Abril—Panaon Pian Magmaliw a Maseseg Parad Maabig Iran Gawa!
1 Diad panasingger na bagyo ed matoon lugar, kaukolan a maganat a napasakbayan iray totoo ed asingger lan kapeligroan. Diad lalon panasingger na bagyo, nepeg a lalon mapuersa so pasakbay. Akin? Lapud delikado iray bilay! Nayarin agnadngel na pigaran totoo so inmuna iran pasakbay. Nayarin nadngel na arum balet ta ag-ira kinmiwas. Tua met itan ed say madibinon pasakbay a niganggan ed sikatayon ipaknol sakbay a “say aloboob” na matunong a sanok na Dios so ombasig ed amin a pakasuysoyan na sayan marelmeng a mundo. (Uli. 10:25) Walad kaatapan so magnayon a bilay na binilyon a totoo! Nepeg ya ipaknol so pasakbay. Nepeg a sikatayo so “maseseg parad maabig iran gawa.”—Tito 2:11-14, NW.
2 Diad inlabas na saray dekada, napapakiwas iray totoo nen Jehova pian gawaen a say tiempo na Memoryal so sakey a panaon parad nikabiig a seseg diad ministeryo. Nen tiagew na 1939, oniay impaseseg na Informant, say akadkauna ed Ministeryo Tayo ed Panarian: “Diad isabi na tiagew, tan maabig a panaon, nailaloan tayo a nadobli na saray manangipalapag [ed kongregasyon] so oras da ed lawak, tan makatantanda so idaak na oras na saray payunir. Limaran-Simba so bulan na Abril. Walaan met na limaran Sabado. Pagmaliwen so kada Sabado tan Simba legan na Abril . . . a panaon na nikabiig a panagpulong.” Satan so makapaangat a kalat parad saray agagi ed apalabas a 60 taon! Diad sayan taon, a singa nen 1939, say bulan na Abril so walaan na limaran sampot-simba. Antoray plano yo ed sayan bulan? Antoray inlista yo ed kalendaryo yo parad Abril 2000? Iplano so makabaliksan a pibiang ed maabig iran gawa a kaibay arum a totoo nen Jehova legan na sayan espisyal a bulan na apapeles a kimey ed espiritual.
3 No Antoy Ilaloan Tayon Nasumpal: Say sankaimportantian ya agew ed taon 2000 et ombana ed sayan bulan. Satan so Abril 19, say anibersaryo na impatey nen Jesus. Pankulian tayon imbitaan so dakel a totoo no nayadyari ed Memoryal. Singa nisuheri ed imbeneg a bulan, ilista so amin a posiblin onatendi ed Memoryal tan asikasoen ya anggapoy naliwatan. Ilaktip ed saramay naimbitaan so siopaman ya inaktibo iran manangipalapag, saray iyaaralan na Biblia, papawilen, saramay dati lan inyaralan, katrabahoan, kaeskuelaan, kakaabay, kakanayon, tan arum a kabkabat. Kasin saramay malabay ya onatendi et walaay luluganan? No anggapo, kasin simamaaro kayon ontulong? No labi na Memoryal, pribilihyo tayon amin ya ipalikna ed saramay onatendi a sikaray naabrasa. Kayari na Memoryal, nituloy tayo ni kaaruman ya espiritual a tulong ed saratan ya interesado.
4 Say pagmaliw a “maseseg parad maabig iran gawa” legan na pigaran agew sakbay tan kayari na Memoryal et sakey a paraan pian ipanengneng ed si Jehova a talagan papablien tayo so amin a ginawa to parad sikatayo. Lapud andukey so oras ed agew tan mas maabig a panaon ed kaslakan a lugar, dakel ed sikatayo so makapadaak na saray sagpot tayo diad panag-ebanghelyon kimey. No man-auxiliary payunir kayo, labay yon gawaen so anggaay nayarian yo diad pangusar na 50 oras odino onsulok ni ed ministeryo. (Mat. 5:37) Tumboken a maapit so ginawa yon eskedyul diad kagapo na bulan. (Ecl. 3:1; 1 Cor. 14:40) Gawaen tayo komon ya amin so anggaay nayarian tayon inatnat so pitutulongan ed amin a payunir, diad pamaseseg ed sikara tan diad pikimeyan ed sikara ed lawak. (Ikompara so 2 Arari 10:15, 16.) No maseseg itayon mantanem legan na Abril, nailaloan tayo so baleg a gayaga tan panamendision nen Jehova. (Mal. 3:10) Nayarin saya so onkanan balitang ed pantultuloy ya auxiliary payunir odino ed panregular payunir. Komon ta say iyaaligwas tayo ed espiritual no Abril so ninatnat ed saray ontumbok niran bulan leleg ya itultuloy tayoy pagmaliw a regular a manangipalapag na Panarian.
5 Andi-duaruwa, nilibo ed totoo nen Jehova ed sayan bulan so makapangigapo na dakel a panangiyaral na Biblia. Kasin labay yoy mangigapo na sakey a panangiyaral? Espisipikon ipikasi so panagaral, tan onkiwas a mitunosan ed saray pikakasi yo. Makaseguro kayo a pablien nen Jehova iray mapaabeban kerew yo parad tulong pian makalmoy matuan-impanpuson totoo a bangatan.—1 Juan 3:22.
