Magmaliw ya Asimbang ed Kanonotan—Asingger La’y Anggaan
“Say angaan na ganagana’y bengatla manasinger: mandangka kayo [magmaliw ya asimbang ed kanonotan, NW] sirin, tan pampelengan yo so pikakasi.”—1 PEDRO 4:7.
1. (a) Anton makapadismaya so naeksperiensia na sakey a relihyoson lider tan saray patumbok to? (b) Lapud walaray iilaloan ya ag-asumpal, antoran tepet so nitepet?
“AKAAWAT ak na tawag manlapud Dios legan na pinal a pikakasi nen labi. Inkuanton 116,000 a totoo so ontokotok ed tawen tan saray lubok na 3.7 milyon ya inaatey a mananisia so nilukas a manpasegep ed tawen.” Ontan so inkuan na lider na Mission for the Coming Days ed labi na Oktubre 28, 1992, say nipasakbay ya agew na pipalinewan da. Anggaman ontan, sanen asabi so Oktubre 29, anggapoy anggan sakey a toon tinmokotok ed tawen, tan anggapoy alukasan a pantyon na inaatey. Imbes a sankasikmat a naala ed mangatatawen a rapture, saraman a mananisia’d anggaan diad Korea so akanengneng ed Oktubre 29 ya ordinaryon agew lambengat. Saray kinepeg ya agew na anggaan so sinmabi tan linmabas, balet siansian ag-adismaya iray mananisia’d anggaan. Antoy gawaen na saray Kristiano? Kasin sikaray ontunda ed panisian say anggaan so manasingger la?
2. Siopa so nansalita ed saray apostol na arapen ya agew na panangukom, tan ed silong na antoran sirkumstansya a naaralan da iya?
2 Diad pangebat, kaukolan a repasoen tayo so okasyon sanen si Jesus so pribadon akitongtong ed saray babangatan to. Dima’d distrito na Cesarea Filipo, diad amianen-sagur a Dayat na Galilea, a say balbaleg a Palandey Hermon so manseserbin masnag a benegan, nadngel dan diretsaan ya imbaga ton sikatoy pateyen. (Mateo 16:21) Insan tinumbokan na saray seryoson salita. Kayari impangisalaysay ed sikara a say pagmaliw a babangatan et kabaliksan toy panbilay a pantultuloy a pansakripisyo, impasakbay nen Jesus: “Ta say Anak na too onla dia naani dia’d gloria na Ama to a pati saray angeles to; saman to tumangan naani so balang sakey a too onong ed saray gawa to.” (Mateo 16:27) Sinalita nen Jesus so arapen ya isasabi. Anggaman ontan, diad sayan okasyon et sikato so magmaliw ya Ukom. Diad satan a panaon et amin so mandependi no kasin say sakey a too so matoor ya ontutumbok ed sikato odino andi. Say panangukom nen Jesus so nibase’d awawey, anggan panon lay kinarakel odino kinaraiset na minumundon kaykayarian na saman a too. Sayan katuaan so nepeg a masekder a tuloy a nodnonoten na babangatan to. (Mateo 16:25, 26) Kanian, si Jesu-Kristo a mismo so mangibabaga ed papatumbok to a manalagar ed maglorian isasabi to, ya atekepan na panangukom.
3. Panon nen Jesus ya inyilustra so katuaan na arapen ya isasabi to?
3 Say tinmumbok ya imbaga nen Jesus et mangiyilustra ed panamaseguro ed arapen ya isasabi to. Walaay autoridad ya imbaga ton: “Tua kuan ko’d sikayo, Wala ray arum ed saray wadia, ya angan panon ag da naani natawayan so patey, anga’d pakanengneng da ed Anak na too ya onsabi ed panarian to.” (Mateo 16:28) Anemiran agew ed saginonor, sarayan salita so asumpal. Say masnag a pasingawey na transpigurasyon nen Jesus so amakelaw ed maapit iran babangatan to. Aktual ya anengneng da so lupa nen Jesus ya onsisindag a singa banwa tan say kawes to so mankirlap ya amputi. Say transpigurasyon so akauna lan pasingawey ed gloria nen Kristo tan Panarian. Agaylan makapabiskeg a pasekder ed saray propesiya na Panarian! Agaylan makapaseseg a tuloy para’d saray babangatan to a magmaliw ya asimbang ed kanonotan!—2 Pedro 1:16-19.
