Repaso ed Teokratikon Eskuelaan Parad Panagministro
Kaput-libron repaso ed materyal a kinobrian ed saray asainmin ed Teokratikon Eskuelaan parad Panagministro a para ed saray simba na Enero 3 ya anggad Abril 17, 2000. Usaren so akabiig a peligo na papel a pangisulatan ed saray ebat ed anggan panon a karakel na tepet a nayarian yo diad nigeter a panaon.
Imanoen: Legan na insulat a repaso, say Biblia lambengat so nayarin usaren diad pangebat ed anggan anton tepet. Saray reperensya ya ontumbok ed saray tepet so para ed personal a pansukimat yo. Saray pahina tan numero na parapo so nayarin ag-ompatnag ed amin a reperensya ed Say Panag-Bantayan.
Ebatan so kada onggendan iran balikas na Tua o Tila:
1. No maminsan et nepeg itayon manalagar pian naawat iray bendision nen Jehova, lapud amta nen Jehova iray kipapasen tayo tan mangitatarya ed kada nakaukolan sano pankaabigan tayon tuloy itan. (Sal. 145:16; Sant. 1:17) [w98-PN 1/1 p. 23 par. 6]
2. Say kiwawala lambengat na kaban na sipan so ag-angarantiya na intalona na saray Israelita. Nandependi so panamendision nen Jehova unong ed espiritual a kipapasen tan matoor a katutulok na saramay angipiyaan ed kaban. (Jos., kap. 7) [Sinimban babasaen ed Biblia; nengnengen so it-1 p. 167 par. 2.]
3. Natan et natatagano itayo ed espiritual diad basta labat la pambasa ed saray balikas nen Jehova. (Deut. 8:3) [Sinimban babasaen ed Biblia; nengnengen so w85 6/15 p. 17 par. 15, 17.]
4. Impaimano na prinsipyon nipabitar ed Mosaikon Ganggan diad Deuteronomio 23:20 ya agmaaro ed biang na sakey a Kristiano so panpaabang sano mamaotang na kuarta. [Sinimban babasaen ed Biblia; nengnengen so it-1 p. 1212 par. 5-6; it-2 p. 259 par. 11; w86 10/15 p. 12 par. 9.]
5. Say marakep a report nen Josue tan Caleb so nibase ed malet a panisia ra diad biskeg tan determinasyon na saray Israelita a natalonaan iray babeng a makasbel ed pangubkob da ed Insipan a Dalin. (Num. 13:30) [w98-PN 2/1 p. 5 par. 4]
6. Diad impanukoy ed ‘langkap’ diad 1 Timoteo, papanonotan nen Pablo si Timoteo ed inkalanaan to na masanton espiritu tan say mangatatawen a tumang a manatalaran ed sikato. (1 Tim. 4:14) [w98-PN 2/15 p. 25 par. 1]
7. Ag-iiter na libro na Josue so antokaman ya importantin siglaotan ed say rekord a mansumpal ed kiwala na Bini na Panarian. [si p. 46 par. 24]
8. Say libro na Uko-ukom so sakey a rekord na lalaki a pinili tan tinuro na Israel pian manuley ed nasyon sakbay na panaon na saray arari. [si p. 46 par. 2]
9. Say kerew nen Gideon, a singa adeskribe diad Uko-ukom 6:37-39, so mangipanengneng a sikatoy alabas a maalwar tan mainap. [Sinimban babasaen ed Biblia; nengnengen so w88 4/1 p. 30 par. 6.]
10. Diad impamilin ed saray babangatan ton ‘aglakapen ya ibano so siopaman ed dalan,’ indanet nen Jesus so inkaganatan na panagpulong a kimey tan say pankaukolan na sigpot a pangimano ed sayan sankaimportantian ya asainmin. (Luc. 10:4) [w98-PN 3/1 p. 30 par. 5]
Ebatan so onggendan iran tepet:
11. Akin ya importantin nitatak iray salita nen Jehova ed kapusoan na atateng? (Deut. 6:5, 6) [Sinimban babasaen ed Biblia; nengnengen so w98 6/1 p. 20 par. 4.]
12. Panon a niyaplika na ulo na pamilya so prinsipyon nipaimano ed Deuteronomio 11:18, 19? [Sinimban babasaen ed Biblia; nengnengen so fy-PN p. 70 par. 14.]
13. Antoy Makasulatan a pakanengnengan a say tinmaynan ya aripen ya Onesimo so mapatnag a medyo abaybayag lan akaiba nen apostol Pablo sakbay a nansulat si Pablo ed si Filemon? [w98-PN 1/15 p. 30 par. 2]
14. Sano nanenengneng tayo odino nasasagmak tayon dili iray ag-inkahustisya, antoy nagawaan tayo pian agnabayuboay kaandiay ilalo odino pesimistikon awawey? [w98-PN 2/1 p. 6 par. 2-3]
15. Panon ya impanengneng di Josue tan Gideon so pirmin panangigalang ed ganggan na Dios? (Deut. 20:8, 15-18) [si p. 41 par. 32]
16. Panon a sarayan ebento ya adeskribe ed Josue 10:10-14 so mipara ed say nailaloan diad Armagedon? [Sinimban babasaen ed Biblia; nengnengen so w86 12/15 p. 23 par. 12—p. 24 par. 14.]
17. Mamitla na taloran gungguna na masimoon a panangidaydayew lapud maabig a kondukta. (Ikompara so Uliran 15:23.) [w98-PN 2/1 p. 31 par. 5-6]
18. Bilang pitunosan ed Josue 20:4, panon ya ombatik so sakey ed antitipikon syudad na salimbengan? [Sinimban babasaen ed Biblia; nengnengen so w86 12/15 p. 24 par. 16.]
