Managbiahi Iran Manangasikaso—Langkap a Totoo
“Sanen sinmegep ed tagey, inawi’to a dinakep so inkadakep; tan angiter na langkap [a] totoo.”—EFESO 4:8.
1. Anton balon kimey so niyabawag ed sayan magasin nen 1894?
MASULOK a sakey siglo lay apalabas, walay bengatlan balon inyabawag na Watch Tower. Adeskribe itan bilang “Sakey Nin Sanga na Kimey.” Anto so nasasaglawi ed sayan aktibidad? Satan et say modernon-agew ya inagurasyon ed kimey na saray managbiahin manangasikaso. Isasalaysay na Setyembre 1, 1894, paway na sayan magasin a nanlapulad saman et bisitaen na kualipikadon agagin lalaki iray grupo na saray Estudyante na Biblia ‘diad gagalan pabiskegen ira ed katuaan.’
2. Antoray susumpalen na saray manangasikaso na sirkito tan distrito?
2 Diad inmunan siglo K.P., saray Kristianon kongregasyon so binisita na saray manangasikaso a singa di Pablo tan Bernabe. Getma na sarayan matoor a lalakin ‘paalageyen’ iray kongregasyon. (2 Corinto 10:8) Natan et nabebendisyonan itayo na nilibon lalakin manusumpal ed saya diad sistematikon paraan. Tinuro ira na Mananguley ya Ulop na Tastasi nen Jehova bilang manangasikaso na sirkito tan distrito. Seserbian na sakey a manangasikaso na sirkito ed loob na sakey simba so kada sakey ed saray manga 20 kongregasyon a mamidduan danay ed sakey taon, ya aanalisaen iray rekord, manpapaliwawa, tan mibibiang ed lawak a ministeryo a kaiba iray lokal a manangipalapag na Panarian. Say manangasikaso na distrito so tsirman ed kada tinaon a sirkito iran asamblea ed pigaran sirkito, mibibiang ed lawak a ministeryo ed saramay kongregasyon a bibisitaen da, tan mangitatarya na panamaseseg diad saray nibase’d-Biblian paliwawa.
Say Dilin-Managsakripisyon Espiritu Ra
3. Akin a kaukolan na saray managbiahin manangasikaso so dilin-managsakripisyon espiritu?
3 Naynay a manbabaroy iray managbiahin manangasikaso. Sayan mismo so mankakaukolan na dilin-managsakripisyon espiritu. Say panbiahi manlapud sakey a kongregasyon a paarap ed sananey so mabetbet a mairap, balet magayaga irayan lalaki tan saray kaasawaan da a gawaen itan. Oniay kuan na sakey a manangasikaso na sirkito: “Talagan matulong tan agmareklamo so akulaw ko . . . Sikatoy makanepegan labat a pagalangan lapud dilin-managsakripisyon espiritu to.” Arum a manangasikaso na sirkito so manbiabiahi na masulok a 1,000 kilometro manlapud sakey a kongregasyon a mamaarap ed sananey. Dakel so manmamaneho na luluganan, balet say arum so manbiabiahi diad panamegley na panpublikon luluganan, biseklita, pankabayo, odino diad panakar. Kaukolan a beltangen na sakey ya Aprikanon manangasikaso na sirkito so sakey ya ilog a sankadagi so akulaw to ta pian nasabi so sakey a kongregasyon. Diad saray panmisioneron baroy to, kaukolan ya itepel nen apostol Pablo so petang tan betel, eras tan kapgaan, pakapuyat, nanduruman kapeligroan, tan maruksan panamasegsegang. Sikato met so walaan na “pampirawat lapu ed saray amin ya iglesias”—eksperiensian kaslakan ed saray managbiahin manangasikaso natan.—2 Corinto 11:23-29.
4. Anto so epekto na saray problema ed bunigas ed bilay na saray managbiahin manangasikaso tan ed kaasawaan da?
4 Singa say kaulop nen Pablo a si Timoteo, no maminsan et walaan na saray problema ed bunigas iray managbiahin manangasikaso tan kaasawaan da. (1 Timoteo 5:23) Saya so sakey nin pakakadesdesan da. Onia so salaysay na asawa na sakey a manangasikaso na sirkito: “Alay irap na piulop ed agagi sano agmarakep so liknaan ko. Lalon nairapan ak sanen ginmapoy panminopos ko. Say pangimpaki labat na amin a kagawaan mi ed kada simba tan iyalis ed arum a lugar so talagan sakey ya angat. Mabetbet, kaukolan koy ontunda tan manpikasi ed si Jehova ya ikdan toak na biskeg pian makapantultuloy.”
