Asingger Lay Makapataktakot ya Agew nen Jehova
“Sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.”—MALAQUIAS 3:16.
1, 2. Nipaakar ed anton makapataktakot ya agew so ipapasakbay nen Malaquias?
MAKAPATAKTAKOT! Legan ya ompapalbangon nen Agosto 6, 1945, sakey a baleg a syudad so biglan agaygay. Ngalngalin 80,000 so inatey! Nilibo-libo so graben asugatan! Binugaay apuy! Say bomban nuklear so nansengegay baleg a desyang. Komusta iray Tasi nen Jehova legan na satan a desyang? Saksakey so Tasi ed Hiroshima—ya akakulong ed salimbeng na saray pader na prisoan lapud Kristianon katooran to. Nagba so prisoan, balet ag-asakitay agi tayo. Unong ya inkuanto, sikatoy imbulos na bomba-atomika—anganko say mogmon maabig a bengatlan agawaan na satan a bomba.
2 Anggan panon lay pakataktakot ed insabog na satan a bomba, samsamet a tuloy itan sano ipareng ed “makapataktakot ya agew nen Jehova” a pagani-gani lan onsabi. (Malaquias 4:5) On, wala laray makapataktakot ya agew ya agawa’d apalabas, balet lampasan na sayan agew nen Jehova iratan ya amin.—Marcos 13:19.
3. Anton pandumaan so naimano ed baetan na “amin a laman” tan ed pamilya nen Noe sakbay na Delubio?
3 Diad agew nen Noe, “amin a laman pinauges to so kagagawa to ed dalin,” tan inyabawag na Dios: “Say dalin napno na karawalan lapu ed sikara; et, nia, gaygayen ko ran pati dalin.” (Genesis 6:12, 13) Singa nikurit ed Mateo 24:39, inkuan nen Jesus ya ‘ag-angimano [so totoo] angga’d sinmabi delap tan inyanor toran amin.’ Balet si matoor a Noe, ‘a managpulong na inkatunong,’ kaibay pamilya ton matakot-ed-Dios, so akaliktar ed satan a Delubio.—2 Pedro 2:5.
4. Anton manamasakbay ya alimbawa so itatarok na Sodoma tan Gomorra?
4 “Salanti singa,” isasalaysay na Judas 7, “say Sodoma tan Gomorra, tan saray kaliberliber da a ciudades, a no panon so inpangawa na lawan tan intombok da ed sananey a laman, ontan da met, nipasen ira a panuliranan, ed panliknara na dusa na andi angaan ya apuy.” Saraman ya agmaridios a totoo so atawtaw lapud makapadimla tan marumsis ya istiloy-kabibilay da. Abuloyan a napasakbayan iray komunidad na sayan mundon mahilig-ed-sekso! Balet, imanoen a say matakot-ed-Dios a si Lot tan saray marikit to so nipreserban mabilay legan na desyang, ontan met a nasalimbengan iray managdayew nen Jehova legan na maples ya onsasabin baleg a kairapan.—2 Pedro 2:6-9.
5. Anto so naaralan tayo manlapud saray nidapon panangukom ed Jerusalem?
5 Nilikud ed saya et kunsideraen paray manamasakbay ya alimbawan nitarok sanen inusar nen Jehova so managlubak iran armada a mamunas ed Jerusalem, say maglorian syudad a datin “gayaga na sankadalinan.” (Salmo 48:2) Sarayan makapasinagem ya ebento so agawan inmuna nen 607 K.K.P. tan lamet nen 70 K.P., lapud saray mankuan a totoo na Dios so angitalirak ed tuan panagdayew. Makapaliket, ta akaliktar iray matoor ya aripen nen Jehova. Say inkaderal nen 70 K.P. (niretrato’d onsublay a pahina) so nadedeskribe bilang “kairapan, ya agni agawa so ontan nanlapu ed gapo na inkapalsa na pinalsa’y Dios anga ed natan.” Aminpinsan ton inekal so apostatan Judion sistema na bengabengatla, tan maseguron lapud satan a pamaakaran et “agla nagawa lamet.” (Marcos 13:19, NW) Balet anggan sayan panangidapo na madibinon panangukom so anino lambengat na “baleg a kairapan” a mamapagyaw natan ed interon sistemay bengabengatla ed mundo.—Apocalipsis 7:14.
