Panaglingkor ed si Jehova Tekep na Espiritu na Dilin-Panagsakripisyo
“No say siopaman et labay to’y ontombok ed siak, kaukolan a benegan to’y inkasikato tan alaen to’y panamairapan a kiew to tan mantultuloy a tomboken toak.”—MATEO 16:24, NW.
1. Panon nen Jesus a pinakabatan iray babangatan to nipaakar ed manasingger lan ipatey to?
DIAD kaliberliber na napnoy nieben Palandey Hermon ya adampot nen Jesus so manunan importanten ebento’d bilay to. Kulang lan sakey taon so panbilay to. Amta to’tan balet ag-amta na saray babangatan to. Asabi la’y panaon pian nakabatan da. Peteg a nipasakali la nen Jesus so manasingger ya ipatey to, balet saya so sankaunaan a pankanawnawan sikato’y diretsaan ed satan. (Mateo 9:15; 12:40) Nabasa ed salaysay nen Mateo: “Nanlapu’d saman a panaon ginapoan nen Jesus ya inpatnag ed saray babangatan to, a kaokolan to’y onla ed Jerusalem, tan mantepel na amayamay a bengat la ed saray mamasiken, tan manunaan day sacerdote tan saray escribas, tan sikatoy pateyen da et dia’d kamatlo’n agew onoli ed bilay.”—Mateo 16:21; Marcos 8:31, 32.
2. Anto’y reaksion nen Pedro ed saray salita nen Jesus nipaakar ed arapen a panirap To, tan panon so impangebat nen Jesus?
2 Manasingger la’y ipatey nen Jesus. Balet, pankebbiewan nen Pedro itan a kuanmono makapataktakot a kanonotan. Agto naaksobi a say Mesias so talagan napapatey. Kanian, nanpakpel si Pedro a pansalitaa’y Katawan to. Adagdag na sankaabigan iran intensyon, sisesebeg ton pinaseseg: “Sikato so niarawi komon ed sika, Katawan: saya ag komon nagawa angan kapigan ed sika.” Impulisay a tampol nen Jesus so lingon panangasi nen Pedro, a singa diad positibon panmekmek ed ulo na maditan uleg. “Ekal ka’d arap ko, Satanas: ta ag mo nonoten iray bengatlan nipaakar ed Dios, noag saray bengatlan nipaakar ed saray totoo.”—Mateo 16:22, 23.
3. (a) Panon ya agnamamamtaan a ginawa nen Pedro so inkasikaton ahente nen Satanas? (b) Panon a baton pakatiroran si Pedro ed kurang na panagsakripisyo?
3 Agnamamamtaan nen Pedro a ginawa toy inkasikaton ahente nen Satanas. Say ebat nen Jesus so singa inkapekder ed impangebat to’d Satanas diad kalawakan. Diman a sinali nen Diablo a tuksoen si Jesus ed mainomay a kabibilay, inkaarin andian na irap. (Mateo 4:1-10) Natan met et sikato’y papasesegen nen Pedro a kasian to’y inkasikato. Amta nen Jesus a saya so aglinawa nen Ama to. Say bilay to so nepeg a panagsakripisyo, aliwan panagliket. (Mateo 20:28) Si Pedro so magmamaliw a baton pakatiroran ed ontan a kurang; say masimoon a pililikna to so magmamaliw a patit.a Balet, amtan tuloy nen Jesus a no abuloyan to’y antokaman ya ideya ed bilay a bulos manlapud sakripisyo et sikatoy ag-abobonan na Dios diad panamsam nen Satanas ed sikato diad makapatey a patit to.
4. Akin a say mainawan kabibilay so aliwan para’d si Jesus tan papatumbok to?
4 Kanian, mankakaukolan na pananguman so panag-isip nen Pedro. Saray balikas to’d si Jesus so ideya na too, aliwan diad Dios. Say mainawan kabibilay, bulos ed kairapan, so aliwan para’d si Jesus; nisay satan a kabibilay so para’d saray patumbok to, lapud intuloy ya inkuan nen Jesus ed si Pedro tan ed saray babangatan: “No say siopaman et labay to’y ontombok ed siak, kaukolan a benegan to’y inkasikato tan alaen to’y panamairapan a kiew to tan mantultuloy a tomboken toak.”—Mateo 16:24, NW.
