Salogen so Bukel Pian Ontubo
1. Antoy kaukolan ya salogen pian ontubo?
1 Saray intanem ya bukel et kaukolan ya salogen pian ontubo. Mipara ed satan so bukel na katuaan ya nitanem ed kapusoan na saray totoo ed teritorya tayo. (1 Cor. 3:6) Kaukolan tayon pawilen tan salogen iratan ya piguratibon bukel panamegley na Salitay Dios pian saratan et onlamot, ontubo, tan ombuna.
2. Antoy gawaen mo pian pitalaran na unabung so ipawil mo?
2 Mamalesay Tepet: No mangipaparaan kay presentasyon, agta maabig no mannonot kay makapainteres a tepet ya ebatan mo diad ipawil mo? Itepet mo itan diad pansampot na pitongtong mo, tan mangiyeskedyul na espisipikon agew tan oras na ipawil mo. Dakel lay akasali ya epektibo so pamili na sakey ya tema ed libron Ibabangat na Biblia pian nidemostray panangiyaral na Biblia ed ipawil da.
3. Antoran impormasyon so nayarin ilista?
3 Manlista: Tampol kayari impitongtong mo, ipanaon so panlista. Isulat so ngaran tan address na unabung. Maabig met no isulat mo so agew tan oras na impantongtong yo, antoy nantongtongan yo, tan no anton literatura so intilak mo, no wala. Kasin imbaga to ya wala lay relihyon to? Kasin wala lay pamilya to? Antoray asalambit ton paninteresan tan pampapagaan to? Makatulong iratan ya impormasyon diad panpreparam ed onsublay ya pantongtong yo. Isulat mo met no kapigan so nampaknaan yon ipawil mo tan say tepet ya ebatan mo.
4. Akin et kaukolan tayoy man-anos diad pamawil ed saray interesado?
4 Man-anos: Ag-ontunda si Satanas ed panggugunaet ton ‘ekalen so salita’ a nitanem ed puso na sakey. (Mar. 4:14, 15) Kanian agka onsusuko no agmo nasasabid abung to imay interesado. Nayari kasin sulatan mo odino mangitilak kay note ed puerta? Nigapo na sakey a payunir so panangiyaral na Biblia diad puertay abung na sakey ya bii balet ta agto la nasasabi, kanian angitilak na sulat. Sanen akapantongtong lamet ira, imbalikas na unabung ya atenyeg so liknaan to ed personal ya interes ya impanengneng na sister. Diad pansasalog tayod saray bukel na katuaan, nalikna tayoy liket diad pakaimaton ed itubo, ibaleg, tan ‘pambunga ray tunggal talomplo, anemaplo, tan sanlasus.’—Mar. 4:20.