Apocalipsis​​​​—Asingger la so Engranden Kapantokan To!

Katuloyan na Kapitulo 39

Anggad Kaunoran a Bakal!

14. Anto so isisimbolo na “andukey a makdem a kampilan” ya ompapaway ed sangi nen Jesus?

¹⁴ Diad anton pakauley a si Jesus so kompleton analo ed bakal to? Ipapakabat nen Juan ed sikatayo: “Tan dia ed sangi to ompapaway so sakey ya andukey a makdem a kampilan, pian panuga’to ed saray nasyon, tan uleyan to ra ed sakey a tayokor a balatyang.” (Apocalipsis 19:15a) Saman ya “andukey a makdem a kampilan” so mangirepresenta ed inter-Dios a pakauley ed si Jesus a mangipaway na ganggan ed pangukom ed amin a mangikaindan a mansuporta ed Panarian na Dios. (Apocalipsis 1:16; 2:16) Sayan malinew a panangisimbolo so mipetekan ed saray salita nen Isaias: “Et ginawa to [nen Jehova] so sangik a singa sakey a kampilan a makdem. A sinaniban toak ed anino na lima to. Tan kalkalnan ginawa toak a sakey a masileng a pana.” (Isaias 49:2) Dia iyanino nen Isaias si Jesus, a mangiyabawag na panangukom na Dios tan mamatey ed sikara, a singa ed sakey ya anggapoy mintis a pana.

15. Diad sayan peryodo na panaon, siopara so niwalwal la tan naukom, a tanda na gapoan na anto?

¹⁵ Diad peryodo na sayan panaon, kinmiwas la si Jesus ed panumpal na saray salita nen Pablo: “Tan, diad ontan niparungtal so too na kaugsan, a pateyen na Katawan a Jesus ed panamegley na espiritu na sangi to tan deralen ed panamegley na panangipatnag na kiwawala to.” On, say kiwawala nen Jesus (Griego, pa·rousiʹa) so niparungtal nanlapulad 1914 a manpatuloy diad pangiwawalwal tan panguukom ed too na kaugsan, say klero na Sankakristianoan. Saman a kiwawala so mapatpatnag a niparungtal sano say samploran saklor na eskarlatan-kolor ya atap ya ayep so mangidapu na panangukom tan maneral ed Sankakristianoan, a pati say nakekeraan a kabiangan na Babilonia a Baleg. (2 Tesalonica 2:1-3, 8) Saman so magmaliw a gapoan na baleg a kairapan! Kayari na satan, iteen nen Jesus so imano to ed nakekeraan ed organisasyon nen Satanas, a mitunosan ed propesiya: “Sakitan to so dalin ed panamegley na tayukor ed sangi to; tan dingan na espiritu ed saray bibil to et pateyen to so mauges.”​—Isaias 11:4.

16. Panon a dediskrebien na Salmo tan Jeremias so betang na aturon Mibabakal-Ari nen Jehova?

¹⁶ Bilang tinuro nen Jehova, ipanengneng na Mibabakal-Ari so pandumaan na saraman so makaliktar tan saraman so ompatey. Onya so ibabaga nen Jehova ed mapropetikon dalan ed sayan Anak na Dios: “Sika buyaken mo ra [saray manuley ed dalin] ed lewet a balatyang; sika ibalsak mo ra a mekmeken a singa pomapalba.” Tan ipapaarap nen Jeremias so ontan ya abulok a ginogobiernon papangulo tan saray kaalyado, a mankuan: “Managogol kayo, sikayo a pumapastol, tan mannangis! Tan mantolin kayo ed dapol, sikayon manunaan ed pulok, ta saray agew na kapatey yo tan kibuybuyak yo so sinmabi la, tan napelag kayo naani a singa marakep ya agamilen!” Anggan panon lan ompatnag a makaayat iraman a papangulo ed marelmeng a mundo, say sakey a basig na balatyang a tayukor na Ari so manmisimisi ed sikara, a singano panmisimisi ed sakey a marakep a baseha. Singa ontan so impangipropesiya nen David ed Katawan a Jesus: “Say tayukor na biskeg mo so ibaki nen Jehova a manlapud Sion, a mankuan: ‘Onla ka a mibakal ed leeleet na kakabusol mo.’ Si Jehova a mismo ed nikawanan a dapag mo so petepeteg a mamuyak ed saray arari ed agew na sanok to. Sikato so mangukom ed limog na nasyones; sikato so mamano na saray bangkay ed amin a pasen.”​—Salmo 2:9, 12; 83:17, 18; 110:1, 2, 5, 6; Jeremias 25:34.