6. Akin ya aabuloyan nen Jehova iray kalamidad?
6 Akin ya aabuloyan na Dios iratan a makapataktakot a kalamidad, a sengegay katigway na dakel a bilay? Diad saray agawa ed si Noe, ed Sodoma tan Gomorra, tan ed Jerusalem, indapo nen Jehova so panangukom to’d saramay nanderal ed dalan da ed tapew na dalin, nandutak ed sayan marakep a planeta tekep na literal a polusyon tan inkagba ed moral, tan nan-apostata, odino angipulisay ed tuan panagdayew. Natan et wala tayo la’d tambib na sigpot a panangidapo na panangukom a manasalikobkob ed interon mundo.—2 Tesalonica 1:6-9.
“Dia ed Kaonoran ya Agew”
7. (a) Diad anto a mapropetiko iray kadaanan a madibinon panangukom? (b) Anton maglorian iilaloan so walad arapen?
7 Saraman a kadederal ed inmunaran panaon so mapropetiko ed makapataktakot a baleg a kairapan ya adeskribe ed 2 Pedro 3:3-13. Kuan na apostol: “Amtaen so saya ya unona, a dia ed kaonoran ya agew onsabi so saray managlurey a pati panaglurey, a manakar irad dilin lawan da.” Insan, diad pangipaimano’d agew nen Noe, insulat nen Pedro: “Lapu ed saya say mundo nen saman, dia ed inkayanep to na danum atawtaw. Balet saray tawen ya wala natan, tan say dalin, inpansiansia ra na dilin salitan niatol ya onkana ed apuy ed agew na panangokom, tan dia ed kaderal na saray mangaruksan totoo.” Onsublay ed satan a sankabalgan ed amin a kairapan, say abayag lan aalagaren ya uley na Panarian na Mesias so nawalaan na balo iran kurang—“saray tawen a balo tan dalin a balo, a sikara so pana-ayaman na katunongan.” Agaylan magayagan iilaloan!
8. Panon a saray ebento ed mundo so mamapaarap ed kapantokan?
8 Legan na koma-20 siglo tayo, saray ebento ed mundo so mantultuloy a mamapaarap ed kapantokan. Anggaman say inkadesyang na Hiroshima so aliwan agew na panagsukay na Dios, nayarin nilaktip itan ed “makapatakot tan angkakabaleg a tanda” ya impropesiya nen Jesus parad panaon na anggaan. (Lucas 21:11) Amawala na panamagyaw na nuklear a siansian manatalagnaw ed katooan. Kanian, onia so nabasa tayo ed sakey a paulo na The New York Times na Nobyembre 29, 1993: “Nayarin Latiyan Laray Paltog Balet Siansian Mansyayap Iray Nuklear ya Armas.” Kaleganan to, mantultuloy a manaani makapataktakot iran bungay bakabakal ed baetan na saray nasyon, rasa, tan tribu. Diad apalabas a panaon, say kabalgan a kabiangan na inaatey et saray sundalo. Natan, 80 porsiento na inaatey ed bakal et nireport a sibilyan, nilikud ni ed minilyon a tinmaynan ed dilin nianakan dan dalin bilang takas (refugee).
9. Panon a nipapanengneng na relihyoson papangulo so pikakaaro ed mundo?
9 Mabetbet ya impanengneng la tan ipapanengneng ni na relihyoson papangulo so “pikakaaro ed mundo” diad pantultuloy ya aktibon pibabali ed saray bakal tan marala iran rebolusyon. (Santiago 4:4) Arum so akinonong ed maagum tan maimpluensya iran negosyante ed komersyo ed mundo diad malaknab a panamawala na sarayan armas tan panangiletneg na saray imperyon nisisiglaot ed druga. Singa bilang, diad pangireport ed impamatey ed sakey a lider na sindikatoy druga ed Abalaten ya Amerika, kuan na The New York Times: “Lapud iyaamot iray negosyo to ed druga diad pangibabagan saray kayamanan to et nanlapud lehitimon negosyo tan diad pansimpisimpitan ed itulong ed saray walaay pankaukolan, sikatoy awalaan na dilin programa ed radyo tan mabetbet a kaiba iray parin Romano Katoliko.” Inreport na The Wall Street Journal a nilikud ed panederal ed bilay na minilyon a nagmaliw ya adik ed druga, sayan lider ed druga so personal ya amapatey ed nilibo. Inkuan na The Times ed London: “Mabetbet a manbabayar iray managpatey na espesyal a Misa pian misalamat . . . diad parehon bekta legan a nagagaway misay panangiponpon ed biktima ed arum a lugar.” Agaylan karelmengan!
