanti saraman so lapud pangagamil, saray pakalikna ra so apasal ed panangibiig na maong tan mauges.” Kasin ‘kabat [yo] so salita na inkatunong’? Kasin amta yo so Salita na Dios, say Biblia, a magenap pian nayarian yon usaren itan ed “panangibiig na maong tan mauges”? Inkuan nen Pablo a saray matatken a totoo so makayarin manggawa ed atan lapud sikara so maparanay a mangakan na “taganon anawet.” Kanian, say panpilalek odino pankaliktan na sakey parad anawet ya espiritual a tagano so maong a pakapatnagan no kasin say sakey et binmaleg la ed espiritual odino mansiasiansia nin ugaw ed espiritual.
9. Panon a say espiritual a pankaliktan na sakey so pakapatnagan ed espiritual ya aligwas to?
9 Sirin, komusta so espiritual a pankaliktan yo? Panon so panmoria yo ed daakan a suplay na espiritual a taganon maparanay ya itatarya nen Jehova diad panamegley na nibased-Biblia iran palapagan tan Kristiano iran miting tan asamblea? (Isaias 65:13) Andi duaruwan mangayaga kayon tuloy no saray balon palapagan so nipaway ed tinaon iran distrito kumbension. Balet anto so gawaen yo ed saratan bektan akasempet kayo? Anto so gawaen yo sano say balon paway na Panag-Bantayan odino Awake! a magasin so onsabi? Kasin mangipanaon kayo pian basaen irayan palapagan, odino basta parlasan yo iratan pian nengnengen iray nipabitar tan insan iyarum iratan ed aparador na libro yo? Parehon tepetepet so nayarin nipaarap nipaakar ed Kristiano iran miting. Kasin maparanay kayon onatendi ed amin iran miting? Kasin sikayo so mangipaparaan tan mibiang ed saratan? Mabitar ya arum so naplag ed makapuy ya espiritual iran ugali ed panangan, palaspas a panagbasa tan manapuran mangan, a singa panangibaga. Agaylan duma itan ed salmista, ya angikuan: “Agaylay panangarok ed ganggan mo! Sikato so dalepdep ko ed amin ya agew.” Niarum ni, inkuan nen Arin David: “Ikdan taka na pisasalamat ed loob na baleg a kongregasyon; idayew taka ed utel na dakel a totoo.” (Salmo 35:18; 119:97) Malinew, say laknab na panangapresya tayo ed espiritual iran probisyon so sakey a pakapatnagan na espiritual ya aligwas tayo.
10. Anton kagagawa na ugaw ed espiritual so nipatnag ed Efeso 4:14?
10 Angidanet si Pablo na sananey a kagagawa na espiritual ya ugaw sanen impasakbay to: “Nepeg ya ag itayo la manugaw-ugawan, ya iyanur na saray daluyon tan nipalpalig dia tan diman na antokaman a dagem na bangat diad panamegley na kasiliban na totoo, diad panamegley na masilib a panamalingo.” (Efeso 4:14) Singa kabat a tuloy na atateng, saray ugugaw so maupapet nipaakar ed amin a bengatla. Diad sakey a dalan saya so sakey a positibon kagagawa lapud abuloyan toran mansukimat tan manaral tan agmanbayag pian nabayuboan a magmaliw a matatken a totoo. Anggaman ontan, say kapeligroan et say pagmaliw dan magmainomay a nasigensigen na mantutumbokan iran bengatla. Say mauges, lapud kakulangan na eksperiensia, sayan inkaupapet so mabetbet a mangipaarap ed sikara diad seryoson gonigon, a pakarisgoan da ni ingen tan arum ni. Saya so tua met ed ugugaw ed espiritual.
11. (a) Anto so walad kanonotan nen Pablo ed impangusar na balikas ya “antokaman a dagem na bangat”? (b) Anto ‘iran dagem’ so akapaarapan tayo natan?
11 Anggaman ontan, anto so wala ed kanonotan nen Pablo sanen inkuanto a saray ugugaw ed espiritual so iyanur na “antokaman a dagem na bangat”? Dia, say “dagem” so nipatalos manlapud Griegon salitan aʹne·mos, a nipaakar ed atan et komentoan na International Critical Commentary a mapatnag itan a “pinili unong a matukoy ed ideyan panguman-uman.” Saya so insalaysay a maong nen Pablo ed saray ontumbok a salita, “diad panamegley na kasiliban na totoo.” Say salitan “kasiliban” ed orihinal a lenguahe so manunan mankabaliksan a “dais (dice)” odino “panggalaw-na-dais,” salanti, galaw na kibanbana. Say punto et sikatayo so maparanay a nipapaarap ed balo iran ideya tan gegemtan a singa aliwan makapasakit, makatukso, mabunigas ni ingen. Saray salita nen Pablo so manunan onaplika ed saray pamaakaran a misiglaot ed pananisia tayo—organisado iran sagpot a mangiyaalibansa ed sankamundoan a pankakasakey ed limog na saray iglesia, sosyal tan politikal iran kurang, tan mipadpara. (Ipareng so 1 Juan 4:1.) Balet say prinsipyo so mansiansian tua met no nipaakar ed lawas-manguuman iran uso ed mundo—saray estilo, panligliwaan, saray tagano, bunigas odino saray rutina ed ehersisyo, tan arum ni. Lapud kakulangan na eksperiensia tan maong a pakatebek, say ugaw ed espiritual so nayarin nasigensigen a tuloy ed saratan a bengatla tan napokpokan a manggawa na espiritual ya iyaabante tan pananumpal ed mas importanten Kristiano iran obligasyon to.—Mateo 6:22-25.
