Ginawa Ra so Linawa nen Jehova

Si Daniel so Nanlingkor ed Dios Tekep na Agpakagiing

MATALAG a nagawa ed awaran so sanlabin pananguman. Ingen, satan so agawa nen 539 K.K.P., sanen binagbag na Medo tan saray Persiano so Imperyo na Babilonia ed loob labat na pigaran oras. Diad saman a taon, manaayam la so propeta nen Jehova a Daniel bilang sakey a Judion adakep ed Babilonia ed loob na ngalngalin 80 taon. Nayarin wala lad 90, paganigani la’d saman ya arapen nen Daniel so sakey ed saray sankabalgan a subok na integridad to ed Dios.

Kayari inkaplag na Babilonia, ompasen a diad inmuna et marakep lay amin a bengatla parad si Daniel. Say balon ari et si Dario a Medo, sakey a lakin manedad na 62 a pinagalangan toy Daniel. Sakey ed saray inmunan kiwas nen Dario bilang ari et say panuro ed 120 a satrapa tan iyatagey so posisyon na taloran lalaki bilang opisyal.a Si Daniel so sakey ed saramay taloran pinaboran a lalaki. Diad pamidbir ed nikaduman potensyal nen Daniel, getma ni ingen nen Dario ya iter ed sikato so posisyon a primo ministro! Balet, diad saman a panaon et walay agawa a biglan anguman ed saray plano na ari.

Sakey a Manamalikdon Pakana

Saray kaparan atagey ya opisyal nen Daniel, a kaiba iray baleg a grupo na saray satrapa, so inmasingger ed ari tekep na makapaintriga ya ideya. Akikasi ra ed si Dario pian mangiletneg na sakey a kapilitan a ganggan: “Anggan siopa a mankerew ed siopaman a dios odino too ed loob na talomploy agew, ya aliwan dia ed sika, O ari, sikato naani nibantak ed ungib na leon.” (Daniel 6:7) Singa ompasen itan ed si Dario a sarayan lalaki et mangipapatnag na katooran da ed sikato. Nayarin inkatunongan to met a satan a ley so ontulong ed sikato, sakey a sankaili, pian napabiskeg so posisyon to bilang ulo na panarian to.

Balet ag-improponi na saray atagey ya opisyal tan saray satrapa iyan ganggan parad pankaabigan na ari. Sikaray “nanaanap na pangidaleman a sumpa ed Daniel nipaakar ed panarian; balet ag-ira akaromog na sengeg na pangidaleman odino pamakasalanan, lapu ed sikato so mananumpal nen saman, anggapo so anggan anto a lingo odino pankulangan ya aromog ed sikato.” Kanian nankatunongan irayan manamalikdon lalaki: “Ag-itayo makaromog na bengatla a kibana a sumpa ed Daniel, nilikud a naromog tayo a sumpa ed sikato so nipaakar ed tunong na Dios to.” (Daniel 6:4, 5) Lapud amta ra a si Daniel et manpipikasi ed si Jehova ya inagew-agew, nanggunaetan da a gawaen iyan sakey a kasalanan a makanepegay dusan patey.

Anganko ta nanemem na panamusol iray atagey ya opisyal tan saray satrapa ed si Daniel lapud sikatoy “niduma ed tagey na saray pangulo, lapu ed wala ed sikato so nagnap ya espiritu; et say ari ninonot to so pangyan to ed sikato ed tagey na amin a panarian.” (Daniel 6:3) Nayarin amalesa so inkamatua nen Daniel na agkaliktan a pananebel sumpad inkabulok tan panagsaol. Antokaman so kipapasen, akombensi na sarayan lalaki so ari a pirmaan so ganggan, a gawaen itan a kabiangan na “tunong na saray Medo tan saray Persia, a sikato so agnauman.”​—Daniel 6:8, 9.

Nansiansian Agnagiing si Daniel

Kayari impakaamta nipaakar ed balon pananontonan, kasin tinmundan manpikasi si Daniel ed si Jehova? Andin balot! Mantalimukor ed atep na abung to, sikatoy manpikasi a mamitlo ed sanagew, “singa ginawa to nen inmuna a panaon.” (Daniel 6:10) Legan a sikato so manpipikasi, saray kakabusol to “aromog da si Daniel a manggagawa na pankerew tan pikakasi ed arap na Dios to.” (Daniel 6:11) Sanen inawit da so pamaakaran ed ari, agonigon si Dario lapud say ley a pinirmaan to et pakaakusaan nen Daniel. “Et nansagpot angga ed inselek na agew a manondon ed sikato,” so ibabaga na salaysay ed sikatayo. Balet anggan say ari so agmakapangibaliwala ed belat na impaakseb to lan ley. Sirin si Daniel so inawit ed ungib na saray leon, mapatnag a kinotkot odino walad dalem na dalin a pasen. “Say Dios mo a sikato so panlingkoran mo a naynay, ilaban to ka,” so paseguro na ari ed si Daniel.​—Daniel 6:12-16.

Kayari ag-impakaugip tan impan-ayunal, inapura nen Dario so linma ed ungib. Si Daniel so mabilay tan ag-asakitan! Tampol a kinmiwas so ari. Impaibuntok to iray kakabusol nen Daniel tan saray pamilya ra ed ungib na saray leon bilang panangibales. Impabalita met nen Dario ed interon nasasakopan to a “diad amin a panuleyan na panarian ko, a saray totoo ongiwgiw tan ontakot ira komon ed arap na Dios nen Daniel.”​—Daniel 6:17-27.

Leksion Parad Sikatayo

Si Daniel so sakey a maabig ya alimbawa na katooran. Anggan say ari, ya agmandadayew ed si Jehova, naimano ton si Daniel so nanlingkor ed Sikato “a naynay [agpakagiing, NW].” (Daniel 6:16, 20) Say lamot a salitan Aramaiko a nipatalos ya “agpakagiing” so manunan mankabaliksan a “manliberliber.” Isusuheri na satan so pantultuloy. Agaylan saya so manedeskribin maong ed agnabuyak ya integridad nen Daniel ed si Jehova!

Abayuboan nen Daniel so sakey ya ugalin agnagiing sakbay ni na kibantak to ed ungib na saray leon. Bilang sakey a malangwer a kautibo ed Babilonia, agto nilabay so mangan odino oninum na bengabengatlan isesebel na Mosaikon Ganggan odino natilolan na paganon ritual. (Daniel 1:8) Saginonor, makmakpel ton indeklara so mensahe na Dios ed ari na Babilonia a si Nabucodonosor. (Daniel 4:19-25) Pigaran oras lambengat sakbay na inkaplag na Babilonia, andi takot ya improklama nen Daniel so panangukom na Dios ed Arin Belsasar. (Daniel 5:22-28) Kanian sanen nipaarap si Daniel ed ungib na saray leon, nantultuloy ed matoor a kurang ya apasalan to la.

Makapanlingkor ka met ed si Jehova tekep na agpakagiing. Sakey ka ta a malangwer a too? Sirin onkiwas ka la natan pian napaaligwas so ugalin agnagiing diad pangipulisay ed mauges a piuulop ed sayan mundo tan makaderal a kondukta to. No manlilingkor ka la ed Dios ed pigaran taon, pansiansiam so ugalin matoor a panagsungdo. Ag-ontutunda, ta balang naarap tayon subok so mangiter ed sikatayo na pankanawnawan ipanengneng ed si Jehova a sikatayoy determinadon manlingkor ed sikato tekep na agpakagiing.​—Filipos 4:11-13.

[Paimano ed leksab]