5. (a) Anto so angat ed Kristianon panagbilay? (b) Diad anton taloran makanan bengatla so nepeg a pamparaanan na Kristianon gawaen?
5 Inulit-ulit nen Jesus iyan manunan tema: say angat ed Kristianon panagbilay. Pian magmaliw a papatumbok nen Jesus, saray Kristiano so nepeg a manlingkor ed si Jehova a walaay dilin-panagsakripisyo, a singa say Pangulo ra. (Mateo 10:37-39) Kanian, indalatdat toray taloran nakaukolan a bengatlan nepeg a pamparaanan na Kristianon gawaen: (1) benegan to’y inkasikato, (2) alaen to’y panamairapan a kiew to, tan (3) mantultuloy ya ontombok ed Sikato.
“No say Siopaman et Labay to’y Ontombok ed Siak”
6. (a) Panon na too a benegan so inkasikato? (b) Siopa so nepeg a manunan paliketen tayo nen say sikatayon dili?
6 Anto so kabaliksan na benega’y inkasikan dili? Kabaliksan ton kaukolan a kumpleton ipulisay na sakey so inkasikato, nengneng to’y dilin ipapatey. Say manunan kabaliksan na Griegon salitan nipatalos a “benegan” et say “pangibagan andi”; labay ton ibaga et “ipulisay a sigsigpot.” Kanian, no awaten yo so angat na Kristianon panagbilay, sibubulos yon isuko iray dilin ambisyon, inawa, pilalek, liket, panliliket yo. Diad segek et italaga yo so interon bilay yo tan amin a bengatlan manasaglawi’d si Jehova a Dios diad amin a panaon. Say dilin panangibeneg so mas ni nen say tunggal paminsan a pangipulisay na sakey ed pigaran panliliket. Imbes, kabaliksan ton nepeg ya abuloyan si Jehova a mangayarian ed sikato. (1 Corinto 6:19, 20) Say toon imbeneg to’y inkasikato et manbilay ya agto paliketen so inkasikato, noag say Dios. (Roma 14:8; 15:3) Kabaliksan to ya amin a panaon ed bilay to et nibaga ton andi ed saray sinisiblet a pilalek tan on ed si Jehova.
7. Anto so panamairapan a kiew na Kristiano, tan panon ton sakbaten itan?
7 Kanian, say pangala na panamairapan a kiew et walaan na seryoson isusuheri. Say pangawit na palitek so makapabelat tan simbolo na ipapatey. Say Kristiano so mabulos a manirap no nakaukolan, odino napabaingan odino napairap odino napapatey ni ingen nisesengeg ta sikatoy patumbok nen Jesu-Kristo. Inkuan nen Jesus: “Say ag to alaen so cruz [panamairapan a kiew, NW] to tan ontombok ed siak, ag makana ed siak.” (Mateo 10:38) Aliwan amin a maniirap et manasakbat na panamairapan a kiew. Saray marelmeng et walaan na dakel ya “erermen” balet andian ira na panamairapan a kiew. (Salmo 32:10) Anggaman ontan, say kabibilay na Kristiano et bilay a manasakbat ed panamairapan a kiew na masakripisyon serbisyo ed si Jehova.
