Panon Mon Aaregloen Iray Agpantatalosan?

Sakey ya agmaalwar a kiwas​—et say komatlo ed sakey a lira na limaran porselanan elepanti so naplag a manlapud saman a mantilis. Saman a piraso so kaukolan a naapiger. Tano andi, nabalang so pantutunosan na saman ya interon huwego. Balet, say paraan so delikado, ta liknaen mon agmo nayarian. Kaukolan a sika so onkerew na simbawa odino kerewen mo ni ingen a gawaen iman na sakey ya espesyalista.

SAY pantutunosan ed baetan na agagi ed espiritual so nagkalalo nin mabli nen say arkos lambengat. Matukoy so impankanta na salmista: “Nengneng yo, alay kaabigan tan alay kaligliwaan na panayam na sanaagi ed inkasaksakey!” (Salmo 133:1) Say panresolbi ed agpantatalosan ed kaparan Kristiano so no maminsan et delikadon bengatla. Nilikud ed saya, say arum so agmanggagawa ed satan a bengatla ed dugan paraan. Mabetbet a say “panangipawil” so ansakit odino agmaabig a tuloy, a mangititilak na aliwliwan marka.

Ilalanor ni ingen na arum a Kristiano iray aturon mamatatken ed saray pamaakaran a nayarian da met ya aregloen ed inkasikara. Nayarin saya so lapud ag-ira segurado ed no anto so nepeg dan gawaen. “Dakel ed agagi tayo so agmakaamta no panon dan iyaplika so simbawa na Biblia pian naareglo iray agda pantatalosan,” so inkomento na sakey ya agin lakin eksperiensiado ed panangiter na simbawa na Biblia. “Mabetbet a tuloy,” intuloy to, “sikaray ag-ontutumbok ed paraan nen Jesus ed panresolbi na bengabengatla.” Kanian, anton talaga so imbaga nen Jesus nipaakar ed no panon so nepeg a panresolbi na sakey a Kristiano ed agpantatalosan ed agi to? Akin ya importanti so pangikabisadon tuloy ed sayan konseho tan aralen no panon so pangiyaplika ed satan?

Ankelag Iran Agpantatalosan

“Kanian no isasaklang mo so bagat mo ed altar, et nanonotan mod’man ya say agim et wala’y bengatla’n pamosolan to ed sika, Itilak mod’man so panangaro’m ed arap na altar, et onla ka, ta mipulangan ka ni’n onona ed agim, insan ka ed satan onla tan isaklang mo so panangaro’m.”​—Mateo 5:23, 24.

Sanen imbalikas nen Jesus iratan a salita, ugali na saray Judio ya isaklang iray bagat, odino mangiter na saray isasaklang, ed altar na templo diad Jerusalem. No nankasalanan so sakey a Judio ed kaparan Israelita, say nankasalanan so makapangiyapay na interon popoolan ya apay odino apay para’d kasalanan. Say alimbawan insalaysay nen Jesus so sinmabi ed sankadelikadoan a punto. Sano say sakey a too so walad altar tan ngalngali to la iyapay so bagat ed Dios et anonotan ton say agi to so walaay bengatlan sumpa ed sikato. On, kaukolan a talosan na Israelita a say pipulangan ed agi to so nepeg a nagawan ununa sakbay na panggawa na ontan a relihyoson obligasyon.

Anggaman saratan ya iyaapay so kakaukolanen na Mosaikon Ganggan, diad inkasikaran dili et andian na sankabalgan a balor ed imaton na Dios. Onia so inkuan nen propeta Samuel ed agmatoor ya Arin Saul: “Walaan kasi si Jehova na baleg a liket dia ed bagbagat a poolan tan bagbagat, singa say panangonor ed voces nen Jehova? Nia, say panangonor sikato so magmaong nen say bagat, tan say pangimatlek, nen say taba na saray carnero a kalakian.”​—1 Samuel 15:22.

Diad Sermon to ed Palandey, inulit nen Jesus so alasir na sayan panangiyuna tan impanengneng to ed saray babangatan to a nepeg dan aregloen iray agda pantatalosan sakbay iran mangiyapay. Natan, saray apay a kakaukolanen ed saray Kristiano et diad espiritual a paraan​—“bagat a panangidayew, salanti, say bunga na saray bibil a mangiwakawak na ngaran to.” (Hebreos 13:15) Anggaman kuan, say prinsipyo so mansiansia nin makana. Ipapanengneng met nen apostol Juan ya anggapoy kakanaan to no say sakey et ibaga ton inaro to so Dios no kagula to so agi to.​—1 Juan 4:20, 21.

