Pansukimat ed Napanmatalkan Iran Panangipasakbay
“SAMAY makaamta la ya akadkauna ed saray kurang a taloy agew so onyaman ed nilibon taon.” Kuan na diparan na Intsik.
Peteg a labay na totoon amtaen no anto so nagawa ed arapen, tan dakel so mabulos a manbayar na baleg a kantidad ed napanmatalkan ya impormasyon ed satan a nengneng. Manaanap iray napanmatalkan a panangipasakbay. A singa nanengneng ed saray paimano nipaakar ed klima tan saray aamtaen ed ekonomya, walaan tayo na makapainteres iran ebento ed arapen. Nagkalalo ni, say napanmatalkan a pikakabat ed arapen so manggawa ed sikatayon manplano tan mangiyuksoy ed kabibilay tayo.
Say pilalek ed pangamta no antoy nagawa ed arapen tayo so managdag ed dakel ya ontupleg ed saray managparles, guru, astrologo, tan manananem. Saray lakoan na libro tan magazine rack so napnapno na kadaanan tan modernon palapagan na saramay mangibabagan nibaga ra so nagawa ed arapen. Balet sarayan nengneng na panangipasakbay so napapaliberan na panduaruwa. Nireport ya inkuan na Romanon estadista a si Cicero: ‘Mankelaw ak a say managparles so ag-onelek kapiganman a nanengneng toy sananey a managparles.’
Siempre, walaray amayamay a nengneng na panangipasakbay. Nen 1972 saray internasyonal a grupo na matudio tan negosyanten akabatan a Club of Rome so angipalapag na pasakbay a say mundo so naandian na kaykayamanan. Naandian itan na balitok ed 1981, mercury ed 1985, zinc ed 1990, petrolyum ed 1992, tan arum ni. Natalosan tayo natan a sarayan panangipasakbay so agtinmua.
Dakel iran panangipasakbay so nibase’d saray relihyoson panmoria. Diad pangiyilustra: Say obispo na Saxon a si Wulfstan so anisia a say inlosob na Denmark ed Inglatera ed asasakbay a koma-11 a siglo so tandan asingger lay anggaan na mundo. Nen 1525, si Thomas Münzer so angipangulo ed rebelyon na saray dumaralos ya Aleman ta diad sakey a pasingawey et anengneng ton saray angheles so mangiyoobol ed saray kompay da ya iisipen ton baleg a panagani. Malinew, sarayan panangipasakbay so agsusto.
Singa nayarin kabat yo la, kakargaen na Biblia iray panangipasakbay. Nagkalalo ni, ibabaga na saray managsulat na Biblia a sikaray pinuyanan na Dios. Inkuan nen Kristianon apostol Pedro: “Amtaen yo ya onona ya angapo so inprofeta a sulat ya inpatpatalos ya indumaduma. Ta angapo so profecia a nanlapu ed linawa na too, no ag saray totoo nansalita ra a nanlapu ed Dios, diad inpanenieg ed sikara na Espiritu Santo.”—2 Pedro 1:20, 21.
Sakey ni, impasakbay na Biblia so nambabangil iran aligwas a mangipapabidbir ed kailalakan a makaeksperiensia ed kiwawala nen Jesu-Kristo diad mangatatawen a pakayari na Panarian. Agnaparaan iran bakal, eras, yegyeg, tan kagegebay moralidad na too so tanda ed dedeskribien na Biblian “kaonoran iran agew.” (2 Timoteo 3:1-5; Mateo 24:3-14, 34) Unong ed Biblia, say pakaekal na peles a sistemay bengabengatla so mangipaarap ed liket na katooan diad balon mundo na andi-getar iran bendisyon.—2 Pedro 3:13; Apocalipsis 21:1-4.
Panon so panmoria yo ed saratan a panangipasakbay na Biblia? Singa saray arum iran nipasakbay, kasin saratan so palbeng labat? Nasubok tayo so inkanapanmatalkan na agni asumpal iran propesiya na Biblia diad panetermina no kasin saray panangipasakbay na Biblia nipaakar ed apalabas iran ebento so napanmatalkan. Diad ontumbok ya artikulo et kunsideraen tayo so pigara ed saraya.
[Picture Credit Line ed pahina 3]
Courtesy National Weather Service