Sakey a Nikadkaduman Kristianon Tawir

UNONG ED SALAYSAY NEN BLOSSOM BRANDT

Inmuran na yelo ed San Antonio, Texas, nen Enero 17, 1923, say agew na inkiyanak ko. Ambetel ed paway, balet siak so maliket ya inabrasa ed ampetang iran taklay na maaron Kristianon atateng ko, di Judge tan Helen Norris. Diad sankasakbayan iran memoryak, amin a ginaway atateng ko so nisentro ed panagdayew da ed si Jehova a Dios.

NEN 1910 sanen si Ina so manedad na walora, saray ateng to so inmalis manlapud asingger na Pittsburgh, Pennsylvania, ya amaarap ed sakey ya alog ed paway na Alvin, Texas. Diman da nangayagaan a naaralan iray katuaan ed Biblia manlapud sakey a kaabay. Inusar nen Nanay so nakekeraan a kabiangan na bilay to ed gunaet a sagyaten so totoo nipaakar ed ilalo ed Panarian. Sikatoy abautismoan nen 1912 kayari inyalis na pamilya ed Houston, Texas.

Si Charles T. Russell, say inmunan presidente na Watch Tower Bible and Tract Society, so akabat nen Nanay tan saray ateng to sanen sikatoy binmisita ed kongregasyon da ed Houston. Mabetbet a manasankaili so pamilya ed ayaman da na saray managbaroy a manangilaman na Sosyedad, a nensaman et tatawagen iran pilgrim. Kalabas na pigaran taon, si Ina a kaiba na saray ateng to so inmalis ed Chicago, Illinois, tan si Brother Russell so ombisita met ed kongregasyon diman.

Nen 1918, si Bai so dinapoan na trangkaso Español tan lapud makapaletey ya epekto ed bunigas to, inrekomenda na saray doktor a sikatoy manpaabig ed sakey a lugar a walaan na ampetpetang a klima. Lapud si Laki so mantatrabaho ed kompanya na tren a Pullman, nen 1919 et sikatoy inyalis da lamet ed Texas. Diman, ed San Antonio, akabat nen Nanay so maseseg a kalangweran a membro na kongregasyon a manngaran na Judge Norris. Sikaray akapangustoan a tampol, tan ag-abayag et nankasal ira, tan si Judge so nagmaliw ya amak.

Naaralan nen Tatay so Katuaan ed Biblia

Si Judge (ukom) so inikdan na nikadkaduman ngaran sanen sikatoy niyanak. Sanen inmunan anengneng nen tatay to, inkuanto: “Satan ya ugaw so seryoso a singa sakey a judge (ukom),” tan satan so nagmaliw a ngaran to. Nen 1917, sanen si Tatay so 16, sikatoy inikdan na saray tract a Where Are the Dead? tan What Is the Soul? ya inimprinta na Watch Tower Bible and Tract Society. Say ama nen Tatay so duay taon lan inatey, tan saray tract so angiter ed sikato na saray ebat ed aanapen to nipaakar ed kipapasen na inaatey. Ag-abayag kayari to, sikatoy ginmapon onatendi ed saray miting na Saray Estudyante na Biblia, a singa tawag nensaman ed saray Tasi nen Jehova.

Labay nen Tatay so mibiang a tampol ed saray kimey na kongregasyon. Sikatoy angala na sakey a teritoryan napanpulongan to, tan kayari klase sikato so manbisikletan mamaarap a mangibunog na saray tract. Sikatoy sigpot ya akibiang ed pananginabang na ilalo ed Panarian, tan nen Marso 24, 1918, insimbolo to so dedikasyon to ed si Jehova diad panamegley na bautismo ed danum.

Diad tinmumbok a taon sanen inmalis si Nanay ed San Antonio, naingganyon tampol si Tatay ya inkuanton “say sankasamitan ya imis tan sankaasulan iran mata” ya anengneng to ed kapiganman. Ag-abayag et impakabat dan labay day mankasal la, balet nairapan iran mangumbinsi ed atateng nen Nanay. Ingen, nen Abril 15, 1921, agaway kasal. Kalat dan dua so sigpot-panaon a ministeryo.

