Nibiig Pian Magmaliw a Magayaga Iran Manangidayew ed Sankamundoan
“Idayew yo si Jehova! Idayew yo, O sikayo ariripen nen Jehova, idayew yo so ngaran nen Jehova.”—SALMO 113:1.
1, 2. (a) Mitunosan ed Salmo 113:1-3, siopa so makanepegan na entusiastikon panangidayew tayo? (b) Anton tepet so matukoy ya itepet?
SI JEHOVA a Dios so Engranden Manamalsa na tawen tan dalin, say Sankatalbaan a Soberano tayo ed inkamagnayon. Sikatoy sigsigpot a makanepegan na entusiastikon panangidayew tayo. Satan no akin ya igaganggan ed sikatayo na Salmo 113:1-3: “Idayew yo si Jehova! Idayew yo, O sikayo ariripen nen Jehova, idayew yo so ngaran nen Jehova. Nagalang so ngaran nen Jehova a manlapu ed saya a panaon tan angga ed ando lan ando. Manlapu ed itayagtag na banwa ya angga ed iselek to say ngaran nen Jehova so idayew.”
2 Bilang Tastasi na Dios, panggagayagaan tayon gawaen iya. Agaylan makapaliket ta agla manbayag et panoen nen Jehova a Dios so intiron dalin na sayan magayagan kanta na panangidayew a kakansionen tayo natan! (Salmo 22:27) Kasin say bosis mo so narerengel ed sayan sankamundoan a koro? No ontan, alay liket mo ed kiarawi’d sayan agnankakasakey, andiay gayagan mundo!
3. (a) Antoy manggagawa ed totoo nen Jehova a nikabkabiig tan nikadkaduma? (b) Diad antoran dalan a sikatayo so nibibiig?
3 Say nankakasakey a pangidadayew tayo ed si Jehova so seguradon pagmamaliwen to itayon nikabkabiig tan nikadkaduma. Mansasalita tan manbabangat tayo a mantutunosan tan manguusar na pariparihon metodo ya iyabawag ‘so abalbaleg a kaabigan mo [Jehova].’ (Salmo 145:7) On, bilang dedikadon totoo nen Jehova, sikatayoy nibiig parad serbisyo na Dios tayo, si Jehova. Imbaga na Dios ed inmunan dedikadon totoo to, say Israel, a mansiansian biig manlapud nasyones a walad kabangibang da tan agpadudutakan ed agagamil na saraman a nasyon. (Exodo 34:12-16) Inikdan toy totoo to na ganggan pian nagawaan da iya. Ontan met natan, inikdan itayo la nen Jehova na Masanton Salita to, say Biblia. Ipapanengneng ed sikatayo na saray instruksion to no panon itayon makaarawi’d sayan mundo. (2 Corinto 6:17; 2 Timoteo 3:16, 17) Agtayo nibibiig a singa niyaarawi diad saray monastiryo tan kombento, a singa saray monghe tan madre na Babilonia a Baleg. Diad panutumbok ed uliran nen Jesu-Kristo, sikatayoy mapublikon manangidayew nen Jehova.
Aligen so Manunan Manangidayew nen Jehova
4. Panon ya impanengneng nen Jesus so uliran diad panangidayew ed si Jehova?
4 Agbalot sinmuawi si Jesus ed gagala ton dayewen si Jehova. Tan saya so angibiig ed sikato manlapud mundo. Diad saray sinagoga tan diad templo na Jerusalem et indayew toy masanton ngaran na Dios. Balanglan walad toktok na palandey odino diad gilig na baybay, inerman a pandaragupay karaklan, sipupublikon impulong nen Jesus iray katuaan nen Jehova. Inyabawag to: “Misalamat ak ed sika, O Ama, Katawan na tawen tan dalin.” (Mateo 11:25) Anggan sanen bibistaen ed arap nen Poncio Pilato, nantasi si Jesus: “Nisengeg ed saya nianak ak, tan nisengeg ed saya linma ak dia ed mundo, pian tasian ko so katuaan.” (Juan 18:37) Inapresya nen Jesus so kaimportantian na kimey to. Inerman so kawalaan to, nantasi si Jesus nipaakar ed Jehova tan sipupublikon indayew to.
