Apocalipsis—Asingger la so Engranden Kapantokan To!
Kapitulo 40
Panagmekmek ed Ulo na Uleg
Pasingawey 14—Apocalipsis 20:1-10
Tema: Say kibantak nen Satanas ed kaaralman, say Milenyon Uley, kaunoran a subok na katooan, tan kadederal nen Satanas
Panaon na kasumpalan: Manlapud sampot na baleg a kairapan anggad kadederal nen Satanas
1. Panon a say kasusumpalan na inmunan propesiya ed Biblia so nantultuloy?
Kasin nanonotan yo so inmunan propesiya na Biblia? Satan so imbalikas nen Jehova a Dios sanen inkuanto ed uleg: “Mangyan ak na gulaan ed sika tan ed bii tan ed binim tan bini to. Sikato sugaten to ka ed ulo tan sika sugaten mo ed mukor.” (Genesis 3:15) Natan say kasumpalan na satan a propesiya so makakarateng ed kapantokan to! Nausisa tayo so awaran nen Satanas ed pibabakal a sumpad mangatatawen a singa-biin organisasyon nen Jehova. (Apocalipsis 12:1, 9) Say mangaraldalin a bini na Uleg, a tekep na relihyon, pulitika, tan baleg a negosyo, so angibunton na maruksan panamasegsegang ed bini na bii, si Jesu-Kristo tan 144,000 ya alanaan a patumbok to, dia ed dalin. (Juan 8:37, 44; Galacia 3:16, 29) Sakey a makapairap ya ipapatey so intarok nen Satanas ed si Jesus. Balet apaneknekan a saya so singa sugat ed mukor, ta pinaoli na Dios so matoor ya Anak to ed komatlon agew.—Gawa 10:38-40.
2. Panon a say Uleg so susugatan, tan anto so agawa ed mangaraldalin a bini na Uleg?
2 Komusta met so nipaakar ed Uleg tan say bini to? Ngalngali 56 K.P. insulat nen apostol Pablo so sakey ya andukey a sulat ed saray Kristiano ed Roma. Diad impanampot ed satan, pinaseseg to ra diad impangikuan: “Diad biang to, say Dios ya angiter na kareenan so magano lan mamekmek ed si Satanas ed leksab na saray sali yo.” (Roma 16:20) Saya so mas ni nen say atapew a sugat, si Satanas so namekmek! Inusar dia nen Pablo so Griegon salitan, syn·triʹbo, a kabaliksan na satan so panugat anggad magmaliw a singa halea, gatingatinan, deralen a maong diad panamegley na panmekmek. No para’d atooan a bini na Uleg, saya so nigeter para’d panagbakbak ed agew na Katawan, a mamantok ed baleg a kairapan ed kompleton panmekmek ed Babilonia a Baleg tan say pulitikan sistema na sayan mundo, a pati pinansyal tan militar a kaiba to. (Apocalipsis, kapitulo 18 tan 19) Sirin itarok nen Jehova ed sakey a kapantokan na panamusol ed baetan na duaran bini. Say Bini na bii na Dios so manalo ed mangaraldalin a bini na Uleg, tan satan a bini so naandi la!
Nibantak ed Kaaralman si Satanas
3. Anto so ibaga ed sikatayo nen Juan a nagawa ed si Satanas?
3 Anto, sirin, so manaalagar para’d si Satanas a mismo tan ed saray demonyo to? Ibabaga ed sikatayo nen Juan: “Tan akanengneng ak na sakey ya anghel a linmeksab a nanlapud tawen a walaan na tombok na kaaralman tan sakey a baleg a golonggolong ed lima to. Tan inerel to so dragon, say daan ya uleg, a sikato so Diablo tan Satanas, tan sikato so binalor ed sanlibon taon. Tan sikato so imbantak to ed kaaralman tan impokok to tan tinatakan to, pian agto lan balot palikdoen iray nasyones angga ed kasumpal na sanlibon taon. Kayari na sarayan bengatla kaukolan a sikato so nibulos ed maganon panaon.”—Apocalipsis 20:1-3.
