Say Tombok ed Matalonan Bilay na Pamilya

“WALAAN kami na nagegeban yunit na pamilya,” so inkuan na sakey a kandidato ed inkapresidenti diad E.U. nen katantaon. Peteg a makapakigtot so laknab na kagegeba na pamilya. “Saray pananguman ed mipadparan laknab diad report na ekonomya odino industriya ed parehon peryodo na panaon,” unong ed salaysay na magasin a Fortune, “so mamakelaw ed sikatayo.”

Anggan saray pamilyan manggugunaet ya ontumbok ed saray prinsipyo na Biblia so mabetbet a manasagmak na maermen ya epekto to. Pigaran taon so apalabas, sakey ya ama na anemiran manedad na sakbay-tinedyer so binagaan na kaparan Kristianon anggapoy mauges ya intensyon: “Nailaloan mon apatira ed ananak mo so agmansiansia ed katuaan.” Ingen, sayan ama so ag-anisia a nagawa iya anggan ed sakey ed saray anak to. Insalaysay to no akin.

“Saray anak mi so talagan agmi kayarian,” inkuanto. “Sikaray inmatalek ed sikamin sanasawa nen Jehova a Dios, sakey a ‘tawir,’ odino sakey a langkap a nanlapud sikato. Tan inkuanto a no sikaray ipasal mi ed dugan paraan, sikaray “ag onarawi ed sikato.” Kanian lawas min nanggunaetan a sikaray asikasoen a singano sikaray kien nen Jehova.”​—Salmo 127:3; Uliran 22:6.

Ipapaamta dia na ama so tombok ed matalonan bilay na pamilya​—saray atateng so nepeg a mangasikaso ed saray anak da a singano sikaray mangaasikaso’d kayarian na Dios. Bangta agto labay ya ibagan diad amin a pankanawnawa et ontalineng iray anak ed maabig a panangiwanwan yo, walaan kayo na responsabilidad ya asikasoen iray anak yo ya inmatalek na Dios ed sikayo.

Sakey a Seryoson Responsabilidad

Duga so pangitatarok mo na onian panangasikaso tekep na aralem a respeto tan panagpaga, aliwan palpalaran odino anggapoy pananginunang. Kikimeyan mo itan ta amtam a mikuentaan ka ed Dios ed inter to’d sikan tawir, odino regalo. Agla kaukolan a salien so nambabangil a paraan ed panamabaleg na anak. Say kaukolan lambengat na saray ateng et saray panamilin na Dios a nitarya ed Salita to, say Biblia, tan nepeg a siaalwar irayan tumboken.

Onia so bilin nen Jehova a Dios: “Tan nepeg mo ya ibangat iraya [saray salitak] a sankakolian ed saray anak mo, tan nepeg mo ra a tongtongen kapagno manyorong ka ed abung mo, tan kapagno manakar ka ed dalan, tan kapagno mandokdokol ka tan kapagno onbangon ka. Tan iberber mora ed limam ya onkana a sakey a panamirbiran, tan manayam ira ed parongtal ed nanleetan na saray matamatam. Tan isulat mo ra naani ed saray lusek na kapot na abung mo, tan saray pinto ed polong.” Ipapaseseg met na Biblia: “Sikayo, kaamaan, . . . itultuloy yon pabalegen [iray anak yo] diad disiplina tan manametek-kanonotan nen Jehova.”​—Deuteronomio 6:7-9; Efeso 6:4, NW.

Kanian say panangasikaso ed saray anak et kakaukolanen to so inagew-agew a panangimano; on, kaukolan a sikaray mabulbulos mon ikdan na say panaon mo tan nagkalautla ed panangarom tan aralem a panagpagam. Saray ateng a mangiiter na sarayan manunan pankaukolan ed saray anak da so manusumpal ed ibabaga na Dios a kaukolan a gawaen ta pian napangayagaan so sakey a matalonan bilay na pamilya.

Kasin sisiaen mon ambelat a tuloy iyan kakaukolanen? Dakel ya atateng so mangipapanengneng ya ontan so liknaan da. Ingen, sarayan langkap a nanlapud Dios​—saray anak yo—​so talagan makanepegan na nagkalalo nen say kaslakan a panangimano.

No Panon a Sikaray Asikasoen

Tekep na kakabatan, kunsideraen pa so alimbawa na saramay magayaga ed matalonan panamabaleg ed saray anak. Sakey a magasin, diad cover story a “Makapakelkelaw Iran Pamilya,” so analambit na apatiran bengatlan makana ed matalonan panamabaleg na ugugaw: “[1] Pantotongtong legan na panangan a mamaliing ed kanonotan, [2] say panagbasa na maabig iran libro, [3] say inspirasyon manlapud totoon matudio tan manepeg ya aligen, [4] say pakaamta a walay sakey a tradisyon na pamilya a kaukolan a pansiansiaen.”​—U.S.News & World Report, Disyembre 12, 1988.