12. Panon a saray ugugaw et duma manlapud saray adulto no nipaakar ed responsabilidad?
12 Sananey a kagagawa na ugugaw et say lawas a pankaukolan da na tulong tan imano. Sikara so agmikabat nisay sinononot ed saray responsabilidad; say inkaugaw so panaon na bilay sano ngalngalin amin a bengatla so panliket tan panggalaw lambengat. Unong ya isalaysay nen Pablo, sikara so ‘mansalita a singa ugaw, manisip a singa ugaw, manrason a singa ugaw.’ Agda ikabkabilangan so pangasikaso na arum ed sikara. Pareho so nibaga ed ugaw ed espiritual. Sano say balo ni so mangiter na ununan paliwawa to ed Biblia odino onggapon ompaway ed lawak na ministeryo, say espiritual ya ateng so naliketan a manggawa na anggaay nayarian ton ontulong. Anto so nagawa no say balo ni so mantultuloy ya onsaral ed atan a tulong tan mamaneknek ya agmakasarag a mangawat na responsalilidad diad pangasikaso ed inkasikato? Malinew a pakapatnagan itan na kakulangan na dilin-panangiyaplika.
13. Akin a nepeg ya aralen na balang sakey a sakbaten so dilin awit to?
13 Nipaakar ed saya nonoten so simbawa nen apostol Pablo ya anggaman sikatayo so nepeg a “mansasakbatan na saray awit,” siansian “balang sakey so manakbat na dilin awit to.” (Galacia 6:2, 5) Siempre, kaukolan na sakey so panaon tan sagpot pian naaral so panakbat ed Kristiano iran responsabilidad to, tan nayarin kabaliksan na saya so pansakripisyo ed arum iran pamaakaran. Anggaman ontan, sakey a seryoson lingo so pangiyabuloy mo ed inkasika ya ontanlan nalanor ed panliket tan panggalaw ed panagbilay, balanglan diad panagpasyar, panagbaroy, de-makina iran galaw (gadgets), odino anggan ed agnakakaukolan a gegemtan ed sekular ya anapan, a say sakey so manangimaton lambengat, a singa panangibaga, ya anggapo so pilalek a mamadaak ed pibibiang to ed panaggaway-babangatan a kimey odino dampoten so espiritual ya iyaabante tan responsabilidad. Impaseseg nen babangatan a Santiago: “Mananumpal kayo komon na salita, ya aliwan dumerengel labat, a papalikdoen yo so inkasikayo ed palson katunongan.”—Santiago 1:22; 1 Corinto 16:13.
14. Akin ya agtayo napenek ed panangipatnag na saray kagagawa na ugaw ed espiritual?
14 On, walaray dakel a magmainomay a tebeken iran kagagawa a mangibiig ed sakey ya ugaw tan adulto. Anggaman ontan, say importanten bengatla, unong ya indalatdat nen Pablo, ya agmanbayag et sikatayo so mangikaindan ed saray kagagawa na sakey ya ugaw tan ombulaslas. (1 Corinto 13:11; 14:20) Tanoandi, nayarin sikatayo so napokpokan ed espiritual ya iyaaligwas. Balet panon a gawaen na sakey so aligwas? Anto so nalalanor ed panmantine na espiritual ya ibubulaslas ed inkatatken?
No Panon a Nipatnag so Iyaabante
15. Antoray manunan kundang diad kurang na ibabaleg?
15 Bueno, panon a nagagawa so ibabaleg ed natural a mundo? “Say bilay na balang indibidual so ginmapo bilang sakey a selula,” isalaysay na The World Book Encyclopedia. “Say selula so mangala na saray materyal tan pagmaliwen ton manangipaalagey iran bloke (building blocks) a kaukolan ya ombaleg. Kanian, ombaleg so sakey a selula manlapud loob. Sayan selula so makapanparakel tan makapanapag pian pormaen so arum niran selula. Sayan kurang na panagpaalagey, panagparakel, tan panangapag so ibabaleg.” Say makatantandan punto dia et say ibabaleg so nagawa manlapud loob. Sano say dugan tagano so awaten, talosan, tan usaren, mansumpal itan ed ibabaleg. Saya so malinew a nanengneng ed kaso na kapangiyanak ya ugaw. A singa amta tayo la, say kapangiyanak so mangala na pareparehon suplay na atimplan tagano, gatas, a mayaman ed taba tan protena, saray materyal a nakaukolan parad ibabaleg. Say resulta? Say sukat na ibabaleg nipaakar ed belat tan katagey a nagamoran na ugaw ed ununan taon so agbalot mipara ed dinanman nin taon na normal ya ibabaleg ed interon bilay to.
