Saniiban Manaayam ed Nipawil a “Dalin”

“Balet sikayo ningaran kayo naani a sacerdote nen Jehova; saray totoo tawagen da kayo naani na katangbayan na Dios tayo.”​—ISAIAS 61:6.

1, 2. (a) Anto so kipapasen na saray proselita ed Israel? (b) Anton espiritu so impanengneng na saray membro na “baleg ya ulop” ed modernon panaon?

NEN inmunan panaon, say Israel, sanen matoor so kinmiwas ed sena na mundo bilang sakey a tasi ed kigloriaan nen Jehova. (Isaias 41:8, 9; 43:10) Dakel a sankaili so kinmiwas tan ginmapon nandayew ed si Jehova a kaiba na apilin nasyon To. Diad tua, inkuan da ed Israel so singa ed inkuan nen Rut ed si Noemi: “Say baley mo sikato so baley ko tan say Dios mo, Dios ko.” (Rut 1:16) Sikaray nampasakop ed kakaukolanen ed Ganggan a sipanan, diad ontan et nanpagalsim iray lalaki. (Exodo 12:43-48) Arum ed saray bibii so akiasawa’d Israelitas. Sikara di Rahab na Jerico tan si Rut a Moabita so nagmaliw ya inmuunan atateng nen Jesu-Kristo. (Mateo 1:5) Say ontan iran proselita so kabiangay kongregasyon na Israel.​—Deuteronomio 23:7, 8.

² Singa saray proselita ed Israel, onia so inkuan na “baleg ya ulop” natan ed saray alanaan a nakdaan: “Sikami mila kami naani ed sikayo, ta sikami nadngelan mi a say Dios wala ed sikayo.” (Apocalipsis 7:9; Zacarias 8:23) Bibidbiren da a sarayan alanaan a Kristiano so “matoor tan makabat ya aripen” nen Jehova, tan sikaray talagan maapit a mitutulongan ed sikara, a saray alanaan tan say “arum a carnero” so “saksakey a polok, saksakey ya pastor.” (Mateo 24:45-47; Juan 10:16) Anto kasi nagawa ed baleg ya ulop sano naawat lan amin na alanaan ya agagi ra so mangatatawen a tumang da? Agda nepeg so ontakot. Diad sarayan panaon na “saray kaonoran ya agew,” pinaraanan nen Jehova itan a panaon.​—2 Timoteo 3:1.

Sakey ya Espiritual a “Dalin”

3. Antoray “tawen a balo” ya impasakbay nen Pedro, tan kapigan irayan niletneg?

³ Impasakbay nen apostol Pedro so oksuyan na mangatatawen a mananguley a ditan et mibiang iray 144,000 ya alanaan a Kristianos. Onia so inkuanto: “Unong ed sipan to alagden tayo so saray tawen a balo tan dalin a balo, a sikara so pana-ayaman na katunongan.” (2 Pedro 3:13) Sarayan “tawen a balo” so niletneg nen 1914, sanen nitrono si Kristo bilang Ari na mangatatawen a Panarian. Balet komusta met so “dalin a balo”?

4. (a) Anton ag-inilaloan ya ebento so agawa nen 1919? (b) Anto so ‘nacion a nianak a maminpinsan,’ tan anto so ‘dalin a nianak tekep na impanpasakit’?

⁴ Nen 1919, impaway nen Jehova iray alanaan a nakdaan manlapud inkakautibo ed Babilonia a Baleg. (Apocalipsis 18:4) Parad papangulo na Kakristianoan, sigpot ya ag-iilaloan iyan dramatikon ebento. Nipaakar ed satan, kuan na Biblia: “Siopa so akadngel na ontan a bengatla? Siopa so akanengneng na saray ontan a bengatla? Nianak ta naani so sakey a dalin [tekep na panpasakit] ed saksakey ya agew nianak ta so sakey a nacion ed maminpinsan?” (Isaias 66:8) Sanen biglan inmapireng so alanaan a kongregasyon ed arap na nasyones bilang sakey a bulos a baley, saya so talagan sakey a nasyon a ‘nianak a maminpinsan.’ Balet, anto met itay “dalin”? Diad pantalos, sakey itan ya espiritual a kasimbangan na dalin na kadaanan ya Israel. Satan so sakop na kimey a niiter ed balon niyanak a “nacion,” sakey a lugar a ditan et niwala so moderno tan espiritual a kasumpalan na saray pasakbay nipaakar ed Panarian ed libron Isaias. (Isaias 32:16-20; 35:1-7; ipareng so Hebreos 12:12-14.) Inerman so nayarin kawalaan na sakey a Kristiano ed pisikal, sikatoy wadtan ed satan a “dalin.”