5. Siopay kiyaaplikaan na Salmo 22:22, tan anto so kaukolan ya awawey tayo?
5 Diad Salmo 22:22, naromog tayo iyan mapropetikon balikas nipaakar ed Manunan Manangidayew nen Jehova: “Ipaamtak so ngaran mo ed saray agagik; dia ed pegley na muyong idayew ta ka.” Tan diad Hebreos 2:11, 12, itutukoy nen apostol Pablo irayan bersikulo ed Katawan a Jesus tan ed saramay pinasanto nen Jehova a Dios parad mangatatawen a gloria. Singa sikato, agda-ibabaing ya idayew so ngaran nen Jehova diad limog na kongregasyon. Kasin walaan itayo met na parihon awawey sano aatendian tayoray miting ed kongregasyon? Say entusiastikon pibibiang tayo ed saray miting, namparan diad kanonotan tan ed insalitan paraan, so mangidadayew ed si Jehova. Balet kasin say magayagan panangidayew tayo et anggad’ tan labat?
6. Antoy inganggan nen Jesus ed saray babangatan to, tan panon a saray manangaro na liwawa et niglogloria ra so Dios?
6 Unong ed Mateo 5:14-16, inganggan met nen Jesus iray patumbok to ya isindag day liwawa ra ta pian mandayew met so arum ed si Jehova. Inkuanto: “Sikayo so silew na mundo. . . . Ontan met pasindagen yo komon so silew yo ed arap na saray totoo, pian nanengneng da so saray maong a gawa yo, et galgalangen da so Ama yo a wala ed tawen.” Saray manangaro na liwawa so mangiglogloria ed Dios. Kasin gagawaen da labat iya diad pansalita tan panggawa na maabig, pilantropon paraan? Andi, gagawaen da itan diad nankakasakey a panangigloria ed si Jehova. On, idedika na saray manangaro na liwawa so inkasikara ed Dios pian magmaliw iran magayagan manangidayew to. Agawaan mo ta la iyan maliket a kundang?
Gayaga’d Panangidayew ed si Jehova
7. Akin a saray manangidayew nen Jehova so ontanlan magayaga, tan antoy nanggayagaan da ed agew na Pentecostes 33 K.P.?
7 Akin a magaygayaga iray manangidayew nen Jehova? Lapud say gayaga et sakey ed bunga na masanton espiritu na Dios. Diad Galacia 5:22, nilista itan a katumbokan na aro. Impatnag na saray babangatan nen Jesus ed inmunan-siglo iyan bunga na espiritu nen Jehova. Siempre, diad agew na Pentecostes nen 33 K.P., sanen inkalbo na Dios so espiritu to ed ngalngali 120 babangatan nen Jesus, amin da so ginmapon nandadayew ed si Jehova diad nanduruman pansasalita. Saray magalang a Judion linma’d Jerusalem a nanlalapud dakel a nasyon so ‘nikelkelawan tan atalagnaw.’ Inkekelyaw da: “Sikara so narengel tayo a mansalita ed salita tayo a dili nipaakar ed saray makapakelaw a gawa na Dios”! (Gawa 2:1-11) Antoy resulta na sayan makapakelaw a nankakapigan lenguahen panangidayew ed Jehova? Ngalngali 3,000 a Judio tan Judion proselitas so angawat ed maong a balita na Panarian nipaakar ed say Mesias. Nampabautismo ra, inawat so masanton espiritu, tan sigugunaet ya angiyarum ed bosis da bilang magayagan manangidayew nen Jehova. (Gawa 2:37-42) Agaylan bendisyon iman!
8. Kayari Pentecostes, antoy ginawa na Kristianos pian mas lalon manggayaga ra?
8 Ituloy na report: “Inagew-agew a nansiansia ra a malet ed sakey a kanonotan ed dalem na templo, tan ed panagpisag da na tinapay ed abung, inalara so kanen a malikeliket tan sililinis so kapusoan da, ya ingalgalang da so Dios tan kakaliktanen ira ya amin na ombaley. Et say Katawan inyarum to ed sikara ya inagew-agew so saray nilaban.” (Gawa 2:46, 47) Kasin say panlilimog da tan pakatatagano ra labat so amawala’d sikara na baleg a gayaga? Andi, say baleg a gayaga ra so manlalapud pangidadayew ed si Jehova a Dios a kada-agew. Tan mas lalon nanggayaga ra sanen anengneng day inkiwas na nilibo ed mensahe ran kilalaban. Mipadpara met itan ed sikatayo natan.
Magayaga Iran Manangidayew ed Amin a Nasyon
9. (a) Kapigan tan panon ya inggapon inikdan na Dios so totoo ed amin a nasyon na pankanawnawan narengelan so maong a balita to? (b) Akin a say masanton espiritu so nikalbo ed si Cornelio tan ed saray kakaiba to sakbay na kabautismoan da?
