Kasin Posibli so Tuan Salimbeng?

AMINSAN et imbaga na managsulat na essay a si Ralph Waldo Emerson: “Saray totoon ataptapew so kanonotan da so manisia ed swirti . . . Saray totoon mabiskeg ed moral tan kanonotan so manisia ed sengegan tan epekto.” On, say toon manisia ed pakayari na saray maswirtin galing tan anting-anting so mangisusuko na bilay to ed saray agnanengneng a puersa. Ipupulisay to so lohiko tan katunongan tan pababanlongan ed anggapoy katunongan, maanito iran katatakotan.

Anggaman ontan, say Biblia so makapangibulos ed too manlapud saratan a katatakotan. Ipapanengneng to a saray galing tan anting-anting so andiay pakayari, inutil. Diad anton paraan? Bueno, unong ed The New Encyclopœdia Britannica, “saray galing so ipapasen a mangaala na pakayari ra manlapud saray koneksyon da [nilikud ed arum niran bengatla] ed saray natural a puersa.” Sarayan puersa so nayarin ‘saray espiritu na inaatey’ odino ‘say pakayari na swirti.’ Balet malinew ya ipapanengneng na Biblia a saray inatey et “agda amta so bengatla.” (Eclesiastes 9:5) No ontan, anggaporay espiritu na inatey a makatulong odino makapasakit ed saray mabilay; nisay wala so antokaman ya agnanengneng a puersa a singa say kapalaran a walay nagawaan to ed biang mo.

Diad saray panaon na Biblia, kinondena na Dios iray mangikakaindan ed sikato, saramay makakalingwan ed masanton palandey to, “ya angitadia na sakey a dulang a nipaakar ed Kapalaran tan mamano ed alaokan ya alak ed Signo.” Imbes a gamoray salimbeng, saramay mangiyaalibansa na kapalaran so niganan naderal. “Igeter ta kayo naani ed kampilan,” kuan nen Jehova a Dios.​—Isaias 65:11, 12.

Diad pangaagamil na magic, say kadaanan a nasyon na Babilonia so angagamil met na pananisia ed salimbeng na misteryoso iran pakayari. Balet say Babilonia so akasagmak met na kadederal. “Mantultuloy kan onalagey ed saray engkanto,” so inyangat nen propeta Isaias. “Angangko ta makakerew ka na tulong manlapud sikara . . . Balet andi! anggaman ed dakerakel a panagpalikdom, sikay andiay biskeg.” (Isaias 47:12, 13, The New English Bible) Asabi panaon, saman a nasyon so naandi. Apaneknekan a kaapaan so panisia ed okulto. Mipadpara, anggapoy misteryoson galing, anting-anting, odino agimat ya ontulong odino manalimbeng ed sika.

Sakey a Nengneng na Panagtalintao

Siansia, nayarin agnaiimano na arum so pasakit a gagawaen na sakey a kristal, sakey a sali na kuneho, odino sakey a relihyoson medalya. Agta saraya so mumuraen lambengat ya alahas ya agmakapasakit? Aliwan unong ed ibabaga na Biblia. Ibabaga to a saray kagawaan ed okultismo so pihon makapasakit.

Say panangusar na saray galing so sakey a nengneng na panagtalintao​—a malinew a kinondena na Salita na Dios. (Exodo 20:4, 5) Tua, a nayarin agliknaen na sakey a sikatoy direktan mandadayew ed sakey a galing odino sakey ya agimat. Balet agta mangipapatnag itan na galang, awawey na panagdayew ed agnanengneng iran walaay pakayari okultismo no say sakey so basta walaan itan? Tan agta tua a saray anting-anting a mismo so mabetbet ya iikdan na panangimano tekep na dayew (a singa say panag-angob)? Ingen say Biblia, ed 1 Juan 5:21 so manisimbawa ed saray Kristiano: “Arawian yo so saray kinondiosdiosan.” Agta laktipen na saya iray bengatlan momoriaen a bilang anting-anting odino galing?