10. Panon so nepeg a panmoria tayo ed onuuges iran kipapasey mundo?
10 Siopa tay makaamta ni ed kadederal ya idapo ni na pinuyanan-na-demonyon totoo ed sayan dalin? Unong ya ibabaga na 1 Juan 5:19, “say sankamundoan so mandokdokol ed kaugsan,” si Satanas a Diablo. Natan et “kasi lara so dalin tan dayat, ta say diablo inmakseb ed sikayo, ya wala ed baleg a sanok to, ya amta to a daiset la so panaon to.” (Apocalipsis 12:12) Anggaman kuan, makapaliket ta papaseguroan itayo na Roma 10:13 a “siopaman ya ontawag ed ngaran na Katawan [Jehova, NW], nilaban.”
Manasingger Lay Pangukom na Dios
11. Antoran kipapasen diad Israel so nankaukolay pasakbay nen Malaquias?
11 No nipaakar ed magano lan arapen na katooan, say propesiya nen Malaquias so mangipapalinew no antoy pagani-gani lan nagawa. Si Malaquias so unor ed andukey a linya na sakbay-Kristiano iran Hebreon propeta. Naeksperiensia na Israel so impankibalatar na Jerusalem nen 607 K.K.P. Balet 70 taon ed saginonor et impanengneng nen Jehova so mapangasin maaron-kaabigan diad impangipawil ed satan a nasyon ed dalin ton mismo. Ingen diad loob na sanlasus taon, say Israel so nipaarap lamet ed apostasya tan karelmengan. Ag-inggalang na totoo so ngaran nen Jehova, imbaliwala ra iray matunong a ganggan to, tan dinutakan da so templo to diad impangitarok na bulag, piley, tan mansasakit ya ayayep bilang bagat. Sikara met so angisian ed kaasawaan da ed inkatobonbalo ra pian makapangasaway sankailin bibii.—Malaquias 1:6-8; 2:13-16.
12, 13. (a) Anton panagdalisay so kaukolan parad alanaan a grupo na saray saserdote? (b) Panon a say baleg ya ulop so nagugunggunaan met diad panaglinis?
12 Sakey a panagdalisay a kimey so nakakaukolan. Satan so nadedeskrebi diad Malaquias 3:1-4. Singa say kadaanan ya Israel, kaukolan na modernon-agew a Tastasi nen Jehova a nalinisan, kanian say panagdalisay a kimey a deniskrebi nen Malaquias so onaplika ed sikara. Legan na panasampot na inmunan guerra mundial, pigara ed saray Estudyante na Biblia, unong a tawag ed saman ed saray Tasi, so agnanmintina ed mapeget a neutralidad ed saray kurang na mundo. Nen 1918, imbaki nen Jehova so ‘igagangan na sipanan’ To, si Kristo Jesus, ed espiritual a templon uksoyan To pian linisan so melag a grupo na saray managdayew To manlapud minumundon inkamantsaan. Mapropetiko, intepet nen Jehova: “Siopa so makayari a mangitepel ed agew ya isabi to? Tan siopa naani so makaalagey sano ompatnag? Ta sikato so singa say apuy na mangogol, tan singa sabon na managpakapal na abel. Et sikato onyorong naani a singa say manlinis tan mangogol na pilak, et gogolan to naani so saray anak nen Levi, et linisan to ra naani a singa say balitok tan say pilak; et sikara manbagat ira naani ed Jehova na saray bagat ed inkatunong.” Bilang adalisay a totoo, ginawa ra so singa ontan!
13 Satan ya alanaan a grupo na saray saserdote so manbilang lambengat na 144,000. (Apocalipsis 7:4-8; 14:1, 3) Anggaman ontan, komusta iray arum a dedikadon Kristiano natan? Natan et ondaraak a minilyon, saraya so mamoporma ed “sakey a baleg ya olop” a kaukolan met a nalinisan manlapud minumundo iran dalan, ‘inorasan daray kawes da tan pinapoti daratan ed dala na Kordero.’ (Apocalipsis 7:9, 14) Kanian, diad pangagamil na pananisia ed dondon bagat na Kordero, si Kristo Jesus, apansiansia ra so malinis a talindeg da ed arap nen Jehova. Nisisipan ed sikara so kililiktar ed interon panaoy baleg a kairapan, say makapataktakot ya agew nen Jehova.—Sofonias 2:2, 3.
