Usar Yo ed Epektibon Paraan so Panaon Yo ed Ministeryo
1 Talagan baleg ni gagawaen ed ministeryo tayo, tan daiset lay nakekeran panaon. (Juan 4:35; 1 Cor. 7:29) No organisado itayo tan masakbay lan manplaplano, nausar tayo ed epektibon paraan so inggana tayon panaon parad ministeryo.
2 Manparaan: Antis ya onla ed pantitipon parad lawak na serbisyo, seguroen a walay awit yon literatura a nakaukolan yo tan akaparaan lay presentasyon yo. Kayari na pikakasi, ondiretso lan tampol ed pampulongan pian dakel so nagawaan yo tan saramay kaiba yo ed ingganan panaon a pampulong.
3 Onggapon tampol no apabtangan kayon mangikondukta na pantitipon parad lawak na serbisyo. Pansiansiaen ya antikey so pantitipon—agla onlampas ed 10 anggad 15 minuto. Tan seguroen met ed satan ya amta la na balang sakey so kaiba to tan say pankimeyan da.
4 Legan a Walad Ministeryo: Sano asumpal la so pantitipon parad lawak na serbisyo, onla lan tampol ed teritorya. No bilang ta iilaloan yo lan agyo napasumpal so teritorya, iyareglo yo lay transportasyon yo pian nituloy ni na arum. No walaray kagrupo yon manaalagar legan yon mitotongtong ed unabung, ikonsidera ira. Nayarin mataktika kayo lan manpatanir ed too no say labay to labat et misuppiatan, odino no interesado et iyuksoy yo lay ompawil.—Mat. 10:11.
5 Sano manggawa kayo na panagpawil, danayen iray nanaasinggeran antis ya onla ed sananey. Nayarin tawagan ni so too pian naseguro a walad abung. (Uli. 21:5) No nalikas yon ondukey so tongtongan yo, nayarin manpulong ni iray kagrupo yo ed asingger odino manggawa nira na panagpawil.
6 Manbibilay itayo ed panaon na baleg ya espiritual a panagani. (Mat. 9:37, 38) Magano lan manampot so kimey. Kanian, say pilalek tayo et say pangusar ed panaon ed epektibon paraan legan a manpupulong.