Espisyal a Panangibunog na Imbitasyon Parad Memoryal!
1. Anto so pibiangan na saray manangipalapag na Panarian ed sankamundoan onggapo’d Marso 21, 2009, tan akin?
1 Diad Huebes, Abril 9, 2009, saray managdayew nen Jehova a Dios ed sankamundoan et mandaragup pian nodnonoten so sankatalonggaringan ya impangipatnag to na panangaro ed katooan. (Roma 5:6-8) Malikeliket tayon iilaloan a minilyon ya interesadon totoo so nakaiba tayo ed panselebra ed impatey nen Jesus. Onggapo’d Marso 21, walay ibunog tayon espisyal ya imbitasyon parad Memoryal diad sankamundoan.
2. Antoray nepeg yon tandaan sano mangibubunog na imbitasyon?
2 Saray Nepeg a Tandaan: Usaren ed epektibon paraan iray litrato, tepetepet, tan nisitas a teksto ed imbitasyon. Alimbawa, sarag yon ipanengneng so litraton walad arap tan ikuan: “Labay ta kan imbitaan pian nakaiba mi ed panselebray impatey nen Jesus, a nagawa no Huebes, Abril 9, 2009.” Insan yo ipaimano so paulo na imbitasyon tan saray tepet a walad leksab to. Agyo lilingwanan ya ipurek ed unabung a sarag ton ipila ed Memoryal so pamilya to tan arum ni ran kabat to.
3. Anto ni nepeg yon gawaen kayari yon niiter iray imbitasyon?
3 No baleg so teritorya na kongregasyon yo, nayarin ikdan kayoy instruksion na saray mamatatken a sarag yo lan itilak so imbitasyon ed kaabungan ya anggapoy asabin too. Diad saray sampot-simba, iyopresi iray magasin katekep na imbitasyon. Seguroen a naikdan yoy imbitasyon iray papawilen yo, iyaaralan na Biblia, kakanayon, kaklase, katrabaho, kakaabay, tan arum niran kabat yo. Nen katantaon, sakey ya agin bii so angimbitay 30 a kakanayon to, tan kayari to et pana-panaon to ran papanonotan ed kaimportantian na Memoryal. Sikatoy malikeliket ta inmatendi so 25 ed sarayan kakanayon to, tan diad saginonor et 4 so angawat na panagaral na Biblia!
4. Antoran plano so nepeg tayon gawaen la natan, tan akin?
4 Manplano La Natan: Ompan sarag a palaknaben na dakel a manangipalapag so ministeryo ra legan na Marso tan Abril. No walay anak yo odino iyaaralan yoy Biblia ya onaaligwas la, ompan saya lay pankanawnawa ran magmaliw ya agbautismadon manangipalapag. Igapo yo la natan so pamplano pian sigpot kayon makapibiang ed sayan kampanyan mangipapakabat ed selebrasyon na pannodnonot ed duaran sankatalonggaringan a panangipatnag na aro.—Juan 3:16; 15:13.