4. Siopa so anghel a walaan na tombok na kaaralman, tan panoy pikabat tayo?
4 Siopa iyan anghel? Peteg a sikato so walaan na balbaleg a pakayarin mamagit ed kabusol nen Jehova. Sikato so walaan na “tombok na kaaralman tan walaan na baleg a golonggolong.” Agta saya so mangipanonot ed sikatayo na asasakbay a pasingawey? Peteg ya on, say ari ra so atawag ya “anghel na kaaralman”! (Apocalipsis 9:11) Kanian dia naimano tayo lamet so Manunan Manangiyalangon nen Jehova, say niglorian Jesus-Kristo, a walad kakikiwas. Sayan arkanghel ya angibasileng ed si Satanas a manlapud tawen, ya angukom ed Babilonia a Baleg, tan mangekal ed “saray arari ed dalin tan saray armada ra” ed Armagedon so agmangiyabuloy ed sakey ya abebbéban anghel pian sikato so manggawa na ultimon kundang diad pangibantak ed si Satanas ed kaaralman!—Apocalipsis 12:7-9; 18:1, 2; 19:11-21.
5. Panon a say anghel na kaaralman et akideneng ed si Satanas a Diablo, tan akin?
5 Sanen say baleg a maapuy-kolor a dragon so nibasileng a manlapud tawen, sikato so asalita a bilang say “daan ya uleg, say atawag a Diablo tan Satanas, a mamapalikdo ed interon atooan a dalin.” (Apocalipsis 12:3, 9) Natan, ed punton naerel tan nibantak ed kaaralman, sikato so adeskriben sigpot lamet bilang “say dragon, say daan ya uleg a Diablo tan Satanas.” Sayan manamalikdo, managtila, tan sumusumpa so nigolonggolong tan nibasileng ed “kaaralman,” ya akaputan tan atatakan a maong, “pian agto lan balot palikdoen iray nasyones.” Sayan panangibasileng ed si Satanas diad kaaralman et para’d loob na sanlibon taon, legan na satan a panaon say impluensya to ed katooan so magmaliw a nagkalalo nen say nipangaw ed aralem a bartolina. Say anghel na kaaralman so kompleton mangekal ed si Satanas ed antokaman a pisiglaotan ed inkatunong na Panarian. Agaylan sakey a pakainawaan ed katooan!
6. (a) Anto so mamaneknek a saray demonyo so nipasen met ed kaaralman? (b) Anto natan so nigapo, tan akin?
6 Anto so nagawa ed saray demonyo? Sikara met so “niparaan ed panangukom.” (2 Pedro 2:4) Si Satanas so atawag a “Beelzebub say manuley na saray demonyo.” (Lucas 11:15, 18; Mateo 10:25) Nisesengeg ed andukey a panaon a pibabali ra ed si Satanas, agta parehon panangukom so nipaabet ed sikara? Say kaaralman so abayag lan tatakotan na saraman a demonyo; diad sakey ya okasyon sanen inarap ira nen Jesus, sikaray “kinmerew ed sikato pian agto ra ibaki ed kaaralman.” (Lucas 8:31) Balet sano si Satanas so nibantak ed kaaralman, saray anghel to so petepeteg a nibasileng ed kaaralman a kaiba to. (Ipareng so Isaias 24:21, 22.) Kayari na kibantak nen Satanas tan saray demonyo to ed kaaralman, say Sanlibon Taon ya Uley nen Jesu Kristo so onggapo.
7. (a) Diad anton magmaliw a kipapasen a si Satanas tan saray demonyo to legan a walad kaaralman, tan panoy pikabat tayo? (b) Kasin say Hades tan say kaaralman pareho? (Nengnengen so paimanod-leksab.)
7 Kasin si Satanas tan saray demonyo to so magmaliw ya aktibo legan a walad kaaralman? Bueno, nonoten so eskarlatan-kolor ya atap ya ayep, pitoran-ulon atap ya ayep a “sikato, balet andi la, tan ingen ngalngali la ompaway a manlapud kaaralman.” (Apocalipsis 17:8) Legan a walad kaaralman, satan ‘so andi la.’ Satan so ag-onkikiwas, ag-ongagalaw, ed amin a gegemtan tan saray gagala et inatey. Ontan met, no nipaakar ed si Jesus, inkuan nen apostol Pablo: “‘Siopa so onlasor ed kaaralman?’ salanti, pian paolien si Jesus a manlapud patey.” (Roma 10:7) Legan a walad kaaralman, si Jesus so inatey.a Makatunongan a samputan, sirin, a si Satanas tan saray demonyo to et walad kipapasen a singa inatey ed loob na sanlibon taon na inkibantak da ed kaaralman. Agaylan maabig a balita para’d manangaro na inkatunong!