Say Patit na Okulto

Diad panangusar na saray galing, dakel met so apatitan na okulto. Tua, walaray arum a mangaawit na kristal odino misteryoson iinumen lapud kustombre tan aliwan lapud mabiskeg a kumbiksyon. Balet no panon a say pirelasyonan ed sakey a balangkantis so nayarin mangipaarap ed pansakit na say AIDS, say pisiglaotan ed okulto so mansumpal met ed kapeligroan. Walay makatunongan a rason no akin a sinebelan na Dios iray Israelita ed panangagamil na magic, dibinasyon, tan panagparles. Ipapasakbay na Biblia, “Say siopaman a mangawa ra nia sikato so kadimdimla nen Jehova.”​—Deuteronomio 18:10-14.

Akin ya ontanlan mapekder a panangisebel? Lapud saray agnanengneng a puersan walad benegan na saratan ya agamil so aliwan saray espiritu na inaatey nisay pakayari na swirti noag si Satanas a Diablo tan saray demonyo to.a Tan say panangusar na saray galing so direktan nisisiglaot ed panagdayew ed demonyo. Kuan na Vine’s Expository Dictionary of Old and New Testament Words: “Diad panagsalamangka, say panagdruga, balanglan simpli odino mabiskeg, so gendagendat ya uulopen na saray orasyon tan panapelo ed okultismo, tekep na probisyon na nanduruman anting-anting, galing, tan arum ni.”

Say sakey a walaay anting-anting so mibibiang sirin ed espiritismo. Sikatoy walad kapeligroan a nisilong ed mauges ya impluensya tan pakayari na “dios na saya’n panaon”​—si Satanas a Diablo. (2 Corinto 4:4) Kanian, sirin, say Biblia so walaay maabig a rason ed pangigaganggan a paliisan tayo so amin a nengneng na espiritismo.​—Galacia 5:19-21.

Ilulukpos ed Panag-anito

Anggaman ontan onia so naimano na say The World Book Encyclopedia: “Angangko ta saray anito so nawalaan na kabiangan ed kabibilay legan a natatakot iray totoo ed balang sakey tan agmakapanseguro nipaakar ed arapen.” Balet tutulongan na saray Tasi nen Jehova so dakel pian nibulos ed makapasakit iran panag-anito. Sakey a biin taga Abalaten ya Aprika ya akasagmak na onia so nankuan: “Siak so ginonigon na mauges iran espiritu, tan say abung ko so napno na muti ta pian manalimbeng ed siak sumpa’d sikara.” Sikatoy tinulongan na saray Tasi nen Jehova a makanengneng ed kapeligroan na pibibiang ed okulto. Anto so kiwas to? “Ginapoan kon ibantak ya amin so bengatlan kayarian kon mikonektaan ed demonismo,” kuanto. “Inmaligwas so bunigas ko. Intalagak so bilay ko’d panaglingkor ed si Jehova tan siak so nanpabautismo.” Sikato la natan so bulos manlapud panag-anito tan espiritismo.

Kunsideraen pa met so albolaryon taga Nigeria a nilaokan to na espiritismoy panagtambal to. Mabetbet diad panguusar to na panagtaktakot tan panangisamba, niyugali ton ablogen iray Tasi nen Jehova sano sikaray ondadalaw. Aminsan et sikatoy namparaan na sakey ya espesyal ya iinumen, nan-orasyon, tan inpugso to ed lupa na sakey a Tasi! “Diad loob na pitoran agew et sikay ompatey!” inyeyag to. Pitoran agew ed saginonor say Tasi so pinmawil, a sengegay manapurastan impaway na albolaryo, diad impakabaloan a sikatoy akanengneng na anyani! Natan ta niwalwal ya anggapoy kana na magic to, sikato so inmabuloy a paiyaralan na Biblia tan diad kaunoran et nagmaliw a sakey a Tasi.

Anggan sika so nayarin nibulos manlapud inkabalor ed takot tan panag-anito. Aminen tayon agmainomay iya. Nayarin sika so binmaleg ed kultoran kaslakan so panguusar na saray galing tan anting-anting. Saray Kristiano ed kadaanan ya Efeso so nidunget ed ontan ya angat. Sikaray nambilay ed kultoran malaknab so impluensya na espiritismo. Anto so ginawa ra sanen naaralan da so katuaan na Salita na Dios? Kuan na Biblia: “Et aliwa’n daiset ed saray maanito so nantipon na saray libro ra, et pinoolan da ra ed arap da ya amin: et binilang da so bili ra, et aromog a limamplon libo a denario a pilak.”​—Gawa 19:19.