5. Anton pinagkasentro so niwala nen 1919? Isalaysay.

⁵ Anto so pisiglaotan na saya ed “dalin a balo” ya impropesiya nen Pedro? Bueno, satan a balon “nacion,” a niyanak nen 1919 ed nipawil a “dalin,” so nagmaliw a sankamundoan ya organisasyon a tinibukel na alanaan tan ag-alanaan iran manangigalang nen Jehova. Makaliktar iyan organisasyon ed Armagedon a mamaarap ed balon mundo na Dios. Diad onian dalan et namoria itan a nasyon bilang pinagkasentro na matunong a sosyedad na too, say balon dalin, a niwala kayari kaderal na mundo nen Satanas.a Kasabi kapegleyan na saray taon 1930, saray alanaan, bilang sakey a grupo, so atipon ed nipawil a dalin. Nanlapulad saman, say nidadanet et say panipon na baleg ya ulop na arum a karnero, a natan et walaay bilang a ngalngali limaran milyon. (Apocalipsis 14:15, 16) Kasin subsubra lay populasyon na “dalin”? Andi, saray ketegan to so ninatnat ni anggad nakakaukolan. (Isaias 26:15) On, makapasagyat so pakanengneng ed ibubulaslas na populasyon to legan a say “dalin” so papanoen na alanaan a nakdaan na “bunga”​—makapabunigas, makapabiskeg ya espiritual a tagano. (Isaias 27:6) Balet anto so kipapasen natan na sarayan arum a karnero ed nipawil a “dalin” na totooy Dios?

Aktibo Iray Sankaili ed “Dalin”

6. Panon a nagmaliw ya aktibo iray sankaili ed “dalin” na totoo na Dios?

⁶ No panon a nampasakop iray proselita ed dalin na Isarel ed Mosaikon Ganggan, tutumboken na baleg ya ulop natan diad nipawil a “dalin” iray ganggan nen Jehova. Lapud binangatan ira na alanaan ya agagi ra, aarawian da so amin a pormay palson panagdayew tan igagalang da so inkasagrado na dala. (Gawa 15:19, 20; Galacia 5:19, 20; Colosas 3:5) Aaroen da si Jehova ed interon puso, kanonotan, kamarerwa, tan biskeg da tan aaroen day kapara ran too a singa ed sikaran dili. (Mateo 22:37; Santiago 2:8) Diad kadaanan ya Israel et tinmulong iray proselita ed impangipaalagey ed templo nen Solomon tan anuporta ed kipawil na tuan panagdayew. (1 Awaran 22:2; 2 Awaran 15:8-14; 30:25) Natan, mibibiang met so baleg ya ulop ed saray proyekto na panangipaalagey. Alimbawa, sikaray ontutulong ed pamorma na saray kongregasyon tan sirkito, ya agsasalambiten iray literal a proyekto ed konstruksion, a singa saray Kingdom Hall, Assembly Hall, tan saray pasilidad na sanga.

7. Anto so agawa ed Jerusalem kayari na inkadakep sanen anggapoy magenap iran Levita a manlingkor ed templo?

⁷ Nen 537 K.K.P., sanen pinmawil so Israel manlapud inkadakep ed Babilonia, ginapoan daray oksuyan ed panaglingkor ed pasen na templo. Balet, agtanton dakel iray Levita a pinmawil. Kanian, saray Netineo​—agalsiman iran manaayam a dayo a dati iran katulongan na saray Levita—​so inikdan na apadaak iran pribilihyo ed panaglingkor ed templo. Anggaman ontan, ag-ira kasimbangan na saray alanaan a saserdoten Aaroniko.b​—Esdras 7:24; 8:15-20; Nehemias 3:22-26.

8, 9. Panon a sasakbaten na arum a karnero so ombabaleg a pibibiang ed kimey a panangisaklang na sagradon serbisyo legan na kaunoran iran agew?