No Akin ya Inkaganatan so Pagmaliw ya Asimbang ed Kanonotan
4. Akin a saray Kristiano so nepeg ya alerto ed espiritual ya isasabi to?
4 Kulang a sakey taon ed saginonor, nanengneng tayo si Jesus a manyudyurong ed Palandey Olibo, diad pribadon tongtongan lamet ed saray babangatan to. Legan a sikaray mamabantag ed syudad na Jerusalem, isasalaysay to’d sikara so tanda na arapen a kiwawala to tan insan impasakbay: “Manpuyat kayo sirin: ta ag yo amta no anto’n agew so isabi na Katawan yo.” Kaukolan a mantultuloy a manalerto iray babangatan lapud agkabat so panaon na isasabi to. Nepeg a sikaray lawas akaparaan para’d satan.—Mateo 24:42.
5. Panon a say pankaukolan na inkamabantay et niyilustra?
5 Say nengneng na isasabi na Katawan so singa sakey a matakew. Kuanto ni: “Balet amtaen yo so saya, ya no say makan-abung akabatan to no anto’n horas ed panagbantay so isabi matakew, sikato komo’y nanpuyat, tan ag to komon inabuloyan ya nabungawan so abung to.” (Mateo 24:43) Agpakabatan na matakew so unabong no kapigan so isabi to; say manunan ayura to et say pamigla ed biktima to. Kanian, say unabong so nepeg a lawas manbantay. Anggaman ontan, para’d matoor a Kristiano, say pantultuloy a panbantay et aliwan lapud pakalalagaan. Imbes, say motibo et say panilalo ed isasabi la komon nen Kristo diad gloria a mamaarap ed mareen a Milenyo.
6. Akin a sikatayo so nepeg ya asimbang ed kanonotan?
6 Anggaman ed panbabantay, anggapon balot so makaamta ed eksakton agew na isabi to. Kuan nen Jesus: “Kanian manparaan kayo met komon: ta dia ed horas ya ag yo isisipen onsabi Anak na too.” (Mateo 24:44) Kanian nakakaukolan so inkasimbang na kanonotan. No isipen itan na sakey a Kristiano ed maseguron agew, ya ag-onsabi si Kristo, ompan satan so agew na isabi to! Siempre, saray walaan na maptek a getman matoor iran Kristiano diad apalabas so sisisimoon ya amalbeng no kapigan so isabi to. Ingen, say pasakbay nen Jesus a manbantay so naulit-ulit ya apaneknekan a tua. “Balet satan ya agew tan horas angapo’y mikabat, angan saray angeles ed tawen, angan say Anak, noag say Ama lambengat.”—Mateo 24:36.
7. Pian magmaliw a papatumbok nen Kristo, panon so nepeg a kabibilay tayo?
7 Kanian, anto sirin so nibaga tayo? Ta pian magmaliw itayon patumbok nen Kristo et sikatayoy manbilay a lawas manisian say anggaan na sayan marelmeng a sistema so asingsingger la.
8. Anto so tanda na saray Kristiano nanlapulad sankasakbayan iran agew na Inkakristiano?
8 Say ontan ya awawey so lawas tanda na Kristianos, unong a bidbiren na saray sekular a manag-awaran tan iskolar na Biblia. Alimbawa, saray editor na The Translator’s New Testament, ed silong na salitan “Day” (Agew) diad glosario ra, kuanto: “Saray Kristiano ed saray panaon na B[alon] S[ipan] so nambilay a nanilalo’d say Agew (salanti say panaon) sano say peles a mundo pati ed amin ya inkauges tan karelmengan to so mangangga tan si Jesus so ompawil ed dalin a mangukom ed amin a katooan, a mangiletneg ed balon panaon na deen tan mangigapo ed Panguley to ed sankamundoan.” Ipanengneng na Encyclopœdia Britannica: “Say nikadkaduman sankagloboan a panangilaknab na Inkakristiano so direktan nisiglaot ed panilalo na Kristiano ed anggaan na panaon, diad nengneng na asingsingger lan paniilalo ed ipawil nen Kristo. Say paniilalo na saray Kristiano ed anggaan na panaon so aliwa lambengat a malainemem a pankaliktan ed isasabi na Panarian na Dios.”
No Anto so Kabaliksan na Pagmaliw ya Asimbang ed Kanonotan
9. Anggaman arum ed saray iilaloan nen Pedro nipaakar ed Mesias so aliwan susto, akin a sikato so akapansiansian matalek?