14. Antoran salita so nepeg a tumboken natan na totoo na Dios legan ya itutuloy dan bayuboan so balon personalidad?
14 Kaiba na nakdaan iran saserdote, sayan baleg ya ulop so nepeg ya ontulok ed kaaruman niran salitay Dios: “Et siak onasinger ak naani ed sikayo ed pangokom; et masiglat ak naani a tasi a sumpa ed saray maanito, tan sumpa ed saray mikakalogoran, tan sumpa ed saray matila a mansamba, tan sumpa ed saray manangapos ed saray miopopa ed saray upa ra, ed balo a bii, tan ed saray ulila, tan mamikewet ed saray sankaili ed matunong to, tan ag antakot ed siak . . . Ta siak, si Jehova, agak mangoman.” (Malaquias 3:5, 6) Andi, agmanguuman iray estandarte nen Jehova, kanian diad itatakot ed si Jehova, nepeg ya arawian na totoo to natan so panagtalintao ed amin a nengneng tan magmaliw a matua, tan mabunlok legan ya itutultuloy dan mamayubo na Kristianon personalidad.—Colosas 3:9-14.
15. (a) Anton mapangasin imbitasyon so inanatnat nen Jehova? (b) Panon tayon napaliisan a ‘takewan’ si Jehova?
15 Inanatnat nen Jehova so imbitasyon ed siopaman a pinmaliis manlapud matunong iran dalan to, a kuanto: “Ompawil kayo ed siak, et siak ompawilak naani ed sikayo.” No itepet na saraya: “Ed anto so pawilan mi naani?” sikatoy onebat: ‘Tatakewan yoak.’ Tan bilang ebat ed kaaruman nin tepet a: “Ed anto so nantakewan mi ed sika?” Kuan nen Jehova a sikatoy tinakewan da diad insaew a pangibagat na sankaabigan da bilang iyaapay ed serbisyo ed templo. (Malaquias 3:7, 8) Diad pagmaliw a kabiangay totoo nen Jehova, talagan labay tayo so mangideboto na sankaabigan a kabiangay biskeg, abilidad, tan materyal a kaykayarian tayo diad serbisyo ed si Jehova. Kanian, imbes a takewan so Dios, ‘mantutultuloy [tayo] ya aanapen ya unona so panarian tan say inkatunong to.’—Mateo 6:33.
16. Anton panamaseseg so naromog tayo ed Malaquias 3:10-12?
16 Wala so engranden tumang parad amin a mangipulisay ed dilin-manamenek, materyalistiko iran dalan na mundo, a singa ipapanengneng na Malaquias 3:10-12: “Salien yo ak natan ed saya, kuan nen Jehova na saray ejercito, no siak agko naani lukasan ed sikayo so saray pinto na tawen, et ikalbok naani ed sikayo so sakey a bendicion, ya angapo naani so pasen a makasarag a mangawat ed sikato.” Diad amin a maapresya, isisipan nen Jehova so iyaaligwas tan inkamabunga ed espiritual a pamaakaran. Iyaarum to: “Amin a nacion ingaran da kayo naani na mapalar, ta sikayo so makapalikliket a dalin.” Agta napapaneknekan itan ed limog na minilyon ed misadsalamat a totoo na Dios ed interon dalin natan?
Saray Manamenben Katooran ed Libro na Bilay
17-19. (a) Panon a say gulo ed Rwanda so mangaapekta ed agagi tayo diman? (b) Makakapantultuloy irayan amin a matoor tekep na anton kumbiksyon?
17 Diad sayan punto et komentoan tayo pa so katooran na agagi tayon taga Rwanda. Lawas dan itatarok so sankaabigan ya espiritual iran iyaapay ed espiritual ya abung a panagdayewan ed si Jehova. Alimbawa, diad “Madibinon Panangibangat” a Distriton Kumbension da nen Disyembre 1993, say 2,080 a manangipalapag na Panarian da so nanani na dagup na inmatendin 4,075. Wala so 230 balon Tastasi ya abautismoan, tan ed saraya et ngalngali 150 so nanpalista ed panag-auxiliary pioneer ed tinmumbok a bulan.
