Kasin Sikay Biktima na Panangidumaduma?

ANTO so panpadparaan na saray karawalan ed etniko, rasismo, diskriminasyon, panangibiig, tan palanit a panamatey? Amin da so resulta na malaknab ya atooan a tendensya​—panangidumaduma!

Anto so panangidumaduma? Inukeran itan na sakey ya encyclopedia a bilang “sakey ya aporman opinyon ya andian na panangipanaon odino panangimano pian mangukom a maptek.” Bilang ag-ayadyarin totoo, mainomay itayon magmaliw a manangiduma ed baleg a laknab. Anganko naisip yoray kipapasen sanen sikayo so angukom ya andian na saray ebidensya. Iduduma na Biblia so ontan iran manangiduman inklinasyon ed dalan na panangukom nen Jehova a Dios. Inkuanto: “Lapud say paraan na pannengneng na too et aliwan singa say Dios, lapud nanengneng labat na too so ompatnag ed saray mata to; balet parad si Jehova, nanengneng to so wala ed puso.”​—1 Samuel 16:7.

Makapasakit so Panangidumaduma

Andi-duwaruwan balang sakey so lingon inukom na sananey ya aminsan. (Ikompara so Eclesiastes 7:21, 22.) Diad inkalapagan, amin tayo so biktima na panangidumaduma. Anggaman ontan, sano maples a nikayat, saray manangiduman kaisipan so nayarin sengegan na samet odino anggapoy kasakitan. Satan et say panemem ed ontan iran kaisipan a manresulta ed pakasakitan. Satan so mamalikdo ed sikatayo diad panisia ed katilaan. Alimbawa, diad silong na impluensya na panangidumaduma, arum a totoo so peteg a manisia ed too a nayarin magmaliw a maagum, mangiras, bagel, odino mapaatagey lapud ta kabiangan na sakey a relihyoso, etniko, odino nasyonal a grupo.

Diad dakel a kaso saray ontan a lingon panangukom so mansusumpal ed bangking, maabuso, odino anggan marawal a tratamento ed arum. Minilyon a totoo so akabalang na bilay da lapud palaspas, palanit, etnikon panamatey, tan arum niran porma na alablabas a panangidumaduma.

Diad sankamundoan, nilabanan na saray gobierno so panangidumaduma diad panamegley na legal a panaggarantiya ed kanepegan parad kawayangan, kaligenan, tan panpapara. No basaen mo so konstitusyon odino manunan datak na saray ganggan na bansam, andi duaruwan naromog mo iray balikas odino sakey a denesinyon panametek pian naprotektaan so kanepegan na amin a mibabaley, antokaman so rasa, sekso, odino relihyon da. Ingen, say panangidumaduma tan diskriminasyon so kasmak ed sankamundoan a laknab.

Kasin sikay biktima na panangidumaduma? Abidbiran ka ta la bilang maagum, mangiras, bagel odino mapaatagey lapu lambengat ed say rasam, edad, sekso, nasyonalidad, odino relihyoson sisisiaen? Kasin sikay ag-iikdan na saray pankanawnawa parad suston edukasyon, impleyo, panabungan, sosyal a serbisyo lapud panangidumaduma? No ontan, panon kan makatalona?

[Litrato ed pahina 3]

Say panemem ed panangidumaduma so mamalesay panbubusolan ed rasa

[Credit Line]

Nina Berman/Sipa Press