Asakbay a Panangigapo ed Ministeryo

Sanen si Nanay tan Tatay so okupado ed panplaplanon iyatendi ed kumbension ed Cedar Point, Ohio, nen 1922, naamtaan dan siak so lukon nen Nanay. Tampol kayari inkiyanak ko, sanen si Tatay so manedad lambengat na 22, sikatoy aturon service director na kongregasyon. Kabaliksan na saya a sikatoy nanggawa na amin ya oksuyan ed lawak a serbisyo. Pigara lambengat a simba kayari inkiyanak ko, siak lay kaiba nen Nanay ed panagkabkaabungan. Diad tua, labay met na saray laki-baik a siak so kaulop da ed ministeryo.

Sanen duay taon ko lambengat, inmalis iray ateng ko ed Dallas, Texas, tan ginapoan da so sigpot-panaon a ministeryo bilang payunir kalabas na taloran taon. No labi, sikaray onugip ed sakey a dokolan ed gilig na dalan tan iiyan da ak ed beneg a yurongan na kotse. Siempre, ikuankon makapaliket iya, balet ag-abayag et apatnagan a sikaray ag-akaparaan ed saman a manpayunir. Kanian si Tatay so angigapo na negosyo. Ag-abayag, sikatoy nanggawa na sakey a trailer bilang panparaan ed panpayunir lamet.

Sakbay a naneskuela ak, imbangat ak nen Nanay a manbasa tan mansulat, amtak so anggad komapat a multiplication table. Lawas akapuntirya so imano to ed panulong to’d siak a makaaral. Paalageyen toak ed yurongan ed abay to pian punasan koray plato kayari ton urasan, tan bangatan toak a manpatlep na saray teksto tan mangansion na saray kanta ed Panarian, odino saray himno a singa tawag mi nensaman.

Panaglingkor ed Dios a Kaiba Iray Ateng Ko

Nen 1931 sikamin amin so inmatendi ed makapagayagan kumbension ed Columbus, Ohio, a diman mi naawat so ngaran a Tastasi nen Jehova. Anggaman siak so waloy taon lambengat, ninonot kon saman so sankarakpan a ngaran a nadngel ko ed kapiganman. Ag-abayag diad insempet mi, say negosyo nen Tatay so apoolan, tan sikara di Tatay tan Nanay so anisian saya so “linawa na Katawan” a sikaray ginmapo lamet a manpayunir. Kanian, diad kagapo na tiagew na 1932, sikami magayagan nanlingkor ed dakel a taon diad sigpot-panaon a ministeryo.

Saray ateng ko so nampayunir ed sentral a Texas pian mansiansian asingger ed saray ateng nen Nanay, a wadman ni ed San Antonio. Say iyalis-alis ed saray distino so mankabaliksan ed siak na mabetbet a pansalat na saray paneskuelaan. No maminsan et ibaga na saray anggapoy-alwar a kakaaron, “Akin ya agkayo manpirmi ed sakey a lugar tan nawalaan na ayaman para’d satan ya ugaw,” a singano agak naaasikason maong. Balet inilaloan kon say bilay mi so makapaliket tan natutulongan ko ra di Tatay tan Nanay ed ministeryo ra. Diad tua, siak so ipapasal tan ipaparaan da ed magmaliw a dilin estiloy-bilay ko ed saginonor.

Diad ilalabas na saray bulan naynay kon ibabaga ed si Tatay tan Nanay a labay koy manpabautismo, tan mabetbet da ak a kakatongtongen nipaakar ed saya. Labay dan seguroen ya amtak no kaunongan kaseryoso so desisyon ko. Nen Disyembre 31, 1934, sinmabi so agew para’d sayan makatantandan ebento ed bilay ko. Anggaman ontan, diad labi sakbay a nagawa iya, sineguro nen Tatay a siak so nampikasi la ed si Jehova. Kayari to et sikatoy nanggawa na sakey a makapaliket a bengatla. Sikami so impantalimukor to, tan sikatoy nampikasi. Imbaga to ed si Jehova a sikatoy ontanlan maliket para’d anak to ya idedika ed Sikato so bilay to. Ilaloan yo, ya anggad kapigan et agkon balot nalingwanan itan a labi!

Panangipasal na Saray Laki-Baik

Diad baetan na 1928 tan 1938, angusar ak na dakel a panaon ed ibisita ed laki tan baik ed San Antonio. Say rutina ra so mipadpara met ed saray ateng ko. Si Bai so nagmaliw a sakey a colporteur, a singa say tawag da nensaman ed saray payunir, tan insan sikato so nagmaliw a tunggal paminsan a payunir. Si Laki so aturon payunir nen Disyembre 1929, kanian say serbisyo ed lawak so nagmaliw a sakey a regular ya inagew-agew a kimey.