19. Panoy pangipatnag na Uko-ukom 5:31 a say impanalo nen Ukom a Barak sumpad say mabiskeg iran puersa nen Sisera diad lawak na Kison et walaay makatantandan kabaliksan parad agew tayo? [Sinimban babasaen ed Biblia; nengnengen so w86 2/15 p. 21 par. 4.]
20. Panon tayon nipanengneng so respeto ed walan prinsipyo ed balikas a “tinmalindeg ira a balang laki dia ed pasen to,” a singa nirekord diad Uko-ukom 7:21? [Sinimban babasaen ed Biblia; nengnengen so w82 6/1 p. 25 par. 17.]
Iter so salita o balikas a nakaukolan pian nakompleto so kada onggendan iran balikas:
21. Pian naeksperiensian nagkalalo so panamendision nen Jehova, nepeg tayon itultuloy ya ․․․․․․․․ tan patulongan ed si Jehova a ․․․․․․․․ so bangabangat ed apuyanan a Salita to. (1 Tim. 4:8, 9) [w98-PN 1/1 p. 24 par. 6]
22. Ontanlan kainglit nen Jehova so panaglarog lapud papakiwasen itan na ․․․․․․․․, aliwa itan a ․․․․․․․․ nisay ․․․․․․․․, tan nagkalalo’d amin, ․․․․․․․․ itan. [w98-PN 2/1 p. 30 par. 2-3]
23. Say ngaran a Josue et mankabaliksay ․․․․․․․․ tan sikatoy mapropetikon angiyanino ed ․․․․․․․․. [si p. 42 par. 5]
24. Bilang pitunosan ed ilustrasyon nen Jesus diad Mateo 7:24-27, natulongan na makabat ya atateng so ananak da ya onarap ed singa bagyon pakadesdesan diad pangiter ed sikara na ․․․․․․․․ ya ontulong ed sikaran makapansiansian ․․․․․․․․. [w98-PN 2/15 p. 9 par. 1]
25. Sakupen na maawaran a rekord na libro na Uko-ukom so inkalapagan a panat na panaon manlapud impatey nen ․․․․․․․․ ya anggad panaon nen ․․․․․․․․, a saknapen toy ngalngali ․․․․․․․․ a taon. [si p. 47 par. 5]
Pilien so dugan ebat ed kada onggendan iran balikas:
26. Say panggawa na saray testamento parad pangiyalis ed kayarian na sakey no bilang ta ompatey et (pamaakaran na kongregasyon; personal a pamaakaran; kakaukolanen ed saray tuan Kristiano). (Gal. 6:5) [w98-PN 1/15 p. 19 par. 6]
27. Pinaseseg nen Pablo a mapangasin awaten nen Filemon si (Onam; Onesiforo; Onesimo) balet agto inusar so inka-apostol to pian iganggan ton gawaen so ontan odino ibulos so aripen to. (Filem. 21) [w98-PN 1/15 p. 31 par. 1]
28. Say seryoson nankulangan a nipabitar diad salaysay nipaakar ed saray akating a pinaabig nen Jesus et say (kakulangan na pananisia; katutunganga; andiay otang a linawa). (Luc. 17:11-19) [w98-PN 2/15 p. 5 par. 1]
29. Lapud inabobonan na Dios so kurang nen Rahab, ipatnag na saray balikas to ed lalaki diad Jerico a manguusil ed saray espiyan Israelita a (balanglan say pantila et personal a desisyon; ag-obligado so sakey a mangibaga na matuan impormasyon ed saramay agmanepeg ed satan; agto ni nauman so amin a minumundon dalan to). (Jos. 2:3-5; ikompara so Roma 14:4.) [Sinimban babasaen ed Biblia; nengnengen so w93 12/15 p. 25 par. 1.]
30. Singa nirekord ed Juan 13:5, say bengatlan naaralan ya impabitar nen Jesus et say kualidad na (panangasi; empatya; inkamapaabeba), a pagmaliwen ton onkiling so sakey a manggawa ed sankaabebaan iran kimey diad biang na arum. [w98-PN 3/15 p. 7 par. 6]
Ipetek so onggendan iran teksto ed saray balikas a nilista ed leksab:
Deut. 7:3, 4; 17:7; 25:11, 12; 28:3; Jer. 15:20
31. Say atagey a panangikuenta na Manamalsa ed saray organon panilalak so nepeg a mangimpluensia ed desisyon na Kristiano nipaakar ed matukoy a paraan na family planning. [Sinimban babasaen ed Biblia; nengnengen so w99-PN 6/15 p. 28 par. 1-4.]
32. Makapankompiyansa itayo ed suporta nen Jehova leleg a susumpalen tayo so angigangganan ed sikatayo ya ipulong so maong a balita na Panarian na Dios. [w98-PN 3/1 p. 28 par. 1]
33. Say itulok ed pasakbay na Biblia so mangilegyas ed sikatayo ed makapaot-ot iran pansumpalan a mabetbet a resulta sano mipako so sakey a Kristiano ed agmananisia. [Sinimban babasaen ed Biblia; nengnengen so w89 11/1 p. 20 par. 11.]
34. Say panggayaga ed saray bendision na Dios so agmandependi ed no iner so panaayaman odino panlilingkoran tayo odino ed antokamay nipabtang ed sikatayo diad panaglingkor ed Dios. [Sinimban babasaen ed Biblia; nengnengen so w96-PN 6/15 p. 15 par. 15.]
35. Bilang autoridad ed saray instruksion to ed 1 Corinto kapitulo 5 nipaakar ed panagdispelosip, inaon nen Pablo so Ganggan nen Jehova. [Sinimban babasaen ed Biblia; nengnengen so si p. 213 par. 24.]