9 Kayari na ngalngali 30 a taon na saraman a personal ya impitongtong nen Jesus ed maapit iran babangatan to, si apostol Pedro so agtinmundan nanalagar ed isabi na anggaan. Anggaman aliwan susto iray inmunan iilaloan to pati ed saray kapara ton babangatan nipaakar ed Mesias, sikatoy nansiansian nanmatalek a say aro tan pakayari nen Jehova so garantiya ed pakasumpal ed saray ilalo ra. (Lucas 19:11; 24:21; Gawa 1:6; 2 Pedro 3:9, 10) Sikatoy angidanet na punton agbalot anguman ed interon Griegon Kasulatan sanen kuanton: “Bangbalet say angaan na ganaganay bengatla manasinger.” Insan pinaseseg to’ray kaparan Kristiano: “Mandanka kayo [magmaliw ya asimbang ed kanonotan, NW] sirin, tan pampelengan yo so pikakasi.”—1 Pedro 4:7.
10. (a) Anto so kabaliksan na pagmaliw ya asimbang ed kanonotan? (b) Anto so nalalanor ed inengneng ed saray pamaakaran unong ed suston siglaotan ed linawa na Dios?
10 Say pagmaliw ya “asimbang ed kanonotan” et agto kabaliksan so pagmaliw ya intelihente unong ed minumundon panmoria. Kuan nen Jehova: “Erepen ko so kakabatan na saray makabat, Ta paandien ko so pakatalos na saray matodio.” (1 Corinto 1:19) Say salitan uusaren nen Pedro so nayarin kabaliksan toy “pagmaliw a seryoso.” Sayan inkaseryoso ed espiritual so mitunosan ed panagdayew tayo. Kanian, diad pagmaliw a masekder ed kanonotan et nanengneng tayoray bengatla unong ed suston siglaotan da ed linawa nen Jehova; natalosan tayo no dinan iran bengatla so importante tan andi. (Mateo 6:33, 34) Anggaman manasingger lay anggaan, agtayo paiimpluensyaan ed maaburidon estiloy-kabibilay; nisay agtayo manginenen ed panaon a panbibilayan tayo. (Ipareng so Mateo 24:37-39.) Imbes, sikatayo so uuleyan na kabkaabigan tan asimbang a kaisipan, disposisyon, tan kondukta, a manunan nibalikas ed Dios (“pampelengan yo so pikakasi”) tan insan diad kaabay tayo (“ag komon naumas so aro yo ed sakey tan sakey”).—1 Pedro 4:7, 8.
11. (a) Anto so kabaliksan na “napasimbalo [tayo] komon ed espiritu na kalakal [tayo]”? (b) Panon a say balon puersa ed kanonotan so ontulong ed panggawa tayo na saray dugan desisyon?
11 Say pagmaliw ya asimbang ed kanonotan et lalanoren to a “napasimbalo [tayo] komon ed espiritu na kalakal [tayo].” (Efeso 4:23) Akin a napasimbalo? Lapud atawir tayo so ag-inkayadyari tan manbibilay ed makasalanan iran kaliberliber, say kanonotan tayo so babanlongan na tendensyan sumpa ed espiritualidad tayo. Satan a puersa so naynay a mangitutulak ed saray kaisipan tan inklinasyon tayo ed materyalistiko, masiblet a kalat. Kanian, sano say sakey so magmaliw a Kristiano, kaukolan to so balon puersa, odino matalonggaring ya awawey na kanonotan, a mangimpluensya ed saray nonot to ed maptek a direksyon, say espiritual a direksyon, a mamaarap ed bulos a panagsakripisyo. Kanian no nipaarap ed panagpili, alimbawa, diad edukasyon, karera, panangimpleyo, panligliwaan, panpasyar, estiloy panagkawes, odino antokaman, say manunan pilalek to et say pangunsidera ed bengatla unong ed espiritual imbes ed silalaman, masiblet a punto de bista. Sayan balon awawey na kanonotan so mamainomay ed pandesisyon ed saray pamaakaran a walaay inkasimbang na kanonotan tan say pikakabat ya asingger lay anggaan.
12. Panon tayon mansiansian “mabunigas ed pananisia”?
12 Say pagmaliw ya asimbang ed kanonotan so mangipapatnag a sikatayoy mabunigas ed espiritual. Panon so pansiansia tayon “mabunigas ed pananisia”? (Tito 2:2, NW) Kaukolan a taganoen tayo so kanonotan tayo na dugan klase na tagano. (Jeremias 3:15) Say pantultuloy a pantagano ed katuaan a Salita na Dios a susuportaan na panangipakurang na masanton espiritu to so ontulong ed sikatayo a napansiansia so inkasimbang tayo ed espiritual. Kanian say pagmaliw a maparanay ed personal a panagaral, ontan met ed lawak a serbisyo, pikakasi, tan Kristianon panlilimog, so makana.