Siak so bembenan nen Laki no labi tan babangatan toak na saray ngaran na bibitewen. Sikatoy mangibalikas ed saray anlong a nipatlep to. Kaulop toak ed dakel ya impanbiahe ton akalugan ed tren na Pullman sanen sikatoy mantratrabaho para’d relis. Sikato so lawas naasinggeran ko sano walaan ak na problema; niligliwa toak tan pinunas toray luak. Ingen, sano siak so dinisiplina lapud makapuy ya awawey ko tan onla’d sikato pian mananap na ligliwa, ibaga to lambengat iray salitan (agko natalosan ed saraman a panaon, balet ta agaylay linew na tono ra): “Ining, say sakey a makakagaway lingo, so manirap.”

Saray Taon na Panamasegsegang

Nen 1939, ginmapo so Guerra Mundial II, tan saray totoo nen Jehova so anagmak na panamasegsegang tan karawalan na saray ulop. Diad kasampotan na 1939, si Nanay so maniinagem a tuloy tan diad kaunoran et mankaukolan na operasyon, kanian pinmawil kami ed San Antonio.

Legan a sikami manmamagasin ed saray lansangan na San Antonio, mantitipon met iray ulop. Balet kada simba, bilang sakey a pamilya, sikami wadman ed balang kanton akaasainan mi, mabetbet a siak so akabantay legan ya aawiten da si Tatay ed estasyon na pulisya.

Nanggunaetan nen Tatay ya ituloy so panagpayunir anggaman kaukolan ya ontunda si Nanay. Anggaman ontan, sikatoy ag-akalmo na magenap ed tunggal paminsan a panagtrabaho, kanian sikato so kaukolan met ya ontunda. Asumpal ko so paneskuela nen 1939, tan siak so nantrabaho met la.

Say ngaran nen Tatay a Judge (Ukom) so akatulong na baleg legan na saraman a taon. Alimbawa, sakey a grupo na kakaaro so linma diman pian manpulong ed sakey a baley ed amianen na San Antonio, tan sikaran amin so ginapoan ya ipisok na sheriff. Impaaresto to so ngalngali 35, kaiba lay lakik tan si baik. Impakabat da ed si Tatay ko, tan sikatoy linma diman. Dinmeretso ed opisina na sheriff tan inkuanto: “Siak si Judge Norris a nanlapud San Antonio.”

“Sir, Judge (Ukom), antoy nitulong mi ed sikayo?” so intepet na sheriff.

“Siak so linma dia pian amtaen no sarayan totoo et nibulos la manlapud karsel,” ebat nen Tatay. Kayari to et inabuloyan lara na sheriff a nibulos ya anggapoy piyansa​—tan anggapo lay kaaruman a tepet!

Si Tatay so mahilig a manpulong ed saray paalagey ya opisina ed baley, tan labalabay to so ondalaw ed saray ukom tan abogado. Onia so ibaga to ed receptionist: “Siak si Judge Norris, tan linma ak dia pian minengnengan ed si ontan a Judge.”

Kayari to, no akabat to la so ukom, sikatoy lawas akaunan mangibagan: “Bueno, sakbay ak a mansalita nipaakar ed gagalak, labay kon isalaysay a siak so sakey ya ukom a mas abaybayag nen say sika. Siak so sakey ya Ukom ed interon bilay ko.” Tan kayari to et isalaysay to no panon ton agamoran so ngaran to. Saya so kinmanan makaaron panangikabat ed inkasikato, tan abayuboan to so dakel a maabig a siglaotan ed saray ukom ed saman a panaon.

Pisasalamatan so Panangiwanwan na Atateng

Siak so walad panaon na inkagulo na saray taon na inkatinedyer, tan amtak a si Tatay tan si Nanay so mabetbet a napapagaan legan a babantayan tan uumamengen da no antoy ontumbok a gawaen ko. Singa gagawaen na amin na anak, aminpigan danay a sinubok ko si Tatay tan si Nanay, a kekerewen so sakey a bengatla odino onla ed inerman ya amta lan ununa a say ebat da et andi. No maminsan et walaray inangis. Diad tua et seguro siak so lalon naaburido no say ebat da et: “Sige, gawam so labay mo. Anggapoy pibabali mi.”