17. (a) Panon a deneskribe nen Juan so manamatey a kiwas na Mibabakal-Ari? (b) Mangisalaysay na pigaran propesiya a mangipanengneng no panon a makadesyang so agew na sanok na Dios ed nasyones.

¹⁷ Sayan makapanyarin Mibabakal-Ari so ompatnag lamet ed ontumbok ya eksena na pasingawey: “Et sikato igatin to so darapilan na alak na petang tan say sanok na Dios a Makapanyarin-amin.” (Apocalipsis 19:15b) Diad inmunan pasingawey, anengneng la nen Juan so panangigatin ed “darapilan na sanok na Dios.” (Apocalipsis 14:18-20) Dediskribien met nen Isaias so makapatey a darapilan, tan ibaga na arum iran propeta no panon a makadesyang so agew na sanok na Dios ed amin a nasyones.​—Isaias 24:1-6; 63:1-4; Jeremias 25:30-33; Daniel 2:44; Sofonias 3:8; Zacarias 14:3, 12, 13; Apocalipsis 6:15-17.

18. Anto so ipanengneng na propetan Joel no nipaakar ed panangukom nen Jehova ed amin a nasyones?

¹⁸ Insiglaot nen propetan Joel so darapilan ed onsasabin “pangukom ed amin a nasyones” nen Jehova. Tan si Jehova so mangiganggan, agpanduwaruwaan ed kaiban Ukom, si Jesus, tan ed mangatatawen ya armada to: “Iyan yo so kompay, ta say anien aluto la. Dago kayo, tan mangigatin, ta say panagpespesan na alak et napno la. Saray samang manlepwa ira; ta say inkauges da sikato so baleg. Dakerakel, dakerakel a totoo ed lawak na panangigeter, ta say agew nen Jehova so asingger ed lawak na panangigeter. Say banwa tan say bulan onkuyep ira, tan saray bitewen isiblet da so pansinag da. Et si Jehova manongol naani a manlapud Sion, tan ibesngaw to naani so boses to a manlapud Jerusalem. Tan say tawen tan say dalin onyegyeg ira naani; balet si Jehova sikato naani so apireng na baley to tan salimbeng ed say anak na Israel. Tan naamtaan yo naani a siak si Jehova a Dios yo.”​—Joel 3:12-17.

19. (a) Panon a say tepet ed 1 Pedro 4:17 et naebatan? (b) Anton ngaran so nisulat ed akinpaway a kawes nen Jesus, tan akin a napaneknekan a matukotukoy?

¹⁹ Satan so magmaliw ya agew a maudiem, peteg, para’d matungangan nasyones tan katooan balet sakey ya agew na ligliwa para’d amin a nanggawan salimbeng da si Jehova tan say Mibabakal-Ari to! (2 Tesalonica 1:6-9) Say panangukom a ginmapo ed abung na Dios nen 1918 so mantultuloy ya anggad pantok to, a mangebat ed tepet ed 1 Pedro 4:17: “Anto so kasumpalan na saramay matunganga ed maong a balita na Dios?” Say maglorian Mananalo so mangigatingatin ed darapilan anggad kasumpalan, a mangidedemostra a sikato so nitandoro a Sakey ya ibabaga nen Juan: “Tan dia ed kawes to, tan dia ed olpo to, wala a nisulat so ngaran, Ari na saray arari tan Katawan na saray kakatawan.” (Apocalipsis 19:16) Pinaneknekan ton nagkalalo, nagkalalon mabiskeg nen say siopaman a mangaraldalin a manuley, siopaman ya atooan ya ari odino katawan. Say kagalangan to tan karlangan to so nikadkaduma. Sikato so nanasikason tuloy “nisengeg ed katuaan tan kaoyamoan tan inkatunong” tan manatalo para’d amin a panaon! (Salmo 45:4) Diad awalsikan na dala a kawes to a nisulat so ngaran ya inter ed sikato na Soberanon Katawan a si Jehova, bilang Manangiyalangon to!