No Panon a Sasalimbengan Itayo na Asimbang a Kanonotan
13. Panon a say inkasimbang na kanonotan so manalimbeng ed sikatayo ed makulangkulang a kalilingo?
13 Nasalimbengan itayo na inkasimbang na kanonotan manlapud pakapanggawa na makulangkulang a lingo a sengegan na pakabalang tayo na andi-anggan a bilay. Panon a posibli iya? Sinalita nen apostol Pablo so “gangan na isip.” Para’d sakey a toon mabunigas ed pananisia, satan a ganggan na isip so uuleyan na bengatlan panliketan to, salanti “gangan na Dios.” On, say “gangan na kasalanan” so mibabakal sumpa ed gangan na isip. Anggaman ontan, say Kristiano so nayarin ontalona diad tulong nen Jehova.—Roma 7:21-25.
14, 15. (a) Antoran duaran impluensya so manpupuligesgesan a mangontrol ed kanonotan? (b) Panon so panalo tayo ed pibabakal ed kanonotan?
14 Nantultuloy si Pablo diad impangipanengneng ed baleg a pandumaan na kanonotan a babanlongan na makasalanan a laman, a niyapasakey ed bilay na dilin-inkaalablabas, tan say kanonotan a dodominaen na espiritu na Dios, a niyapasakey ed bilay na panagsakripisyo ed serbisyo’d si Jehova. Insulat nen Pablo ed Roma 8:5-7: “Ta saray wala ed onong ed laman anapen da so saray agagamil a kien na laman; sara balet so onong ed espiritu, anapen da so agagamil a kien na Espiritu. Ta say kaisipan na laman say patey; balet say kaisipan na Espiritu say bilay tan kareenan: Ta say kaisipan na laman kabusol ya onsumpa ed Dios; ta dia ed tuaytua ag to ingen nayarian.”
15 Diad Rom 8 bersikulo 11 ya insalaysay nen apostol Pablo no panon a say kanonotan a mikokoopera ed masanton espiritu so ontalona ed pibabakal: “Balet no say Espiritu na saman so amangon ed Jesus a nanlapu ed saray inatey manaayam ed sikayo, saman so amangon ed Cristo Jesus ed saray inatey itdan to na bilay met so maipapatey a kalamanan yo, lapu ed Espiritu to a manaayam ed sikayo.”
16. Salimbengan itayo na inkasimbang na kanonotan manlapud antoran pakatuksoan?
16 Kanian, diad pagmaliw ya asimbang ed kanonotan et agtayo natukso na saray lawas-presentin pakatuksoan ed sayan mundo, a nabidbir diad panamegley na sigpot a kimedmer ed amin a nengneng na likeliket, materyal a bengabengatla, tan lingon kondukta ed sekso. Say asimbang a kanonotan tayo so mangibaga ed sikatayo ya “ibatikan . . . so lawanan” tan arawian so makaderal a pansumpalan to. (1 Corinto 6:18) Say asimbang ya awawey na kanonotan tayo so mamilit ed sikatayon iyuna iray intereses na Panarian tan bantayan to’y panagnonot tayo sano sikatayo so tuksoen na saray opresi na sekular a kareran nayarin mamaletey ed siglaotan tayo ed si Jehova.