5. Anggaman ed nanduruman pakasubokan, anton awawey so impatnag na saray managbiahin manangasikaso tan kaasawaan da?
5 Anggaman walaray problema ed bunigas tan arum niran pakasubokan, panggagayagaan na saray managbiahin manangasikaso tan saray kaasawaan da so serbisyo ra tan naipapatnag da so dilin-managsakripisyon aro. Arum ni ingen so angirisgay bilay da pian makatulong ed espiritual diad panaon na panamasegsegang odino bakal. Sano bibisitaen iray kongregasyon, ipapatnag da so awawey a singa ed samay si Pablo, ya angibaga ed saray Kristianon taga-Tesalonica: “Noag say mauyamo kami ed pegley yo, a singa sakey a sigsiwa a managano na dilin anak to. Ontan mi met a maibibeg kamin mangaro ed sikayo, apaliket kamin tuloy a mangipanabang ed sikayo, na aliwan say evanghelio na Dios labat noag met saray dilin kakamarerwa mi, ta nagmaliw kayo a sankablian ed sikami.”—1 Tesalonica 2:7, 8.
6, 7. Anton positibon impluensya so nitarok na saray managbiahin manangasikaso?
6 Singa met ed arum a mamatatken ed Kristianon kongregasyon, saray managbiahin manangasikaso so “mansagpot ed salita tan dia ed panagbangat.” Amin na saratan a mamatatken so kaukolan a “nibilang ira komon ed manepeg ed mamidduan dayew.” (1 Timoteo 5:17) Say alimbawa ra so napaneknekan a makagungguna no, kayarin ‘motekteken no anto so asumpalan na inpanbilay da et aligen so pananisia ra.’—Hebreos 13:7.
7 Anto so epekto na pigaran managbiahin mamatatken ed arum? “Agaylan maabig so impluensya nen Brother P—— ed bilay ko!” insulat na sakey a Tasi nen Jehova. “Sikatoy sakey a managbiahin manangasikaso ed Mexico nanlapulad taon 1960 a manpatuloy. Bilang sakey ya ugaw, tatalaranan koray ibisita to tekep na panilalo tan gayaga. Sanen mantaon ak la na samplora et inkuanto ed siak, ‘Magmaliw ka met a manangasikaso na sirkito.’ Legan na maprobleman panaon na impantin-edyer ko, mabetbet kon inanap lapud sikatoy lawas walaan na makabat a simbawa. Say bilay to so nitalaga ed pamastol ed pulok! Natan ta sakey ak lan manangasikaso na sirkito, lawas kon panggugunaetan a mangitalaga na panaon ed saray kalangweran tan ipasepsep ed sikara iray teokratikon kalat a singa met ed ginawa to ed siak. Anggan diad pansamposampot lay bilay to, anggaman ed kaleteyay puso, naynay a panbabanikelan nen Brother P—— a mansalita na makapaseseg. Sakey ya agew sakbay ni ingen na impatey to nen Pebrero 1995 et inibaan toak ed sakey ya espisyal ya asamblean agew tan pinaseseg to so sakey ya agin arkitekto a nawalaan na maabig iran kalat. Tampol ya angisubmiti so agi na aplikasyon to pian manlingkor ed Bethel.”
Sikaray Aapresyaen
8. Sioparay “langkap a totoo” ya adeskribe ed Efeso kapitulo 4, tan panon iran makagungguna ed kongregasyon?
8 Saray managbiahin manangasikaso tan arum niran mamatatken a pinabtangan na saray asainmin na serbisyo diad panamegley na agkanepegan a panangasi na Dios so natatawag a “langkap a totoo.” Bilang manangilaman nen Jehova tan Ulo na kongregasyon, itatarok nen Jesus irayan espiritual a lalaki ta pian napaalagey so sinansakey ed sikatayo tan nadampot so inkatatken. (Efeso 4:8-15) Antokaman a langkap so makanepegan na apresasyon. Nagkalalo lan tua iya ed langkap a mamapabiskeg ed sikatayon makapantultuloy a manlingkor ed si Jehova. Kanian, panon tayo sirin a nipanengneng so apresasyon tayo ed kimey na saray managbiahin manangasikaso? Diad antoran dalan a nipanengneng tayo a ‘sikara so papagalangen’ tayo?—Filipos 2:29.