Say Baleg a Pangdem na Dios

20. Panon so impaneskribe nen Juan ed “baleg a pangdem na Dios,” a mangipapanonot na anton akadkauna, balet mipadparan, propesiya?

²⁰ Diad pasingawey na Ezequiel, kayari na kadederal na ulop nen Gog, saray manok tan atap ya ayayep so naimbitaan ed sakey a piesta! Nilinisan da so dalin manlapud saray bangkay diad pangan ed inatey a laman na kakabusol nen Jehova. (Ezequiel 39:11, 17-20) Saray ontumbok a salita nen Juan so mangitarok ed asasakbay a propesiya a malinlinew ed kanonotan: “Tan akanengneng ak na sakey ya anghel a manalalagey ed agew et tinmawag ed baleg a boses a kuanto ed saray amin a manomanok a mantektekiab ed pegley na tawen: ‘Dago kayo, mantitipon kayo ed pangdem na sankabalgan a Dios, pian kanen yo so laman na saray arari tan laman na kakapitan tan laman na saray mabayani tan laman na saray kabayo tan saray wala a manyurong ed tapew da, tan lamalaman na amin, a totoon bulos man tan ariripen ya ankekelag man tan ankakabaleg.​—Apocalipsis 19:17, 18.

21. Anto so ipanengneng na (a) “inkatalindeg ed banwa” na anghel? (b) say katuaan a saray inatey so agnikotkot? (c) say listaan na saramay bankay a kitongilang ed dalin? (d) say balikas a “say baleg a pangdem na Dios”?

²¹ Say anghel so “manalalagey ed agew,” sakey a walad atagey a kipapasen para’d panlagyat ya imano na saray manok. Sikato so angimbita ed sikaran mangan ed laman na saramay ngalngali pateyen na Mibabakal-Ari tan ed mangatatawen ya armada to. Say katuaan a say inatey so agnikotkot so mangipanengneng a sikaray ompatey ed publikon kababaingan. Singa si Jezebel nen saman, sikaray andian na mapagalang a ponpon. (2 Arari 9:36, 37) Say listaan na saramay bangkay ya apaulyanan a kitongilang diman so mangipatnag ed kalaknab na kadederal: arari, kakapitan, mabiskeg a lalaki, bulos, tan ariripen. Anggapo so nipuera. Amin a pakatandaan na rebelyoson mundo a sumpa ed si Jehova so napagit. Kayari na saya, naandi la so andian-kaligenan a dayat na awetwet a katooan. (Apocalipsis 21:1) Saya so “baleg a pangdem na Dios,” ta si Jehova so angimbita ed saray manok a minabang dia.

22. Panon so impansegek nen Juan ed kurang na pinal a bakal?

²² Iiter nen Juan so segek na pinal a bakal: “Tan anengneng ko so atap ya ayep tan saray arari na dalin tan saray armada ra ya atiptipon pian mibakal ed saman so sakey ya akayurong ed kabayo dingan na armada to. Tan abalor so atap ya ayep, tan pati ed palson propeta a nangagawa ed arap to na saray tanda a mamalikdo ed saraman so akaawat na marka na atap ya ayep tan saraman so manangidayew ed talintao to. Leleg a mabilay ni, nibantak iran dua ed dayat na apuy a mandarlang ed asupre. Balet saray kera so pinatey ed andukey a kampilan na samay manyurong ed kabayo, a satan a kampilan so ompapaway ed sangi to. Tan amin na saray manok so napsel ira manlapud kalamanan da.”​—Apocalipsis 19:19-21.

23. (a) Diad anton pantalos a panlabanan so “bakal na baleg ya agew na Makapanyarin-amin a Dios” ed “Armagedon”? (b) Anton pasakbay so sinaewan na “saray arari ed dalin,” tan ed anto iran pansumpalan?