18 Sanen tinmerak so gulaan na tribu nen Abril 1994, ag-onkulang ed 180 Tastasi, pati say city overseer diad Kigali, say kabisera, tan interon pamilya to, so pinatey. Say anemiran managpatalos a walad opisinay Watch Tower Society diad Kigali, apatira ed sikara so Hutu tan duara so Tutsi, so nantultuloy a nankimey ed loob na pigaran simba ed silong na agaylan panamagyaw, anggad kaukolan ya ontaynan iray Tutsi, pian napatey lambengat ed checkpoint. Diad kaunoran, legan na pangaalsa ed antokaman a nakekeraan a kagawaan dan computer, say nekekeraan ya apatira so tinmaynan ed Goma, diad Zaire, a ditan da sitotoor ya itutuloy so pangipapatalos da ed Say Panag-Bantayan diad lenguahen Kinyarwanda.—Isaias 54:17.
19 Sarayan takas a Tastasi, anggaman ed agaylan mairap iran sirkumstansya, so naynay ya onkekerew na espiritual a tagano a manunaan nen say materyal iran probisyon. Diad panamegley na baleg a sakripisyo, saray tulong so asarag a niiter ed sikara na maaron agagi tayo manlapud arum a daldalin. Diad panamegley na insangin balikas tan diad inkauksoy da anggaman ed mairap a situasyon, saray takas so akapangiter na makapakelaw a pantasi. Talagan intutultuloy da so pangitarok na sankaabigan da ed panagdayew ed si Jehova. Idedemostra ra so kumbiksyon, a singa imbalikas nen Pablo diad Roma 14:8: “Ta no manbibilay itayo, manbibilay itayo ya onkana ed Katawan [Jehova, NW]; et no ompatey itayo, ompatey itayo ya onkana ed Katawan [Jehova, NW]: kanian, mabilay itayo man odino onpatey itayo, kien itayo na Katawan [Jehova, NW].”
20, 21. (a) Siopan kangaranan so agnisulat ed libro na pakanodnonotan nen Jehova? (b) Sioparan kangaranan so walad libro, tan akin?
20 Pansiasiansiaen nen Jehova so amin a rekord na manlilingkor ed sikato diad katooran. Intuloy na propesiya nen Malaquias: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakay a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.”—Malaquias 3:16.
21 Agaylan importanti natan ya ipanengneng tayo so maridios a takot tayo diad pangigalang ed ngaran nen Jehova! Diad panggawa ed satan, agtayo nairapan ed agaylan panangukom, a singa nagawa’d saramay mandinayew a manusuporta ed saray sistema na mundo. Isasalaysay na Apocalipsis 17:8 a “saray kangaranan da ag ira nisulat ed libro na bilay.” Makatunongan, say manunaan a ngaran a nisulat ed libro na bilay nen Jehova et say Manunan Ahenti na bilay, say dilin Anak na Dios, si Jesu-Kristo. Iyaabawag na Mateo 12:21: “Et dia’d ngaran to so panilaloan na saray Gentiles.” Say dondon bagat nen Jesus so pinagkagarantiya na andi-anggaan a bilay parad amin a mangaagamil na pananisia ed saya. Agaylay pribilihyo tayon niarum so kangaranan tayo ed ngaran nen Jesus ed satan a lukot!
22. Anto so mapatnag a pandumaan sano idapo nen Jehova so panangukom?
22 Komustay ariripen nen Jehova diad panaon na panangukom? Si Jehova a mismoy oneebat diad Malaquias 3:17, 18: “Imasakit ko ra naani, singa sakey a too imasakit to so dili ya anak to a laki a manlinkor ed sikato. Dia ed ontan ompawil kayo naani tan mangibiig kayo naani na matunong tan marelmeng, say manlinkor ed Dios tan say ag manlinkor ed sikato.” Malinew naani ed amin so inkaapag: saray marelmeng so nibiig parad andi-anggaan a kapegpeg, tan saray matunong so naabobonan parad andi-anggaan a bilay ed sakop na Panarian. (Mateo 25:31-46) Sirin et sakey a baleg ya ulop na kinmarneron totoo so makaliktar ed baleg tan makapataktakot ya agew nen Jehova.
Kasin Natandaan Yo?
◻ Antoran panangukom so indapo nen Jehova ed panaon na Biblia?
◻ Panon a saray kipapasen natan so mipara ed saramay kadaanan a panaon?
◻ Anton panagdalisay so nagagawa diad kasumpalan na propesiya nen Malaquias?
◻ Siopan kangaranan so nisulat ed pakanodnonotan a libro na Dios?