Mapatpatnag, say toon anonotan ton walaay antokaman a babarongan na agi to ed sikato so manggawa na unaan a kundang. Say inkamapaabeba ya ipapatnag to so nayarin mamawala na maabig iran resulta. Maseguro, say toon naopendi so agmangipulisay a mikoopera ed toon inmasingger ed sikaton mangaksobi ed saray dilin kakulangan to. Inletneg na Mosaikon Ganggan ya antokaman a bengatlan inala diad sililingon paraan so kaukolan a sigpot ya ipawil tan aruman niman na kakaliman kabiangan na saman. (Levitico 6:5) Say pangipawil na mareen, mantutunosan a siglaotan so mipadparan magmaliw a mas mainomay no ipanengneng na nankasalanan a kaliktan ton manpasaol nen say nakakaukolan, diad eksakton pantalos na say salita, et pian apigeren so antokaman a deral a nayarin sikato so sengegan.

Anggaman ontan, saray panasalin pangipawil ed mareen iran siglaotan so aglawas matalona. Ipapanonot ed sikatayo na libro na Uliran a mairap ya aregloen iray agpantatalosan ed sakey a naiirapan ya onkiwas. Kuan na Uliran 18:19: “Say agi ya apaunong sikato so mamairap a patoloken nen say mabiskeg a ciudad; et saray ontan a pankokolkol sikara so singa saray balewet na castillo.” Onia so nabasa ed sananey a patalos: “Say agin naopendi so mas mairap a taloen nen say sakey a mabiskeg a syudad: Tan saray balingaan da so singa ra balewet na kastilyo.” (The Englishman’s Bible) Anggaman ontan, say masimoon tan mapaabeba iran sagpot so diad kaunoran et maseguron ontalona diad kaso na saray kapananisian a pilalek dan paliketen so Dios. Balet no wala so seryoson kasalanan, say simbawa nen Jesus ya akasulat ed Mateo kapitulo 18 so kaukolan ya iyaplika.

Pangareglo ed Ankabaleg Iran Agpantatalosan

“Et no say agim makapankasalanan ed sika, onla ka, ipaliwawam ed sikato so kasalanan to a sikayon dua lambengat: no dengelen to ka, tinalom so agim. Balet no ag to ka dengelen, mangitagar ka na ibam a sakey ono duara pian dia ed sangi’ duara ono talora a tasi napamintuaan so amin a salita. Et no ag to ra labay a dengelen, sikato’y ibagam ed iglesia: et no ag to labay met a dengelen so iglesia, sikatoy ipasen mo ed sika a singa Gentil tan publicano.”​—Mateo 18:15-17.

Anto no sakey a Judio (odino diad saginonor, et sakey a Kristiano) so nidunget ed sakey a seryoson agpantatalosan ed kaparan managdayew ed si Jehova? Say sakey ya isipen ton akapankasalananan so kaukolan a mangala na ununan kundang. Kaukolan ton isingbat ed akaopendi iray bengatla a sikaran dua lambengat. Diad panamegley na agpanggugunaet a mangala na manuporta ed dapag to, maseguron nagamoran to so agi to, nagkalautla no wala lambengat so agpantatalosan a nayarin naresolbin tampol. Amin so mainomay ya aregloen no saramay direktan nalalanor et sikara lambengat so makaamta ed pamaakaran.

Anggaman ontan, say ununan kundang so nayarin agmagenap. Pian napidenengan so ontan a situasyon, inkuan nen Jesus: “Mangitagar ka na . . . sakey ono duara.” Saraya so nayarin aktual ya akanengneng a testigo. Nayarin nadngel da a sakey ed saraman ya indibidual so amauges ed samay sakey, odino nayarin saramay itagar so nagmaliw a testigo ed sakey a nisulat a paknaan a natan et agla panpaknaan na duaran dapag. Diad biek a dapag, saramay nitagar so nayarin mantestigo sano walay antokaman a nalalanor, a singa saray insulat odino insalitan testimonya, so natibukel pian niletneg so sengegan na problema. Diad saya lamet, say sankamelagan a bilang no nayari​—“sakey ono duara”—​so nepeg a makaamta lambengat na nipaakar ed problema. Saya so mangamper ed iloor na bengabengatla no saman so sakey lambengat ya agpantatalosan.

Antoran motibo so nepeg a niwala ed sakey a naopendi? Kasin salien ton pabaingan so kapara ton Kristiano tan kaliktan ton paabebaen? Diad liwawa na simbawa nen Jesus, saray Kristiano so agnepeg a maples a mangakusa ed agagi ra. No bidbiren na nankasalanan so lingo to, onkerew na pasensya, tan mangugunaet ya ipetek iray pamaakaran, diad ontan et say nankasalananan so ‘analo ed agi to.’​—Mateo 18:15.

No say pamaakaran et agnaareglo, saya so kaukolan ya awiten ed kongregasyon. Nensaman, saya so ontutukoy ed saray mamasiken na saray Judio balet ta ag-abayag et saray mamatatken na Kristianon kongregasyon. Say agmagbabawin managkasalanan so nayarin naekal ed kongregasyon. Satan so labay ya ibaga na “sikatoy ipasen mo ed sika a singa Gentil tan publicano,” totoon papaliisan na saray Judio. Sayan seryoson kundang so agnayarin gawaen na bokbokor na sakey a Kristiano. Saray aturon mamatatken, a mangilalaman na kongregasyon, so autorisado lambengat a manggawa na ontan ya aksyon.​—Ipareng so 1 Corinto 5:13.

