Kasin say Diablo so Makasengeg ed Pansasakit Tayo?

AGKOMON BALOT LINMESA SO SAKIT. Pinalsa itayo na Dios a manbilay ya ando lan ando diad ayadyarin bunigas. Si Satanas, sakey ya espiritun pinalsa, so nansengegan na sakit, ot-ot, tan ipapatey a mamapairap ed sankatooan sanen sinagyat ton mankasalanan iray inmunan atateng tayo, si Adan tan Eva.​—GENESIS 3:1-5, 17-19; ROMA 5:12.

LABAY to kasin ibaga iya a say amin a sakit et direktan nanlapu ed simpok na saray espiritu? Singa naimano tayo la ed inmunan artikulo et ontan so iisipen na dakel natan. Sakey la et say bai nen ugaw nin Owmadji. Balet kasin say pantatai nen Owmadji​—a makapatey no maminsan a sakit na malangwer nin ugugaw ed saray masalimoot a lugar​—so talagan manlalapu ed saray agnanengneng ya espiritu?

Say Betang nen Satanas

Malinlinew so ebat na Biblia ed sayan tepet. Unona, ipapabitar ton agnapasakitan na saray espiritu na inmuunan atateng tayo iray mabilay. Sano ompatey so too, “agda amta so bengatla.” Andian iray espiritu a makaliktar ed ipapatey. Sikaray naugip ed lubok, ya “anggapo so gawa, no kanonotan, no pakaamta, no kakabatan.” (Eclesiastes 9:5, 10) Agnayarin pansakiten na inaatey iray mabilay!

Balet, ipaparungtal na Biblia a walaray mauges ya espiritu. Say inmunan rebeldi ed intiron uniberso et sakey ya espiritun pinalsa a kabkabat natan bilang Satanas. Walaray arum met ya akinunong ed sikato tan atawag iran dedemonyo. Sarag kasi nen Satanas tan saray demonyo so mamalesa na sakit? Agawa la itan. Arum ed saray mamilagron impamaabig nen Jesus so angilanor ed impamapaway ed saray demonyo. (Lucas 9:37-43; 13:10-16) Balet, maslak ed saray pinaabig nen Jesus et sakisakit ya aliwan mismon nanlapud saray demonyo. (Mateo 12:15; 14:14; 19:2) Mipadpara natan, bilang panontonan et say pansesengegay sakit et diad natural a paraan, aliwan ed say labas lay pakayari na too.

Komusta met so nipaakar ed tanem? Papaseguroan itayo na Uliran 18:10: “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.” Ibabaga na Santiago 4:7: “Onsumpa kayo ed Diablo, et sikato so onarawi ed sikayo.” On, sarag na Dios a salimbengan iray manmamatoor ed sikato manlapud tanem tan antokaman nin mabiskeg nen say pakayari na too. Sakey itan ya isusuheri na saray salita nen Jesus: “Say katuaan sikayo so gawaen to a bulos.”​—Juan 8:32.

Nayarin itepet na arum, ‘Anto imay nipaakar ed si Job ey? Agta sikatoy pinansakit na mauges ya espiritu?’ On, ibabaga na Biblia a say impansakit nen Job so nanlapu ed si Satanas. Balet nikaduma so kipapasen nen Job. Abayag lan sasalimbengan na Dios si Job manlapud direktan iyaataki na demonyo. Insan si Jehova so inangat nen Satanas a dapoan toy sakit si Job, tan lapud walaray nalalanor a baleg ya isyu, inekal ni nen Jehova ya agano so proteksion to ed sayan mandadayew ed sikato lapud saya lambengat a kaso.

Balet, walaray gineteran na Dios. Sanen inabuloyan toy Satanas a mangabil ed si Job, napansakit nen Satanas si Job ed sakey a peryodo na panaon, balet ta agto nayarin pateyen. (Job 2:5, 6) Diad kaunoran, anampot so paniirap nen Job, tan sikatoy mayamyaman a tinumangan nen Jehova lapud katooran to. (Job 42:10-17) Saray prinsipyon apaneknekan ed impanmatoor nen Job so abayaglan nikurit nensaman ed Biblia tan mapatpatnag itan ed amin. Agla nakaukolan so sakey nin kason panubokan.