9 Aglabay nen Jehova ya igetar labat lay panangakbibit-liwawa ed ariripen to ed saksakey a nasyon. Kanian, nanlapulad 36 K.P., inikdan to na pankanawnawa so totoo ed amin a nasyon pian narengelay maong a balita to. Diad panangidirihi na Dios, si Pedro so linma’d abung na sakey ya opiser na armadan Hentil diad Cesarea. Diman et asabian toy Cornelio a nandaragup a kaibay maapit a kakaaro tan kapamilyaan to. Diad itatalineng dan maong ed saray salita nen Pedro, anisia ra’d Jesus diad kapusoan da. Panon tayon amta? Lapud say masanton espiritu na Dios so niwala’d saraman a mananisian Hentil. Gendagendat, say langkap na masanton espiritu na Dios so niiter labat kayari na bautismo, balet diad saman ya inkagawa et impanengneng nen Jehova so panangabobon to ed sarayan aliwan-Judio sakbay na kipalgep da. Tano agginawa itan nen Jehova, ompan agnaseguro nen Pedro a diad saman et aaksobien la na Dios iray Hentil bilang ariripen To a sikara met lay kualipikadon manpabautismo ed danum.—Gawa 10:34, 35, 47, 48.
10. Panon a nipasakbay ed kadaanan a panaon a saray totoo ed amin a nasyon et mangidayew ed si Jehova?
10 Diad kadaanan a panaon et impasakbay la nen Jehova ya amin a totoo ed nasyones so mandayew ed sikato. Sikatoy nawalaan na magayagan manangidayew ed amin a dalin. Pian pruebaan iya, inaon nen Pablo iray propesiya manlapud Hebreon Kasulatan. Imbaga to ed internasyonal a kongregasyon na Kristianos ed Roma: “Manaakoan kayo, unong a si Kristo met inako to itayo, onkana ed gloria na Dios. Kuan ko sirin a si Kristo agawa a ministro na galsim nipaakar ed katuaan na Dios, pian pamaelet [T]o ed saray sipan a niiter ed saray ama, tan pian saray Gentiles dayewen da so Dios lapu ed panangasi to. Unong na nisulat [diad Salmo 18:49]: ‘Lapu ed saya idayew taka ed utel na saray Gentiles tan kantaen ko so ngaran mo.’ Tan kuanto lamet [diad Deuteronomio 32:43]: ‘Panliketan yo, sikayo Gentil, pati baley to.’ Tan lamet [diad Salmo 117:1]: ‘Dayewen yo so Katawan, amin yo a Gentil, tan sikato so dayewen yo, amin yo a balbaley.’”—Roma 15:7-11.
11. Panon a natutulongan na Dios so totoo ed amin a nasyon pian naamtaan iray katuaan to, tan anto lay resulta na satan?
11 Agmakapankakasakey a nidayew na totoo si Jehova nilikud no say panilaloan da et si Jesu-Kristo, say sakey a tinuro na Dios a manguley ed totoo na amin a nasyon. Ta pian natulongan iran natalosay katuaan To a mangitonton ed magnayon a bilay, inyarunsa na Dios so internasyonal a programan panagbangat. Ididirihi to itan diad panamegley na matoor ya aripen a klase to. (Mateo 24:45-47) Say resulta? Masulok a limaran milyon a walaay magayagan bosis so mankakanta na panangidayew ed si Jehova diad masulok a 230 daldalin. Tan minilyon ni so interesado met a manggagawa na ontan. Nengneng yo pa no pigaray inmatendi ed Memoryal nen 1996: 12,921,933. Makapakelkelaw!
Nipasakbay so Baleg ya Ulop na Saray Magayagan Manangidayew
12. Anton makapasagyat a pasingawey so naeksperiensia nen Juan, tan anto so mabilay ya inkapeteg na sayan pasingawey?
12 Diad pasingawey, anengneng nen apostol Juan so “sakey a baleg ya ulop” a nanlapud amin a nasyones. (Apocalipsis 7:9) Anto so tema na saray panangidayew a kakantaen na sayan baleg ya ulop a kaiba iray alanaan a nakdaan na Dios? Oniay ibabaga nen Juan ed sikatayo: “[Otang tayo so, NW] inkilaban ed Dios tayo a wala a manyurong ed trono, tan dia ed Kordero.” (Apocalipsis 7:10) Saya so sipapakpel a niyaabawag ed amin a parti na mundo. Ipapayapay iray sanga na palma, a singa panangibaga, nankakasakey tayon itatandoro so Dios bilang say Sankatalbaan a Soberano tan sigagayagan ipapatua ed arap na tawen tan dalin ya “otang tayo” so kilalaban tayo ed sikato tan ed Anak to, say Kordero, si Jesu-Kristo. O, agaylan liket so naeksperiensia nen apostol Juan ed impakanengneng ed sayan makapasagyat a pasingawey na baleg ya ulop! Tan agaylay liket tayo met natan ed pakakanengneng, tan pakapipibilang ni ingen, ed mabilay ya inkapeteg na anengneng nen Juan!