Nipaakar ed “pantotongtong legan na panangan,” tandaan a bibilinen na Dios iray ateng a bangatan daray anak da kapagno sikaray manyudyurong ed abung. Kasin say pamilyam so regular a mandurungoan, diad ontan et mangiiter na inagew-agew a pankanawnawan sikayoy maniiba tan minabang ed makapabiskeg a tongtongan? Saratan a panaon so kaukolan tan makatantanda para’d ananak, a mangitatarok ed sikara na liknaan na inkapekder tan inkaligen. Sakey ya anem-taon so angikuan a labay toray oras na panangan “lapud agka napapagaan ed balang sakey,” ta amin so wadtan.

Komusta met so kalidad na tongtongan yo ed pananganan? Kasin satan so naynay a nisentro ed lugan na “maong iran libro,” a laktipen to so Biblia tan nibased-Biblian literatura a sisingbaten to so serbisyo tayo ed Dios odino ed bengabengatlan nisisiglaot ed panamalsa na Dios? Niarum ni ed onian nengneng na pantotongtong ed pananganan, diad panamegley na regular a programa na panagaral, kaukolan a bayuboan na saray ateng ed ananak da so panangaro ed si Jehova tan ed saray matunong a ganggan to.

Insalaysay na say aman walaan na anemiran ilalak ed asasakbay a, “say regular a pandurungo so aliwan problema. Saya so automatiko, tan onkakana itan a mamakasakey ed sikami. Balet say pakawalaan na sakey a regular a programa na panagaral na Biblia so mairap.” Lapud naksawan la so ateng kayari sanagew a mairap a trabaho, no maminsan et sikatoy mantemeg legan na panagaral. Ingen, sikatoy agtinmundan balot a mangikondukta ed sakey a regular a panagaral na Biblia ed saray ilalak to, tan sikatoy maparanay a mitongtong ed sikara bilang sinansakey tan talinengen ira ed andukey a panat na panaon.

Nilikud ed panangidaulo ed makabaliksan a pantotongtong ed pananganan tan pangitatarok ed maabig iran libro, kasin seseguradoen mon saray anak mo so mangaawat na “inspirasyon manlapud totoon matudio tan manepeg ya aligen”? Say katuaan et say panangiyuksoy ed saray anak mo a milimog a maparanay ed saramay mangaalig ed sankabalgan a toon nambilay ed kapiganman, si Jesu-Kristo, so kaukolan pian magmaliw iran matalonan adulto.

Kaunoran, komusta met so “pakaamta a walay sakey a tradisyon na pamilyan kaukolan a pansiansiaen”? Kaukolan a natalosan na saray anak mo a walaray estandarte na pamilyan kaukolan a pansiansiaen da​—ya arum a kondukta, panagsalita, panangawes, walna, tan arum ni, so agnaawat tan sumlang ed tradisyon na pamilya. Kaukolan a namoria ran say isumlang ed tradisyon na pamilya so sakey a seryoson pamaakaran—​a sika so nasakitan a tuloy, a singa ed si inmunan patriarkan Jacob, a ‘pinaingongot ed saray totoo ed sayan dalin’ na ilalak ton lalaki lapud makapabaing a kondukta ra.​—Genesis 34:30.

Say ama na anemiran momoriaen ton saray ilalak to a bilang kayarian na Dios so nagkalautlan angidanet ed “tradisyon na pamilya.” Sikatoy naynay a mikakatunongan ed saray ilalak to ed no panon a say estandarte na pamilya ed panangawes, panag-ayos, tan say iyaarawi ed saray dalan na mundo so mitunosan ed espiritu tan panangiwanwan na Manamalsa, si Jehova a Dios. Lapud baleg a panaon, panangaro, tan panagpagan tuloy a niiter ed sikara​—say panangipasal ed dalan a nepeg dan laen—​say anemiran anak so kinmiwas diad ‘ag-inyarawi’ manlapud satan a dalan.​—Uliran 22:6.

Diad sankamundoan, walaray singa ontan a nilibon mabiskeg a pamilya. Agaylan mamagalang iraya ed Manamalsa ra, tan agaylan tumang ira ed agmasiblet, maaron atateng! Diad ilalabas na saray taon, saratan ya atateng so nagkalalon pablien na saray anak a nagugunggunaan ed saray sagpot da. Ipangasin kunsideraen so ontumbok ya estorya na sakey a biin pinabaleg na maridios ya atateng, tan imanoen iray mablin leksion a naaralan manlapud satan.