Panon ya Onkikiwas si Satanas?

Diad amin lawarin pankanawnawa, say impakapisiglaot labat nen Satanas ed sakisakit na too et say katuaan a tinukso nen Satanas so inmunan sanasawan too, kanian sikaray nankasalanan. Agdirektan manlalapud sikato tan saray demonyo so ami-amin a beblay. Balet, agmakapanpasirayew si Satanas ed panasali ton mangimpluensia ed sikatayo a manggaway agmakabat iran desisyon tan mangikompromiso ed pananisia tayo, a nayarin manresulta ed kaapektoan na bunigas tayo. Agto tinaneman, pinatey, odino pinansakit si Adan tan Eva. Tinangguyor toy Eva ya ontunganga ed Dios, tan tinmumbok met si Adan ed intunganga nen asawa to. Say sakit tan ipapatey so kabiangay nansumpalan.​—Roma 5:19.

Aminsan et binayaran na ari na Moab so sakey a matungangan propetan manngaran na Balaam pian isamba so nasyon na Israel, a makapasesgan nankampamento ed saray ketegan na Moab. Sinali nen Balaam ya isamba so Israel, balet ta agto ayarian lapud sinalimbengan nen Jehova iyan nasyon. Insan inayat na saray Moabita so Israel pian mandayew ed talintao tan migawaay seksual ya imoralidad. Tinmalona iyan taktika, tan agla sinalimbengan nen Jehova so Israel.​—Numero 22:5, 6, 12, 35; 24:10; 25:1-9; Apocalipsis 2:14.

Makaaral itayoy importantin leksion manlapud satan a kadaanan ya inkagawa. Nipagamor ed saray matoor a mandadayew ed Dios so proteksion to manlapud direktan iyaataki na saray mauges ya espiritu. Anggaman ontan, nayarin salien nen Satanas iray sinansakey pian nikompromiso ray pananisia ra. Nayarin ayaten toran makagaway imoralidad. Odino, singa sakey a managlem a leon, nayarin pagyawen to ira pian onkiwas ed paraan a kaekal lay proteksion na Dios ed sikara. (1 Pedro 5:8) Satan no akin a si Satanas so tinawag nen apostol Pablo a “kawalaan na pakayari na ipapatey.”​—Hebreos 2:14.

Sinali na bai nen Owmadji a tangguyoren si Hawa pian mangusar na saray galing a panumbra na sakit. Anto komon so agawa no inmabuloy si Hawa? Agto napaneknekan so sigpot a panagmatalek ed si Jehova a Dios, tan agto la pankompiyansaan so pananalimbeng to.​—Exodo 20:5; Mateo 4:10; 1 Corinto 10:21.

Sinali met nen Satanas a tangguyoren si Job. Agni magenap so impangikibot to ed si Job na pamilya to, kayamanan, tan bunigas to. Aliwliwa met a simbawa so nadngel nen Job ed akulaw to ya angikuan: “Ikaindan mo so Dios, tan ompatey ka.” (Job 2:9) Insan sikatoy pinasyar na taloran “kakaaro” to a nankakasakey ya angombinse ed sikato a say natetel ed pansasakit to et sikato. (Job 19:1-3) Diad onian paraan et inanamot nen Satanas so maletletey lan kipapasen nen Job pian dismayaen tan dogirogen so panmamatalek to ed inkatunong nen Jehova. Ingen, si Job so nantultuloy a sinmaral ed si Jehova bilang say alenleneg a nailaloan to.​—Ikompara so Salmo 55:22.