Igamor ed Salimbeng na Dios

No lukposen mo so amin a bakat na okulto, agka ta naekalan na proteksion? Diad kasuniyan to, “Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon.” (Salmo 46:1) Say pananalimbeng na Dios so nagkalautlan nipatnag sano deralen to iyan marelmeng a sistema na bengabengatla. “Amta na Katawan [Jehova, NW] so pangiliktar to ed saray masantos ed katokso, tan mangigana ed saray aliwan matunong ed lepsag na kadudusa no nasabi agew na panangokom.”​—2 Pedro 2:9; ipareng so Salmo 37:40.

Kaleganan to, ‘say panaon tan kapalaran nagawa ed sikatayon amin.’ (Eclesiastes 9:11) Ag-isisipan na Dios a say ariripen to so nawalaan na “anting-anting” ed bilay odino sikaray ilaban to ed amin a personal a kapasakitan. Anggaman kuan, isisipan to a salimbengan toy espiritualidad tan relasyon tayo ed sikato. (Salmo 91:1-9) Panon? Manuna, sikatoy mangiiter na saray ganggan tan prinsipyon makagungguna ed sikatayo tan manalimbeng ed sikatayo manlapud mauges ya impluensya nen Satanas. (Isaias 48:17) Diad pakagamor tayo na pikakabat ed saray dalan nen Jehova, say ‘kalakal sikato naani bantay ed tagey tayo; say pakatalos sikato naani mangyagel ed sikatayo’​—alimbawa, manlapud anggapoy gungguna odino makapasakit iran aktibidad.​—Uliran 2:11.

Say sakey nin paraan na panangiliktar ed sikatayo na Dios et say pangitatarok to na “pakayarin labas nen say gendat” diad saray panaon na subok. (2 Corinto 4:7, NW) Tan sano manigensigen iray sirkumstansyan manalona ed sakey a Kristiano, Sikatoy mangiiter na “deen na Dios, a talonaan to’n amin a pakatalos” pian manbantay ed puso tan say panagnonot. (Filipos 4:7) On, say Kristiano so nakikinlongan pian “ontalindeg ya onsumpa ed saray pangalot na diablo.”​—Efeso 6:11-13.

Panon mon nagamoran so ontan a salimbeng? Onggapo ka diad pangasol mo na pikakabat nipaakar ed si Jehova tan say Anak to, si Jesu-Kristo. (Juan 17:3) Baleg so nagawaan na saray Tasi nen Jehova ta pian natulongan ka nipaakar ed sarayan bengatla. Legan a babayuboan mo so ampetang a siglaotan ed si Jehova, nagapoan mon naeksperiensia so sipapangasin salimbeng to. Ibabaga na Dios, unong a nabasa tayo ed Salmo 91:14: “Nisengeg ed impasen to so aro to ed siak, kanian sikato so iliktar ko. Sikato so ipasen ko ed tagey, nisengeg ed kinabat to so ngaran ko.”

On, no sika so matoor ed sikato, diad kaunoran et bendisyonan ka na Dios na andi-anggaan a bilay ed onsasabin balon mundo. Ipapaseguro nen Jehova ed saramay manbibilay ed satan a panaon: “Angapo naani manaktatkot ed sikara: ta say sangi nen Jehova na saray ejercito sikato so sinalita to.” (Miqueas 4:4) Anggapo la so sakit tan ipapatey. (Apocalipsis 21:4) On, anggan natan et makapangayaga ka na malaem a kaligenan​—no bayuboan mo so maapit a siglaotan ed si Jehova. Singa say salmista, nayarian mon ibaga: “Say tulong ko onsabi a manlapu ed Jehova, a sikato so nangawa na tawen tan dalin.”​—Salmo 121:2.

[Paimano ed leksab]

[Litrato ed pahin 6]

Inwaklit na saray Kristiano ed Efeso so amin a bengatlan walay pisiglaotan ed okultismo

[Litrato ed pahin 7]

Diad silong na Panarian na Dios, naandi la so takot