Amawala iya ed siak na liknaan na inkaligen ed pakaamtan sikaray agko naimpluensyaan ta pian umanen iray estandarte ra. Diad tua, lapud saya et nagmaliw a mas mainomay ed siak sano saray arum a kalangweran so mangisuhiri na agmakabat a panligliwaan, lapud nibagak: “Agak abuloyan nen Tatay ko.” Sanen siak so mantaon na 16, imbangat ak nen Tatay a manmaneho tan awalaan ak na lisensiya ed panagmaneho. Ontan met, inikdan toak na tombok ed abung. Siak so aliketan a tuloy ta panmamatalekan toak. Say liknaan ko et wala ak la’d dugan edad, tan siak so akalikna na responsabilidad tan pilalek ya agsaewen so panagmatalek da.

Diad saraman a panaon et anggapoy tanton dakel a makasulatan a panangiwanwan nipaakar ed panangasawa, balet si Tatay so walaan na pikakabat ed Biblia tan no anto so ibabaga na Biblia a miasawa “unong ed Katawan labat.” (1 Corinto 7:39) Impalinew to ed siak a no bilbilang ta mangimbita ak na sakey a taga-paway a balolaki pian nakabat na saray ateng ko, odino kunsideraen so pi-date ed sakey a taga-paway a balolaki, sikatoy nasakitan a tuloy. Amtak a sikatoy duga, ta atasian ko so liket tan pankakasakey ed panamaley da lapud sikaray nanasawa “unong ed Katawan.”

Nen 1941, sanen siak so mantaon na 18, isipen kon inarok so sakey a balolaki ed kongregasyon. Sikatoy sakey a payunir tan manaaral pian magmaliw a sakey ya abogado. Siak so maliket. Sanen imbaga mi ed atateng ko a labay mi la so mankasal, imbes ya ag-onabobon odino dismayaen da kami, anggapoy imbaga ra noagta: “Wala lambengat komon so labay min kerewen ed sika, Blossom. Diad padesir mi et ugaw ka nin tuloy, tan labay min kerewen ed sika a manalagar ka ni na sakey a taon. No sikan talaga so mangaaro la, anggapoy dipirensya na sakey a taon.”

Ontanla so pisadsalamat ko ta dinengel ko iman a makabat a simbawa. Diad loob na sakey taon, siak so tinmatken tan anengneng ko a sayan balolaki so andian na saray kalidad a nanengneng ed sakey a maong a kapareha. Diad kaunoran et tinaynan to so organisasyon, tan siak so akapaliis ed nagmaliw komon a desyang ed bilay ko. Agaylay abig na pakawalaan na makabat iran ateng a napanmatalkan iray desisyon da!

Say Panamaley tan say Panagbiahen Kimey

Diad panaon-na-ambetel ed 1946, kayari impangusar ko na anemiran taon ed panagpayunir tan tunggal paminsan a panagtrabaho, say sankaabigan a balolakin akabat ko so linmoob ed Kingdom Hall mi. Si Gene Brandt so apabtangan a magmaliw a kaiba na managbaroy ya aripen na saray agagi, a singa tawag nensaman ed manangasikaso na sirkito. Saman so namparan impangustoan, tan nen Agosto 5, 1947, sikami so nankasal.

Ag-abayag, si Tatay tan si Gene so angilukas na sakey a negosyo. Balet inkuan nen Tatay ed si Gene: “Diad agew a sayan opisina so mangamper ed iyatendi tayo ed miting odino ed sakey a teokratikon asainmin, isarak iyan negosyo.” Binendisyonan nen Jehova iyan espiritual a panmoria, tan say negosyo so angiter na supisiente para’d materyal a pankaukolan mi tan angiyabuloy ed panaon na panpayunir. Sikara di Tatay tan Gene so marunong a negosyante, tan magmainomay mi komon so onyaman, balet aliwan saya so kalat da.

Nen 1954, si Gene so inimbitaan ed kimey para’d sirkito, a mankabaliksan na baleg a pananguman ed kabibilay mi. Panon so ikiwas na saray ateng ko? Maminsan lamet, a say panagpaga ra so aliwan para’d inkasikara noagta ed intereses na Panarian na Dios tan ed espiritual a pankaabigan na saray anak da. Agdan balot imbaga ed sikami: “Akin ya agkayo manilalak ta pian nawalaan kami na saray apo?” Imbes, saman so lanang ya: “Antoy nagawaan mi pian natulongan kayo ed sigpot-panaon a serbisyo yo?”