16. Anton nengneng na ibubulaslas so nanenengneng ed kaslakan a balo nin iyaaralan na Biblia, tan panon itan ya agawan posibli?
16 Wala so dakel a naaralan tayo ed sayan gendat a kurang na ibabaleg a niyaplika tayo ed espiritual ya iyaaligwas tayo manlapud saray manunaan ya anggad inkatatken. Manuna ed amin, say mantultuloy a programan katagano so importante. Nonoten pa so panaon sanen inmunan inggapo yon aralen so Biblia. No sikayo so singa saray kaslakan ya arum, angangko ngalngalin anggapo ni so amta yo nipaakar ed Salita na Dios. Balet sinimban ipaparaan yoray leksion yo tan awalaan kayo na panagaral ed Biblia, tan diad antikey lambengat a panaon, asabin atalosan yon amin so manunan bangabangat na Kasulatan. Nepeg yon aksobien ya atan et makapakelaw ya ibubulaslas, tan amin lapud maparanay a katatagano ed Salita na Dios!
17. Akin a say regular ya espiritual a programan katagano so importanten tuloy?
17 Anggaman ontan, komusta natan? Kasin siansian manutumbok kayo na regular a programan katagano? Nepeg ya agbalot isipen na sakey a lapud sikato so abautismoan la, anggapo la so antokaman a pankaukolan parad regular tan sistematikon panagaral diad pangan na masustansyan espiritual a tagano. Anggaman si Timoteo et matatken a Kristianon manangasikaso, sikato so pinaseseg nen Pablo: “Seetan mo irayan bengatla; sikara labat so arapen mo, pian say iyaabantem so nipatnag ed amin a totoo.” (1 Timoteo 4:15) Agaylan mas nagkalalon gawaen na balang sakey ed sikatayo itan! No sikayo so interesadon mangipatnag na espiritual ya iyaabante yo, saratan a sagpot so nakaukolan a tuloy.
18. Panon a say iyaabante na sakey ed espiritual so nipatnag?
18 Say panangipatnag na iyaabante na sakey et agto kabaliksan so panggawa na nikadkaduman gunaet ya ipasirayew so amta na sakey odino pandinayewen so arum. Inkuan nen Jesus: “Sikayo so silew na mundo. Say sakey a syudad so agniyamot sano nipasen ed tapew na palandey” tan, “diad inkadaakan na puso say sangi so mansalita.” (Mateo 5:14; 12:34) Sano saray kapusoan tan kanonotan tayo so napno na maong iran bengatla na Salita na Dios, agtayo napokpokan balet nipatnag iya ed gawaen tan ibaga tayo.
19. Anto so nepeg a determinadon gawaen tayo nipaakar ed espiritual ya iyaaligwas tayo, tan tekep na anton nailaloan a pansumpalan?
19 Kanian, say tepet so: Kasin sikayo so maparanay a manaaral ed Biblia tan onaatendi ed Kristiano iran miting pian mangan na masustansyan materyal a mamayubo ed akindalem, espiritual ya ibubulaslas yo? Agkayo napepenek ed pagmaliw a sakey ya anggapoy ibabagan manag-imaton no nipaakar ed espiritual ya iyaaligwas. Mangala na positibo iran kundang pian seguroen a sikayo so sigpot a manguusar ed daakan ya espiritual a taganon itatarya nen Jehova. No sikayo so sakey a ‘say gayaga to so wala ed ganggan nen Jehova, tan diad ganggan to mandalepedep ed agew tan labi,’ sirin nibaga met ed sikayo: “Sikato so mipara ed sakey a kiew a nitanem ed abay na managos a danum, a mamapaway na dilin bunga to ed panaon to tan say bulong to et agnamaga, tan antokaman a gawaen to ontalona.” (Salmo 1:2, 3) Anggaman ontan, anto so nepeg a gawaen pian naseguron sikayo so makapantultuloy a manggawa na espiritual ya iyaabante?
Kasin Naebatan Yo?
◻ Akin a nipanpanaon ya usisaen so espiritual ya iyaabante tayo?
◻ Panon a say espiritual ya ibubulaslas et misiglaot ed espiritual a pankaliktan?
◻ Anto so kabaliksan na “antokaman a dagem na bangat”?
◻ Akin a nepeg a sakbaten na balang sakey so dilin awit to?
◻ Panon a nadampot so espiritual ya iyaabante?
[Litrato ed pahina 22]
Kasin mangipanaon kayo ed pamasa na nibased-Biblia iran palapagan?