Akin a Surien so Inkasusto na Biblia?

Panon so panmoria yo ed Biblia? Arum et sisiaen dan mapekder a satan so impuyan na Dios ed too. Sisiaen na arum a satan so ordinaryo lambengat a libro. Siansian arum so agmaseguro. No walaan kayo na antokaman a panduaruwa ed lapuan na Biblia, walaray kapilitan a rason no akin a nepeg yon usisaen tan solbaren so isyu.

ANGGAD koma-18 siglo, say Biblia so inkalapagan a nirespeto bilang Salita na Dios diad saray dalin na Kakristianoan. Balet nanlapud koma-19 siglo a manpatuloy, ondarakel iray edukador, sientista, tan anggan saray teologo tan papangulo na iglesia so ginmapo a mapublikon mangiyaabawag na panduaruwa ed inkasusto na Biblia.

Bilang nansumpalan, nagmaliw a laganap so panagbalaw ed Biblia a dakel so nanggawa la na dilin opinyon anggaman agda ni amta iray lugan na Biblia. Dakel a totoo ed Kakristianoan so ontutupleg natan ed saray pilosopiya na totoo bilang kasalat na Biblia. Siansian say modernon pilosopiya so ag-amawala na mas maligen odino mas maliket a mundo. Satan so sakey a maabig a rason ya usisaen so Biblia tan nengnengen no kasin say panangiwanwan to so mangitonton ed liket tan aligwas.

Sananey nin rason a surien so inkasusto na Biblia et lapud makapakelaw ya ilalon isisipan to parad katooan. Alimbawa, ibabaga na Salmo 37:29: “Say matunong tawiren to so dalin tan manayam diman lawas.” (Apocalipsis 21:3-5) Anto so epekto na sarayan sipan ed sika? Peteg a saraya so magenap a rason pian usisaen so Biblia tan nengnengen no kasin napanmatalkan.

Sayan magasin so lawas mangitatandoro ed inkamatua na Biblia tan mabetbet a mangidadatak na paneknek ed inkasusto to. Dakerakel so pakasurian ed inkasusto na Biblia. Saray nankakapigan paway na Say Panag-Bantayan so ontulong ed sikayon mangebat ed sarayan tepet: Kasin saray kabkabat a katuaan na kadaanan ya awaran so ontukoy ed Biblia? Kasin susto iray panangipasakbay to? Kasin praktikal so simbawa to, odino apaneknekan ta na saray modernon managbangat tan pilosopo a say Biblia et aliwa lan uso?

Say heograpiya so sananey nin pakasurian yo ed inkasusto na Biblia. Saray paganon es-estorya so mabetbet a misumlangan ed saray heograpikon katuaan. Alimbawa, estoryaen na inmuunan totoo iray impanbiahen mamaarap ed tatawagen a mundo na inaatey. Nipaakar ed kadaanan iran Griego, ipaliwawa na libron A Guide to the Gods: “Say dalin so anengneng bilang tapyak ya aliktob na maawang a pasen na danum a tatawagen a Kadayatan. Diad labas na saya et pinmanat so mundo na sananey a bilay (Afterworld), sakey a maudiem a kibalatar a dalin ya atayak iray magket tan agmanbubungan tanaman.” Sanen saya so apaneknekan bilang es-estorya, saray paganon pilosopo so kaukolan a mangiyalis ed tatawagen dan mundo na sananey a bilay. “Sakey a matukoy a pasen so aromog, diad dalem na dalin, a saray nanduruman ungib so angikonekta ed sayan mundo,” impaliwawa nen autor a Richard Carlyon. Natan et amta tayo a saya met so es-estorya. Anggapo so niwalan ontan a mundo na saray inaatey (underworld) odino papawayan.

Aliwan singa saray es-estorya na inmuunan totoo, say Biblia so agnankarga na lingon panmoria a say dalin et tapyak. Imbes, ibabaga to so sientipikon katuaan a say dalin et tibukel a manbitbitin ed anggapo. (Job 26:7; Isaias 40:22) Komusta so arum iran heograpikon deskripsyon ya asalambit ed Biblia? Kasin saratan so es-estorya, odino posiblin iretrato a tekep na inkasusto iray ebento ed Biblia sano ombibisita ed kaplesan-agew ya Ehipto, a pati ed Sinai Peninsula, tan modernon-agew ya Israel?

[Litrato ed pahina 3]

“Sikato a manyorong ed tagey na tibukel a dalin.”​—Isaias 40:22

“Ibitin to so dalin ed tapew na angapo.”​—Job 26:7