6 Nia so asubok la ed lawak a matalonan nausar pian igapoy tongtongan. Igapo yo diad panepet: “Isipen yo kasin amin a karawalan a nagagawa ed pampubliko iran eskuelaan et resulta na gawa na demonyo, odino satan so lapud kakulangay panangipasal na ateng?” Abuloyan ya onebat. No ibaga na too a “gawa na demonyo,” basaen so Apocalipsis 12:9, 12, tan ipabitar so betang nen Diablo diad pangiyaalibansa na kaguloan ed mundo. Insan ibukay ed brosyur a Kakaukolanen diad leksion 4, tan tepeten ed too no kasin nononoten to no iner so nanlapuan na Diablo. Basaen tan singbaten so unonan duaran parapo. No inkuan na too a “kakulangay panangipasal na ateng” so resulta na karawalan diad saray eskuelaan, basaey 2 Timoteo 3:1-3 tan ipabitar iray ugali a mapatnag a sengegay iloloor na sayan problema. Insan ibukay ed brosyur a Kakaukolanen diad leksion 8, basaen so parapo 5, insan ituloy so tongtongan. No akipakna kayon ompawil, nilukas yo lay dalan parad regular a panangiyaral na Biblia ed saman a too. Diad ontumbok ya ibisita, tepeten ed sikato no walay kabat to nin interesadon ondengel ed naaralan to.
7 Say sananey nin dalan pian magmaliw a “maseseg parad maabig iran gawa” legan na Abril et say pibiang ed nanduruman paraan na panagpulong. Kasin ninonot yo la so pampulong ed parki odino ed paradaan? Diad tundaan na bus odino ed istasyon na tren? Odino labay yon salien so manpulong diad panamegley na telepono, diad karsada, odino diad pasen na negosyo? Akin ya aggawaen iratan a nononoten ed sayan bulan? Ontulong si Jehova ed sikayo pian makapanpakpel. (Gawa 4:31; 1 Tes. 2:2b) Nayarin mipakna kayon mikimey ed sakey a payunir odino manangipalapag ya eksperiensiado diad sarayan aspekto na ministeryo.
8 Siopaman a mapilalek ed pamadaak na pibibiang to ed panagpulong so mankaliktan a mibiang ed impormal a panagtasi. Mabetbet et kaukolan so makaaron pitongtong ed too. Mamalesa lambengat na tema a kaslakan a paninteresan, a nayarin usaren so iyaasingger a nipabitar ed tagey diad parapo 6. Panggunaetay maabig a pakapangusar na anggan daiset a kabiangan na panaon a nadarak labat. Agtayo ibabaliwala iray tinggal, dies, odino binting lapud aliwa iratan a piso. Akin ya ag-usaren a makagungguna so anggan limaran minuto, samploran minuto, odino duamplo tan lima a minuto ed impormal a panagtasi?
9 Panaon Parad Panmolimoli: Nodnonoten iray nidanet a punto ed drama diad agano nin “Mapropetikon Salita na Dios” a Distrito Kombension. Say drama ya atemaan na Panamabli’d Espiritual a Tawir Tayo, so nanggawa’d sikatayon nonoten a maong so nipaakar ed pandumaan di Jacob tan Esau. Inkuan nen Esau a singa si Jacob et sikatoy interesado ed espiritual iran bengatla, balet ag-itan nipatnag ed saray gawa nen Esau. (Gen. 25:29-34) Agaylan mabiskeg a panamasakbay parad sikatayo! Singa si Jacob, akaparaan itayo komon a mipuligesgesan, a mibalsakan ni ingen, parad panamendision nen Jehova. (Gen. 32:24-29) Akin ya ag-usaren so Abril tan amin a manumtumbok iran bulan pian pasimbaloen so seseg tayo, ya agleglemewen so alay abig ya espiritual a tawir tayo?
10 “Say baleg ya agew nen Jehova asingger, sikato so asingger tan masiglat a maomaong.” (Sof. 1:14) Nepeg ya iyabawag so maong a balita na Panarian. Walad kapeligroan iray bilay! Komon ta sayan bulan so napaneknekan a nagkalalo lan kabendisionan parad amin a totoo nen Jehova leleg a mankakasakey tayon ipanengneng a sikatayoy “maseseg parad maabig iran gawa.”
[Kahon ed pahina 4]
Saray Panonot ed Memoryal
Say panngilin ed Memoryal ed sayan taon so ombana ed Mierkoles, Abril 19. Nepeg ya imanoen na mamatatken iray onggendan a pamaakaran:
◼ Diad pangigapoy oras na paliwawa, seguroen a saray emblema et agni nipasa anggad agni akaselek so agew.
◼ Amin, anggan say espiker, so nepeg a napakabatan ed eksakton oras tan lugar na selebrasyon.
◼ Say dugan klase na tinapay tan alak so nepeg a naala tan niparaan.—Nengnengen so Pebrero, 1985, Watchtower, pahina 19.
◼ Nepeg a masakbay lan awiten ed hall iray plato, kopa, tan matukoy a lamisaan tan mantilis.
◼ Say Kingdom Hall tan arum niran lugar na miting so nepeg a masakbay lan linisan a maong.
◼ Kaukolan a masakbay lan pilien tan ibangat iray attendant tan managserbi nipaakar ed suston kikurang tan saray gawaen da.
◼ Nepeg a gawaen so uksoyan pian naserbian so siopaman ya alanaan a mansasakit ya agmakaatendi.
◼ Sano pigaran kongregasyon so niyeskedyul a mangusar ed parehon Kingdom Hall, kaukolan a walay maabig a piuksoyan na saray kongregasyon ta pian napaliisan so panseseksekan ed lobby odino lolooban, diad dadalanan, tan paradaan.