Say Pangekebbiew na Nuklear—Sigpot a Naekal La!
SAY panbibilay a natatalagnaw so aglabay na Dios para’d katooan. Bilang “maliket a Dios,” kaliktan ton sikaray mangayaga ed kareenan tan manbilay ed kaligenan—diad antikey et magmaliw a maliket. (1 Timoteo 1:11, NW) Diad sakey a mundon napno na saray pangekebbiew na nuklear, malinew ya imposibli iya.
“Kareenan tan Kaligenan”—Sakey a Panamalikdo
Mapatnag a say pangekebbiew na nuklear so agni angangga. Siansia ni, anggaman ed pulitikal, ekonomya, tan sosyal ya inkagulo, saray bansa ed inkalapagan so singano optimista. Nanengneng so mantultuloy a panbabanikel ed pangekal na peligro nanlapulad NU International Year of Peace nen 1986.
Inuman na The Bulletin of the Atomic Scientist ed apalabas a dekada so doomsday clock to—say metodo na panangipanengneng to ed posibilidad na nuklear a bakal—manlapud 3 minuto sakbay na pegley-labi ed 17 minuto sakbay na pegley-labi. Nen 1989 sinaglawi na Stockholm International Peace Research Institute a “say ilalo para ed mareen a panagresolbi na saray gutgutan so walaay magmaong a pundasyon nen say dinanman a taon kayari Guerra Mundial II.”
Diad agano niran taon, apabiskeg so Nasyones Unidas pian onkiwas ed rehyon ed sankamundoan a walaay naulit-ulit a panlalabanan. Sayan intalona, anggaman agsigpot, so magenap la pian mamawala na inkalapagan ya espiritu na inka-optomista. Say arapen so seguradon mangitarok na kaaruman ya aligwas. Saray kelyaw na “kareenan tan kaligenan” so nayarin onkasil tan lalon ompalalo. Nayarin napanisiaan iraya ni ingen.
Balet manalwar! “Kapiganman ya ibabaga ra: ‘Kareenan tan kaligenan,’” so pasakbay na Biblia, “insan biglan kaderal so tampol ya onsabi ed sikara a singa panpapasakit na sakey a biin malukon; tan sikaray agmakabatik ed antokaman a paraan.” Diad ontan, saray kelyaw na “kareenan tan kaligenan” so mangisinyal ed panaon na Dios ‘pian bagbagen iray mamabagbag ed dalin.’—1 Tesalonica 5:3, 4, NW; Apocalipsis 11:18.
Imanoen ya ag-ibabaga na Biblia a saray nasyon so makadampot na “kareenan tan kaligenan.” Mapatnag a sikara so mangitongtong nipaakar ed satan ed nikadkaduman paraan, a mangibabalikas na inka-optimismo tan talindeg a datin agda alikna. Saray posibilidad para’d pakagamor na kareenan tan kaligenan so ompatnag a mas asingger nen kapiganman. Anggaman walay pantultuloy a pangekebbiew na nuklear, saray nasyon so pareenen na sakey a palson liknaan na inkaligen.
Anggaman ontan, saray tuan Kristiano so agnapalikdo. Tekep na maligsan interes sikaray onnengneng ed sakey a bengatlan magmaong ed labas na kareenan tan kaligenan a manlalapud too!
Kareenan tan Kaligenan—Say Peteg a Bengatla
Unong ed Salmo 4:8, say tuan kareenan tan kaligenan so naromog lambengat ed loob na oksuyan nen Jehova a Dios. “Siak ondokol ak naani ed kareenan tan naugip ak; ta sika labat, Jehova, so mamaayam ed siak ed andi kaatapan.” Antokaman a kelyaw na “kareenan tan kaligenan” ya agnisisiglaot ed oksuyan na Panarian nen Jehova so palso. Agmakapangiter na anggan anton bengatlan magnayon.
Say Panarian na Dios so mangiter na magenagenap a solusyon. Say madibinon gobierno et agto lambengat bawasan iray bilang na nuklear ya armas; satan so sigpot a mamunas ed saratan tan amin niran arum ya armas na bakal. Isisipan na Salmo 46:9: “Sikato patondaen to so bakabakal anga ed sampot na dalin; sikato balbalen to so bekang, tan poteren to a mankadua so gayang; sikato ipool to so carosa ed apuy.”
Ontan met, saray pangekebbiew na nuklear a pinalesa na saray walaay depekton nuclear reactor odino saray basuran radioactive so naandi la. Tano andi agmagmaliw a tua iray salitan: “Onyorong ira naani balang sakey ed silong na kiew to ya uvas tan ed silong na kiew to ya higos; et angapo naani manaktakot ed sikara; ta say sangi nen Jehova na saray ejercito sikato so sinalita to.” Agnayarin mantila so Dios. Anggapoy rason tayon panduaruwaan iray salita to.—Miqueas 4:4; Tito 1:2.
Kasin panggayagaan mo so pakawalaan na ilalon manbilay ed mundo a say pangekebbiew na nuklear so sigpot a naekal la? Nayarian mo, lapud malinlinew ya idadalatdat na Biblia iray kakaukolanen. Diad panaral ed saratan tan panbilay unong ed saratan, balang agew et nayarin nawalaan kayo na gayagan mangibagan: “Say pangekebbiew na nuklear—sigpot a nakal la!”
[Litrato ed Pahina 7]
Manuley so kareenan ed balon mundo na Dios ya anggapo so antokaman iran pangekebbiew na nuklear
[Credit Line]
M. Thonig/H. Armstrong Roberts
[Picture Credit Line ed pahina 6]
U.S. National Archives photo