⁸ Tinumbok na saray alanaan a Kristiano natan iyan padron. Legan a manasingger so ‘angaay panaon na kasumpalan,’ say nakdaan na saray alanaan so ondaraiset lan ondaraiset diad “dalin” na totooy Dios. (Daniel 12:9; Apocalipsis 12:17) Lapud saya, susumpalen natan na say baleg ya ulop so maslak iran responsabilidad na panangisaklang na “sagradon serbisyo.” (Apocalipsis 7:15, NW) Diad panutumbok ed panangidaulo na alanaan ya agagi ra, sikaray ‘mangisasaklang ed Dios a naynay na bagat a panangidayew, salanti, say bunga na saray bibil a mangiwakawak na ngaran to.’ Agda ‘lilingoanan so panaggawa na maabig tan say pananginabang ed arum,’ diad pakakaamtan ‘say Dios napaliket a maong ed saratan a bagat.’​—Hebreos 13:15, 16.

⁹ Kaaruman ni, lapud say baleg ya ulop so ondaraak na nilasus nilibo kada taon, wala so ombabaleg a pankaukolan parad panangasikaso. Walay panaon a saya so inasikaso lambengat na saray alanaan a Kristiano. Natan, say panangasikaso ed kaslakan iran kongregasyon, ontan met ed saray sirkito, saray distrito, tan saray sanga, so kaukolan ya ipabtang ed arum a karnero. Nen 1992 pigara ed saraya so apribilihyoan ya onatendi ed saray miting na komite na Mananguley ya Ulop tan manlingkor bilang ag-omboboto iran katulongan. Siansia ni, nansiansian matoor so arum a karnero ed alanaan a kapara ran Kristianos tan liknaen dan sakey a pribilihyo so panuporta ed sikara bilang matoor tan makabat ya aripen nen Jehova.​—Mateo 25:34-40.

“Singa Sakey a Shik”

10, 11. Bilang pananumbok ed padron na pigaran Filisteo, panon ya anguman so puso na datin kakabusol na totoo na Dios? Tekep na anton resulta?

¹⁰ Impasakbay na Zacarias 9:6, 7 so paraan no panon ya uusaren na matoor tan makabat ya aripen so arum a karnero ed panamenben ed saray responsabilidad. Nabasa tayo ditan: “Et pegpegen ko naani so kalangasan na saray Filisteo. Et ekalen ko naani so dala to a manlapu ed sangi to, tan say kadimlaan to a manlapu ed leet na saray ngipen to; et sikato naani so kera a nipaakar ed Dios tayo; et sikato naani so singa sakey ya oloen ed Juda, et say Ecron singa sakey a Jebuseo.”c Saray Filisteo so mapeget a kabusol na totoo nen Jehova, a singa met ed mundo nen Satanas natan. (1 Juan 5:19) No panon a saray Filisteo so diad kaunoran et dineral bilang sakey a nasyon, ontan met ed sayan mundo, pati saray relihyoso, mapulitika, tan komersyal iran kabiangan to, so asingger lan makasagmak na makaderal a sanok nen Jehova.​—Apocalipsis 18:21; 19:19-21.

¹¹ Anggaman ontan, unong ed saray salita nen Zacarias, arum ed saray Filisteo so anguman, tan iyaanino iya na pigara ed taga mundo natan so agmansiansia’d pibubusol ed si Jehova. Itunda ra so relihyoson idolatriya pati say mabanday iran seremonya tan makapadimla iran bagat tan diad ontan et magmaliw a malinis ed imaton nen Jehova. Diad agew tayo, saratan ya apasimbalon “Filisteo” so naromog diad baleg ya ulop.

12. Diad moderno iran panaon, panon a say ‘Ekron’ so nagmaliw a “singa sakey a Jebuseo”?

¹² Unong ed propesiya, say manunan Filisteon syudad na Ekron so magmaliw a “singa sakey a Jebuseo.” Saray Jebuseo so datin kakabusol na Israel. Say Jerusalem so walad kalimaan da anggad satan so tinalo nen David. Anggaman kuan, arum ed saramay akaliktar ed pibabakal ed Israel so mapatnag a nagmaliw a proselitas. Sikaray nanlingkor ed dalin na Israel bilang ariripen tan awalaan ni ingen na pribilihyon mantrabaho’d panangipaalagey na templo. (2 Samuel 5:4-9; 2 Awaran 8:1-18) Natan, saray ‘Ekronita’ a binmaling ed panangidayew ed si Jehova so walaan met na pribilihyon manlingkor diad “dalin” ed silong na panangasikaso na matoor tan makabat ya aripen.