9. Diad antoran paraan a nipanengneng tayo so apresasyon ed saray managbiahin manangasikaso?
9 Sano niyanunsio so ibisita na manangasikaso na sirkito, makagapo tayo lan manplano pian sigpot a mibiang ed aktibidades na kongregasyon ed loob na satan a simba. Anganko ta makapangigana tayo na malaglaem a panaon pian suportaan iray uksoyan ed lawak a serbisyo legan na bisita. Ompan makapanserbi itayo bilang auxiliary payunir legan na satan a bulan. Maseguron labay tayon iyaplika iray suhestion na manangasikaso na sirkito pian onaligwas so ministeryo tayo. Say ontan a maawat ya espiritu so magungguna ed sikatayo tan mamaseguro ed sikato a say dalaw to et makana. On, bibisitaen na saray managbiahin manangasikaso iray kongregasyon ta pian pabiskegen itayo, balet ta sikara met so kaukolan a pabiskegen ed espiritual a paraan. Walaray panaon sanen nankaukolan si Pablo na panamaseseg, tan mabetbet ton kinerew ed kaparan Kristianos a sikatoy ipikasi ra. (Gawa 28:15; Roma 15:30-32; 2 Corinto 1:11; Colosas 4:2, 3; 1 Tesalonica 5:25) Kaukolan met na saray managbiahin manangasikaso natan iray pikakasi tan panamaseseg tayo.
10. Panon tayon makatulong ta pian magmaliw a sakey a gayaga so kimey na managbiahin manangasikaso?
10 Kasin nibaga tayo la ed manangasikaso na sirkito tan say akulaw to a talagan aapresyaen tayoray ibibisita ra? Pisasalamatan tayo ta ed makatulong a simbawa to ed sikatayo? Ipapaamta tayo ta ed sikato sano saray suheri to ed lawak a serbisyo so mamapadaak na gayaga tayo ed ministeryo? No gagawaen tayo itan, makatulong iya pian magmaliw a sakey a gayaga so kimey to. (Hebreos 13:17) Partikular a nankomento so sakey a manangasikaso na sirkito ed Espanya nipaakar ed no panon dan papablien a sanasawa iray sulat na pisasalamat a naaawat da kayari ibisita ra ed saray kongregasyon. “Isisimpen mi irayan kard tan babasaen iraya sano sikami so nadidismaya,” kuanto. “Saraya so peteg a lapuan na panamaseseg.”
11. Akin a kaukolan tayon ipatnag ed kaasawaan na saray manangasikaso na sirkito tan distrito a sikaray aaroen tan aapresyaen?
11 Maseguron nagugunggunaan manlapud saray komendasyon so asawa na manangasikaso na sirkito. Baleg so sakripisyon gagawaen to pian asistian so masiken to ed sayan lawak na serbisyo. Ikakaindan na sarayan matoor ya agagi so nisipor a pilalek ed pakawalaan na dilin ayaman tan, diad dakel a kaso, et pati say pankaliktan a pananak. Say anak a bii nen Jefte so sakey ed ariripen nen Jehova a sibubulos ya intalirak to so pankanawnawan piasawa tan makapanpamilya lapud samba nen ama to. (Uko-ukom 11:30-39) Panon a minoria so impansakripisyo to? Onia so salaysay na Uko-ukom 11:40: “Saray bibii ya anak na Israel onla ra a tinaon a mangambegya [mangomenda, NW] ed bii ya anak nen Jefte a Gaadita ed apat agew ed sakey taon.” Agaylan abig no panggunaetan tayon ibaga ed kaasawaan na manangasikaso na sirkito tan distrito a sikaray aaroen tan aapresyaen!
“Agyo Lilingwanan so Panagparawes”
12, 13. (a) Antoy walan Makasulatan a basiyan ed pagmamaliw a maparawes ed saray managbiahin manangasikaso tan ed kaasawaan da? (b) Iyilustra no panon a makagungguna ed balang sakey so ontan ya inkamaparawes?
12 Say pagmaliw a maparawes so sakey nin dalan pian nipanengneng so aro tan apresasyon ed saramay walad Kristianon kimey a panagbiahi. (Hebreos 13:2) Kinomendaan nen apostol Juan si Gayo lapud inkamaparawes to ed saramay ombibisita ed kongregasyon bilang managbiahin misionero. Insulat nen Juan: “Inaro, gawaen mo so matoor a kimey ed ganggan a gawaen mo ed saray agagi tan dia ed saray sankaili, ya angiter ira na pantasi ed panangarom ed arap na iglesia, a maong so gawaen mo ya ibalap mo ra ed kurang da a makanakana ed Dios. Ta sikara nisengeg ed ngaran sinmolong ira ya andi bengatla ya inala ra ed saray Gentiles. Sikatayo sirin nepeg tayo ra ya akoen so saraya, pian mankatangbayan itayo ed katuaan.” (3 Juan 5-8) Natan et napaaligwas tayoy panangipulong na Panarian diad pangipatnag na mipadparan panamarawes ed saray managbiahin manangasikaso tan ed kaasawaan da. Siempre, nepeg a seguradoen na lokal a mamatatken a mauksoy iray panpundoan da, balet inkuan na sakey a manangasikaso na distrito: “Say pisiglaotan mi ed agagi so agnibabase’d no siopa so walaay nagawaan parad sikami. Agmi anggan labay a mangiter na ontan ya impresyon. Nepeg min mabulbulos ya awaten so panamarawes na siopaman ed agagi tayo, mayaman man odino pobri.”