Sano mansasakit itayo, nayarin nagonigon itayon maong. Diad ontan a kipapasen, tampol a salsalien itayo nen Satanas pian onkiwas ed arum a paraan a kikompromisoan na pananisia tayo. Kanian, sano ondapo so sakit, importanti a nodnonoten a say manunan pansesengegay paniirap tayo et nayarin lapud atawir ya ag-inkayadyari, imbes a nanlapud bengatlan makapanyari nen say too. Tandaan, abulag lay matoor ya Isaac pigaran taon sakbay na impatey to. (Genesis 27:1) Say makasengeg et lapud intakken to la aliwan mauges iran espiritu. Inatey si Raquel legan na panaanak to, aliwan lapud si Satanas, noagta lapud inkamaletey na too. (Genesis 35:17-19) Diad saginonor, amin a matoor nensaman so inatey​—aliwan lapud saray kantaritas odino samba noagta lapud atawir ya ag-inkayadyari.

Sakey a patit no isipen tayon saray agnanengneng ya espiritu so direktan panlalapuan na amin lan sakit ya ondapo ed sikatayo. Nayarin pansengegan itan na pirmin itakot ed saray espiritu. Insan, sano mansakit itayo, nayarin natukso itayon mikareenan ed saray demonyo imbes ya onarawi itayo ed sikara. No napagyaw itayo nen Satanas ya ombaling ed saray espiritistikon agamil, satan so panangitapat ed tuan Dios, si Jehova. (2 Corinto 6:15) Nepeg a paiwanwan itayo diad panamegley na mapagalang a takot ed Dios, aliwan diad maaniton takot ed say Kabusol to.​—Apocalipsis 14:7.

Say ugaw nin Owmadji so walaan lay sankaabigan a proteksion sumpad saray mauges ya espiritu. Unong ed si apostol Pablo, sikatoy ipapasen na Dios a “masantos” lapud sikatoy walaan na mananisian ina, tan naipikasi na ina to ed Dios a salimbengan To komon so anak ton bii diad panamegley na masanton espiritu. (1 Corinto 7:14) Lapud apalaboan lay ontan a suston pikakabat, sarag nen Hawa so mananap na epektibon panpatambalan nen Owmadji imbes a manmatalek ed saray galing.

Nanduruman Lapuan na Sakit

Maslak a totoo so agmanisia ed saray espiritu. Sano mansakit ira, manpadoktor ira​—no nayarian da itan. Siempre, sarag na sakey a mansasakit so manpadoktor ingen ta siansian ag-onabig. Agnayarin manggaway milmilagro iray doktor. Balet dakel a maaniton totoo a nayarin natambal la komon ingen manpadoktor lambengat sano grabe la. Salien da nin unona so espiritistiko iran paraan ed panagtambal, tan no ag-epektibo iraya insan ira onla ed doktor bilang ultimon remedyo. Dakel so ompapatey ya andi’d oras.

Arum so nipaarap ed ipapatey ya anggapo’d panaon lapud inkaignoranti. Agda nibiig iray sintomas tan agda amta no anto iray praktikal a kundang pian naamper lay sakit. Makatulong so pikakabat pian naamper so panirap ni. Makatantanda a mas daiset ya ananak so naandi’d-bilay lapud akapanaral iray kainaan da nen saray andiay-aral a kainaan. On, makapatey so inkaignoranti.

Say inkamapaulyan so sakey nin sengegan na pansakit. Alimbawa, dakel so mansasakit lapud papaulyanan dan nakurong na saray insekto so tagano ra sakbay itan a kanen odino lapud saray manpaparaan na tagano et agni manuuras na lima ra. Say iyugip ya ag-akamoskitero diad saray lugar ya apektadoy malaria so mapeligro met.a Nipaakar ed bunigas, mabetbet a tua a “say sakey ya onsa na panag-alwar so mabli nen say sakey a libran panpatambal.”

Say agmaalwar ya estiloy-kabibilay so makasengeg met ed impansakit na minilyon tan masakbay ya impatey da. Say panagbuanges, seksual ya imoralidad, aliwan panangusar ed druga, tan tabako so aneral ed bunigas na dakel. No nigalet so sakey a too ed sarayan bisyo insan mansakit, kasin sikatoy kinantaritas na sakey odino inataki na sakey ya espiritu? Andi. Sikato so natetel ed pansasakit to. Say pangitetel ed saray espiritu so ipapaliis ed eebatan makasengeg ed agmaalwar ya estiloy-kabibilay.