13. Antoray shik diad kadaanan a mundo?

¹³ Kuan nen Zacarias a saray Filisteo so magmaliw a singa sakey a shik diad Juda. Say Hebreon salitan al·luphʹ, sano nipatalos a “shik,” et kabaliksan toy “lider na sakey libo” (odino, “chiliarch”). Satan so atagey a tuloy a posisyon. Malinew a say asakbay a nasyon na Edom so walaan lambengat na 13 shik. (Genesis 36:15-19) Say salitan “shik” so agmabetbet a nauusar sano sasaglawien so Israel, balet say balikas a “lider (odino hepe) na sakey a libo” so mabetbet ya onaapireng. Sanen impatawag nen Moises iray representanti na nasyon na Israel, tinawag toray “[papangulo ed] nilibulibu na Israel.”d Walaray 12 ed saraya, mapatnag ya onsasaginonor lambengat ed si Moises. (Numeros 1:4-16) Mipadpara, diad organisasyon na armada, saray hepe na nilibo so onkomadua lambengat ed heneral odino say ari.​—2 Samuel 18:1, 2; 2 Awaran 25:5.

14. Panon natan a nagmaliw a singa sakey a shik so “Filisteo”?

¹⁴ Ag-impropesiya nen Zacarias a saray magbabawin Filisteo so magmaliw ya aktual a sakey a shik diad Israel. Agmanepeg itan, ta sikatoy aliwan natural ya Israelita. Balet sikatoy magmaliw a singa sakey a shik, a mangokopa na sakey a posisyon na autoridad a kasimbangan na sakey a shik. Tan ontan so agawa. Legan ya ondaraiset so bilang na alanaan a Kristianos tan dakel ed saramay mabilay ni so nalilimitaan lapud edad, saray nipasal-a-maong ya arum a karnero so ontutulong legan a nakakaukolan ira, a singa panangibaga. Agda labay a sublayan iray alanaan ya agagi ra. Balet say matoor tan makabat ya aripen so mangiiter ed sikara na autoridad unong ed nakakaukolan diad “dalin” ta pian say organisasyon na Dios so mantultuloy ya onaligwas diad organisadon dalan. Say ontan a maaligwas a paraan so nanengneng ni ed sananey nin propesiya.

Saray Saserdote tan Dumaralos

15. (a) Bilang kasumpalan na Isaias 61:5, 6, sioparay “sacerdote nen Jehova,” tan kapigan iran manlilingkor ed sayan kapasidad diad sigpot a pantalos? (b) Sioparay “sankaili” a manasakbat ed panagdalos diad Israel, tan​—diad espiritual a pantalos—​anto so lalanoren na sayan kimey?

¹⁵ Oniay nabasa tayo ed Isaias 61:5, 6: “Saray sankaili manalagey ira naani tan pakanen da naani so saray ay-ayep yo, et saray sankaili magmaliw ira naani a panbakaen yo tan mangimaton ed kauvasan yo. Balet sikayo ningaran kayo naani a sacerdote nen Jehova; saray totoo tawagen da kayo naani na katangbayan na Dios tayo. Kanen yo naani so saray kayamanan na saray nacion, tan ed gayaga ra nitandoro kayo naani.” Natan, saray “sacerdote nen Jehova” et saray alanaan a Kristiano. Diad unor tan sigpot a pantalos, sikaray manlingkor bilang “sacerdote nen Jehova; . . . katangbayan na Dios tayo,” diad mangatatawen a Panarian. (Apocalipsis 4:9-11) Sioparay “sankaili” a responsabli’d panagdalos? Saraya so arum a karnero, a manaayam diad “dalin” na Israel na Dios. Anto met so panagpastol, panagdalos, tan panangasikaso na ubasan a nipabtang ed sikara? Diad importantin espiritual a pantalos, sarayan asainmin so misiglaotan ed panulong, pangasikaso, tan panagani’d totoo.​—Isaias 5:7; Mateo 9:37, 38; 1 Corinto 3:9; 1 Pedro 5:2.

16. Siopa ed kaunoran so mangasikaso ed amin a kimey ed “dalin” na totoo na Dios?

¹⁶ Diad kaplesan, sakey a melag a bilang na espiritual ya Israelitas so nakekeraan ed dalin a mibibiang ed espiritual a panagpastol, panagdalos, tan panangasikaso’d ubasan. Sano say alanaan a kongregasyon bilang interamenti so diad kaunoran et niyapasakey ed Kristo, itilak iyan amin a kimey ed arum a karnero. Anggan say panangasikaso’d totoo ed “dalin” diad satan a panaon et nipalima ed kualipikadon arum a karnero, a diad libro na Ezequiel so nipakabat bilang hepen klase.​—Ezequiel, kapitulo 45, 46.e