Uko-ukom ed Sanlibon Taon
8, 9. Anto natan so ibabaga ed sikatayo nen Juan nipaakar ed saramay akayurong ed saray trono, tan siopa iratan?
8 Kayari na sanlibon taon, si Satanas so nibulos a manlapud kaaralman ed maganon panaon. Akin? Sakbay ya iter to so ebat, ipaarap nen Juan so imano tayo ya ompawil ed gapo na saman a peryodo na panaon. Nabasa tayo. “Tan anengneng koray trono, tan walara so akayurong ed saraya, tan say pakayari na pangukom so nipabtang ed sikara.” (Apocalipsis 20:4a) Siopa irayan akayurong ed saray trono tan manuuley ed katawenan a kaiba so niglorian Jesus?
9 Sikara so “sasantos” a deneskribe nen Daniel a bilang manuley ed Panarian a kaiba so Sakey a “singa anak na too.” (Daniel 7:13, 14, 18) Sikara so miulibay ed 24 mamatatken ya akayurong ed mangatatawen iran trono ed mismon arap nen Jehova. (Apocalipsis 4:4) Sakup da so 12 babangatan, ya angisipanan nen Jesus: “Dia ed balo a panamalsa, sano say Anak na too onyurong naani ed maglorian trono to, sikayon tinmunbok ed siak so onyurong met ed labinduan trono, a mangukom ed labinduan kailalakan na Israel.” (Mateo 19:28) Kaiba met si Pablo, tan pati saray Kristiano ed Corinto a nansiansian matoor. (1 Corinto 4:8; 6:2, 3) Sakup da met iray membro na kongregasyon ed Laodicea a nagmaliw a mananalo.—Apocalipsis 3:21.
10. (a) Panon natan a dedeskribien nen Juan so 144,000 iran arari? (b) Manlapud anton akadkaunan imbaga nen Juan ed sikatayo, so ilaktip na 144,000 ya arari?
10 Saray trono—144,000 iraya—so niparaan para’d sarayan alanaan a mananalo ya “asaliw a manlapud katooan a bilang ununan bunga ed Dios tan ed Kordero.” (Apocalipsis 14:1, 4) “On,” intuloy ni nen Juan, “anengneng koray kakamarerwa na saramay pinatey ed wasay lapud panagtasi ra ed si Jesus tan lapud pansalita nisengeg ed Dios, tan saramay agnandayew ed atap ya ayep nisay talintao to tan ag-angawat na tanda ed saray kamolingan da tan ed saray kalimaan da.” (Apocalipsis 20:4b) Sirin, kaiba na saraman ya ari so nilanaan a Kristiano iran martir ya akauna la, ed pangilukas na komaliman tatak, so nantepet ed si Jehova no panon kabayag ni a sikatoy manalagar ed pangibales to na dala ra. Diad saman a panaon, sikaray naikdan na amputin kawes tan nibagan manalagar ira na antikey a panaon. Balet natan sikara la so imbalesan la ed panamegley na impakaderal na Babilonia a Baleg, say kadederal na nasyones na say Ari na saray arari tan Katawan na saray kakatawan, tan say kibantak nen Satanas ed kaaralman.—Apocalipsis 6:9-11; 17:16; 19:15, 16.
11. (a) Panon tayon talosan so balikas a “pinatey ed wasay”? (b) Akin a nibaga ya amin a 144,000 so inatey ed sakey a sakripisyon ipapatey?
11 Kasin amin na sarayan 144,000 maarin uko-ukom et literal a “pinatey ed wasay”? Maseguro, daiset lambengat ed sikara so akaeksperiensia ed saya ed literal a pantalos. Anggaman ontan, agpanduwaruwaan a ginagala iyan balikas, pian sayakupen ya amin iramay alanaan a Kristianos a nansungdo ed inkamartir ed nanduruman pamaakaran.b (Mateo 10:22, 28) Peteg, kaliktan nen Satanas a pateyen ya amin da dingan na wasay, balet, diad tua, aliwan amin ya alanaan ya agagi nen Jesus so inatey a bilang martir. Dakel ed sikara so inatey ed sakit tan itatatken. Anggaman ontan, saray ontan so kaiba met na grupon anengneng nen Juan. Say impatey dan amin, so diad pantalos, a panagbagat, (Roma 6:3-5) Niarum ni, anggapo ed sikara so kabiangan na mundo. Sirin, amin da so binusol na mundo, tan ed epekto, nagmaliw ya inatey ed mata ra. (Juan 15:19; 1 Corinto 4:13) Anggapo ed sikara so mandadayew ed atap ya ayep odino say talintao to, tan sano sikara so ompatey, anggapo ed sikara so mangawit na tanda na ayep. Amin da so inatey a bilang mananalo.—1 Juan 5:4; Apocalipsis 2:7; 3:12; 12:11.
