Panalona ed Pakailiw Sano Manlilingkor ed Dios

INGANGGAN nen Jesu-Kristo ed saray patumbok to: “Onla . . . tan mangawa kayo na saray babangatan ed amin a naciones.” (Mateo 28:19) Para’d dakel a Kristiano, say panumpal ed satan a ganggan et mankabaliksan na pangawat ed mairap iran sirkumstansyan arawi ed ayaman. Saray managbaroy a manangasikaso, saray kaasawaan da, tan arum ni so manaynan ed dakel a bengatla nisesengeg ed serbisyo ed Dios. Say pakailiw so peteg ya angat para’d amin na sarayan Tasi nen Jehova.

Makailiw ka sano nanonotan moray kaligenan tan aro na marakep ya apalabas. Saya so nayarin sengegan na seryoson emosyon a liknaen mon sikay nagogonigon tan agla makapantultuloy. Diad tua, kayari impangilako na saray kayarian da tan nanggastos na baleg pian makakar ed sankailin bansa, tinaynan na arum iray plano ra tan sinmempet. Sikaray atalonaan na say pakailiw.

Saratan a panangataki ed emosyon so gendagendat a mabetbet kayari na inmunan inyalis, balet para’d arum saraya so mantultuloy legay-bilay. Kayari inyarawi ed loob na masulok a 20 a taon, si Jacob so ‘mailiw ed abung na ama to.’ (Genesis 31:30) Siopa so makasagmak na pakailiw? Anto so managdag ed saya? Panon a natalonaan na sakey so ontan a liknaan?

Anto so Sengegan na Ermen?

Amin so nayarin naapektoan na pakailiw. Si Amytis, anak a bii na ari na Media a si Astyages, so mapatnag a sikatoy walaan na amin a katunongan pian manliket: kayamanan, kabantogan, marakep ya ayaman. Ingen, sikato so ontanlan mailiw ed kapalandeyan na Media, a sengegay impampagawa nen asawa to, si Arin Nabucodonosor, na akabitin iran tanamanan na Babilonia diad gunaet a sikatoy naligliwa.

Say pakailiw so ompalalo nagkalautla sano say bilay et singano mas mairap no ipareng sakbay na inyalis na sakey. Sanen saray taga Juda so nagmaliw a kautibo, sikaray nannangis: “Diad abay na saray il-ilog na Babilonia, imyorong kami, lanti, a nannangis kami, nen anodnonotan mi Sion. Panon so pancanta mi canta nen Jehova dia ed sakey a sankaili a dalin?”​—Salmo 137:1, 4.

Dakel a bengatla so nayarin pansengegay kaermenan ed pakailiw. Si Terri, ya inmalis ed Canada, so nankuan: “Sakey ya agew naplag manlapud libro so retrato na pamilya. Sanen dinokdok ko, siak so akalikna na agaylan pakailiw, tan siak so nannangis.” Onia so inaksobi nen Chris, ya inmalis manlapud Inglatera ya amaarap ed sakey a mas mairap a bansa: “Anggan say pakadngel na tono na sakey a kadaanan a kanta odino say pakasingob na samyong na kabisadon tagano so managdag ed siak a mankaliktan ed saray bengatlan binenegan ko.”​—Ipareng so Numeros 11:5.

Say maapit a siglaotan na pamilya so mabetbet a sakey a sengegan na satan. Si Roseli, sakey a taga Brazil a manaayam natan ed kabangibang a bansa, so nankomento: “Siak so naeermenan sano makawat ak na mauges iran balita manlapud sikami tan agak makakar diman pian ontulong. No maminsan et lalon mauges sano agak anggan makaawat na antokaman a balita tan onggapo ak a manisip na nambabangil a bengatla.” Si Janice so inmalis ed Amianen Amerika ed sakey a melag a baley na tropikon Amazon. Kuanto: “Siak so makailiw sano makaawat ak na maong a balita manlapud sikami. Nababalitaan kon agaylay liket da, tan wadman ak komon.”

Aliwa lambengat a say pakatilak ed saray ataynanan so sengegan na pakailiw. Onia so salaysay nen Linda: “Siak so nadidismaya sano agko amta no iner so panaliwan ko na bengabengatlan kaukolan ko. Agko amta no pigay presyo odino panon toy makapisalatan. Magastos so pakawalaan na kotse, tan siak so naynay a misekseksekan pian makalugan ed publikon transportasyon. Lapud saya et siak so makailiw.” Diad pankomento nipaakar ed pandumaan na kultura tan kabibilay, onia so inkuan nen Janet: “Say inkaduka so mamagonigon ed siak. Agkon balot ni akanengneng na totoon mipapayabul na tagano, odino angkabaleg iran pamilya a manaayam a manseseksekan ed sakey a kuarton andian na danum. . . . Saratan a bengatla so mamagonigon a tuloy ed siak a kuankon agko nayariay manbayag diman.”