17. Panon ya impanengneng na agin bii a payunir so inkasimbang na kanonotan sanen nidunget ed pinansyal iran obligasyon?
17 Alimbawa, diad sakey a bansan tropiko ed Mamaabalaten ya Asya, wala so malangwer ya agin bii a say intereses na Panarian so lawas walad kanonotan to. Binayuboan to so panangaro to ed sigpot-panaon a serbisyo. Diad saman a bansa, karaklan a trabaho so mankakaukolan na anemira odino pitoran agew na sigpot-panaon a pankimey. Kayari impangraduar to ed unibersidad, say ama to ya aliwan sakey ed saray Tasi nen Jehova so maniilalo’d sikato a makalmo na dakel a kuarta para’d pamilya. Balet lapud sikatoy walaan na mabiskeg a pilalek a manpayunir, akaromog na part-time a trabaho tan ginmapon nanpayunir. Saya so amasanok ed ama to a tinaktakot ton ibasileng toray kayarian to’d kalye. Lapud panagsugal, sikato, say ama et akaotang na baleg, tan saman ya anak a bii so iilaloan ton manbayar ed saray otang to. Say yogtan ya agi ton laki so manaaral ed unibersidad, tan lapud saray otang et anggapo la so nibayar ed saray matrikula to. Insipan na yogtan a no sikatoy tulongan na atsi to et sikato lay akauley ed pamilya no makaromog la na trabaho. Say puso to so naapag ed baetan na panangaro to ed agi to tan ed panangaro to ed panagpayunir. Kayari maalwar ya impannonot ed pamaakaran, denisidi ton ituloy so panagpayunir tan nananap na sananey a trabaho. Bilang ebat ed saray pikakasi to, akaromog na maabig a trabaho ya aglabat makatulong ed gagastosen na pamilya tan ed yogtan to diad pinansyal noagta sikato met so akapantultuloy ni ed inmunan aro to, say payunir a serbisyo.
Anapen so Tulong nen Jehova Diad Pamasiansia na Inkasimbang ed Kanonotan
18. (a) Akin a saray arum a totoo et dismayado? (b) Antoran kasulatan so nayarin manligliwa ed puso na saramay dismayado?
18 Arum a papatumbok nen Kristo so nayarin makaromog a mairap a pansiansiaen so inkasimbang na kanonotan da. Say anos da so nayarin onkekesay lapud sayan peles a marelmeng a sistema na bengabengatla so manbabayag nen say iilaloan da. Nayarin sikaray dismayado nipaakar ed satan. Anggaman ontan, onsabi so anggaan. Isisipan nen Jehova itan. (Tito 1:2) Pati say insipan a mangaraldalin a Paraiso to. Garantiyaan itan nen Jehova. (Apocalipsis 21:1-5) Diad isabi na balon mundo, niwala diman so “kiew na bilay” para’d amin na saramay akapansiansia ed inkasimbang na kanonotan da.—Uliran 13:12.
19. Panon a napansiansia so inkasimbang na kanonotan?
19 Panon tayon napansiansia so inkasimbang na kanonotan? Onkerew na tulong ed si Jehova. (Salmo 54:4) Magmaliw a maapit ed sikato. Agaylan sikatayo so mangayaga a pilalek nen Jehova ya onasingger tayo ed sikato! “Singer kayo ed Dios, et sikato so onsinger naani ed sikayo,” (Santiago 4:8) Kuan nen Pablo: “Mangayaga kayo ed Katawan lawas kuan ko lamet, Mangayaga kayo. Nakabatan komon na amin a totoo so kasongdoan yo. Say Katawan asinger la. Ag kayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.” (Filipos 4:4-7) Tan sano saray sakbat na sayan manpapanabos a sistemay bengabengatla so ompatnag ya ambelat a tuloy lan sakbaten, ipasakbat ira ed si Jehova, tan sikaton mismo so ontulong ed sikayo.—Salmo 55:22.
20. Diad anton kurang so nepeg a pantultuloyan tayo, unong ed 1 Timoteo 4:10?
20 On, say anggaan so asingger la, kanian magmaliw ya asimbang ed kanonotan! Saya so maabig a simbawa ed 1,900 a taon lay apalabas; makana iyan simbawa natan. Mantultuloy tayon usaren iray asimbang a pakayari na kanonotan tayo ta pian idayew si Jehova legan a sikatoy mantultuloy a mangiwanwan ed sikatayo a mamaarap ed balon mundo to.—1 Timoteo 4:10.
Panon so Pangebat Mo?
◻ Anto so inkasimbang na kanonotan?
◻ Akin a wala so pankaganatan a tuloy ed pagmaliw ya asimbang ed kanonotan?
◻ Panon a sikatayo so napasimbalo ed espiritu na kalakal tayo?
◻ Anton mantultuloy a pibabakal so nepeg a pibakalan na kanonotan tayo?
◻ Panon tayon napansiansia so inkasimbang na kanonotan?
[Litrato ed pahina 15]
Say iyaasingger ed Dios diad pikakasi so ontutulong ed sikatayon mamasiansia na inkasimbang na kanonotan
[Litrato ed pahina 17]
Diad pagmaliw tayon asimbang ed kanonotan, et agtayo natangguyor ed saray pakatuksoan ed sayan mundo