8. Anton padron na panagbilay so inletneg nen Jesus para’d papatumbok to?
8 Say kaunoran a kondisyon a sinaglawi nen Jesus et say pantultuloy ya itumbok tayo ed sikato. Aglabat kakaukolanen nen Jesus ya awaten tan sisiaen tayo so imbangat to noagta ontan met, diad interon kabibilay tayo et itultuloy tayon tumboken so padron ya inletneg to. Tan antoray pigaran manunan kabiangan ya anengneng ed padron na kabibilay to? Sanen inter to ed papatumbok to so pinal a ganggan ed sikara, inkuanto: “Onla kayo sirin, tan mangawa kayo na saray babangatan . . . , ya ibangat yo ra’n mangonor na amin a bengabengatla ya ingangan ko ed sikayo.” (Mateo 28:19, 20) Impulong tan imbangat nen Jesus so maong a balita na Panarian. Diad tua, ontan so ginawa na saray babangatan to tan saray asasakbay a Kristianon kongregasyon. Sayan maseseg a kimey, nilikud ed agda pibibiang ed mundo so angitarok ed sikara na panamusol tan isusumpa na mundo, a nansumpal ed panakbat da na lalon ambelat a panamairapan a kiew.—Juan 15:19, 20; Gawa 8:4.
9. Panon so impantrato nen Jesus ed arum a totoo?
9 Sananey nin prominentin padron ya anengneng ed impanbilay nen Jesus et say paraan na impantrato to’d arum a totoo. Sikato so mapangasi tan “maoyamo . . . tan mapaabeba . . . a puso.” Kanian, apaligsa iray dumerengel to tan apaseseg ed kiwawala to. (Mateo 11:29) Agto ra tinaktakot ya ontumbok ed sikato odino angipaakseb na nambabangil a ganggan no panon dan sumpalen itan; nisay kinonsiensia to ra ta pian napilitan iran magmaliw a babangatan to. Anggaman sikaray mansasakripisyo, insindag da’y peteg a gayaga. Agaylan midumaan ed saramay walaay minumundon mainawan kabibilay a manatanda na “saray kaonoran ya agew”!—2 Timoteo 3:1-4.
Bayuboan tan Pansiansiaen so Espiritu na Dilin-Panagsakripisyo nen Jesus
10. (a) Unong ed Filipos 2:5-8, panon nen Kristo ya binenegan so inkasikato? (b) No sikatayoray patumbok nen Kristo, anton awawey na kanonotan so nepeg ya ipanengneng tayo?
10 Inletneg nen Jesus so alimbawa ed dilin-panangibeneg. Inala to so panamairapan a kiew to tan intultuloy ton sinakbat itan diad impanggaway linawa nen Ama to. Nansulat si Pablo ed saray Kristiano ed Filipos: “Yatol yo so sayan kalakal ed sikayo, ya wala met nensaman ed Cristo Jesus; a bangta sikato’y wala ed ereng na Dios, ag to inbilang a say inkaparpara to ed Dios sakey a bengatla’n bebenbenan to nen saman. Noag ingen nilokpos to so inkasikato, ya inala to so ereng na sakey ya aripen, ya agawa’n kaolibay na saray totoo. Tan bangta aromog a singa nengneng na sakey a too, nanpaabeba a nagmaliw a matolok ya anga’d say ipapatey, on, say ipapatey ed cruz [panamairapan a kiew, NW].” (Filipos 2:5-8) Siopa ni so makayarin mangibeneg na inkasikato a nagkalalo nen say saman? No kien kayo nen Kristo Jesus tan sakey kayo ed saray patumbok to, nepeg yon pansiansiaen iyan parehon awawey na kanonotan.
11. Say bilay a panagsakripisyo so panbilay ed linawa na siopa?
11 Sakey nin apostol, si Pedro, a mangibabaga’d sikatayo, a lapud si Jesus so nanirap tan inatey para’d sikatayo, kaukolan ya ayuraan na saray Kristiano so inkasikara a singa akaparaan-a-maong iran sundalo, tekep na parehon panagsakripisyon walad si Kristo. Insulat to: “Bangta si Cristo nanlikna na irap ed laman to, sikayo nepeg yo met so managamil na satan a kanonotan; ta say nanlikna na irap ed laman intalirak to so kasalanan; Pian saray nakdaan ni ya agew ed laman ya panbilay yo komon ya aleg ed gawa na lawan na katooan, no ag dia ed linawa’y Dios.” (1 Pedro 3:18; 4:1, 2) Say kurang na panagsakripisyo nen Jesus so malinlinew ya angipanengneng ed no panon so liknaan to ed linawa na Dios. Sikatoy sinononot ed debosyon to, a lawas ton iyuuna so linawa nen Ama to, anggano diad silong na makapabaing ya ipapatey.—Mateo 6:10; Lucas 22:42.