Say Panalona ed Liknaan Mo

Agtayo ibabaing so pakawalaan na masimoon a liknaan ed totoon inaro tayo odino para ed pamilyar a kaliber-liber a binalegan tayo. Inikdan tayo nen Jehova na liknaan pian pangayagaan tayo so maapit a personal iran relasyon. Saray manangasikason Kristiano ed kongregasyon na Efeso so lalakin matatken ed emosyon. Balet antoy agawa sanen nasumpal la so dalaw nen apostol Pablo ed sikara? Ta, “nannangis ira na baleg, et nilakap da ed beklew si Pablo, tan sikato so inangoban da”! (Gawa 20:37) Siempre, satan ya agawa et agto lalanoren so pakailiw. Ingen, pannonoten to itayo. Natural lambengat a nawalaan na liknaan, balet agtayo papaulyanan a manalona itan ed sikatayo. No ontan, panon yon natalonaan so pakailiw?

Say pakaaral a mansalita ed lokal a lenguahe so tombok pian magmaliw a maligen so liknaan. Say pakailiw so nayarin ompalalo sano naaamper so komunikasyon lapud kaukolan a mangusar na sankailin pansasalita. Kanian, no nayari et aralen so panbasa tan pansalita ed lenguahe na laen mo sakbay na iyalis mo diman. No andi met, iyapasakey moy kanonotan mo ed saray aaralen ed lenguahe ed ununa iran simba kasabim diman. Nagawaan itan no walaan ka na mabiskeg a motibasyon ya aralen itan a lenguahe. No manunan usaren irayan simba ed panaral na lenguage, agmanbayag et pangayagaan moy mitongtong, tan satan so makatulong pian nabawasan so iliw mo.

Mikaaro ka a tamtampol, ta saya so ontulong ed sika a naliknam a sika so walad dilin baley mo. Say kongregasyon na Tastasi nen Jehova so sankaabigan a pasen a pakaromogan na saray kaaro. Bulos linawa tan magmaliw ya interesado ed arum. Panggunaetan ya amtaen so abenegan, say pamilya, saray problema, tan saray interes da. Imbitaan moray kapananisiaan ed ayaman. Diad ontan, naromog mon interesado met iray arum ed sika.

Diad limog na ariripen na Dios, say pikakaaro so nayarin magmaliw a singa saray maapit a siglaotan ed pamilya. Inkuan nen Jesus: “Ta siopaman a manumpal na linawa na Dios, sikato lanlamang so agik a laki, agik a bii, tan inak.” (Marcos 3:35) Pinaseguroan met nen Kristo iray patumbok to: “Tua kuan ko ed sikayo, Angapo’y too ya anainan na abung, ono agagin lalaki, ono agagi’n bibii, ono ina, ono saray anak, ono daldalin, nisengeg ed siak, tan nisengeg ed evangelio. Ingen awaten to so maminlasus natan ed sayan panaon, abu-abung, tan agagi’n lalaki, tan agagi’n bibii, tan saray ina, tan saray anak, tan daldalin, pati saray kapasegsegang; tan dia ed mundo ya onsabi say bilay a maando.” (Marcos 10:29, 30) Tekep na ontan a makapakelkelaw ya espiritual ya impanaagi, agtayo manbobokbokor, anggaman walad sakey a balon bansa.

Say panamasiansia na pikakaaro ed saramay ataynanan mo so makatulong met ed sika a natalonaan so pakailiw. Natan ta sikalay inmalis, nayarin sika so nasurpresa a naamtaan a say komunikasyon diad pisulatan so nagkalautlan makabaliksan, lapud ta nonoten mon maong iray ibagam. Walaray makapasagyat a bengatlan nibaga. Onia so suhestion nen Janet, ya asaglawi ed unaan: “Magastos so itawag ed long distance, balet say pangipawit na inrekord a cassete tape diad panamegley na koreo so agtanton magastos. Diad unaan et nayarin makapalek so pitongtong ed sakey a makina. Ingen, no mitongtong ka ed sakey a too a walaay mikropono ed baetan yon dua, satan so mainomay tan makapaliket.” Nayarin kerewen mo ya ipawitan ka met na cassette recording.

