Eskedyul ed Pantitipon ed Panagserbi
Simba na Enero 10
Kanta 107
10 min: Lokal iran pakabat. Apilin Saray Pakabat manlapud Ministeryo Tayo ed Panarian.
15 min: “Pangipakabat ed Ngaran nen Jehova ed Intiron Dalin.” Tepet tan ebat a diskusyon. Ilaktip iray komento ed impormal a panagpulong manlapud libron Our Ministry, pahina 93-4.
20 min: Manparaan la Natan Pian Itandoro so Ganggan na Dios Nipaakar ed Dala. (Gawa 15:28, 29) Singbaten na kualipikadon matatken so kaimportantian na pansulat ed Advance Medical Directive/Release card. Ipapanengneng na apuyanan a panangiwanwan diad Salmo 19:7 a say Gawa 15:28, 29 et sakey a balikas na ayadyarin ganggan na Dios nipaakar ed dala. Ipaamta na sayan dokumento so determinasyon yon mangitandoro ed satan a ganggan tan isalitaan to kayo met sano agkayo makapansalita. (Ikompara so Uliran 22:3.) Kayari na sayan miting, naikdan iray bautismadon Tastasi na balon card, tan saraman so walaan na agbautismadon menor de edad ya ananak so makaawat na Identity Card parad balang ugaw. Agsulatan natan irayan card. Nepeg a sulatan iratan a maalwar diad abung balet ALIWAN pirmado. Say panpirma, pakatasi, tan panpetsa ed amin a card so gawaen ed ontumbok a Panagaral na Libro ed Kongregasyon, diad panangasikaso na konduktor na panagaral na libro. Sakbay a pirmaan, seguroen a saray card so kompleton asulatan. Saraman so manpirma bilang tastasi so nepeg ya aktual a makanengneng ed panpirma na makan-card ed dokumento. Diad pangitukoy ed sayan card unong ed dili ran sirkumstansia tan kombiksion, nayarin mangisulat iray agbautismadon manangipalapag na dili ran directive ya usaren da tan ed ananak da.
Kanta 155 tan pansaran pikakasi.
Simba na Enero 17
Kanta 12
10 min: Lokal iran pakabat. Report na kuenta.
15 min: Lokal iran pankaukolan.
20 min: “Usaren Iray Tract a Pangigapoy Tongtongan.” Repasoen so dinanman ya apatiran tract a maslak ya uusaren ed teritorya. Mamalesa na tepet a naebatan ed balang sakey a tract. Imbitaan so dumerengel a mangisuheri no panon a nausar so tepet pian igapoy tongtongan tan nayarin mansumpal ed panagaral na Biblia. Idemostra no panon iyan nagawaan ed duara ed saray tract.
Kanta 57 tan pansaran pikakasi.
Simba na Enero 24
Kanta 110
10 min: Lokal iran pakabat tan saray eksperiensia ed lawak na kimeyan.
15 min: “Konsideraen so Salita nen Jehova ya Agew-agew!” Paliwawa tan singbaten ed dumerengel. Pasesegen so amin ya usaren a maabig so Usisaen so Kasulatan ya Inagew-agew—2000. Ilaktip iray komento manlapud paunan salita, pahina 3-4. Paisalaysay ed saray manangipalapag no panon a matoor dan panggugunaetan so pangonsidera ed teksto kada agew.
20 min: “Say Mabunlok a Suporta Tayo ed Kimey na Panarian.” Tepet tan ebat ya idauloan na matatken. (Tulongan iray agagin mangapresia ed say pribilihyo tan responsabilidad a mangiter na pinansyal a suporta ed say kimey.)
Kanta 157 tan pansaran pikakasi.
Simba na Enero 31
Kanta 16
10 min: Lokal iran pakabat. Panonotan so amin ya iter day report ed lawak na kimeyan parad Enero. Saglawien so opresin literatura parad Pebrero: Libron Liket ed Pamilya. Idemostra no panon a nausar iray taloran tepet ed kahon diad pahina 12 na libro bilang basiyan na pitongtong ed sakey a too.
10 min: Say Ebat ed Tepet Nipaakar ed ‘Panagmarka.’ Paliwawa na matatken, a nibase’d Hulyo 15, 1999, a Panag-Bantayan, pahina 29-31.
25 min: “Panangusar ed Internet—Manalwar ed Saray Kapeligroan!” Tepet tan ebat a diskusyon ed parapo 1-18. Basaen so parapo 4-7, 12, 16, 17. Pasesegen so amin a manparaan a maong ed ontumbok a simba a paningbat ed parapo 19-36.
Kanta 60 tan pansaran pikakasi.
Simba na Pebrero 7
Kanta 113
5 min: Lokal iran pakabat.
15 min: Repasoen so Libron Daniel’s Prophecy. Imanoen so Propesiya nen Daniel! Paliwawa tan singbaten ed dumerengel. Repasoen iray pabitar ed balon libro: makapasagyat iran paulo na kapitulo, mabilabilay iran ilustrasyon, saray kahon a walaan na manangusisa iran tepet diad sampot na kada diskusyon, saray mapa tan tsart a mamalinew ed saray detalyi. Konsideraen so makapaseseg ya eksplinasyon ed no panon so “italindeg” nen Miguel ed nikaduman dalan (Pahina 288-90). Singbaten so kaimportantian na panagsungdo tayo bilang managbangat na Salitay Dios (Pahina 311-12). Kaukolan a basaen tayon amin a maalwar so libro tan pasesegen iray interesado ya ontan met so gawaen da.
25 min: “Panangusar ed Internet—Manalwar ed Saray Kapeligroan!” Tepet tan ebat a paningbat ed parapo 19-36. Basaen so parapo 23-5 tan 34-6.
Kanta 182 tan pansaran pikakasi.