13 Say panagparawes so makagungguna ed balang sinansakey. “Diad pamilyak et niyugali mi lan imbitaan a manpundo iray managbiahin manangasikaso ed sikami,” nanonotan ni nen Jorge, sakey a datin manangasikaso na sirkito a natan et manlilingkor ed Bethel. “Liknaen kon sarayan ibibisita so tinmulong ed siak na mas ni nen say amoriak ed saman. Sanen manbalbalolaki ak la, awalaan ak na saray problema ed espiritual. Panaaburidoan iya na nanay ko balet ta agto amta no panon toak a tulongan tan lapud saya et kinerew to ed manangasikaso na sirkito a katongtongen to ak. Diad inmuna et inarawian ko, ta natatakotak ompan balawen to ak. Balet diad kaunoran et asagyat ak ed makaaron paraan to. Sakey a Lunes et inimbitaan to ak a mirungo ed sikato, tan inpaway kon amin so walad pusok lapud segurado ak a natalosan to ak. Tinalineng to ak a maong. Talagan epektibo iray praktikal a suhestion to, tan siak so ginmapon inmaligwas ed espiritual.”
14. Akin a nepeg itayon magmaliw a maapresya imbes a mabalaw ed saray managbiahin mamatatken?
14 Panggugunaetan na managbiahin manangasikaso a tulongan ed espiritual a paraan so namparan ugaw ni tan matatken. Maseguro sirin, a kaukolan tayon ipanengneng so apresasyon tayo ed saray sagpot to. Balet, panon to no sikato so balawen tayo ed saray kakapuyan to odino negatibon ikompara ed arum a binmisita la ed kongregasyon? Maseguro, saya so talagan makapadismaya. Agmakapaseseg parad si Pablo so pakadngel ed panamalaw ed kimey to. Mapatnag, binalaw na pigaran Kristianon taga-Corinto so itsura tan abilidad ton mansalita. Inulit ton mismo iray imbaga na saratan a mababalaw: “Saray sula’to, kuan da, maiyan tan mabiskeg ira, balet say inkatoo to a silalaman makapuy tan say salita to sikato so namormora.” (2 Corinto 10:10) Balet makapaliket ta maaron panangapresya so kaslakan a narerengel na saray managbiahin manangasikaso.
15, 16. Panon a naaapektoan iray managbiahin manangasikaso tan saray kaasawaan da ed aro tan seseg na saray kapananisiaan da?
15 Sanagew ya inakar na sakey a manangasikaso na sirkito ed Latin Amerika so mapitek a dalan pian bisitaen so agagi to ed espiritual ed sakey a lugar a kontrolado na saray gerilya. “Makapatenyeg na liknaan so pakanengneng ed paraan na panamabli ra ed ibibisita,” so insulat to. “Anggaman kaukolan koy mansagpot na nagkalalo pian makasabi diman, ya aarapen so dakel a kapeligroan tan ir-irap, amin na saya so natutumangan na say aro tan seseg ya impanengneng na agagi.”
16 Onia so insulat na sakey a manangasikaso na sirkito ed Aprika: “Lapud panangaron impanengneng na agagi ed sikami, labalabay min tuloy so teritoryan Tanzania! Akaparaan iray agagin makaaral ed sikami, tan sikaray naliliketan a manpaloob ed sikami ed saray ayaman da.” Wala so maaro tan maliket a siglaotan ed baetan di apostol Pablo tan say inmunan-siglon Kristianon sanasawan Aquila tan Prisca. Diad tua, inkuan nen Pablo nipaakar ed sikara: “Ibano yo ra di Prisca tan Aquila, a kakimeyan ko ra ed Kristo Jesus, ya inyan da so beklew dan dili a nisesengeg ed bilay ko, et aliwa a siak lambengat so misalamat ed sikara, noag ingen met ganagana ray iglesias na Gentil.” (Roma 16:3, 4) Misalsalamat iray managbiahin manangasikaso tan kaasawaan da a nawalaan na saray modernon-agew ya Aquila tan Prisca bilang kaaro a nikadkaduman mansasagpot pian magmaliw a maparawes tan mangitarok na nakaulop da.