Say posibilidad na pakadespilosip na agmanbabawin managgaway-mauges so mangipapanengneng a say Mateo 18:15-17 so agmanutukoy ed ankelag iran agpantatalosan. Say tutukoyen nen Jesus et say seryoso iran kasalanan, ingen saray nengneng a nayarin aregloen ed baetan na duaran too lambengat a nalalanor. Alimbawa, nayarin say kasalanan et panagpauges, ya aapektoen ton tuloy so reputasyon na biktima. Odino saman so nayarin nipaakar ed pinansyal a pamaakaran, ta saray ontumbok a bersikulo so nipaakar ed ilustrasyon nen Jesus na aripen ya andiay panangasin a pinerdona ed baleg ya otang to. (Mateo 18:23-35) Say otang ya ag-abayaran ed nigetar a panaon so nayarin sakey lambengat ya atapew a problema a mainomay a resolbien ed baetan na duaran too. Balet satan so nayarin magmaliw a sakey a baleg a kasalanan, salanti, no say inmotang so nanpaawet ya agmanbayar ed inotang to.

Say arum iran kasalanan so agnayarin basta naareglo ed panamegley na duaran Kristiano. Diad silong na Mosaikon Ganggan, saray seryoson kasalanan so kaukolan ya ipaamta. (Levitico 5:1; Uliran 29:24) Mipadpara, saray ambelat a kasalanan a mangilalanor ed inkamaralus na kongregasyon so kaukolan a nipaamta ed Kristianon mamatatken.

Anggaman ontan, maslak a kaso na balingaan ed baetan na saray Kristiano so agnisilong ed onian paraan.

Nayari Kasin Mamerdona Ka La?

Kayarin tuloy na impangisalaysay nen Jesus no panon ya aregloen iray ankabaleg ya agpantatalosan, sikatoy angibangat na sakey nin importantin leksion. Nabasa tayo: “Saman la sinminger si Pedro, tan inkuan to’d sikato, Katawan maminpiga kasi a mankasalanan naani ed siak so agik, tan maminpiga a perdonaen ko? anga ed maminpito? Si Jesus kuan to’d sikato, Ag ko inkuan ed sika, Anga ed maminpito; ingen, Anga ed maminpitomplo ya pito.” (Mateo 18:21, 22) Diad sananey nin inkagawa imbaga nen Jesus ed babangatan to a perdonaen a “mamimpito ed inagewagew.” (Lucas 17:3, 4) Malinew, sirin, a saray patumbok nen Kristo so kakaukolanen a mangareglo ed saray agpantatalosan da diad sibubulos a panpeperdonaan.

Saya so sakey a lawak a mankakaukolan na babaleg a sagpot. “Say arum ya agagi et talagan agmarunong a mamerdona,” so inkuan na toon inaon ed kagapo. Inkuanto ni: “Sikaray singano nikelawan sano wala so mangisalaysay ed sikara a makapanpili ran mamerdona, ununa tan manuna ed amin pian napansiansia so kareenan ed Kristianon kongregasyon.”

Si apostol Pablo so nansulat: “Mantetepelan so sakey tan sakey, tan manpipirdonaan so balang sakey, no say siopaman a too wala so pangidalman to ed siopaman; onong ed impamirdona na Katawan ed sikayo, ontan met so gawaen yo.” (Colosas 3:13) No ontan, sakbay na iyasingger ed sakey ya agin nayarin nankasalanan sumpad sikatayo, maabig no nonoten iray onggendan a tepet: Kasin say kasalanan so makanan itongtong ed sikato? Talaga ta’n imposibli para’d siak a lingwanan la so agpantatalosan diad tuan espiritu na Inkakristiano? No wala ak ed kipapasen to, agta pilalek kon naperdona? Tan no agak mamerdona, nailaloan ko kasin ebatan na Dios iray pikakasik tan perdonaen toak? (Mateo 6:12, 14, 15) Saratan a tepet so maseguron makatulong ed sikatayo a magmaliw a manamerdona.

Bilang Kristianos, sakey ed importanti iran responsabilidad tayo et say pamasiansia na kareenan diad kongregasyon na totoo nen Jehova. Kanian, tumboken tayo so simbawa nen Jesus. Saya so ontulong ed sikatayon mabulos a mamerdona. Say ontan a manamerdonan espiritu so mangiyabuloy ed maaron impanaagi a pakabidbiran a tanda na saray babangatan nen Jesus.​—Juan 13:34, 35.

[Litrato ed pahina 23]

Naareglo na saray Kristiano so agpantatalosan da diad itumbok ed simbawa nen Jesus