12. Kasin makaalipanes ed si Jesus so masakripisyon panagbilay? Ipaliwawa.
12 Anggaman say bilay a panagsakripisyo nen Jesus so mairap tan makapaangat a basbas parad sikato pian tumboken, agto niliknan makaalipanes itan. Imbes, nanliketan nen Jesus so impanpasakup ed madibinon linawa. Para’d sikato say panumpal ed kimey nen Ama to so singa tagano. Naawat to so peteg ya inkapnek ed satan, a singa nagamoran na sakey ed maong a panangan. (Mateo 4:4; Juan 4:34) Kanian, no labay yon talagan napenek ed bilay yo, anggapo lay magmaong a nagawaan yo nen say itumbok ed alimbawa nen Jesus diad pamayubo na panagnonot to.
13. Panon a say aro so manamakiwas a puersa ed benegan na panagsakripisyo?
13 Diad tua, anto so manamakiwas a puersa ed benegan na panagsakripisyo? Diad salita et say aro. Inkuan nen Jesus: “Aroen mo so Katawan [si Jehova, NW] a Dios mo ed masimoon a pusom, tan dia ed masimoon a kamarerwam, tan dia ed masimoon ya nonot mo. Sikato ya so baleg tan unona’n gangan. Tan say komadua a mipadpara ed sikato saya, Aroen mo so kaparam a too [unong] ed sikan dili.” (Mateo 22:37-39) Agnayarin say sakey a Kristiano et magmaliw a masiblet, insan sikato met so mangunor ed saraman a salita. Say liket tan interes ton mismo so nepeg ya uleyan ya ununa tan manuna ed amin na panangaro to ed si Jehova tan kakaabay. Ontan so impanbilay nen Jesus, tan ontan so iilaloan to ed saray patumbok to.
14. (a) Antoran responsabilidad so nisasalaysay diad Hebreos 13:15, 16? (b) Anto so mamaseseg ed sikatayon mangipulong ed maong a balita tekep na seseg?
14 Atalosan nen Pedro iyan ganggan na aro. Insulat to: “Lapu ed sikato sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to. Balet ag yo lingoanan so panaggawa na maabig tan say pannanabang: ta say Dios napaliket a maong ed sarayan bagat.” (Hebreos 13:15, 16) Agmangisasaklang na bagat ya ayayep iray Kristiano ed si Jehova odino mipadpara ed satan; kanian, agda kaukolan iray saserdote diad nanengneng a templo a mangipakurang ed panagdayew da. Diad panamegley nen Kristo Jesus a nitatarok so bagat a panagdayew tayo. Tan manuna diad panamegley na satan a bagat na panagdayew, a say mapublikon panangiyabawag na ngaran to, a nipanengneng tayo so aro tayo ed Dios. Nagkalautlan say agsinisiblet ya espiritun nilamot diad aro so mamaseseg ed sikatayon mangipulong ed maong a balita tekep na seseg, a manbabanikel a magmaliw a lalon maligsan mangisaklang ed Dios na bunga na saray bibil tayo. Diad sayan paraan et nipanengneng tayo met so aro ed kaabay.