Papabiskegen Iray Kongregasyon
17. Akin a nibaga a walay kakabatan ed benegan na uksoyan parad saray managbiahin manangasikaso, tan iner ira mangaala na instruksion?
17 Inkuan nen Jesus: “Say kakabatan napatnagan la ed saray gawa to.” (Mateo 11:19) Say kakabatan ed benegan na uksoyan ed managbiahin manangasikaso so sankanengneng diad bengatlan ontutulong iya ed kapaseseg na saray kongregasyon na totoo na Dios. Diad komadduan impanbaroy nen Pablo, sikara di Silas so sitatalonan ‘linma ed Siria tan Cilicia a pinaletan so saray iglesia.’ Onia so ibabaga na libro na Gawa ed sikatayo: “Et dia ed indalan da ed saray syudad initer da ed sikara pian sumpalen da so saray ganggan a pinaabig na saray apostoles tan saray mamasiken a wala ed Jerusalem. Kanian saray iglesia apaletan ira ed pananisia, et dinmakel so bilang da ed inagew-agew.” (Gawa 15:40, 41; 16:4, 5) Singa met ed arum a Kristiano, saray peles a managbiahin manangasikaso so makakaawat na espiritual ya instruksion diad panamegley na Kasulatan tan saray palapagan na “matoor tan makabat ya aripen.”—Mateo 24:45.
18. Panon a papabiskegen na saray managbiahin manangasikaso iray kongregasyon?
18 On, nepeg ya ituloy na saray managbiahin mamatatken so mangan ed espiritual a lamisaan nen Jehova. Nepeg a sigpot ya ikabisado daray metodo tan pananontonan a tutumboken na organisasyon na Dios. Diad ontan et magmaliw a sakey a peteg a bendisyon ed arum iratan a lalaki. Diad panamegley na maabig ya alimbawa ra ed seseg da ed lawak a serbisyo, makatulong ira ed saray kapananisiaan ya onaligwas ed ministeryon Kristiano. Saray nibase’d-Biblian paliwawa na sarayan onbibisitan mamatatken so mamapabiskeg ed saray dumerengel diad espiritual a paraan. Diad itulong ed arum a mangiyaplika ed konseho na Salita na Dios, manlingkor a mitunosan ed totoo nen Jehova ed sankadalinan, tan iyaplika iray espiritual a probisyon na Dios ed panamegley na ‘matoor ya aripen,’ papabiskegen na saray managbiahin manangasikaso iray kongregasyon a pribilihyo ran bisitaen.
19. Antoran tepet so siansian konsideraen?
19 Sanen inggapo na organisasyon nen Jehova so kimey na managbiahin mamatatken ed limog na saray Estudyante na Biblia a ngalngali sanlasus taon la ed apalabas, inkuan na sayan magasin: “Talaranan mi iray resulta tan ed nagkalalo nin panangitonton na Katawan.” Malinlinew a napapatnagan so panangitonton nen Jehova. Lapud panamendisyon to tan ed silong na panangasikaso na Mananguley ya Ulop, sayan kimey so nilalaknab tan nadadalisay diad ilalabas na taotaon. Bilang resulta, saray kongregasyon na Tastasi nen Jehova ed interon dalin so oneelet diad pananisia tan ondarakel ed bilang ed agew-agew. Mapatnag, bebendisyonan nen Jehova so dilin-managsakripisyon awawey na sarayan langkap a totoo. Balet panon a matalonan nasusumpal na saray managbiahin manangasikaso so kimey da? Antoray kalat da? Panon iran makapangitarok na baleg a gungguna?
Panon Yon Ebatan?
◻ Antoray pigaran susumpalen na saray manangasikaso na sirkito tan distrito?
◻ Akin a kaukolan a walaan iray managbiahin manangasikaso na dilin-managsakripisyon espiritu?
◻ Panon a nipanengneng so apresasyon parad saray managbiahin manangasikaso tan ed kaasawaan da?
◻ Anto so nagawaan na saray managbiahin manangasikaso pian napaelet so pananisia na kongregasyon?
[Litrato ed pahina 10]
Say naynay a panbiabiahi et kakaukolanen toy dilin-managsakripisyon espiritu
[Litrato ed pahina 13]
Maparawes kayo ta ed saray managbiahin manangasikaso tan ed kaasawaan da?