Limaran Paraan Pian Makalmoy Iyaralan na Biblia
1. No mairap so makalmoy iyaralan na Biblia ed teritorya tayo, antoy nepeg tayon gawaen, tan akin?
1 Kasin naiirapan kan makalmoy iyaralan moy Biblia? Manseet ka labat. Bebendisyonan nen Jehova iramay ag-ontutundan manggaway linawa to. (Gal. 6:9) Walay limaran suhestion dia ya makatulong ed sika.
2. Panon tayon makapangigapoy panangiyaral diad direktan pangiyopresi?
2 Direktan Iyopresi: Amta na dakel a totoo ya mangiyoopresi tayoy Panag-bantayan tan Awake!, balet ompan agda amta ya mangiyoopresi tayoy panangiyaral na Biblia. Akin ta no salien ya direktan iyopresi itan no manpupulong ed kaabungan? Nayari met ya tepetan iray interesadon papawilen mo no labay day manaral na Biblia. No agda labay, ituloy mo labat so pangiter na literatura tan pansiansiaey interes da. Walay brother ya pigay taon lan ombibisitad sakey ya sanasawa ya regular ton iikday magasin. Kayari ton inter ed sikara so sankabaloan iran magasin, paalis la komon balet bigla ton intepet: “Labay yoy manaral na Biblia?” Agto ilaloan ya say iyebat da et, on. Natan et abautismoan la ra.
3. Kasin nepeg tayon isipen ya saray miaaral et wala lay mangiyaaral na Biblia ed sikara? Ipaliwawa.
3 Diad Saray Miaaral: Ag-iisipen ya saray interesadon nanenengneng mon miaaral et iyaaralan lay Biblia. Oniay inkuan na sakey a brother: “Masulok ya kapalduad saray inyaralan ko et nigapo lapud impitongtong kod saray miaaral.” Inasinggeran na sakey a sister so sakey ya mabaing a bii ya saray bautismadon anak ton bibii et walad satan a kongregasyon. Manga 15 taon lan miaaral so bii, tan naynay ya onsasabid Kingdom Hall no onggapo lay aral tan onalis ya tampol kayari to. Inawat na bii so panangiyaral tan sinmabi panaon et nagmaliw ya Tasi. Insulat na samay sister: “Sayang labat ta nanalagar ak ni 15 taon antis kon tinepet no labay toy manaral!”
4. Panon tayon makalmoy iyaralan diad pantepet ed arum?
4 Mantepet ed Arum: Walay sakey ya sister ya makulin mangiba ed arum ya mangiyaral na Biblia. Ipatanir tod mangiyaaral, insan kayari dan manaral et tepetan toy iyaaralan no walay kabat ton labay to met so manaral na Biblia. No iyoopresim so libron Ibabangat na Biblia ed sakey ya abayag mo lan bibisitaen, nayarin itepet mo: “Walay kabat mon labay to met so nawalaan na onia?” No maminsan, lapud kipapasen et agnaiyaralan na saray manangipalapag tan payunir so sakey ya akatongtong dad teritorya. Kanian ipaamtam ed arum ya akaparaan kan mangiyaral na Biblia.
5. Akin a maabig no tepetan tayo ray aliwan Tasin asawa na agagid kongregasyon no labay day paiyaralan?
5 Diad Saray Aliwan Tasin Asawa na Agagi: Kasin wala ray manangipalapag ed kongregasyon yo ya aliwan Tasi asawa ra? Wala ray aliwan Tasin asawa na agagi ya agda labay ya pantongtongan dan sanasawa so Biblia, balet ta awaten day panangiyaral no say mangiyopresi et agda kanayon. Mas maabig no katongtongen nin unona so Tasin asawa pian naamtaan no antoy marakep ya gawaen.
6. Panon a makatulong so pampikasi no manaanap na iyaralan?
6 Manpikasi: Agmemelmelagen so pakayari na pikakasi. (Sant. 5:16) Insipan nen Jehova ya dengelen to ray pikakasi tayo no saratan et unong ed linawa to. (1 Juan 5:14) Walay sakey ya brother ya masyadon busy so eskedyul to balet impikasi ton nawalaan komon na iyaralan na Biblia. Nannonot so asawa to no kasin wala ni panaon na brother ya mangasikasoy sakey ya iyaaralan, lalo la no dakel so problema na satan a too. Kanian imbalikas na sister ed si Jehova iratan ya pampapagaan to nen nampikasi ya nawalaan komon na iyaaralan so asawa to. Kayari na manga duay simba, naebatan iray pikakasi da nen walay nalmo na kakongregasyon dan payunir ya labay toy manaral tan impasa to itan ed samay brother. Oniay insulat na samay sister: “Diad saramay maniisip ya ompan agda sarag so mangiyaral na Biblia, say nibagak: Gawa yon espisipiko iray pikakasi yo, tan ag-ontutundan ipikasi itan. Talagan malikeliket kami.” No manseet kayo, makalmo kayo met na iyaralan yoy Biblia tan naeksperiensya yo so liket ed itulong ed sakey ya mamaarap ed “dalan ya ompugta ed bilay.”—Mat. 7:13, 14.