Pantutulongan​—Importante ed Espiritual ya Iyaaligwas

DIAD saramay labay dan onaligwas ed espiritual so pamilya ra, makana so pantutulongan. Sanen pinalsa nen Jehova so inmunan sanasawa, indanet toy kaimportantian na pantutulongan. Naikdan si Eva na betang bilang “katulongan” nen Adan. (Gen. 2:18) Say sanasawa et nepeg ya agnagsi-nagsi, noagta mankimey bilang sankapareha. (Ecl. 4:9-12) Nakaukolan met so pantutulongan pian nasumpal na saray atateng tan ananak so betang ya inter na Dios ed sikara.

Panagdayew Bilang Pamilya

Si Barry tan Heidi so walaan na limaran anak. Adiskobre ran say pantutulongan dan nawalaay regular a panagaral na Biblia et akatulong ed inyaligwas da. Inkuan nen Barry: “Diad panagaral mi bilang pamilya, sagpaminsan et iikdan koy angkelag ya asainmin iray ugugaw. No maminsan, pamparaanen ko iray komento base ed saray artikulo ed Awake! Manprapraktis kami met parad kapapaway pian amin da et walay akaparaan a presentasyon.” Oniay inyarum nen Heidi: “Ililista na balang sakey ed sikami iray espiritual a kalat a labay min dampoten, insan diad panagaral mi bilang pamilya et panapanaon min rerepasoen no anto lay inaligwasan mi.” Adiskobre met na sayan sanasawa a lapud walaray inyeskedyul dan labi ya ag-ira manbantay na TV, amin da et awalaay panaon a manbasa.

Pantitipon na Kongregasyon

Si Mike tan Denise et walaan na apatiran anak. Panon ya agunggonaan so pamilya ra diad impantutulongan da? Inkuan nen Mike: “No maminsan, anggan akaplano kami lan maong, naaatrasado kami nin siansia ed aral, balet sano mantutulongan kami, makakasabi kami’d dugan oras.” Inkuan met nen Denise: “Sanen angkelag ni ray anak mi, amin da et walay asainmin. Si Kim et ontutulong a manluto tan manayos na lamisaan.” Oniay nanonotan na anak dan si Michael: “Kada Martes na labi et walay aral ed abung mi. Kanian manlilinis kami, manva-vacuum, tan ililira mi ray yurongan.” Inkuan met na sakey nin anak da a si Matthew: “Seseguroen nen Tatay a masakbay so isabi to no walay aral pian naibaan to kamin manparaan.” Antoray resulta ey?

Abawbawi Iray Sagpot

Inkuan nen Mike: “Nen 1987, ginmapo kamin nampayunir nen Denise. Diad saman, wala ni’d pudir mi so talora ed saray anak mi. Duara’d anak mi so nampayunir, tan say arum et namboluntaryo ed panagpaalagey na Bethel. Say panlikliketan ni pamilya mi et walay 40 ya atulongan min mangidedikay bilay da ed si Jehova tan manpabautismo. Apribilehyoan met so pamilya mi a manbulontaryo ed saray proyektoy panagpaalagey, anggad arum a bansa ni ingen.”

On, nabawbawi iray sagpot no walay kooperasyon ed pamilya. Wala ni kasi nanonotan mon paraan pian makapitulongan ed pamilyam? Makaseguro ka a no mantutulongan kayon sankapamilyaan et mas onaligwas so espiritualidad yo.

[Litrato ed pahina 28]

Makatulong so panagpraktis na presentasyon pian onaligwas ed panagpulong