Siempre, agnakontrol iray arum a bengatla. Alimbawa, nayarin apeketan itayo na mikrobyon panlapuan na sakit odino lapud polusyon. Onia so agawa si Owmadji. Ag-amta nen ina to no antoy makasengeg ed pantatai to. Aliwan mabetbet a mansasakit iray ananak to a singa say arum nin ugugaw lapud pansiasiansiaen ton malinis so abung tan kaliberliber da tan naynay a manuuras na lima to sakbay a manparaan na tagano. Balet ta mansakit so amin ya ananak no maminsan. Manga 25 nanduruman organic infection so pansengegay pantai. Nayarin anggapo so makaamta no dinan ed saratan so makasengeg ed pantatai nen Owmadji.

Say Manbayag a Solusyon

Agnatetel so Dios lapud pansasakit. “Say Dios agnayari a tuksoen na mauges tan agmet manukso na siopaman a too.” (Santiago 1:13) No walay mansakit ed saray mandadayew ed sikato, susustunien ira nen Jehova diad espiritual a paraan. “Si Jehova pabiskegen to ed tapew na dukolan na pasasagpot: sika gawaen mo so amin a dukolan to ed kasakitan to.” (Salmo 41:3) On, walaan na panangabagey so Dios. Labay to itayon tulongan, aliwan pasakitan.

On, si Jehova so walaan na manbayag a solusyon parad sakit​—say impatey tan inkioli nen Jesus. Diad panamegley na dondon bagat nen Jesus, narondon iray maptek-impanpuso manlapud makasalanan a kipapasen da tan makagamor ed kaunoran na ayadyarin bunigas tan magnayon a bilay diad paraison dalin. (Mateo 5:5; Juan 3:16) Saray milagro nen Jesus so pasimar ed tuan panagtambal ya itarok na Panarian na Dios. Galpongen met na Dios si Satanas tan saray demonyo to. (Roma 16:20) On, wala laray insagana nen Jehova a makapakelaw a bengabengatla parad saramay mangaagamil na pananisia ed sikato. Kaukolan tayo lambengat so mananos tan mansungdo.

Kaleganan to ni, itatarya na Dios so praktikal a kakabatan tan espiritual a panangiwanwan diad panamegley na say Biblia tan say sankamundoan ya impanaagi na matoor iran managdayew. Ipapanengneng to ed sikatayo no panon so ipaliis ed saray bisyon panlapuan na problema ed bunigas. Tan tataryaan to itayo na tuan kakaaro ya ontulong sano walaray onlesan problema.

Isipen pa lamet si Job. Say panpaalbolaryo so sankagrabian a bengatlan nagawaan komon nen Job! Lapud satan et naandi’d sikato so proteksion na Dios, tan nabalang to met so amin a bendision a manatalaran ed sikato kayari na pirmin kasusubok to. Si Job so agnilingwanan na Dios, tan agto itayo met lingwanan. “Nadngelan yo so impantepel nen Job, tan anengneng yo so anggaan ya initer na Katawan,” so inkuan nen babangatan a Santiago. (Santiago 5:11) No ag-itayon balot onsuko, nagamoran tayo met so alay abig iran bendision ed aturon panaon na Dios.

Antoy agawa ed si ugaw nin Owmadji? Anonotan nen nanay to so sakey ya artikulo diad kaiban magasin na Say Panag-bantayan, say Awake!, nipaakar ed oral rehydration therapy.b Tinumbok to iray instruksion a walad satan insan sikatoy nantimplay inumen nen Owmadji. Natan et say ugaw nin bii so maong la tan makitkitsing.

[Saray paimano ed leksab]

[Saray litrato ed pahina 7]

Inyuksoy la nen Jehova so permanentin solusyon ed probleman nipaakar ed sakit