Mangitarok na Mayaman Iran Bendisyon so Panagsakripisyo
15. Antoran manangusisan tepet nipaakar ed panagsakripisyo so nitepet tayo ed inkasikatayo?
15 Ontunda pan magano tan nodnonoten iray onggendan a tepet: Kasin say kaplesan a padron na kabibilay ko so mangipapatnag na kurang na panagsakripisyo? Kasin saray kalat ko so mangituturo ed ontan a kabibilay? Kasin saray membro na pamilyak so manaani na espiritual iran gungguna manlapud alimbawak? (Ipareng so 1 Timoteo 5:8.) Komusta iray ulila tan balo? Kasin sikara met so nagugunggunaan manlapud panagsakripisyok? (Santiago 1:27) Kasin napalaknab ko’y panaon ya uusaren ko’d mapublikon bagat na panagdayew? Kasin nayarian kon dampoten so pribilihyo na payunir, Bethel, odino misioneron serbisyo, odino kasin sarag ko’y onla pian manlingkor ed pasen a babaleg so pankaukolan na saray manangiyabawag ed Panarian?
16. Panon a say inkatudio so ontulong ed sikatayon mangitonton na bilay na panagsakripisyo?
16 No maminsan et say kaukolan labat et samet ya inkatudio pian nadampot tayo so nagnap a panaglingkor ed si Jehova a walaay panagsakripisyo. Alimbawa, si Janet, a regular payunir diad Ecuador so sigpot-panaon ed sekular a trabaho. Agnambayag, say eskedyul to so nanggawan mairap parad sikato a kapeten so oras na regular-payunir tekep na inkaligsa. Denisidi ton isalaysay so problema to ed amo to tan kinerew ton bawasan so oras na pantrabaho to. Lapud sikatoy ag-inmabuloy a bawasan so oras na pantrabaho to, insublay ton inawit si Maria, a manaanap na part-time a trabaho ta pian makapanpayunir. Balang sakey ed sikara so angiyopresi a mankimey a pegtaw, a panapagey sanagew a trabaho. Inmabobon so amo ed suhestion. Natan et sikaralay regular payunir. Diad impakanengneng ed sayan maabig a resulta, si Kaffa, a naksawan la ed pantatrabahon sigpot-panaon ed parehon kompanya tan manggugunaet ed pakakapet na oras na payunir, so angawit ed si Magali ya inyopresi so parehon suhestion. Saman met so inabobonan. Kanian, apatiran agagin bibii so akayarin manpayunir, imbes a duara a ngalngali ni ingen ontunda ed sigpot-panaon a serbisyo. Say inkatudio tan panangiyuna so walaan na saray makagunggunan resulta.
17-21. Panon so impangusisa na sanasawa ed gagala ra ed bilay, tan ed anton nansumpalan?
17 Niarum ni, kunsideraen pa so basbas na panagsakripisyon tinumbok nen Evonne legan na apalabas a samploran taon. Insulat to so onggendan ed Watch Tower Society nen Mayo 1991:
18 “Nen Oktubre 1982, say pamilyak tan siak so nan-tour ed Brooklyn Bethel. Say impakapasyar ditan so amakiwas ed siak a mankaliktan a manboluntaryo diman. Abasak so sakey ya aplikasyon tan wala so makatantandan tepet, ‘Anto so promedyon oras mo ed lawak a serbisyo ed apalabas lan anemiran bulan? No saray promedyon oras et abeba nen samplora, isalaysay no akin.’ Agak makaisip na makatunongan a rason ed abeba iran oras ko, kanian angiletneg ak na kalat tan dinampot itan ed loob na limaran bulan.
19 “Anggaman makaisip ak na pigaran rason ed agpakapanpayunir, sanen abasak so 1983 Yearbook of Jehovah’s Witnesses, akumbinsi ak ya atalonaan na arum so babaleg iran babeng nen say wala’d siak pian makapanpayunir. Kanian nen Abril 1, 1983, tinmunda ak ed sigpot-panaon a trabahok a walaay baleg a sueldo tan nan-auxiliary payunir, tan linmoob ak ed rangko na regular payunir nen Setyembre 1, 1983.
20 “Liket ko’y impiasawa’d maabig a ministeryal ya aripen nen Abril, 1985. Taloran taon ed saginonor, say distrito kumbension ya aningbat nipaakar ed panagpayunir so anagdag ed masiken kon mangiyesaes ed siak tan intepet ton. ‘Wala tay amtan a rason ed agko igapon panpayunir no Setyembre 1?’ Sikatoy akibiang ed siak ed sayan kimey ed ontumbok a duaran taon.