13. Antoy mangibibiig ed totoo nen Jehova manlapud mundo?
13 Bilang ariripen nen Jehova, sikikinon tayon aakbitey ngaran to. (Isaias 43:10, 12) Say pagmamaliw tayon Tastasi nen Jehova et pagmamaliwen to itayon duma manlapud sayan mundo. Agaylan gayaga so pakaakbibit ed anggapoy kaparan ngaran na Dios tan say pakapagmaliw a gagalay bilay tayo so panggawa na madibinon kimey to! Say engranden gagala nen Jehova a pamasantos ed masanton ngaran to tan ed kiyalangon na sankatalbaan ya inkasoberano to diad panamegley na Panarian to so mamapawalay gagala ed bilay tayo. Tan natutulongan itayo na Dios a nawalaan na pasen ed madibinon gagala to nipaakar ed ngaran tan Panarian to. Gagawaen to iya ed taloran dalan.
Angimatalekan na Katuaan
14, 15. (a) Antoy sakey a dalan a natutulongan itayo na Dios pian nawalaay pasen ed madibinon gagala to nipaakar ed ngaran tan Panarian to? (b) Panon a midumaan so Panarian a niletneg nen 1914 K.P. ed samay nagba nen 607 K.K.P.?
14 Unona, angimatalek si Jehova na katuaan ed totoo to. Say makapasagyat a tuloy a panangiparungtal et say Panarian to so ginmapo lan manguuley nen 1914. (Apocalipsis 12:10) Sayan mangatatawen a gobierno so duma manlapud samay tipikon panarian diad Jerusalem, a datiratin kitrotronoan na arari ed linya nen David. Saman a panarian so nagba la, tan nanlapud 607 K.K.P., say Jerusalem so kompleton nipasakop ed uley na saray pakayari mundo a Hentil. Say balon Panarian ya inletneg nen Jehova nen 1914 so mangatatawen a pakayari ya agbalot nipasakop ed siopaman noagta ed si Jehova labat, nisay naderal itan. (Daniel 2:44) Ontan met, say pananguley to so duma. Panon? Oneebat so Apocalipsis 11:15: “Tinmumbok so ankakabaleg a bosis diman ed tawen, a kuan da: ‘Saray nanarian na mundo agawa ran nanarian na Katawan tayo tan si Kristo to, tan manari ed ando lan ando.’”
15 Say “nanarian na Katawan tayo tan si Kristo to” so walaan na autoridad ed intiron mundo na katooan. Sayan balon balikas na inkasoberano nen Jehova, a lalaktipen toy Mesianikon Anak to tan 144,000 ya agagi nen Jesus, a maslak ed sikara so apaoli la ed mangatatawen a gloria, so aliwa labat ya akadimikon paninteresan—bengatlan teoritiko a labalabay a pandiskusyonan na saray estudyante. Andi, sayan mangatatawen a Panarian et peteg a gobierno. Tan say maliket ya ilalo tayon pakapambilay a maando diad inkayadyari bilang resulta na uley to so mangiiter ed sikatayo na magenap a rason pian tuloytuloy a manggayaga. Say inkimatalekan na saratan a katuaan na Salita nen Jehova et papakiwasen to itayon lawas a mansalita na maabig nipaakar ed satan. (Salmo 56:10) Kasin regular mon nibabalita iya ed amin a say Mesianikon Panarian na Dios so manuuley la diad katawenan?
Tulong na Masanton Espiritu tan Sankamundoan ya Impanaagi
16, 17. Antoray onkomadua tan onkomatlon dalan a natutulongan itayo na Dios a nawalaan na pasen ed madibinon gagala to?