²³ Kayari na impangikalbo na komanem a yaong na sanok nen Jehova, inreport nen Juan a “saray arari na dalin tan ed interon mundo” so atugyop na demonikon propaganda ed “bakal na baleg ya agew na Dios a Makapanyarin-amin.” Saya so nagawa ed Armagedon​—aliwan ed sakey a literal a pasen, balet say englobon kipapasen a manatawag ed pangukom nen Jehova. (Apocalipsis 16:12, 14, 16, King James Version) Natan nanenengneng nen Juan iray linya na bakal. Diman, sinmanok a sumpad Dios, so amin “ya arari na dalin tan saray armada ra.” Sikaray anawet-ulon angikaindan a pauleyan so inkasikara ed Ari nen Jehova. Inikdan to ra na pasakbay ed nipuyan a mensahe: “Angoban yo so Anak, ompan sikato [si Jehova] et agnasanokan tan agnabalang ed dalan naani.” Lapud sikaray agnampasakup ed uley nen Kristo, nepeg a sikara so ompatey.​—Salmo 2:12.

24. (a) Anton panangukom so nagawa ed atap ya ayep tan ed palson propeta, tan ed anton pantalos a sikara so “siansia nin mabilay”? (b) Akin a nepeg a say “dayat na apuy” so piguratibo?

²⁴ Say pitoran-ulo, samploran-saklor ya atap ya ayep a pinmaway ed dayat, a mangirerepresenta ed pulitikal ya organisasyon nen Satanas, so niponpon ed pakalingwanan, tan pati say palson propeta to, say komapiton pakayari na mundo. (Apocalipsis 13:1, 11-13; 16:13) Leleg a “mabilay” ni, odino siansian onkikiwas ed nankakasakey ya isusumpa ed totoo na Dios ed dalin, sikara so nibantak ed “dayat na apuy.” Kasin saya so literal a dayat na apuy? Andi, a singa saman so atap ya ayep tan say palson propeta so aliwan literal ya ayayep. Imbes, satan so sakey a simbolo na kompleto, pinal a kadederal, sakey a pasen ya anggapo lay pakapawil. Diad saginonor et dia met ibasileng so patey tan Hades, tan ontan met ed Diablo a mismo. (Apocalipsis 20:10, 14) Peteg ya aliwan impierno na andi-geter a panamairap para’d mauges, ta say mogmon ideya na ontan a pasen et makapadimla ed si Jehova.​—Jeremias 19:5; 32:35; 1 Juan 4:8, 16.

25. (a) Siopa iramay “pinatey ed andukey a kampilan na saman so sakey ya akayurong ed kabayo”? (b) Kasin iilaloan tayo a siopaman ed saramay “pinatey” et napaoli?

²⁵ Amin na arum ya aliwan direktan kabiangan na gobierno balet anggaman ontan et agnasalatan a kabiangan na sayan abulok a mundo na katooan so ontan met “pinatey ed andukey a kampilan na samay manyurong ed kabayo.” Iyabawag nen Jesus ed sikara a kanepegan day ompatey. Lapud say kipapasen da et ag-abitla so dayat na apuy, kasin naiilaloan a sikara so napaoli? Agnaromog a balot a nibaga ed sikatayo a saraman so pateyen na Ukom nen Jehova ed satan a panaon so napaoli. Unong ya imbaga a mismo nen Jesus, amin na saraman so aliwan “karnero” so napegpeg ed “andi-anggaan ya apuy a niparaan para’d Diablo tan saray anghel to,” salanti, “ed andi-anggaan a kadederal.” (Mateo 25:33, 41, 46) Saya so mamantok ed “agew na panangukom tan ed kadederal na agmaridiios a totoo.”​—2 Pedro 3:7; Nahum 1:2, 7-9; Malaquias 4:1.

26. Ibalikas ed antikey so pansumpalan na Armagedon.

²⁶ Diad sayan paraan, amin na mangaraldalin ya organisasyon nen Satanas, so mangangga. Say “gendat a tawen” na pulitikan pananguley so linmabas la. Say “dalin,” say singa permanentin sistema ya impalagey nen Satanas ed loob na saray siglo, so nadederal la natan. Say “dayat,” say ulop na mauges a katooan a sumpa ed si Jehova, so naandi la. (Apocalipsis 21:1; 2 Pedro 3:10) Anto, anggaman kuan, so ipaparaan nen Jehova ed si Satanas a mismo? Intuloy ya imbaga ed sikatayo nen Juan.