21 “Nanboluntaryo met so masiken ko ed panagpaalagey a kimey diad Brooklyn Bethel ed loob na duaran simba tan nanaplay parad International Program. Kanian nen Mayo 1989 sikamiy nibaki ed Nigeria ed loob na sakey bulan pian ontulong ed panagpaalagey na sanga. Nabuas sikami so manbiahen mamaarap ed Alemanya, a ditan niyuksoy iray visa mi ed iloob ed Polandia. Aliketan kamin akapibiang ed ontan a makabaliksan tan makatantandan panangipaalagey ed Polandia tan pagmaliw a kabiangan na sayan balon klase na sigpot-panaon a serbisyo.”
22. (a) Panon a sikatayo so nayarin magmaliw a singa si Pedro, agnamamamtaan a magmaliw a baton pakatiroran? (b) Say panlingkor ed si Jehova tekep na panagsakripisyo so agmandependi ed anto?
22 No agyo nayarian so manpayunir a mismo, kasin napaseseg yo’ramay wala’d sigpot-panaon a serbisyon mansiansia ed pribilihyo ra tan anggan tulongan yora ni ingen a manggawa ed satan? Odino sikayo kasi so magmaliw a masimoon iran membro na pamilya odino kakaaro, a singa si Pedro, ya ibaga ed walad sigpot-panaon ya aripen a manpainawa tan manbilay ed inomay, kasian to so inkasikato, ya agmomoriaen no panon itan a nayarin magmaliw a baton pakatiroran? Tua a no say bunigas na payunir so wala’d seryoson kapeligroan odino no napapaulyanan toray Kristianon obligasyon to, nayarin kaukolan a sikato’y ontundan magano ed sigpot-panaon a serbisyo. Say panaglingkor ed si Jehova tekep na panagsakripisyo so agmandependi ed kipapasen, a singa bilang sakey a payunir, Bethelite, odino arum ni. Imbes, satan so mandependi no anto tayo bilang persona—no panon so panagnonot tayo, no antoy gagawaen tayo, no panon so panagtrato tayo ed arum, no panon so panbibilay tayo.
23. (a) Panon tayon makapantultuloy a nawalaan na gayaga bilang kaiban kumikimey na Dios? (b) Anton panamaseguro so naromog tayo ed Hebreos 6:10-12?
23 No sikatayo so peteg a walaan na panagsakripisyo, nawalaan tayo na gayaga ed pagmaliw a kaiban kumikimey na Dios. (1 Corinto 3:9) Nawalaan tayo na inkapnek ed pakaamtan napapaliket tayo so puso nen Jehova. (Uliran 27:11) Tan walaan tayo na panamaseguron ag-itayon balot lingwanan odino paulyanan nen Jehova likud no sikatayo so mansiansian matoor ed sikato.—Hebreos 6:10-12.
[Paimano ed leksab]
a Diad Griego, say “baton pakatiroran” (σχάνδαλον, skanʹda·lon) so gendagendat a “tawag ed kabiangan na patit ya akakabitan na tapang, kanian, satan so patit odino kalot a mismo.”—Vine’s Expository Dictionary of Old and New Testament Words.
Antoray Nononoten Yo?
◻ Panon ya agnamamamtaan nen Pedro a sikatoy magmamaliw a baton pakatiroran ed kurso na panagsakripisyo?
◻ Anto so kabaliksan na benegan so inkasika?
◻ Panon a sakbaten na Kristiano so panamairapan a kiew to?
◻ Panon tayon bayuboan tan pansiansiaen so panagsakripisyo?
◻ Anto so manamakiwas a puersa ed panagsakripisyo?
[Litrato ed pahina 10]
Kasin mabulos yon benegan so inkasikayo, ya alaen so panamairapan a kiew yo, tan mantultuloy ya ontumbok ed si Jesus?