Kanian sanen asabi so agew na iyalis mi, say nadngel ko lambengat et saray makapaseseg a salita tan gayaga ed engranden pribilihyo mi. Agda impalikna ed sikami a sikaray tataynanan mi la noagta say lawas a 100 porsienton pananuporta ra ed sikami. Kaalis mi, nantultuloy iran okupado ed panagpayunir ed loob na samploy taon ni. Si Tatay so aturo bilang manangasikaso na syudad ed San Antonio, a binenbenan to ed loob na 30 a taon. Sikatoy aliketan ed impakanengneng ed imbulaslas manlapud sakey a kongregasyon ed syudad ed saray dekada na 1920 ya anggad 71 sakbay na impatey to nen 1991.

Para’d sikamin dua nen Gene, say bilay so napno na liket. Awalaan kami na gayaga ed panlingkor ed inadaron agagi ed masulok a 31 ya estado tan, angangko say kapantokan na amin et say pribilihyon pakapibiang ed koma-29 a klase na Watctower Bible School of Gilead nen 1957. Kayari to et sikami so pinmawil ed panagbiahen kimey. Nen 1984, kayari na 30 a taon ed kimey ed sirkito tan distrito, say Sosyedad so sipapangasin angiyabuloy ed si Gene a niasain ed sirkito ed San Antonio, ta saray ateng ko so manedad na masulok lan 80 tan masakit la.

Panangasikaso ed Atateng

Sakey taon lambengat tan kapaldua kapawil mi ed San Antonio et si Nanay so naplag la ed kipapasen a semicoma, tan sikatoy inatey. Biglaan iman ya agawa, ya agko nibaga iray bengatlan labay kon ibaga ed sikato. Binangatan ak na saya a kaukolan ko so mabetbet a mitongtong ed si Tatay. Kalabas na 65 a taon na impaniba ra, kaililiw ton tuloy si Nanay, balet wadman kami pian mangipanengneng ed sikato na panangaro tan suporta.

Say legay-bilay ya alimbawa nen Tatay ya iyaatendi ed saray miting, panagaral, tan serbisyo bilang Kristiano so nantultuloy anggad impatey to. Labalabay to so manbasa. Unong ta sikatoy kaukolan a manbukbukor legan a sikami walad serbisyo, onsempet ak tan tepetan, “Kasin maermen kayo?” Sikatoy nagmaliw ya okupadon tuloy ed panagbasa tan panagaral, kanian aglinma’d kanonotan to so panermen.

Wala ni sakey a legay-bilay ya ugalin intultuloy mi. Naynay ya ipapaskar nen Tatay a say pamilya so mandurungo, nagkalautla ed almusal, sano napantongtongan so inagew-agew a Makasulatan a teksto. Sanen siak so ugaw ni, agak inabuloyan ya onalis anggad satan so agni agawa. No maminsan et ibagak: “Balet Ta’y, naatrasado ak ed klasek (odino ed trabaho).”

“Aliwan say panagteksto so rason no akin a naaatrasado ka; agka binmangon ed dugan oras,” so ikuanto. Tan siak so kinaukolan ya ag-onalis tan talinengen iman. Sinegurado ton sayan maong ya alimbawa so natumbok anggad kaunoran iran agew na bilay to. Saya so sakey nin tawir ya intilak to’d siak.

Si Tatay so walaan na malinew a kanonotan anggad impatey to. Nagmaliw a mainomay a sikatoy asikasoen lapud agton balot makurisya odino mareklamo. Oh, no maminsan et sasalambiten to ed sikami so arthritis to, balet ta ipanonot ko ed sikato a say talagan sakit to et say “Adamitis,” tan sikatoy onelek. Legan a sikami nen Gene so akayurong ed abay to, si Tatay so marendeen a nanpatanir ed kabuasan na Nobyembre 30, 1991.

Siak so masulok lan 70 a taon la natan tan siansian nagugunggunaan manlapud maong ya alimbawa na maaron Kristianon atateng ko. Tan masimoon ya ipipikasik a paneknekan ko so sigpot a panamablik para’d sayan tawir diad panamegley na dugan panangusar ed satan ed andi-anggaan nin panaon ya onsabi.​—Salmo 71:17, 18.

[Litrato ed pahina 5]

Kaibak si Nanay

[Saray litrato ed pahina 7]

1. Say inmunan kumbension ko: San Marcos, Texas, Setyembre 1923

2. Say kaunoran a kumbension nen Tatay: Forth Worth, Texas, Hunyo 1991 (akayurong si Tatay)

[Litrato ed pahina 9]

Si Gene tan Blossom Brandt