Si Shirley, ya inmalis manlapud Estados Unidos ya amaarap ed Latin Amerika ngalngali 25 a taon la natan so apalabas, so nankuan: “Mabetbet kon isusulat so nipaakar ed makapabiskeg iran eksperiensia imbes a saray problema. Saya so mamaseseg ed arum a mantutluloy a sulatan ak.” Anggaman ontan, magmaliw a maalwar. Say alabas a panaggaway-sulat so nayarin mangamper ed sika ed pananap na saray balon kaaro. Onia so kuan nen Del ya inmalis manlapud Canada ya amaarap ed sakey a bansa: “Paliisan mo so pansiansia ed ayaman tan manermen a nonoten iray bengatlan tinaynan mo. Imbes, ompaway ka tan pangayagaan so balon lugar a kawalaan mo.”

Diad dalin ya inalisan mo et amtaen moray kustombre, awaran, panelekan, tan saray lugar a makaligliwa tan marakep a laen. Saya so ontulong ed sika ya agmangimano ed negatibo iran bengatla. Tan no labay mon mansiansia ed lugar ya inalisan mo, maong no agmo tampol a dalawen odino agmabetbet a dalawen so sarilin bansam. Kaukolan so panaon pian nawalaan na saray balon kaaro tan nasanay ed balon kaliber-liber. Say panbayag ya idalaw ed datin ayaman tayo so mangamper ed satan a bengatla. Bektaman a maligen ka la ed balon ayaman mo, makapangayaga ka lan ombisita ed datin ayaman mo​—tan kayari to et ompawil lamet. Kaleganan to, magmaliw ya okupado ed makapabiskeg a pisiglaotan ed balon ayaman mo.

Mantultuloy ya Onnengneng ed Unaan

Inter nen Jehova ed sikatayo so interon dalin bilang ayaman tayo. (Salmo 115:16) Tekep na espiritu na Kristianon gayaga, say bilay so nayarin magmaliw a marakep ed inerman. No sika so onalis pian iyalibansa so interes na Panarian tan ipulong so maong a balita ed sananey a bansa odino inerman ed dilin bansam, gawam itan a tekep na maliket a panilalo. Manilalo ed pakawalaan na balo iran kaaro, odino panaral nipaakar ed nanduruman kustombre, panggawa na saray babangatan, odino panggawa na makapaliket iran bengatla ed panaglingkor ed Dios.

Si Jehova a Dios so sakey a Kaaro a lawas walad sikayo, inerman so kawalaan mo. (Salmo 94:14; 145:14, 18) Kanian mansiansian maapit ed sikato diad pikakasi. (Roma 12:12) Ontulong iya ed sika ya ipaslep ed kanonotan so gagalam ed bilay bilang aripen na Dios. Sinononot ira di Abraham tan Sara ed gagala ra sanen tinaynan da so makapaligliwan ayaman da ed syudad na Ur. Bilang katutulok ed ganggan nen Jehova, tinaynan daray kaaro tan kanayon da. (Gawa 7:2-4) No nantultuloy dan ninonot tan nanpirawatay lugar a tinaynan da, sikaray walaan komon na pankanawnawan ompawil. Balet dadampoten da so magmaong a pasen​—diad kaunoran et bilay ed paraison dalin ed silong na mangatatawen a Panarian na Dios.​—Hebreos 11:15, 16.

Say panagpulong ed sankaili iran lawak odino ed pasen a walay babaleg a pankaukolan na saray manangiyabawag na Panarian so nayarin magmaliw a sakey a baleg ya angat. Balet saya met so sakey a mabunga tan makapaliket a kimey. (Juan 15:8) Tan no bilang ta temporaryon talonaan ka na saray negatibon kanonotan, saraya so natalonaan diad panamegley na mabetbet a pannonot ed kalat ed bilay tan inengneng ed arapen. Sakey a marikit a misionera so nankuan: “Sano siak so naeermenan, sasalien kon nonoten so nipaakar ed balon mundo tan no panon ya amin a too so magmaliw a sakey a pamilya.” Saray marakep a kanonotan a singa saraya so makatulong ed sika a napansiansiam so gayagam tan agpakatalona ed pakailiw.

[Litrato ed pahina 29]

Say pakailiw so agnepeg a mangamper ed Kristianon ministeryo