Say “Dalin” so Mansiansia

17. Antoran panagparaan so gagawaen nen Jehova ed sayan interon panaon na kaunoran iran agew?

¹⁷ On, agkaukolan ya ontakot so baleg ya ulop! Angiter si Jehova na daakan a panagparaan parad sikara. Say sanka-importantian a nagagawa’d dalin legan na sarayan kaunoran iran agew et say panitipon tan panatatak ed saray alanaan. (Apocalipsis 7:3) Anggaman ontan, legan a natatasian so kasusumpal na saya, ipapaarap nen Jehova so arum a karnero pian makapiulop ed sikara diad nipawil ya espiritual a dalin. Ditan et sikaray napapakan diad espiritual a paraan tan ipapasal ed Kristianon kabibilay. Sakey ni, sikaray binangatan a maong ed sagradon serbisyo, pati say panangasikaso. Lapud saya et sikaray misalsalamat a tuloy ed si Jehova tan ed alanaan ya agagi ra.

18. Diad panamegley na antoran ebento a say arum a karnero so mansiansian matoor diad “dalin” na espiritual ya Israel?

¹⁸ Sano gawaen la nen Gog na Magog so pinal a panangataki to ed totoo na Dios, ontalindeg a mapekder so arum a karnero a kaibay alanaan a nakdaan diad “dalin ya ag binakoran a polok.” Say arum a karnero so wala ni ed satan a “dalin,” sano makaliktar ira ed kadederal na saray bansa tan onloob ed balon mundo na Dios. (Ezequiel 38:11; 39:12, 13; Daniel 12:1; Apocalipsis 7:9, 14) Diad pantultuloy a matoor, ag-iran balot kaukolan ya onalis ni ed satan a makapalikliket a lugar.​—Isaias 11:9.

19, 20. (a) Diad balon mundo, anton engranden panangasikaso so panggayagaan na saray manaayam ed “dalin”? (b) Anto so panpirawatan tayo tekep na baleg a panilalo?

¹⁹ Say kadaanan ya Israel so inuleyan na totoon arari tan awalaan na saray saserdoten Levita. Diad balon mundo, nagkalalon engranden panangasikaso so panggayagaan na Kristianos. Diad silong nen Jehova a Dios, sikaray pauleyan ed baleg ya Atagey a Saserdote tan Ari, si Jesu-Kristo, tan ed 144,000 a kaiba ton saserdote tan ari​—a pigara ed sikara so dati lan kabkabat da bilang Kristianon agagi ran lalaki tan bibii ed dalin. (Apocalipsis 21:1) Saray matoor a manaayam ed espiritual a dalin so manbilay ed sakey a dalin a nipawil ed sakey a literal a paraiso, a naliliketan lapud makapaabig iran bendisyon ya ipapasabi diad panamegley na Balon Jerusalem.​—Isaias 32:1; Apocalipsis 21:2; 22:1, 2.

²⁰ Legan na anggapoy-tundan iyaaligwas na iyaandar na mangatatawen a karwahe nen Jehova pian sumpalen iray gagala to, panilaloan tayon amin tekep na panpirawat so pananumpal ed nipabtang ed sikatayo. (Ezequiel 1:1-28) Sano diad kaunoran et nasumpal irayan gagala, isip-isipen so gayaga’d panselebra ed matalonan panangiyalangon ed si Jehova! No ontan say makapanyarin kantan nikurit diad Apocalipsis 5:13 so kantaen na amin a pinalsa: “Diad samay manyorong ed trono, bendicion, tan dayew, tan gloria, tan pakayari tan diad Cordero dia ed ando lan ando”! Balanglan say pasen tayo et diad tawen odino ed dalin, agta panpirawatan tayo so pakakar ditan, a mankakasakey a mangipapaatagey na saray boses tayo ed agaylay dakep a koron panangidayew?

[Saray paimano ed leksab]

Panon Yon Ebatan?

◻ Anton “dalin” so nipawil nen 1919, tan panon iyan napano na saray manayam?

◻ Panon a naikdan na babaleg iran responsabilidad so arum a karnero na “dalin” na nipawil a totoo na Dios?

◻ Diad anton dalan a saray membro na baleg ya ulop et “singa Jebuseo”? “singa sakey a shik ed Juda”?

◻ Anggad kapigan a mansiansia ed “dalin” so matoor ya arum a karnero?

[Litrato ed pahina 23]

Say modernon Filisteo so magmaliw a “singa sakey a shik ed Juda”

[Saray litrato ed pahina 24]

Manlilingkor a saniiba iray alanaan tan arum a karnero ed espiritual a dalin