16 Say komaduan dalan a natutulongan itayo na Dios pian nawalaan na pasen ed madibinon gagala to et diad pangiiter to’d sikatayo na masanton espiritu to, a mamakayari ed sikatayon mamawala na saray marakep a bunga to diad bilay tayo pian nagamoray abobon to. (Galacia 5:22, 23) Niarum ni, insulat nen Pablo ed saray alanaan a Kristiano: “Inawa’ tayo . . . say espiritu a manlapu ed Dios, ta pian nakabatan tayo so saray bengatla a niiter a mabulos ed sikatayo ed Dios.” (1 Corinto 2:12) Diad ikikiwas tayo unong ed espiritu nen Jehova, amin tayo so makaamta tan makatalos natan ed peles iran maong a bengatlan sipapangasin iiter to’d sikatayo—saray sipan, ganggan, prinsipyo to, tan arum nira.—Ikompara so Mateo 13:11.
17 No nipaakar ed komatlon dalan a natutulongan itayo na Dios, walaan itayo na sankamundoan ya impanaagi tan say makapaliket ya organisasyonal ya uksoyan nen Jehova parad panagdayew. Sinaglawi itan nen apostol Pedro sanen sinimbawa to itayon “aroen yo so impanaagi.” (1 Pedro 2:17) Say maaro tan internasyonal a pamilya na agagin lalaki tan bibii so ontutulong ed sikatayon nalingkoran si Jehova tekep na baleg a gayaga ed puso, a singa ed igaganggan na Salmo 100:2: “Manlingkor kayo ed Jehova a tinekepan na liket. Dago kayo ed arapan to a mangankanta kayo.” Oniay ibabaga ni na bersikulo 4: “Loob kayo ed saray pinto ed polong to a tarok yo so pisasalamat, tan dia ed saray panagpasyaran to a tarok yo so pandaydayew. Misalsalamat kayo ed sikato, tan igalang yo so ngaran to.” Kanian balanglan sikatayo so sipupublikon manpupulong odino onaatendi ed saray miting, nalikna tayo so gayaga. Agaylan kareenan tan kaligenan so naromog tayo diad alay santing iran lolooban na espiritual a templo nen Jehova!
Sigagayagan Idayew si Jehova!
18. Akin a makapanggayaga itayo diad panangidayew ed si Jehova anggaman nipaarap tayo ed panamasegsegang odino arum niran problema?
18 Antokamay irap na saray sirkumstansia, panamasegsegang, odino arum niran probleman kipaarapan tayo, manggayaga tayo ta wala itayo ed loob na abung a panagdayewan ed si Jehova. (Isaias 2:2, 3) Tandaan a say gayaga et kualidad na puso. Saray inmuunan Kristianon agagi tayo et magayaga iran manangidayew nen Jehova anggaman naeksperiensia ray dakel ya ir-irap tan impakaandi. (Hebreos 10:34) Saray kapananisiaan tayo natan et singa met sikara.—Mateo 5:10-12.
19. (a) Antoran naulit-ulit a ganggan so manasagyat ed sikatayon dayewen si Jehova? (b) Say magnayon a bilay tayo so mandidipindi ed anto, tan anto so determinasyon tayo?
19 Amin tayon manlilingkor ed si Jehova et panliketan tayoy ontulok ed saray igaganggan na Biblia a sikatoy dayewen. Paulit-ulit ya indanet na libron Apocalipsis iray panangidayew ed Dios diad balikas ya “Aleluya!” (Apocalipsis 19:1-6) Diad anemiran bersikulo na Salmo 150, nibaga ed sikatayon 13 danay ya idayew si Jehova. Saya so intiramintin iyaapelo ed amin a pinalsa a miulop ed sigagayagan pankanta na panangidayew ed si Jehova. Say magnayon a bilay tayo so mandidipindi ed piulop tayo ed sayan abalbaleg ya Aleluyan koro! On, saray totoo labat a manbilay a maando et saramay mangisasaklang na andi-tundan panangidayew ed si Jehova, Kanian, kaukolan a determinado tayon ompeket a malet ed matoor a sankamundoan a kongregasyon legan a manasingger lay anggaan. Insan, makapanilalo tayon nanengneng so kasampotan iran salita na Salmo 150 ed kompleton kasumpalan to: “Amin a bengatla a wala so panlinlinawa to idayew to si Jehova. Idayew yo si Jehova!”
Panon Yon Ebatan?
◻ Antoy manggagawan nikabkabiig tan nikadkaduma iray totoo nen Jehovah?
◻ Akin a saray ariripen nen Jehova so ontanlan magayaga?
◻ Antoy mangibibiig ed sikatayo manlapud mundo?
◻ Diad antoran taloran dalan a natutulongan itayo na Dios a nawalaan na pasen ed madibinon gagala to?
[Litrato ed pahina 17]
Inerman so kawalaan to, nantasi si Jesus nipaakar ed si Jehova tan sipupublikon indayew to