12. Anto so irereport nen Juan nipaakar ed 144,000 ya arari, tan kapigan a say kioli et nagawa?
12 Natan sarayan mananalo binmilay lamet! Inreport nen Juan: “Tan binmilay tan nanuley bilang arari a kaiba nen Kristo diad sanlibon taon.” (Apocalipsis 20:4c) Kasin kabaliksan na saya a sarayan uko-ukom et ag-apaoli ya anggad kayari na kaderal na nasyones tan kibantak nen Satanas tan saray demonyo to ed kaaralman? Andi. Kaslakan ed sikara so mabilabilay a maong la, ta sikara so akilugan ed si Jesus a sumpad amin a nasyones ed Armagedon. (Apocalipsis 2:26, 27; 19:14) Peteg, impanengneng nen Pablo a say kioli ra so onggapo kayarin tampol na gapoan na kiwawala nen Jesus nen 1914 tan arum da so apaoli sakbay na saray arum. (1 Corinto 15:51-54; 1 Tesalonica 4:15-17) Sirin, say ibibilay da so nagawa ed sakey a peryodo na panaon unong a sinansakey dan awaten so langkap na ag-ompatey a bilay ed katawenan.—2 Tesalonica 1:7; 2 Pedro 3:11-14.
13. (a) Panon so panmoria tayo ed sanlibon taon legan na panuley na 144,000, tan akin? (b) Panon a minoria nen Papias na Hierapolis so sanlibon taon? (Nengnengen so paimanod-leksab.)
13 Say panuley tan pangukom da et diad loob na sanlibon taon. Kasin saya so literal a sanlibon taon odino kasin moriaen tayo itan a simboliko a bilang ag-kabat, ya andukey a peryodon panaon? Kabaliksan na “sanlibo” so sakey a baleg, agnabilang a numero, a singa ed 1 Samuel 21:11. Balet say “sanlibo” so literal, ta onapireng itan a taloran danay ed Apocalipsis 20:5-7 a bilang “say sanlibon taon.” Tinawag nen Pablo iray panaon na panangukom a “sakey ya agew” sanen sinalambit to: “Inggeter to [Dios] so sakey ya agew a ginagala ton pangukom ed panaayaman a dalin diad inkatunong.” (Gawa 17:31) Lapud ibabaga ed sikatayo nen Pedro itan a say sakey ya agew nen Jehova so sakey a bilang na sanlibon taon, matukotukoy a sayan Agew a Panangukom so magmaliw a sakey literal a sanlibon taon.c—2 Pedro 3:8.
(Ituloy ed ontumbok a paway.)
[Saray paimano ed leksab]
a Arum a kasulatan so mankuan a si Jesus so walad Hades legan a sikato so inatey. (Gawa 2:31) Anggaman ontan, agtayo sasamputan a say Hades tan kaaralman so lawas pareho. Anggaman say atap ya ayep tan si Satanas so nibantak ed kaaralman, saray totoo so nibaga lambengat ya onla ed Hades, no iner a sikaray naugip ed patey ya anggad kioli ra.—Job 14:13; Apocalipsis 20:13.
b Say wasay (Griego, peʹle·kus) so ompapatnag a tradisyonal ya instrumento na panamatey ed Roma, angaman diad agew nen Juan say kampilan so karaklan a nauusar. (Gawa 12:2) Sirin, say Griegon salitan inusar dia et pe·pe·le·kis·meʹnon (“pinatey ed wasay”), simplin mankabaliksan na “pinatey.”
c Makapaliket, si Papias na Hierapolis, a walan atalosan ya akawat na pigaran pikakabat ed Biblia a manlapud saray binangatan nen Juan, saray nansulat na Apocalipsis, so nireport nen komapat-a-siglon manag-awaran ya Eusebius ya anisia ed sakey a literal a Sanlibon Taon ya Uley nen Kristo (anggaman si Eusebius so mabisbiskeg ya ag-akipakna ed sikato).—The History of the Church, Eusebius, III, 39.